Read Pahari, Mahasu मरकुस 6 Bible Online

मरकुस 6 - Pahari, Mahasu bible

मरकुस 6

¹कफरनहूम गांवा कु निकल़ियौ यीशु आपणै गांव नासरता दी आशौ। तेसरै च़ेलै भी साथा दी डेवै।

²ज़ेबी आरामा वाल़ौ दीन आशौ यीशुऐ आराधनालय दी शिक्षा देई। तेसरी शिक्षा शुणियौ भौरी लोग हैरान हुऐ। तैबै सै बोलदै लागै कि, “इणी शिक्षा केशकु शिखी औली इणीऐ? और इणी शक्ति वाल़ै कामा कौरणै रौ हक्क कुणिऐ दैऔ आ एसकै?

³एस यीशु ता आमै भौरी पैहलै ओउलै ज़ाणी। एऊ ता मिस्त्री आ। एऊ मरियमा रौ छ़ोहरु, और याकूब, योसेस, यहुदा और शमौना रौ बौड़ौ भाई आ। एसरी बौइणी भी रौआ ई आमु मांझ़िऐ। इयौ सेज़ौ यीशु आ” एज़ै कारणै तिऊं लोगु कै तेस माथै शक हुऔ तिंउऐ तेस माथै विश्वास ना कियौ।

⁴यीशुऐ तिउंलै बोलौ, “भविष्यवक्ता री इज़्ज़त हुआ सारी ज़ागाह दी। सिरफ आपणै गांवा दी, आपणै रिश्तैदारा दी और आपणै घौरा दी नाईं औन्दी।”

⁵यीशुऐ तिऐ कुछ़ बिमार लोग छ़ुंइयौ च़ांगै कियै। बाकी तिंउरै अविश्वासा री वज़ाह कु सेऊ शक्ति रै भौरी काम नाईं कौरी बौल़ौ।

⁶यीशु कै तिंउरै अविश्वासा देखीयौ भौरी दु:ख और हैरानी हुई। और तैबै सेऊ शिक्षा दैंदी बारै गांव-गांवा दी घुमदै थौ लागौ औन्दौ।

⁷यीशुऐ आपणै च़ुनै औन्दै बारह च़ेलै आपु काऐ औटाऐ, और तिऊं दुई-दुई कौरीऐ अलग-अलग ज़ागाह दी लागौ भेज़दै। तिणीऐ तिउंलै लोगु कु बुरी आत्माऐं गाड़नै रौ हक्क दैऔ।

⁸यीशुऐ बोलौ, “बाटा लै हाथा दी डिंगौ, लातु दी चैपलै रै अलावा कुछ़ भी ना निऐं ऊ, ना रोटी, ना बैग और ना ज़ेबा दी पैसै।

⁹दुजौ कुरतौ भी ना नियौं, ज़ो जुड़कै तुमुऐ भिड़ौ औन्दै ई, सै मोकते ई।”

¹⁰तौंइऐ यीशुऐ तिउंलै इणौ भी बोलौ, “ज़ेज़ै घौरा दी तुमु माना लै सेज़ै घौरा दी रौइणौ, ज़ेबी झ़ांऊ तुमै सेज़ै गांवा दी ई।

¹¹केज़ै गांवा रै लोग तुमारी बुशै नाईं शुणा लै, तुमारी इज़्ज़त नाईं कौरालै, तैबै तिराकु निकल़ियौ आपणी चैपली री धूड़ भी पोरु झाड़ै ऊ। इणै देखीयौ सै सौमझ़ा ई कि परमेश्‍वर तिउंलै ज़ुरुर सौज़ा दिया आ। कैलैकि तिंउऐ परमेश्‍वरा री शिक्षा नाईं शुणी।”

¹²तेत बासिऐ सै बारह च़ेलै दुई-दुई कौरीऐ अलग-अलग गांवा दी डेइयौ शिक्षा दैंदै लागै कि, “मन बौदल़ौ, पापा री बाटा छ़ाड़ियौ परमेश्‍वरा री बाटा दी आशौ।”

¹³तिंउऐ भौरी लोगु कु बुरी आत्माऐं गाड़ी और बिमार लोगु रै मुंडा माथै तेला लाइयौ प्राथना कौरीयौ सै ठीक कियै।

¹⁴हेरोदेस राज़ै यीशु रै बारै दी शुणौ कैलैकि यीशु रौ नाऊं इबी च़ारौ तरफाई फैअली गौ थौ। यीशु रै बारै दी सारै लोगु री अलग-अलग राय थी। केज़ै बोला थै इणौ कि, यीशु यहुन्ना बपतिस्मौ दैणै वाल़ौ आ, ज़ो मुर्दे मांझ़िआ कु ज़िउंदौ हुई गौ आ। एज़ै कारण यीशु कै शक्ति वाल़ै काम ई लागै औन्दै हुंदै।

¹⁵कुछ़ लोग बोला थै इणौ कि, “एऊ एलियाह सा।” और कुछ़ लोग बोला थै इणौ कि, इयौ “पुराणै ज़मानै ज़िणौ भविष्यवक्ता आ।”

¹⁶राज़ै हेरोदेस अंतिपासै भी इऐ च़र्च़ा शुणी। सेऊ लागौ बोलदै कि, “यहुन्ना बपतिस्मौ दैणै वाल़ौ ज़ासरौ मुंइऐ मूंड कौटाऔ थौ, सौ ज़िउंदौ हुई गौ आ।”

¹⁷हेरोदेसै इणौ एथीलै सुंच़ौ थौ, कैलैकि तिणीऐ आपणै भाई फिलिप्पुसा री छ़ेउड़ी हेरोदियासा आइलै शादी की थी और यहुन्नै तेसलै बोलौ थौ कि ताऐं गलत कियौ आ, आपणै भाई री छ़ेउड़ी आपुलै छ़ाड़णी ताउंलै ठीक नाईं आ। एथीरी वज़ाह कु तिणीऐ यहुन्ना पकड़ाइयौ ज़ेला दी पौआऔ थौ।

¹⁸

¹⁹और हेरोदियास यहुन्ना कु नफरत कौरा थी और तेस झ़ौगाउणौ च़ाहा थी, पर इणौ नाईं हुई बौल़ौ,

²⁰कैलैकि सेऊ राज़ौ ज़ाणा थौ कि यहुन्ना एक धौर्मी और पवित्र आदमी आ एथीलै तेसकु भौरी डौरा थौ, और तेस बौच़ावा थौ, और यहुन्ना री बुशै बौड़ै मौज़ै कौरीऐ शुणा थौ, शुणियौ घबरा भी थौ।

²¹एकी दिनै तेस राज़ै रौ जनम दीन आशौ। तिणी राज़ै आपणै जनम दिना लै परधान, फौज़ीऊ रै आफसर और गलीला रै बौड़ै-बौड़ै लोग थै, सारै औटाऐ। और तिउंलै खाणै पिणै रौ इन्तज़ाम भी थौ कियौ औन्दौ।

²²सै लोग खाई-पियौ निपटै। तेत बासिऐ तिऐं हेरोदियासा री माइंऐ नाच़णौ-गाणौ शुरु कियौ। तिऐं मांई रै नाच़-गाणै इऐ ज़ेती भी मैहमान थै आशै औन्दै सित राज़ै भौरी खुश कियै। तिणी राज़ै तिऐं मांई लै बोलौ, “मांई, तैरै नाच़-गाणै देखीयौ मैरौ मन भौरी खुश हुई गौ आ, तू इणौ बोल तैरै का च़ांई, हाऊं तेस दिआऊ।”

²³राज़ै कसम खाइयौ बोलौ, “इदरा झ़ांऊ कि तू मुकु मैरै राज़ा रौ आधौ हिस्सौ भी मांगा ली हाऊं तेस दैणा लै भी त्यार ऊ।”

²⁴सै मांई आपणी आमा काऐ डेइयौ बोलदै कि राज़ौ इणौ बोला, “तैरै का च़ांई?” तैबै हेरोदियासै बोलौ, “इणौ बोल, यहुन्ना बपतिस्मौ दैणै वाल़ै रौ मूंड दैऔ काटियौ।”

²⁵खरकच़ार सै मांई राज़ै काऐ डेई और राज़ै लै बोलौ कि, “मुकै यहुन्ना बपतिस्मा दैणै वाल़ै रौ मूंड दैऔ काटियौ थाल़ी दी।”

²⁶राज़ौ भौरी परेशान हुऔ, और बोलौ “ओहो मांई, तांऐ का मांगौ इणौ पा?” पर आपणै वायदै री वज़ाह कु राज़ौ नाईं मुकरी बौल़ौ। कैलैकि राज़ौ आपणै मैहमानु रै सामनै बेइज़्ज़त नाईं च़ाहा थौ हुणौ।

²⁷राज़ै आपणै एक सिपाई लै बोलौ, “ज़ेला दी डेऊ यहुन्ना रौ मूंड आण काटियौ।”

²⁸सिपाई ज़ेला दी डैऔ, तिणीऐ यहुन्ना रौ मूंड एकी थाल़ी दी काटियौ आणौ, तैबै दैऔ तिऐं मांई कै। माइंऐ दैऔ आपणी आमा कै।

²⁹तैबै इणै शुणियौ यहुन्ना रै च़ेलै आशै और ज़ेला दी डेइयौ यहुन्ना रौ मौड़ौ आणौ और यहुदी रीती-रिवाज़ा रै मुताबिक किरया-करम कियौ।

³⁰तैबै यीशु रै बारह च़ेलै गांव-गांवा कु वापिस आशै, ज़ो तिणीऐ दुई-दुई कौरीऐ भेज़ै थै। तिंउऐ ज़ो कियौ और शिखाऔ थौ, तेथरै बारै दी तेसकै बोलौ।

³¹तिऐ भौरी लोग थै आशदै-डेउंदै लागै औन्दै। तिउंकै तिऐं ज़ागाह दी रोटी खाणै रौ मौकौ भी ना मिलौ थौ। तिणीऐ तिऊं च़ेलेऊ लै बोलौ, “तुमै मुं आइलै एखुली ज़ागाह दी च़ालौ, तेशी दख ज़ेई आराम कौरौ।”

³²तैबै यीशु और च़ेलै किश्ती दी बोशियौ एखुली ज़ागाह दी डेवै।

³³पर भौरी लोगुऐ यीशु डेउंदी बैरै देखै कि इऐ केशी डियाई। साथा दी रवायी भी ऐरै कि इऐ कुण ई। एज़ै कारण सै लोग तिऊंकु पैहलै तिऐं ज़ागाह दी पौउंच़ै।

³⁴ज़ैबै यीशु किश्ती कु उतरौ ता तिऐं ज़ागाह दी भौरी बौड़ी भीड़ देखी आशी औन्दी, यीशु कै तिऊं लोगु देखीयौ दया आशी, कैलैकि सै लोग इणै थै ज़िणी बिण भेराल़डु री भेरै हुआई। तैबै सेऊ तिउंलै शिक्षा दैंदै लागौ।

³⁵ज़ैबै ब्याल़ हुई गोई तैबै तेसरै च़ेलेउऐ तेस काऐ आशीयौ बोलौ, “इऐ ज़ागाह भौरी शुनशान आ। आबै राच हुई लागी आ।

³⁶तुमै इऊं लोग नीज़ुका री बस्ती और गांवा दी छ़ाड़ौ ताकी इऐ लोग पैसेऊ देइयौ रोटी खाई बौल़ा।”

³⁷इणै शुणियौ यीशुऐ तिऊं च़ेलेऊ लै बोलौ, “तुमै दैऔ इउंलै खाणा लै।” तिंउऐ बोलौ, “अगर आमुकै एती पैसै हुआ थै ज़ेती एक आदमी छ़ौ: मिहनै दी कौमावा, तैबै भी इउंलै खाणौ नाईं खिलाई बौल़ा थै।”

³⁸यीशुऐ च़ेलेऊ कु पुछ़ौ, “तुमुकै केती रोटी ई? डैऔ और पौतौ कौरौ” च़ेलेउऐ लोगु कु पौतौ कौरीयौ बोलौ, “पांज़ रोटी और दुई माच़्छ़ी ई।”

³⁹तैबै यीशुऐ सारै लोग अलग कौरीयौ लाइणी दी धौनी बोशाल़ै।

⁴⁰और सै शौ-पचासा री पांगती दी बोशै।

⁴¹यीशुऐ सै पांज़ रोटी और दुई माच़्छ़ी आपणै हाथा दी पाकड़ी और सौरगा भिलै देखीयौ परमेश्‍वरा रौ धन्यबाद देइयौ आशीष मांगी। तेत बासिऐ यीशुऐ सै रोटी चोड़ियौ आपणै च़ेलेऊ कै थाकौ दैंदै लागी। च़ेलै थाकै लोगु कै दैंदै लागी। यीशुऐ सै दुई माच़्छ़ी भी लोगु मांझ़िऐ बांटी।

⁴²सारै लोगुऐ पेटा भौरीयौ रोटी खाई।

⁴³तेती माथै भी रोटी और माच़्छ़ी रै बौच़ै औन्दै बारह छ़ाबड़ै भौरै।

⁴⁴और तिऊं रोटी खाणै वाल़ेऊ मांझ़िऐ सिरफ पांज़ हज़ार ता मौरद ई थै।

⁴⁵तेत बासिऐ यीशुऐ खरकच़ार आपणै च़ेलेउलै बोलौ कि, “तुमै किश्ती दी च़ौड़ौ।” सै च़ेलै यीशुऐ बैतसैदा रै इलाकै दी आपु कु पैहलै भेज़ै ताकी सेऊ लोगु सौंभावा।

⁴⁶यीशु भीड़ा रै लोगु छ़ाड़ियौ प्राथना कौरदै एक पहाड़ी माथै।

⁴⁷ज़ैबै राच हुई तेबी च़ेलेऊ री किश्ती झ़िला रै मांझ़ा-मांज़ थी। यीशु थौ तेबी एखुली एकी ज़ागाह दी।

⁴⁸यीशुऐ देखौ कि बागुर इउंरी किश्ती च़लाउणै ना दैंदौ। च़ेलेऊ कै किश्ती च़लाउणै री बौड़ी मुश्कल़ हुई गोई। सै च़ेलै गोऐ घबराई। दोतकै पौरै यीशु झ़िला दी पाणी माथै आण्डियौ च़ेलेऊ काऐ डैऔ। यीशु ताका थौ तिऊंकु झ़िला दी औगाड़िऐ डेउणौ।

⁴⁹ज़िणी च़ेलेउऐ सौ पाणी माथै आण्डदै देखौ, सै च़ेलै घबराइयौ लागै राड़ै मारदै। तिंउऐ सुंच़ौ कि भूत आशी गौ आ।

⁵⁰यीशुऐ तिउंलै तेबी बोलौ, “डौरौ नाईं। हिम्मत छ़ाड़ौ। हाऊं इदै।”

⁵¹तैबै यीशु च़ेलेऊ आइलै किश्ती दी च़ौड़ौ, सौ बागुर तेबी गौटौ। च़ेलै इणै देखीयौ भौरी हैरान हुऐ।

⁵²रोटी रौ हैरानी वाल़ौ काम भी तिंउऐ देखौ थौ। पर सै सौमझ़ी ना बौल़ै कि यीशु दी केती शक्ति आ। तिंउरै मन भौरी ढीठ बौणी गोऐ थै।

⁵³तेत बासिऐ सै गन्नेसरत गांवा दी पौउंच़ै, किश्ती बानी तिंउऐ डिका काऐ।

⁵⁴ज़िणी सै किश्ती कु उतरै, तिदलै लोगुऐ यीशु खरकच़ार रवाऔ।

⁵⁵तिदलै लोगुऐ दुड़ियौ सारै बिमार लोग बिस्तरै दी गिनियौ आणै।

⁵⁶ज़िऐ-ज़िऐ यीशु गांवा दी या शहरा दी डिया थौ, तिऐ लोग बिमार लोगु बज़ारा दी बोशाल़ा थै। सै लोग यीशु काऐ औरज़ कौरा थै कि, “इऊं तुमारै जुड़कै रौ एक धुरौ दैऔ एरी छ़ुंइणै।” ज़ेती लोगुऐ भी यीशु छ़ुंऔ सै ठीक हुऐ।