Read Pahari, Mahasu लुका 1 Bible Online

लुका 1 - Pahari, Mahasu bible

लुका 1

¹ओ थियुफिलुस साहब, यीशु मसिऐ ज़ो कुछ़ काम आमु मांझ़िऐ पुरौ कियौ आ, तिऊं बुशु रै बारै दी भौरी लोगुऐ लिखणे री कोशिश की आ।

²इऐ खुशी री खौबर लोगु झ़ांऊ यीशु रै तिऊं पैहलै च़ेलेऊ रै ज़ौरिऐ पौउंच़ौ आ ज़ुणिऐ इऐ बुशै आपणी आखी कौरीऐ पुरी औन्दै देखी थी और इऐ खुशी री खौबर आमुकै तिऊंकु मिली आ ज़ुण तेबी तिऐ ज़िउंदै मान थै।

³तैबै मुंइऐ यीशु रै बारै दी ज़नमा कु सारी बुशै पौरखियौ इणौ फैसलौ कियौ कि इऐ एक-एक बूश सुंच़ी सौमझ़िऔ तांउलै लिखु,

⁴ताकी ताउंकै पौतौ लागा की ज़ेज़ी शिक्षा ताउंलै मिली ऐन्दी और ज़ेज़ी तू सौच़्च़ी माना ई सै बूश ठीक और पाकी आ।

⁵सारी बुशु री शुरुआत यहुदी याजक जकरयाह नावां रै आदमी कु हुई आ ज़ुण यहुदिया रौ राज़ौ हेरोदेसा रै बौगता दी ज़िउंदौ थौ, जकरयाह याजक अबिय्याह नावां रै याजकीयै गुटा रौ आदमी थौ और जकरयाह री छ़ेउड़ी इलिशीबा थी हारुन नावां रै याजकु री खानदानी री।

⁶जकरयाह और इलिशीबा परमेश्‍वरा री नौज़रीऐ धौर्मी थै, और सै दुइया परमेश्‍वरा रै हुकम और विधी आच़्छ़ा कौरी माना थै।

⁷पर इलिशीबा रै कोई भी औलाद नाईं थी कैलैकि तिंआरी कूख बन्द थी और सै दुइया बुड़ै थै।

⁸एकी दिनै ज़ेबी जकरयाह रै गुटा रै लोग ज़ो याजक थै सै परमेश्‍वरा रै घौरा दी याजका रौ काम कौरा थै कैलैकि तेबी तिउंरी बारी थी।

⁹याजकु री रीती रिवाज़ा कौरी जकरयाह नावां री चिट्ठी निकल़ी कि सेऊ परमेश्‍वरा रै घौरा भितै डेइयौ धूप ज़ाल़ा

¹⁰धूपा ज़ाल़ना रै बौगतै लोगु री भीड़ बाइरै प्राथना कौरदै थी लागी ऐन्दी।

¹¹सेज़ै बौगतै जकरयाह कै परमेश्‍वरा रौ एक दूत बेदी री सुल़टी भिलै पौगड़ौ हुइयौ दिशौ।

¹²जकरयाह तेस दूता देखीयौ डौरौ और कांबदै लागौ।

¹³पर तिणी दूतै तेसलै बोलौ, “ओ जकरयाह, नाईं डौर कैलैकि ज़ो प्राथना तांऐ सन्तान पाइणा लै की आ, सै प्राथना परमेश्‍वरै शुणी गोई आ, ‘तेरी छ़ेउड़ी इलिशीबा रौ एक मांऊ हुआ, तू तेसरौ नाऊं यहुन्ना छ़ाड़ै,’

¹⁴तेस पैदौ हुइयौ ताऊं लै और भौरी लोगु लै बौड़ी खुशी हुआ आ,

¹⁵कैलैकि सेऊ प्रभु री नौज़री दी बौड़ौ हुआ। सेऊ केबी भी अंगुरा रौ रस और सूर नाईं पिंदौ। आपणी मां रै गर्भा कु ई सेऊ परमेश्‍वरा री पवित्र आत्मा कौरी भरपूर हुआ सा।

¹⁶ज़ैबै सेऊ बौड़ौ हुआ लौ तैबै सेऊ आपणै संदेशा कौरीऐ इस्राइलिऊ लोगु मांझ़िया कु भौरी लोगु आपणै प्रभु परमेश्‍वरा भिलै आणा आ।

¹⁷सेऊ परमेश्‍वरा रै दास, एलियाह भविष्यवक्ता ज़िणौ आत्मिक और शक्तिशाली हुणौ आ। सेऊ प्रभु रै ज़नमा कु पैहलै आशा, ताकी प्रभु कालै आदमी तैयार कौरा। ताकी सारेऊ रै मां-बाबा रौ मन आपणै लोल़डेऊ भिलै फेरा, और तिउंलै हुकम मानणै री शिक्षा दिआ आ।”

¹⁸जकरयाहा ऐ सौरगदूता कु पुछ़ौ, “ज़ो तांऐ बोलौ आ तेस हाऊं सौच़्च़ौ किणै कौरी मानु? कैलैकि हाऊं ता गो ऊ बुड़ौ हुई और मेरी छ़ेउड़ी भी गोई बुढ़ी हुई?

¹⁹तैबै सौरगदूतै तेसलै ज़वाब दैऔ, ‘मैरौ नाऊं ज़िब्राइल आ और हाऊं सौदा परमेश्‍वरा काऐ खौड़ौ रौआऊ। और तेसरी मिठी बुशै शुणाऊ। तिणीऐ ई हाऊं एज़ी खुशी री खौबरी कौरी ताऊं काऐ भेज़ौ ऊ।

²⁰और ज़ो बूश मुंइऐ ताऊं आइलै बोली आ, ताऐं तेथ माथै विश्वास नाईं कियौ, आबै ज़ेबी झ़ांऊ तैरौ छ़ोहरु नाईं औआ लौ तेबी झ़ांऊ तू लाटौ रौआ ई और कुछ़ भी बोली नाईं बौल़दौ कैलैकि ज़ो बूश मुंइऐ ताऊं लै बोली आ, सै बूश आपणै ठीक बौगता दी पुरी हुआ आ।’

²¹तैबै लोग दारा काऐ जकरयाह बाइरै पौखदै थै लागै औन्दै, सै परेशान थै हुऐ औन्दै कि जकरयाह कै परमेश्‍वरा रै घौरा भितै एती बौगत कैलै लागौ औलौ?

²²ज़ेबी जकरयाह भितरा कु बाइरै आशौ ता तिऊं लोगु आइलै सेऊ कुछ़ भी ना बोली बौल़ौ। और सै सौमझ़ी गौऐ कि इणीऐ परमेश्‍वरा रै घौरा भितै कोई दर्शण देखौ। सेऊ तिऊं आइलै इशारै कौरी बुशै लाइंदै लागौ कैलैकि सेऊ लाटौ बौणी गौ थौ।

²³ज़ैबै जकरयाह री सेवा कौरणै री बारी पुरी हुई तैबै सेऊ आपणै घौरै डैऔ।

²⁴तेथकु कुछ़ बौगता बासिऐ तेसरी छ़ेउड़ी इलिशीबा गौरकड़ी हुई और पांज़ा मिहनै झ़ांऊ तिंउऐ इऐ बुशै कासी आइलै ना बोली,

²⁵और सै आपणै ज़िवा दी सुंच़दै लागी कि परमेश्‍वर केती दयालु आ कि मुं आइलै केती बौड़ौ काम कियौ आ।”

²⁶ज़ैबै इलिशीबा रै छ़ौउऔ मीहनौ हुऔ, तैबै परमेश्‍वरै ज़िब्राइल नावां रौ दूत गलील परदेशा रै नासरत इलाकै दी,

²⁷मरियमा काऐ भेज़ौ ज़ुण बिण ब्याई थी। और तिंआरी मांगणी युसुफ नावां रै छ़ोहरु लै थी हुई ऐन्दी ज़ो दाऊद राज़ै री खानदानी रौ थौ।

²⁸परमेश्‍वरा रौ दूत मरियमा काऐ पौगड़ौ हुऔ और बोलदै लागौ, तेरी ज़ै-ज़ै कार हो, ताऊं माथै परमेश्‍वरा री दया हुई आ, और परमेश्‍वर ताऊं आइलै आ।

²⁹इऊं बुशै शुणियौ मरियम डौरी और हैरानी कौरीऐ सुंच़दै लागी कि एस ज़ै-ज़ैकारा री खुशी री खौबरी रौ का मतलब औलौ?

³⁰परमेश्‍वरा रै दूतै मरियमा लै बोलौ, “ओ मरियम डौरै नाईं कैलैकि परमेश्‍वरा री बौड़ी दया ताऊं माथै हुई आ।

³¹शुण! तू गौरकड़ी हुआई, और ताऊं कु एक छ़ोहरु हुआ, तू तेसरौ नाऊं यीशु छ़ाड़ै।

³²सेऊ सारेऊ कु बौड़ौ हुआ आ और तेसलै परमपरधान परमेश्‍वरा रौ छ़ोहरु बोलाई और प्रभु परमेश्‍वर तेसकै तेसरै पुरखा दाऊद राज़ै री राज़गादी दिआ सा।

³³और सेऊ इस्राइली लोगु माथै सौदा राज़ कौरा आ। तेसरौ राज़ केबी भी खातम नाईं हुन्दौ।

³⁴मरियमै परमेश्‍वरा रै दूता लै बोलौ, ‘इणौ किणै कौरी हुआ? हाऊं ता औज़ौ बिण ब्याई छ़ोटूड़ ऊ।’

³⁵परमेश्‍वरा रै दूतै तिंआलै ज़वाब दैऔ, ‘पवित्र आत्मा ताऊं दी आशा, और परमपरधान परमेश्‍वर ज़ुण सारेऊ कु बौड़ौ आ तेसरी शक्ति ताऊं माथै आशा। ज़ो छ़ोहरु ताऊं कु हुणौ आ सेऊ पवित्र हुणौ, और तेसलै परमेश्‍वरा रौ छ़ोहरु बोलाई।’

³⁶और शुण तेरी रिश्तैदार इलिशीबा भी बुड़ींदी बारै गौरकड़ी हुई आ। लोग तिंआलै बोला थै कि इआंरी आ कूख बन्द, पर तिंआरै आज़कालै छ़ौउऔ मीहनौ आ।

³⁷कैलैकि परमेश्‍वरा लै केज़ौ भी काम कठिण नाईं आसतौ।

³⁸एज़ी बुशा माथै मरियमै बोलौ, ‘देख, हाऊं ता परमेश्‍वरा री दासी ऊ, ज़िणौ ताऐं बोलौ आ, तिणी च़ांई हुऔ। तेथ बासिऐ सौरगदूत तिंया काऐ कु डेई गौ।’ ”

³⁹“कुछ़ दिना बासिऐ मरियम तैयार हुइयौ डांडैउ माथै यहुदा परदेशा रै एक इलाकै दी डेई।

⁴⁰ज़िऐ जकरयाह रौआ थौ तेसरै काऐ डेइयौ मरियमै तेसरी छ़ेउड़ी इलिशीबा कै ढाल की।

⁴¹ज़िणी ई इलिशीबै मरियमा री ढाल शुणी, तिणी ई इलिशीबा रै पेटा दी मांऊ हिलदै लागौ, और इलिशीबा परमेश्‍वरा री पवित्र आत्मा कौरीऐ भौरुई।

⁴²तैबै तिंआऐ ज़ोरै मरियमा लै बोलौ, ‘तू सारी छ़ेउड़ी मांझ़िया कु परमेश्‍वरा री नौज़री दी भौली ई, और तैरौ गर्भा रौ छ़ोहरु भी भौलौ आ।’

⁴³इऐ केती बौड़ी इज़्ज़ता री बूश आ, कि मैरै प्रभु री मां मुं ज़िणी छ़ेउड़ी कु मिलदै आशी आ।

⁴⁴ज़िणी ई ताऐं मुकै ढाल की आ, तिणी ई मैरै पेटा दी मांऊ खुशी कौरीऐ हिलदै लागौ।

⁴⁵भौली तू कैलैकि ताऐं विश्वास कियौ आ, कि ज़ो भी बूश परमेश्‍वरा री तौरफा कु बोली आ सै बूश पुरी हुआ आ! ”

⁴⁶तैबै मरियमै बोलौ, “हाऊं प्रभु री बौड़ाई कौराऊ,

⁴⁷आ… हा… मेरी आत्मा मैरै छ़ुटकारौ कौरणै वाल़ै परमेश्‍वरा री बौड़ाई कौरा आ।

⁴⁸कैलैकि परमेश्‍वरै आपणी दासी री गरीबी देखी आ एथीलै, ‘ओ परमेश्‍वर आज़ा कु मुलै जुगा-जुगा झ़ांऊ भौलौ बोलाई’

⁴⁹तिणी परमेश्‍वरै ज़ुण सारेऊ कु शक्ति वाल़ौ आ मुलै बौड़ै-बौड़ै काम किएई। तेसरौ नाऊं पवित्र आ।”

⁵⁰ज़ुण परमेश्‍वरा रौ डौर माना ई तिऊं माथै परमेश्‍वरा री दया तिंउरै सारी पीड़ी झ़ांऊ रौआ आ।

⁵¹परमेश्‍वरै आपणी बाई री एती शक्ति देखा ई, ज़ुण आपुलै बौड़ै बौणा थै सै किणै तित्तर-बित्तर किएई।

⁵²तिणी परमेश्‍वरै राज़ै-महाराज़ै कु तिऊंरौ हक्क छ़ुड़ाऔ आ, और गरीबु री छ़ाड़ी इज़्ज़त।

⁵³और भुखै लोगु लै खिलाई आच़्छ़ी-आच़्छ़ी रोटी, और सेठ गाड़ै खाली हाथै बाइरै। परमेश्‍वरै आपणै इस्राइली लोगु री मज़द की, और तिऊं आइलै कियौ औन्दौ आपणौ वायदौ नाईं बिसुरदौ।

⁵⁴परमेश्‍वरै आपणै इस्राइली लोगु माथी बौड़ी दया की, और तिऊं आइलै कियौ औन्दौ आपणौ वायदौ नाईं बिसुरदौ।

⁵⁵तिणीऐ आमारै पुरखा अब्राहम और तिंउरै वंशा आइलै वायदौ कियौ कि परमेश्‍वरा री दया तिऊं माथै सौदा बौणी रौआ।

⁵⁶मरियम कम सै कम चिया मिहनै झ़ांऊ इलिशीबा आइलै रौई, और तेथ बासिऐ डेई वापिस आपणै घौरै।

⁵⁷तैबै इलिशीबा रै औल़खिणा रै दीन पुरै हुऐ और तिंआरौ एक मांऊ हुऔ।

⁵⁸और इऐ खुशी री खौबर खरकच़ार तिंआरै आस-पड़ोसा दी और सारै रिश्तैदारु मांझ़िऐ फौइली गोई, कि प्रभुऐ तिंआ माथै बौड़ी दया की आ। तैबै सौभीऐ तिंआ आइलै खुशी मौनाई।

⁵⁹ज़ैबै सेऊ मांऊ आठा दिना रौ हुऔ तेबी सारै रिश्तैदार और गोश्टण तेस मांऊ रौ खतना कौरना लै कौठै हुऐ, सै तेस मांऊ रौ नाऊं तेसरै बाब जकरयाह ज़िणौ छ़ाड़दै लागै,

⁶⁰पर तेस मांऊ री आमै तेसरौ नाऊं छ़ाड़ना लै मौना की, और बोलौ, “एसरौ नाऊं यहुन्ना जा छ़ाड़णौ।”

⁶¹इणै शुणियौ सारै लोगुऐ हैरानी कौरीऐ पुछ़ौ, “कैलै”? तैरै टौबरा दी ता एज़ै नावां रौ कोई नाईं?

⁶²तैबै रिश्तैदारुऐ तेस मांऊ रै बाबा कु साना कौरीयौ पुछ़ौ।

⁶³तिणी जकरयाह ऐ लिखणा लै तौखती मांगी और तिदरा ई लिखौ कि एसरौ नाऊं यहुन्ना सा। इणै शुणियौ सारै हैरान हुऐ।

⁶⁴तैबै जकरयाह बेज़ौ बौणौ और परमेश्‍वरा री बौड़ाई कौरदै लागौ।

⁶⁵तेसरै आस-पड़ोसा दी रौइणै वाल़ै भौरी का लोग डौरी गौऐ, और इऐ बुशै यहुदा परदेशा रै सारै पहाड़ी इलाकै दी फौइली गोई।

⁶⁶सारै शुणनै वाल़ै आपणै ज़िवा दी सुंच़दै लागै कि एऊ छ़ोहरु किणौ औलौ इणौ पा? कैलैकि प्रभु री शक्ति एस मांऊ आइलै थी।

⁶⁷तैबै मांऊ रै बाब जकरयाह माथै परमेश्‍वरा री पवित्र आत्मा आशी और सेऊ भविष्यवाणी कौरदै लागौ।

⁶⁸इस्राइला रै प्रभु परमेश्‍वरा री बौड़ाई च़ांई हुई, कैलैकि परमेश्‍वरै लोगु माथै तौंइऐ दया कौरीयौ तिऊंरौ छ़ुटकारौ कियौ आ।

⁶⁹और आपणै दास दाऊदा रै वंशा कु आमु कालै एक पापा कु छ़ुटकारौ देणै वाल़ौ भेज़ौ।

⁷⁰ज़िणौ तिणीऐ पुराणै बौगता रै पवित्र भविष्यवक्ता रै ज़ौरिऐ बोलौ थौ,

⁷¹कि आबै आमै आपणै सारै दुश्मना रै हाथा कु बौच़ी ई।

⁷²परमेश्‍वरै आपणौ पवित्र वायदौ ज़ो आमारै पुरखा आइलै कियौ थौ तेस वायदौ याद छ़ाड़ियौ आपणै लोगु माथै दया की।

⁷³और सै कसम ज़ो परमेश्‍वरै अब्राहमा आइलै खाई थी

⁷⁴कि परमेश्‍वर आमु आमारै दुश्मना रै हाथा कु छ़ुड़ावा ताकी आमै आपणै दुश्मना कु निडर हुइयौ परमेश्‍वरा री सेवा,

⁷⁵तिंउरै सामनै पवित्र और नियम भौलाई कौरी सारी उमरीऐ कौरी सौका

⁷⁶और ओ छ़ोहरु ताउंलै लोग परमपरधान परमेश्‍वरा री तौरफा कु भेज़ौ औन्दौ भविष्यवक्ता बोलाई, कैलैकि तू प्रभु कालै लोगु तैयार कौरा ई।

⁷⁷तू तिऊं लोगु कै शिखावा ई कि पापा री माफी पाइयौ, छ़ुटकारौ किणौ मिला आ।

⁷⁸इयौ सब परमेश्‍वरा री बौड़ी दया कौरीऐ हुआ, ज़िणौ सुरज आमुलै प्याशै दैणा लै च़ौमका आ, तिणी ई परमेश्‍वर नौऐ काम कौरा आ ज़ेबी मसीह आमु काऐ आशा लौ।

⁷⁹न्यारै और मौरणै रै डौरा री छ़ांई दी रौइणै वाल़ेऊ लै पयाशौ दिआ, और आमारै कदम शान्ति कौरीयौ आच़्छ़ी बाटा दी सिधै हंडावा।

⁸⁰तैबै सेऊ मांऊ यहुन्ना बौड़दै लागौ और आत्मा दी मज़बूत औन्दै लागौ, और इस्राइली लोगु मांझ़िऐ सेऊ पौगड़ौ हुंदै झ़ांऊ सेऊ शुनशान ज़ागाह दी रौ।