Read Pahari, Mahasu मरकुस 9 Bible Online

मरकुस 9 - Pahari, Mahasu bible

मरकुस 9

¹यीशुऐ इणौ भी बोलौ, “हाऊं तुमुलै सौच़्च़ौ बोलाऊ कि इदै इऊं खौड़ै लोगु मांझ़िऐ कु कुछ़ आदमी ज़ुरुर आपणी ज़िन्दगी दी देखा लै कि परमेश्‍वर शक्ति भौलौ राज़ कौरना लै आशौ आ मौरणै कु पैहलै।”

²छ़ौ: दिना बासिऐ यीशुऐ पतरस, याकूब और यहुन्ना आपु आइलै निऐं। तैबै सै एक उंच़ी पहाड़ी माथै डेऐ। तिऐ एखुली दी तिऊं चीन च़ेलेऊ काऐ यीशु रौ रूप बौदलु औन्दौ दिशौ।

³यीशु रै जुड़कै इणै प्याशै ज़िणै और शेतै बौणै कि इऐं धौतरी दी केज़ौ भी धोबी तिणै प्याशै ज़िणै और शेतै जुड़कै नाईं धोई बौल़दौ।

⁴तिंया ताकै तिऐ यहुदी लोगु रै पुराणै ज़मानै रै दुई भविष्यवक्ता पौगड़ौ हुऐ ज़ासरै नाऊं मुसा और एलियाह थै। सै दुई थै लागै औन्दै यीशु आइलै बुशै लाइंदै।

⁵तैबै पतरसै यीशु लै बोलौ, “गुरुजी एऊ केती आच़्छ़ौ आ कि आमै इदै ई, आमै चीन ताम्बु लाई, एक तुमु कालै, एक एलियाह कालै, एक मुसा कालै।”

⁶पतरसा कै सौमझ़िंदै नाईं थौ लागौ औन्दौ, “कि हाऊं का बोलु” कैलैकि सै इणौ देखीयौ डौरी गौऐ थै।

⁷तैबै तिऊं माथै एक बादल छ़ाऔ, तेस बादल़ा मांझ़िऐ कु परमेश्‍वरा री हाक शुणुई कि, “इयौ मैरौ प्यारौ छ़ोहरु आ। एसरी बुशै शुणौ।”

⁸तैबै एकदम तिऊं च़ेलेउऐ च़ारौ तौरफा ई देखौ, ता यीशु रै सिवाऐ तिऊं आइलै कोई नाईं थौ।

⁹ज़ैबै सै पहाड़ी कु तौल़ै थै लागै औन्दै आशदै, तेबी यीशुऐ आपणै च़ेलेउलै हुकम दैऔ कि, “ज़ो तुमुऐ देखौ आ, तेथरै बारै दी लोगु काऐ तेबी झ़ांऊ कुछ़ ना बोलेऊ ज़ेबी झ़ांऊ हाऊं, ज़ुण परमेश्‍वरा री तौरफा कु भेज़ौ औन्दौ ऊ, मौरीयौ ज़िउंदौ ना हुउलौ।”

¹⁰तैबै च़ेलेउऐ इऐ बूश आपणै ज़िवा दी छ़ाड़ी, और आपु मांझ़िऐ चौपड़िंदै लागै कि मौरीयौ ज़िउंदौ हुणै रौ का मतलब हौलौ।

¹¹तैबै तिंउऐ यीशु कु पुछ़ौ, “यहुदी रै शास्त्री लोग बोलाई कि एलियाह भविष्यवक्ता रौ मसीह कु पैहलै आशणौ ज़ुरुरी आ। सै इणौ कैलै बोलाई?”

¹²यीशुऐ ज़वाब दैऔ, “इणौ सौच़्च़ौ आ कि एलियाह गुरु पैहलै आशौ आ और मसीहा लै बाट तैयार कौरा आ। हाऊं ज़ुण आदमी रौ छ़ोहरु ऊ, तुमुलै बोलाऊ, यहुन्ना बपतिस्मौ दैणै वाल़ौ एलियाह री ज़ागाह दी मुकु पैहलै आशी गौ आ। लोगुऐ आपणी मौरज़ी कौरीऐ सेऊ सौताऔ ज़िणौ तेसरै बारै दी लिखौ औन्दौ थौ। ऐबै तुमै सुंच़ौ कि मैरै बारै दी भी, ज़ुण परमेश्‍वरा री तौरफा कु आ भेज़ौ औन्दौ, धौर्म शास्त्रा दी इणौ लिखौ औन्दौ कि लोग मुलै भौरी दु:ख दिआई, नफरत कौरा ई, मुं नाईं मानदै।”

¹³

¹⁴ज़ेबी यीशु और चीन च़ेलै बाकी च़ेलेऊ काऐ पौउंच़ै, तैबै तिंउऐ देखौ कि तिऐ एक बौड़ी भिड़ै सै बाकी च़ेलै घेरै औन्दै थै और यहुदी शास्त्री थै लागै औन्दै तिऊं आइलै बैहंस कौरदै।

¹⁵खरकच़ार सारै लोग यीशु देखीयौ हैरान हुऐ। तैबै दूड़िऔ तिंउऐ यीशु काऐ आशीयौ तेसरौ स्वागत कियौ।

¹⁶यीशुऐ तिऊंकु पुछ़ौ, “तुमै मैरै च़ेलेऊ आइलै का थै लागै औन्दै बैहंस कौरदै?”

¹⁷तैबै भीड़ा मांझ़िऐ कु एक आदमीऐ ज़वाब दैऔ, “गुरुजी! मुंइऐ आपणौ छ़ोहरु थौ इदै आणौ औन्दौ। कैलैकि मैरै छ़ोहरु दी एक बुरी आत्मा सा ज़ुणिऐ एऊ ज़बाना रौ लाटौ चाणी गौ आ।

¹⁸ज़िऐ किऐ एस बुरी आत्मा पाकड़ा सा, तिऐ बुरी आत्मा एस धौनी लोटाल़ा। और एसरै मुआंदी निकल़ा ई शेफै। आपु लागा दांदु कुट-कुटाउंदै। तैबै बौणा डौकडौकौ। मुंइऐ तुमारै च़ेलेउलै बोलौ, ‘एस मांऊ कु बुरी आत्मा पोरु गाड़ौ’ पर इउंकै नाईं गाड़ुई।”

¹⁹इणौ सब शुणियौ यीशुऐ ज़वाब दैऔ, “का कौरुलै! तुमुकै मुं माथै इबी झ़ांऊ विश्वास नाईं आ? हाऊं केबी झ़ांऊ रौआऊ तुमु आइलै? तुमारौ एस अविश्वास किणै कौरीऐ कौरु सहन? एस छ़ोहरु मुकाऐ आणौ।”

²⁰तैबै लोगुऐ सेऊ छ़ोहरु यीशु काऐ आणौ। ज़ैबै बुरी आत्मै यीशु देखौ, खरकच़ार बुरी आत्मै छ़ोहरु बांथ रौंगा रौ मेकिऔ धौनी लोटाल़ौ। तेसरै मुंआ कु शेफै निकल़ी और सेऊ माटै मांझ़ी लागौ खोरोल़िंदै।

²¹यीशुऐ तेस छ़ोहरु रै बाबा कु पुछ़ौ, “एसरी हालत केबी ओउलै इणी?” तिणीऐ बोलौ, “लोल़डी ओउलै आ।

²²एती नाईं बल्कि बुरी आत्मा एस झ़ांगणा लै केबी टाला आगी मांझ़िऐ, केबी टाला पाणी मांझ़िऐ। तुमै कौरी बौल़ा ई ता दया कौरीऐ आमारी मज़द कौरौ एरी।”

²³यीशुऐ तेसलै बोलौ, “ताइंऐ का बोलौ कि, ‘तुमै कौरी बौल़ा ई ता?’ शुण! ज़ुण मुं माथै विश्वास कौरा आ तेसलै हाऊं सारौ-कुछ़ कौराऊ।”

²⁴खरकच़ार तेस छ़ोहरु रै बाबै ज़ोरै बोलौ, “मुकै दख ज़ेई विश्वास आ। मैरौ विश्वास बौड़ाऔ एरी।”

²⁵ज़ैबै यीशुऐ देखौ कि भीड़ बौड़दै सा लागी औन्दी तैबै तिणीऐ तिऐं बुरी आत्मा लै डांटियौ बोलौ, “ओ लाटौ-टौणौ कौरणै वाल़ी बुरी आत्मा! हाऊं ताउंलै हुकम दिआऊ, एस छ़ोहरु भितै कु पोरु निकुल़! ऐबै केबी ना आशै एस छ़ोहरु दी।”

²⁶तैबै सै बुरी आत्मा ज़ोरै राड़ै मारीयौ छ़ोहरु भितरा कु निकल़ी। और सेऊ छ़ोहरु मौरौ औन्दौ ज़िणौ बौणौ। कई लोग ता इणौ लागै बोलदै, “एऊ गौ मौरी।”

²⁷पर यीशुऐ तेस छ़ोहरु रौ हाथ पाकड़ौ और सेऊ खौड़ी उठाऔ। सेऊ छ़ोहरु खौड़ी उठौ और बिल्कुल ठीक हुऔ।

²⁸यीशु और तेसरै च़ेलै ज़ेबी घौरा भितै एखुलै दी थै, तैबै च़ेलेउऐ यीशु कु पुछ़ौ, “आमुकै सै बुरी आत्मा कैलै ना गाड़ुई?”

²⁹यीशुऐ ज़वाब दैऔ, “इणै रौंगा री बुरी आत्मा प्राथना और ब्रौता कौरी गाड़िया सा। कैलैकि एज़ी आत्मा गाड़नै रौ दुजौ तरिकौ कुछ़ नाईं।”

³⁰यीशु और तेसरै च़ेलै तिऐं ज़ागाह छ़ाड़िऔ गलील परदेशा दी बाटीऐ लागै औन्दै डेउंदै। यीशु नाईं च़ाहा थौ कि कासी कै भी पौतौ लागा कि सै कियै ई,

³¹कैलैकि सेऊ एखुलै दी आपणै च़ेलेउलै शिक्षा दैणौ च़ाहा थौ। यीशुऐ च़ेलेउलै बोलौ, “आदमी रौ छ़ोहरु, लोगु रै हाथै पकड़वाइणौ आ, सै मुं झ़ांगाई, पर मारीयौ हाऊं च़िज़ै दिना दी तौंइऐ ज़िउंदौ हुआ ऊ।”

³²च़ेलै यीशु री एज़ी बूश सौमझु़दै नाईं थै लागै औन्दै। सै यीशु कु एज़ै बारै दी पुछ़णा लै डौरा थै।

³³यीशु तौंइऐ आपणै च़ेलेऊ आइलै कफरनहूम गांउ दी आशौ। घौरा भितै डेइऔ यीशुऐ आपणै च़ेलेऊ कु पुछ़ौ, “तुमै बाटा दी केथरै बारै दी थै चौपड़िंदै लागै औन्दै?”

³⁴सै च़ेलै शौरमा रै मारै च़ुटुक थाकै। कैलैकि सै बाटा दी इणौ थै लागै औन्दै चौपड़िंदै, “आमु मांझ़िया कु सारेऊ कु बौड़ौ कुण आ?”

³⁵तैबै यीशुऐ बोशियौ सै बारह च़ेलै आपु काऐ औटाइयौ बोलौ, “तुमु मांझ़िआ कु कुण च़ाहा बौड़ौ बौणनौ, सेऊ सारेऊ कु छ़ोटौ और सारेऊ रौ सेवादार बौणा लौ।” (सेज़ौ आदमी परमेश्‍वरा री नौज़री दी सारेऊ कु बौड़ौ हुआ सा)

³⁶तैबै तिणीऐ एक मांऊ तिऊं च़ेलेऊ काऐ आणौ। सेज़ौ मांऊ यीशुऐ आपणी उंगाल़ी ऐ च़ुंगौ और च़ेलेउलै बोलौ,

³⁷“केज़ौ भी आदमी ज़ुण मुं आइलै प्यार कौरा सा, कास छ़ोटौ मांऊ अपणावा लौ तैबै सौमझ़ौ कि सेऊ मुं आ लागौ औन्दौ अपणाऊ दै। ज़ेज़ौ मुं अपणावा लौ, सेज़ौ आदमी परमेश्‍वर अपणावा सा, ज़ुणिऐ हाऊं भेज़ौ औन्दौ।”

³⁸तैबै यहुन्ना नावां रै च़ेलै ऐ यीशु लै बोलौ, “गुरुजी, आमुऐ एक आदमी देखौ आ ज़ुण तुमारै नाऊं कौरी बुरी आत्मा थौ लागौ औन्दौ गाड़दै। आमुऐ कौरी तेसलै मौना, कैलैकि सेऊ तुमारै च़ुनै औन्दै च़ेलेऊ मांझ़िआ रौ नाईं थौ।”

³⁹यीशुऐ बोलौ, “तेस आदमी लै मौना ना कौरौ। कैलैकि कि ज़ुण मैरै नाऊं कौरीऐ हैरानी वाल़ै काम कौरा आ, सेऊ फेटी मुलै बुरौ नाईं बोलदौ।

⁴⁰ज़ुण आमारै विरोधा ई नाईं आ सै आमारै तौरफा ई।

⁴¹इणौ सौच़्च़ौ आ कि ज़ेज़ौ आदमी तुमु मसीह मैरै च़ेलै ज़ाणीऔ एक ग्लास पाणी पिलावा लौ तैबै परमेश्‍वर तेसलै ज़ुरुर इनाम दिआ आ।”

⁴²यीशुऐ इणौ भी बोलौ, “मुं माथै विश्वास छ़ाड़णै वाल़ौ, च़ाऊ सेऊ छ़ोहरु औलौ, केज़ौ भी आदमी तेस पापा री बाटा दी नीईंयौ तेस विश्वासा दी डगमगावा लौ, ता परमेश्‍वर तेसलै ज़ुरुर सौज़ा दिआ आ। इणै आदमी लै परमेश्‍वरा री सौज़ा मिलणै कु आच़्छ़ौ थौ कि तेसरै गौल़ै दी घौरटा रौ ज़ौंदर बानिऔ तेस गैहरी झ़िला दी डुबावा।

⁴³अगर तू आपणै हाथै इणौ काम कौरालौ, ज़ो ताऊं पापा री बाटा दी नीईंयौ विश्वासा दी डगमगावा लौ, तैबै ताऊं लै आच़्छ़ौ आ कि तेस हाथ पोरु काटै। आच़्छ़ौ आ कि टुंडै रौइयौ सौरगा दी डिआ, एथकु कि दुई हाथा कौरी नौरका दी डिया लौ,

⁴⁴‘ज़िऐ आदमी दी किड़ै लागा ई ज़ो केबी ना मौरदै, और तिदली आग केबी ना इशदी।’

⁴⁵अगर तैरौ बांगणौ ताऊं बुरी बाटा दी नियां लौ ता ताऊं लै आच़्छ़ौ आ कि तेस बांगणौ पोरु काटै। आच़्छ़ौ आ कि लौंगड़ै रौइयौ सौरगा दी डिआ, एथकु कि दुई बांगणै कौरी नौरका दी डिया,

⁴⁶‘ज़िऐ आदमी दी किड़ै लागा ई ज़ो केबी ना मौरदै, और तिदली आग केबी ना इशदी।’

⁴⁷अगर तेरी आख इणौ देखा ली कि तू विश्वासा ई डगमगाइयौ पापा री बाटा दी डेई गौ, ता तिऐं आख तू पोरु गाड़ै। ताउंलै आच़्छ़ौ आ कि तू काणै रौइयौ सौरगा दी डिया। नाईं ता दुइआ आखी कौरी नौरका दी डियाई,

⁴⁸‘ज़िऐ आदमी दी किड़ै लागा ई ज़ो केबी ना मौरदै, और तिदली आग केबी ना इशदी।’

⁴⁹कैलैकि हर एक आदमी आगी कौरी पौरखिया, और कुर्बानी भी लुणा ज़िणी।

⁵⁰रोटी खांदी बारै लूण आच़्छ़ौ आ। पर लुणा मांझ़िऐ दुजी च़िज़ै मिलाइऔ लुणा रौ स्वाद बिगड़ी जा लौ ता तेस लूण केथ कौरीऐ कौरा ई लुणुऔ? तुमै लोग लुणा ज़िणै ई। कैलैकि तुमै मुं माथै विश्वास छ़ाड़ाई। तुमै पापा री बाटा दी डेइयौ आपणै विश्वासा रौ स्वाद ना खोएउ। एकी-दुजै कु बौड़ै हुणै री इच़्छ़ा छ़ाड़ियौ एकी-दुजै आइलै मिली-ज़ुलियौ रौऔ।”