Read Pahari, Mahasu मरकुस 5 Bible Online

मरकुस 5 - Pahari, Mahasu bible

मरकुस 5

¹यीशु और तेसरै च़ेलै झ़िला पारभिलै डेइयौ गिरासेनिऊ रै इलाकै दी पौउंच़ै।

²ज़िणी यीशु किश्ती कु उतरौ, तिणी खरकच़ार एक आदमी, ज़ासदी बुरी आत्मा थी, सौ तेसकु मिलौ।

³सेऊ आदमी तिऐ रौआ थौ ज़िऐ मौरै औन्दै लोगु दबावा ई। कैलैकि सेऊ भौरी खुंखार थौ तेस कोइयौ शांगल़ी दी भी ना बानी बौल़ा थौ।

⁴कैलैकि सौ बार-बार रौशै और शांगल़ी दी हुआ थौ बानौ औन्दौ, पर तिणीऐ सै शांगल़ी भी पोरु चोड़ी रशेउ रै भी कौरा थौ टुकड़ै-टुकड़ै। तेस केज़ौ भी आदमी आपणै वशा दी ना कौरी बौल़ा थौ।

⁵सौ लगातार राची-दिनै तिऐं ज़ागाह दी और ढोकै माथै डेइयौ राड़ै मारा थौ, और पात्थरु कौरीऐ आपणै ज़िसमा री च़ौरच़ै कौरा थौ।

⁶सौ आदमी यीशु देखीयौ दुरा कु तेस काऐ दुड़ौ। सौ धौनी झ़ुकियौ यीशु कै ढाल कौरदै लागौ।

⁷यीशुऐ तेस भितै ज़ो बुरी आत्मा थी, तियांलै बोलौ, “ओ बुरी आत्मा एस आदमी छ़ाड़ियौ बाइरै निकुल़।” बुरी आत्मै यीशु लै राड़ै मारीयौ बोलौ, “ओ परमेश्‍वरा रै छ़ोहरु यीशु। मुकु का च़ाहा ई? हाऊं तांउकु परमेश्‍वरा रै नावां कौरीऐ औरज़ कौराऊ कि तू मुलै दु:ख ना दै।”

⁸

⁹यीशुऐ तिऐं बुरी आत्मा कु पुछ़ौ, “तैरौ का नाऊं आ?” बुरी आत्मै बोलौ, “मैरौ नाऊं आ सेना, कैलैकि आमै भौरी सी।”

¹⁰तेस आदमी रै जरिऐ तिऐं बुरी आत्मै यीशु कै भौरी औरज़ कौरी कि, “आमु एस इलाकै कु बाइरै ना गाड़ै।”

¹¹तिऐ पहाड़ा माथै सुंगरु रौ गोल़ थौ च़ौरदै लागौ औन्दौ।

¹²तिऐ बुरी आत्मै यीशु कु औरज़ कौरीयौ बोलौ, “आमु इऊं सुंगरु दी भेज़, आमै इऊं भितै डेई।”

¹³यीशुऐ तिउंलै हुकम दैऔ। सै बुरी आत्माऐं तेस आदमी कु निकल़ियौ तिऊं सुंगरु भितै डेई। सुंगरु रौ गोल़, ज़ो दुई हज़ारा रै लगभग थौ, मातौल़ै दुड़ियौ, पौड़ै झ़िला दी। तैबै मौरै तिऐ डुबियौ।

¹⁴तिऊं सुंगरु च़ारणै वाल़ै भागै पोरु, तिंउऐ शहरा, गांवा दी डेइयौ लोगु कै इऐ खौबर शुणाई। और ज़ो कुछ़ हुऔ थौ तेस देखणा लै लोग आशै।

¹⁵सै यीशु काऐ डेवै। तिंउऐ सेऊ आदमी ज़ासदी बुरी आत्मा री पुरी सेना थी, जुड़कै भिड़ीयौ और दिमाग ठीक हुइयौ बोशौ औन्दौ देखौ। तैबै सै लोग डौरी गोऐ।

¹⁶इऊं देखणै वाल़ै लोगुऐ सुंगरु और ज़ासदी सै बुरी आत्माऐं थी, तेसरौ पुरौ हाल तिऊं दुजै लोगु कै शुणाऔ।

¹⁷तैबै तिऊं लोगुऐ यीशु कै औरज़ कौरी और बोलौ, “छ़ौंअटी। आमारै इलाकै कु पोरु डेऊ।”

¹⁸ज़ैबै यीशु किश्ती दी लागौ च़ड़दै, तैबै सौ, ज़ासदी पैहलै सै बुरी आत्मा थी, यीशु कु औरज़ कौरदै लागौ, “मुं आपु आइलै दैऔ रौइणै।”

¹⁹पर यीशुऐ सौ आपु आइलै ना दैऔ आशणै, और तिणीऐ तेसलै बोलौ, “आपणै घौरै डेऊ और आपणै लोगु कै बोलै कि ताऊं माथै दया कौरीयौ प्रभुऐ ताउंलै किणै बौड़ै काम किएई।”

²⁰यीशु रै बोलणै माथै सौ डैऔ और दिकापुलिस परदेशा दी एज़ी बुशा रौ परचार लागौ कौरदै कि, “यीशुऐ मुलै किणै बौड़ै काम किऐ ई।” इणै शुणियौ सारै लोग हैरान हुऐ।

²¹ज़ैबै यीशु तौंइऐ किश्ती दी झ़िला पारभिलै डेवै, तिऐ डिका दी यीशु काऐ एक बौड़ी भीड़ कौठै हुई।

²²तैबै आराधनालय रौ एक मुखियौ यीशु काऐ आशौ। तेसरौ नाऊं थौ याईर। सौ तेस देखीयौ तेसरी लातेऊ माथै पौड़ौ।

²³तिणीऐ यीशु कै औरज़ कौरी, और इणौ बोलौ, “मेरी छ़ोटी मांई मौरणै वाल़ी आ, तुमै मैरै घौरा कै आण्डियौ मेरी मांई माथै हाथ छ़ाड़ौ, तैबै सै मांई च़ांगी हुआ आ, और सै मौरणै कु बौच़ा आ।”

²⁴तैबै यीशु तेस आइलै डैऔ। एक भौरी भीड़ तेस पिछ़ु च़ाल पौड़ी, इदरा झ़ांऊ कि लोग यीशु माथै पौड़दै थै लागै औन्दै।

²⁵तिऐ एक छ़ेउड़ी थी, तिंया दी बारह साला ओउलै लोऊ बौइणै री बिमारी थी।

²⁶तियांऐ भौरी डाक्टरु कु इलाज़ कौराइयौ भी दु:ख उठाऔ। आपणी सारी धन-ज़यदाद खौर्च़ कौरीयौ भी तियांलै कुछ़ सुख ना मिलौ, पर तिंयारी बिमारी औज़ौ भी बौड़दै लागी।

²⁷तियांऐ यीशु रै बारै दी शुणौ थौ कि तिणीऐ बिमार च़ांगै किऐ ई सै भीड़ा मांझ़िऐ यीशु पिछ़ु आशी।

²⁸सै बोला थी कि, “हाऊं यीशु रै जुड़कौ छ़ूंऊं लै ता हाऊं ठीक हुआ ऊ।”

²⁹तियांऐ यीशु रौ जुड़कौ छ़ुंऔ और तेबी तिऐं छ़ेउड़ी रौ लोऊ बौइणौ बंद हुऔ। तियांकै आपणै ज़िसमा दी च़ौगरु ई ऐरौ कि, “हाऊं च़ांगी हुई गोई।”

³⁰यीशुऐ आपणै ज़िवा दी च़ौगरौ कि, “मुकु शक्ति निकल़ी आ।” तैबै खरकच़ार भीड़ा दी पिछ़ाऊं मुड़ियौ पुछ़ौ, “मैरौ जुड़कौ कुणिऐ छ़ुंऔ?”

³¹यीशु रै च़ेलेउऐ तेसलै बोलौ, “तुमै देखदै ई लागौ औन्दै कि तुमु माथै भीड़ आ लागी औन्दी पौड़दै। तौंइऐ भी पुछ़ा ई तुमै इणौ कि, ‘हाऊं कुणिऐ छ़ुंऔ?’ ”

³²तैबै यीशुऐ लोगु भिलै देखौ कि, “हाऊं कुणिऐ छ़ुंऔ औलौ?”

³³सै छ़ेउड़ी इणौ ज़ाणियौ कि तिंया आइलै केती भौलौ काम हुऔ, डौरीयौ और कांबीयौ यीशु काऐ आशी। सै तेसरी लातेऊ माथै पौड़ी और तियांऐ तेस काऐ आपणौ सारौ हाल सौच़्च़-सौच़्च़ बोलौ।

³⁴यीशुऐ तियांलै बोलौ, “धीया, तू च़ांगी हुई गोई कैलैकि तांऐ मुं माथै विश्वास छ़ाड़ौ। आरामा कौरीऐ डेऊ, और आपणी दु:ख पिड़ा कु बौच़ी रौऊ।”

³⁵ज़ैबै यीशु बोलदै थौ लागौ औन्दौ, तैबै आराधनालय रै मुख्यै याईरा रै घौरा कु लोगुऐ आशीयौ याईरा लै बोलौ, “तुमारी मांई मौरी गोई। आबै गुरु लै कौष्ट ना दैऔ।”

³⁶ज़ो बूश सै लोग बोलदै थै लागौ औन्दै, यीशुऐ तिऐं बुशा री कौन्थशुणी की, और तेस आराधनालय रै मुख्यै याईरा लै बोलौ, “नाईं डर! सिरफ विश्वास छ़ाड़! सै ज़िउंदी हुआ आ।”

³⁷यीशुऐ पतरस, याकूब, और याकुबा रौ भाई यहुन्ना आपणै साथा दी निऐं, तिणीऐ औज़ौ कोइयौ ना नियौं।

³⁸यीशु याईरा रै घौरा दी पौउंच़ै। तिणीऐ लोग लेरदै, छ़ाती पिटदै और राड़ै मारदै देखै।

³⁹यीशु घौरा भितै डेवै और तिउंलै बोलौ, “तुमै कैलै ई लागै औन्दै हालै पाइंदै और लेरदै? इऐ मांई मौरी नाईं बल्कि सुती औन्दी आ।”

⁴⁰सै इऐं बुशु शुणियौ यीशु रौ मज़ाक उड़ाउंदै। पर तिणीऐ सारै आदमी बाइरै गाड़ै। आपु डैऔ तिऐं मांई रै मां-बाब और तिऊं चीन च़ेलेऊ आइलै भितरै, ज़िऐ सै मांई थी।

⁴¹यीशुऐ तिऐं मांई रौ हाथ पाकड़ौ और तियांलै आपणी बोली दी बोलौ, “तलीता कूमी” ज़ेथरौ मतलब इणौ आ, “ओ मांई! हाऊं ताउंलै बोलाऊ, उठ।”

⁴²मांई खरकच़ार उठीयौ च़ालदै-फिरदै लागी। (सै बारह साला री थी) इणै देखीयौ सै खरकच़ार भौरी हैरान हुऐ।

⁴³यीशुऐ तिउंकै च़ितल़ाऔ कि एज़ी बुशा रौ कासी कै पौतौ ना च़ांई लागौ। और इणौ भी बोलौ, “इऐं मांई लै कुछ़ खाणा-पिणा लै दैऔ।”