Read Pahari, Mahasu मरकुस 3 Bible Online

मरकुस 3 - Pahari, Mahasu bible

मरकुस 3

¹एकी औज़ौ आरामा रै दिना दी यीशु यहुदी लोगु री आराधनालय दी डैऔ। तिऐ एक आदमी थौ ज़ासरौ हाथ बिमारी कौरीऐ शुकी गौ थौ।

²तैबै कुछ़ फरीसी लोग यीशु माथै आरोप लाइणा लै तेसरी ताकी दी थै रौऐ औन्दै कि का यीशु एस आदमी आरामा वाल़ै दिना दी ठीक कौरा या नाईं कौरदौ?

³यीशुऐ शुकै औन्दै हाथ वाल़ै आदमी लै बोलौ, “सामनै आशीयौ खौड़ौ ऊ।”

⁴तैबै यीशुऐ लोगु कु पुछ़ौ, “नियमा रै मुताबिक का आरामा रै दिना दी भौलौ कौरणौ ठीक आ या बुरौ कौरणौ? प्राण बौच़ाउणौ या मारनौ?” पर कोइयै ज़वाब ना दैऔ।

⁵यीशु दुखी हुऔ कैलैकि तिंउरै मन भौरी ढीठ बौणी गौऐ थै। तैबै यीशुऐ रोशुइयौ लोगु भिलै देखौ और तेस आदमी लै बोलौ, “आपणौ हाथ औगांऊ कर।” तिणीऐ हाथ औगांऊ कौरौ, तैबै तेसरौ हाथ च़ांगौ हुऔ।

⁶तैबै फरीसी बाइरै डेइयौ खरकच़ार हेरोदेस राज़ै रै गुटा आइलै यीशु रै विरोधा ई सलाह कौरदै लागौ कि किणै कौरीऐ यीशु झ़ांगुलै।

⁷तैबै यीशु भीड़ा कु अलग हुणा लै आपणै च़ेलेऊ आइलै गलील झ़िला काऐ डैऔ, पर ज़ो कुछ़ यीशु कौरदै थौ लागौ औन्दौ तेसरै बारै दी शुणियौ एक भौरी बौड़ी भीड़ तेस पिछ़ु आशी।

⁸तिऐं भीड़ा दी गलील परदेश, यहुदा परदेश, यरुशलेम शहर, इदूमी परदेश और यरदन नौईं पार भिला रै लोग इदरा झ़ांऊ कि सूर और सैदा शहरु रै नज़दीका रै लोग भी आशै औन्दै थै।

⁹भीड़ा री वज़ाह कु यीशुऐ आपणै च़ेलेऊ लै बोलौ कि तुमै मुकालै एक छ़ोटी किश्ती त्यार छ़ाड़ेऊ ताकी मुं भीड़ ना दबावा।

¹⁰कैलैकि यीशुऐ भौरी बिमार लोग च़ांगै कियै थै, तैबै बिमार लोग यीशु माथै थै लागै औन्दै पौड़दै कि, “किणै कौरीऐ यीशु छ़ुंइयौ आमै ठीक हुलै।”

¹¹बिमार लोगु री भीड़ा दी इणै भी लोग थै ज़ो कि बुरी आत्मा रै वंशा दी थै। ज़ैबै केबी सै बुरी आत्माऐं यीशु देखा थी, तैबै तिऊं आपणै वंशा दी कौरै औन्दै लोग यीशु काऐ धौनी लोटाल़ा थी। तिऊं लोगु रै मुंआ कु सै बुरी आत्माऐं राड़ै मारीयौ बोला थी कि, “तू परमेश्‍वरा रौ छ़ोहरु ई।”

¹²यीशुऐ तिऊं बुरी आत्मा लै सख्त हुकम दैऔ, “तुमै मुं ना देखाऔ कि हाऊं कुण ऊ।”

¹³यीशु तेत बासिऐ गलील झ़िला रै उतर दिशा री पहाड़ी दी च़ौड़ौ, और ज़ास यीशु च़ाहा थै सै आपु काऐ औटाऐ, और सै यीशु काऐ आशै।

¹⁴यीशुऐ खास कामा लै बारह आदमी चुनै, यीशुऐ तिंउलै प्रेरित बोलौ, ताकी सै यीशु रै साथा-साथाई रौआ और यीशु तिऊं भेज़ा, कि सै परमेश्‍वरा रौ संदेश शुणावा।

¹⁵और सै लोगु कु बुरी आत्माऐं गाड़ने रौ हक्क छ़ाड़ा।

¹⁶तिऊं बारह च़ेलेऊ रै नाऊं एज़ै-एज़ै ई, शमौन ज़ासरौ नाऊं यीशुऐ पतरस छ़ाड़ौ।

¹⁷और जबदी रौ छ़ोहरु याकूब और तेसरौ छ़ोटौ भाई यहुन्ना, ज़ासरै बारै दी यीशुऐ इणौ बोलौ कि इऐ सौरगा रै गुड़णै ज़िणौ आ।

¹⁸और आन्द्रियास, फिलिप्पुस, बरतुलमै, मत्ती, थोमा, हलफई रौ छ़ोहरु याकूब, तद्दै, और दुजौ शमौन ज़ुण देशभक्त थौ।

¹⁹यीशुऐ करियोत गांवा रौ यहुदा भी च़ुनौ, ज़ुणिऐ बासिऐ सेऊ पकड़ाऔ आ।

²⁰ज़ैबै यीशु च़ेलेऊ आइलै घौरा दी आशौ, ज़िऐ यीशु रौआ थौ, तिऐ भी एक भौरी भीड़ कौठी हुई गोई। यीशु कामा दी भौरी उलज़ी गौऔ, इदरा झ़ांऊ कि यीशु और तेसरै च़ेलेऊ कै रोटी खाणा रौ बौगत भी नाईं थौ।

²¹ज़ैबै यीशु रै टौबरुऐ इणौ शुणौ तैबै सै यीशु ओरु आणना लै डेवै कैलैकि सै आपु मांझ़िऐ बोलदै लागै कि यीशु रौ दिमाग ठिकाणै दी ना आसतौ।

²²ज़ेज़ै यहुदी शास्त्री लोग यरुशलेम शहरा कु थै आशै औन्दै, सै यीशु लै इणौ लागै बोलदै कि एस भितै ता शैतान आ ज़ासरै ज़ौरिऐ यीशु बुरी आत्माऐं गाड़ा सा।

²³यीशुऐ सै लोग आपु काऐ औटाइयौ औनैणै देइयौ सौमझ़ाऐ कि, “शैताना कैलै गाड़ा सा शैतान?”

²⁴यीशुऐ तिउंलै बोलौ, “ज़ेज़ै राज़्य रै लोगु दी आपु मांझ़िऐ फूट पौड़ा ली ता सेज़ौ राज़ नाईं बौणी रौइंदौ?

²⁵ज़ेज़ै टौबरा दी आपु मांझ़िऐ फूट पौड़ा ली ता सेज़ै घौरा रै लोग भी कौठै नाईं रौउंदै।

²⁶एज़ै कारण शैतान भी आपणै राज़ा दी फूट टाला लौ ता तेसरौ राज़ किणै कौरीऐ बौणी रौआ? तेसरौ ता खातमौ हुआ आ।”

²⁷केज़ौ भी आदमी केज़ै तागतबर आदमी रै घौरा दी घुसड़ियौ तेसरौ घौर तेबी झ़ांऊ नाईं लुटिंदौ, ज़ेबी झ़ांऊ तेस तागतबर आदमी बाना नाईं लै। इणै कौरीऐ तेस घौर लुटी बौल़ा ई।

²⁸हाऊं तुमुलै सौच़्च़ौ बोलाऊ कि, “लोगु रै सारै पाप, सारी बुराई भी माफ हुआई।

²⁹पर ज़ो पवित्र आत्मा रै बारै दी बुरौ बोलाई तेसलै केबी भी माफी ना मिलदी। और सेऊ सौदा रै पापा लै गुनाहगार बौणा आ।”

³⁰यीशुऐ इणौ तैबै बोलौ कैलैकि सै लोग बोला थै कि यीशु दी बुरी आत्मा सा।

³¹तैबै यीशु री मां और भाई तिऐ पौउंच़ै, सै थै बाइरै खौड़ै, “तिंउऐ लोगु कै बोलौ कि यीशु बाइरै औटाऔ।”

³²यीशु काऐ थी भितै भौरी भीड़ बोशी औन्दी। लोगुऐ यीशु लै बोलौ, “तुमारी मां और भाई तुमु बाइरै औटावा ई।”

³³यीशुऐ तिउंलै बोलौ, “मेरी मां और भाई कुण ई?”

³⁴ज़ेज़ै लोग यीशु काऐ थै बोशै औन्दै, यीशुऐ तिऊं भिलै देखीयौ बोलौ कि, “देखौ मेरी मां और भाई इऐ ई।

³⁵ज़ो परमेश्‍वरा री इच़्छ़ा दी च़ाला ई, सेई सी मैरै भाई, बौइणी और मां।”