Read Pahari, Mahasu मरकुस 13 Bible Online

मरकुस 13 - Pahari, Mahasu bible

मरकुस 13

¹ज़ेबी यीशु परमेश्‍वरा रै घौरा कु बाइरै निकुल़दै थौ लागौ औन्दौ, तैबै एकी च़ेलै यीशु लै बोलौ, “गुरुजी, देखौ एऊ घौर केती बौड़िया सा। केती आच़्छ़ै और बौड़ै-बौड़ै पात्थर ई इदै लागै औन्दै।”

²तैबै यीशुऐ तेसलै बोलौ, “ज़ो तू देखदै ई लागौ औन्दौ, ज़ो ताऊं कै आच़्छ़ौ आ लागदै लागौ औन्दौ, इदै पात्थरा माथै पात्थर भी नाईं बौच़दै, ज़ो दौबा लौ नाईं।”

³तैबै यीशु नाल़ा पारभिलै जैतून नावां री पहाड़ी माथै बोशौ, ज़िदरा कु परमेश्‍वरा रौ घौर नज़दीक दिशा थौ। तिऐ पतरस, याकूब, यहुन्ना और आन्द्रियास यीशु आइलै थै। तैबै एखुलै दी च़ेलेउऐ यीशु कु पुछौ,

⁴“ज़ेज़ी बुशै तुमुऐ परमेश्‍वरा रै घौरा रै बारै दी बोली ई, एज़ी बुशै केबी हुआई? आमै किणौ ज़ाणी कि इऐ हुणै वाल़ी ई? का कोई निशाण आसती आ?”

⁵तैबै यीशु तिउंलै बोलदै लागौ, “बौच़ियौ रोएऊ, कुणिऐ तुमुलै धोखौ ना च़ांई दैऔ।

⁶कई झ़ुठै आदमी आशीयौ बोलाई कि सै परमेश्‍वरा री तौरफा कु भेज़ै औन्दै मसीह ई, और भौरी लोग तिऊं पिछ़ु डेउणै ई।

⁷ज़ेबी तुमै शुणा लै कि ज़ागाह-ज़ागाह दी लौड़ाई-झ़ौगड़ै ई औन्दै लागै औन्दै तेबी तुमै घबराएऊ नाईं। इऐ बूश हुणी ता ज़ुरुरी आ। तैबै भी आखरी बौगत नाईं।

⁸एकी ज़ाती रै लोग दुजी ज़ाती रै लोगु रौ विरोध कौरा ई, एक देश दुजै देशा रौ विरोध कौरा आ। कई ज़ागाह दी भुईंच़ाल़ हुणै ई और कई ज़ागाह दी काल़ पौड़णै ई। इऐ ता दु:ख मुसीबता री शुरुआत आ। ज़िणौ एक छ़ेउड़ी हौल़खुंदी बारै पैहलै कु बेदण झ़ेला सा। बासिऐ तियांरी बेदण बौड़ा सा।”

⁹“पर तुमै बौच़ियौ रौएऊ कैलैकि लोग तुमारै खिलाफा दी हुणै ई। सै लोग तुमु बौड़ी खुंबल़ी दी, कोर्टा दी पाकड़ियौ निंआई और तुमु आराधनालय दी पिटावा ई। मेरी वज़ाह कु बौड़ै-बौड़ै राज़ै, आफसरा काऐ तुमारी पूछ़ताछ़ कौरावा ई। तुमै तिऊं काऐ मैरै बारै दी गवाही दिआई।

¹⁰धौतरी री हर ज़ाती रै लोगु कै मैरौ खुशी री खौबर शुणाउणौ ज़ुरुरी आ। तेथ बासिऐ आखरी बौगत आशा आ।

¹¹ज़ेबी तुमु कोर्टा दी नियांलै तेबी पैहलै कु सुंच़णौ शुरु ना कौरेऊ कि तिऐ का बोलु लै। परमेश्‍वर तुमुलै बोला आ कि ज़ो तुमुऐ तिऐ बोलणौ आ कैलैकि तेबी बोलणै वाल़ै तुमै नाईं, पर परमेश्‍वरा री पवित्र आत्मा तुमु कु बोलावा।

¹²लोग विश्वासी भाई-बौइणिऊ रै फिलाफ हुइयौ तिऊं झ़ौंगाउणा लै विरोधिऊ कै सांबाई, तिणी ई मां-बाब भी कौरा ई। और लोल़डेऊ लै धोखौ दिया लौ और लोल़डै आपणै मां-बाबा झ़ांगणा लै दुश्मनु कु पौकड़ावा ई।

¹³और सारै लोग तुमु आइलै दुश्मनी छ़ाड़ाई कैलैकि तुमै मुं माथै विश्वास कौरा ई। पर ज़ुण आपणी ज़िन्दगी रै आखरी झ़ांऊ सौबर छ़ाड़ा लौ सेऊ बौच़ा आ।”

¹⁴“पौड़णै वाल़ौ सौमझ़ा लौ। इणौ बौगत आशणौ आ ज़ेबी एक भौरी बुरौ आदमी आशीयौ एस परमेश्‍वरा रौ घौर सारेऊ कु शुद्ध ज़ागाह गान्दी कौरा आ। तेबी ज़ेज़ै लोग यहुदा परदेशा दी औलै तिंउऐ बौच़णा लै पहाड़ी दी जा डेउणौ।

¹⁵तैबै ज़ो लोग तौंगा दी औणै बोशै औन्दै, तिंउऐ समाना आणना लै भितरै नाईं डेउणौ, तिऐ रुकेउ नाईं।

¹⁶ज़ुण तेबी डोखरेऊ, बौगिच़ेऊ दी औलै, सै आपणै शौल, जुड़कै निणा लै घौरै ना डेवेऊ।

¹⁷सेज़ै दिना दी तिऊं छ़ेउड़ी लै भौरी मुश्कल़ हुआ आ ज़ो गौरकै ज़िवा री औली और ज़ासकै दूध पिणै वाल़ै लोल़डै औलै।

¹⁸सेज़ै बौगता दी इणी मुसीबतै हुणी ज़िणी धौतरी री शुरुआता कु आज़ा झ़ांऊ कादी ना हुई, और ना ता एथ बासिऐ केबी हुणी। एथीलै तुमै प्राथना कौरदै थाकेऊ लागी कि तेबी शेल़ै रै दीन ना च़ांई हुऐ। नाईं ता लोगु कै शेल़ै दी घौरा छ़ाड़ियौ डेउणौ भी मुश्कल़ हुआ।

²⁰परमेश्‍वरै आपणै च़ुनै औन्दै लोग, ज़ो तेस माथै विश्वास कौरा ई, तिंउरै बारै दी सुंच़ीयौ सौ बौगत कम कौरी ऐरौ आ। नाईं ता एक भी आदमी ज़िउंदौ ना बौच़णौ थौ।

²¹ज़ैबै तुमै शुणा लै कि, ‘मसीह इदै आ’ या, ‘मसीह तिदै आ’ तैबै तिऊं बुशै माथै विश्वास ना कौरेऊ।

²²आखरी बौगता दी झ़ुठै भविष्यवक्ता और झ़ुठै मसीह भी हुणै ई ज़ो निशाण और हैरानी वाल़ै काम देखावा कि इदरा झ़ाऊं कि, लोगु परमेश्‍वरा री बाटा कु टाल़णै री कोशिश कौरा ई। पर सै सफल नाईं औन्दै।

²³तुमै सौम्भल़ियौ रौएऊ। कैलैकि मुंइऐ तुमुलै सारी बुशै पैहलै बोली गोई ज़ो हुणै वाल़ी ई।”

²⁴“पर तिऊं दु:ख मुसीबता बासिऐ इणौ हुआ ज़िणौ भौरी बौगत पैहलै भविष्यवक्तुऐ आशणै वाल़ै बौगता रै बारै दी बोलौ थौ कि, सुरज़ काल़ौ पौड़ा आ, और ज़ून भी राची प्याशौ दैणौ बंद कौरा आ।

²⁵और ज़ेती भी सौरगा दी तारै दिशा ई, और इऐ सारै छ़ुटणै ई तौल़ै और सौरगा री बौड़ी शक्ति हिलणी ई।

²⁶तैबै हाऊं, ज़ुण परमेश्‍वरा री तौरफा कु भेज़ौ औन्दौ ऊ, पुरी शक्ति और शाना कौरीऐ बादल़ा माथै आशाऊ और सारै लोग मुं देखा ई।

²⁷तैबै हाऊं आपणै सौरगदूत भेज़ाऊ, ताकी सै पुरी धौतरी रै कुणै-कुणै कु मैरै च़ुनै औन्दै लोगु कौठै कौरा, ज़ो मुं माथै विश्वास कौरा ई।

²⁸“फेड़ु रै पेड़ा कु कुछ़ औनैणौ शिखौ कि ज़ेबी फेड़ु रै पेड़ा रै शाऊंटै कौंउल़ै हुआई और तेसदी पाच लागदै लागा ई तेबी तुमुकै पौतौ लागा कि फौल़ दैणै रौ बौगत आशी ऐरौ आ।

²⁹तिणी ज़ेबी तुमै देखा लै कि एज़ी बुशै हुआई, तेबी ज़ाणेऊ कि मैरौ दुजी बारै आशणै रौ बौगत हुई ऐरौ आ।

³⁰हाऊं तुमुलै सौच़्च़ौ बोलाऊ, एज़ै पोसतै रै लोग खातम हुणै कु पैहलै एज़ी सारी बुशै पुरी हुआई।

³¹सौरग और धौतरी भी टौल़ाई, पर मेरी बुशै केबी ना टौल़दी।

³²“मैरै दुजी बारै आशणै रै बौगता रै बारै दी कोई ना ज़ाणदौ, सिरफ परमेश्‍वरा कै आ पौतौ। ना ता सौरगा रै दूता कै, और ना ई मुकै ज़ो छ़ोहरु आ पौतौ।

³³शुणौ! तुमै उज़ीई और प्राथना कौरदै रौएऊ कैलैकि तुमै नाईं ज़ाणदै कि सेज़ौ दीन केबी आशा आ।

³⁴ज़िणौ एक बौड़ै घौरा रौ मालिक घौरा छ़ाड़ियौ परदेशा लै डिया आ। आपणौ घौर संभाला आपणै नुकरु कै अलग-अलग काम दिआ आ। और च़ोकीदारा लै बोला कि उज़ीई रौइयौ रखवाल़ी कौरै।

³⁵“एथीलै उज़ीई रौएऊ, कैलैकि तुमै नाईं ज़ाणदै घौरा रौ मालिक केबी आशा सा, ब्याल़ी या आधी राचीऐ या कुखड़ै बाशदी बारी या दोउत राची।

³⁶इणौ ना च़ांई हुऔ सेऊ खरकच़ार आशीयौ तुमु सुतै औन्दै देखा।

³⁷और ज़ो हाऊं तुमुलै बोलाऊ, तेसीई सौभी आइलै बोलाऊ: ‘उज़ीई रौएऊ।’ ”