Read Pahari, Mahasu लुका 10 Bible Online

लुका 10 - Pahari, Mahasu bible

लुका 10

¹इऊं बुशेऊ बासिऐ प्रभुऐ सत्तर च़ेलै तौंइऐ छ़ांटै और ज़ेज़ै-ज़ेज़ै शहर और ज़ागाह दी सेऊ डेउणै वाल़ौ थौ तिऐ-तिऐ यीशुऐ आपु कु पैहलै दुई-दुई च़ेलै भेज़ै।

²तिउंरै डेउणै कु पैहलै, यीशुऐ तिउंलै बोलौ, “पाच़ी ऐन्दी फसल ता भौरी सी, पर तिऐं फसली मेटणे वाल़ै ज़िमदार भौरी कम ई। एथीलै डोखरै रै मालिका कु औरज़ कौरौ कि आपणै डोखरै दी पाच़ी ऐन्दी फसली लौइणा लै ज़िमदार भेज़।”

³आबै डैऔ। और याद छ़ाड़ौ कि हाऊं तुमु भेरीऊ ज़िणै, इणै लोगु काऐ भेज़ाऊ ज़ुण खतरनाक शाल़टेऊ ज़िणै ई।

⁴तुमै डेउंदी बारै आपुकै ना बटुऐ, ना झ़ोल़ै, इदरा झ़ांऊ कि दुजी ज़ोड़ी बूट भी ना निऐऊ, और बाटा दी कासी काऐ टेकियौ ढाल भी ना कौरेऊ।

⁵और ज़ेज़ै घौरा दी तुमै डिआलै, पैहलै बोलेऊ कि एस घौरा दी शान्ति मिला।

⁶और अगर तेस घौरा दी परमेश्‍वरा कु शान्ति पाइणै रै लायक आदमी औलै, ता तिउंलै आशीष मिला सा, अगर सै एथरै लायक नाईं औलै ता सै आशीष और शान्ति वापिस तुमुकै आशा सा।

⁷ज़ेज़ै घौरा दी तुमै डिआलै, सेज़ै घौरा दी रौएऊ, और ज़ो कुछ़ मिला लौ सेज़ौ खाऐ पिएऊ, कैलैकि मज़दुरा लै तेसरी मज़दुरी मिलणी च़ांई, घौरा-घौरा कै नाईं रिटणौ।

⁸ज़ेज़ै इलाकै दी तुमु खुशी कौरी माना लै और ज़ो कुछ़ सै तुमुलै खाणा लै दिआ लै तेस खुशी कौरीऐ खाएऊ।

⁹तिदलै बिमार लोगु तुमै च़ांगै कौरेऊ, और तिउंलै बोलेऊ कि परमेश्‍वरा रौ राज़ तुमारै नज़दीक पौउंच़ी गौ आ।

¹⁰पर ज़ेज़ै इलाकै दी तुमु नाईं माना लै ता तुमै तेस इलाकै री सड़की दी डेइयौ बोलेऊ,

¹¹तुमारै इलाकै री धूड़ भी ज़ो आमारै बांगणै दी लागी ऐन्दी, इऐं धूड़ आमै तुमु काऐ झ़ाढ़ी आ, तैबै भी तुमै इणौ ज़ाणौ कि, “परमेश्‍वरा रौ राज़ तुमारै नज़दीक पौउंच़ी गौ आ।

¹²हाऊं तुमु आइलै बोलाऊ कि, फैसलै रै दिनै तेस इलाकै री हालत सदोम शहरा कु भी बुरी हुणी आ।”

¹³तैबै यीशुऐ दुई शहर खुराजीन और बैतसैदा लै दुखा कौरीऐ बोलौ, हाऐ खुराजीन और बैतसैदा: ज़ो शक्ति वाल़ै काम मुंइऐ तुमु मांझ़िऐ किएई अगर तिऊं काम हाऊं बुरै इलाकै सूर और सैदा दी कौरा थौ ता सै तिंउरै बौणै औन्दै बोरी रै जुड़कै भिड़ीयौ और आपणै ज़िवा दी छ़ारा मांडियौ केबकै आपणौ मन पापा कु बौदल़ा थै।

¹⁴पर फैसलै रै दिना दी तुमारी हालत तिऊं सूर-सैदा इलाकै कु भी ज़ादी बुरी हुणी आ।

¹⁵ओ कफरनहूमा रै लोगुओ, का तुमु सौरगा झ़ांऊ उंच़ौ कौरा ई? तुमु ता तौल़ै उतारा ई पैताल़ा लै।

¹⁶तैबै यीशुऐ आपणै बारह च़ेलेउलै बोलौ, “ज़ो लोग तुमारी शुणाई सै मेरी शुणाई, और ज़ो तुमारौ संदेश नाईं मानदै, सै मुं नाईं मानदै, और ज़ो मेरी बूश नाईं मानदै सै तेस भी ना मानदै ज़ुणिऐ हाऊं भेज़ौ ऊ।”

¹⁷तैबै सै सत्तर च़ेलै यीशु काऐ खुशी कौरीऐ वापिस आशै, और सै बोलदै लागै, “ओ प्रभु तुमारै नावां कौरीऐ ता बुरी आत्मा भी आमारौ हुकम माना ई।

¹⁸यीशुऐ बोलौ, ‘मुंइऐ शैतान बिज़ल़ी बाशीऐ सौरगा कु तौल़ै हारीयौ पौड़दै देखौ आ।’

¹⁹देखौ मुंइऐ तुमुकै साप और बिच़्छ़ु लाता थालै झ़ांगणै रौ, और शैताना री सारी शक्ति माथै हक्क आ दैऔ औन्दौ, और केज़ी भी च़िज़ा कु तुमुलै कोई भी नुकसान नाईं औन्दौ।

²⁰तैबै भी तुमै खुश नाईं हुएऊ कि बुरी आत्मा तुमारै हुकम माना आ, पर एथलै खुश हुएऊ कि तुमारै नाऊं सौरगा दी ई लिखै औन्दै।”

²¹और सेज़ै बौगतै यीशुऐ पवित्र आत्मा दी खुशी कौरीऐ भौरुइऔ बोलौ, “ओ मैरौ बाब” सौरग और धौतरी रै प्रभु, हाऊं तैरौ धन्यबाद कौराऊ कि ताऐं इऐ बुशै ज्ञानी और सौमझ़दारु कु च़ोरी छ़ाड़ी और लोल़डेऊ माथै पौगड़ौ की, कैलैकि, “ओ बाब ताउंकै इणौ ई आच़्छ़ौ लागा।”

²²तैबै यीशुऐ आपणै च़ेलेऊ लै बोलौ, “मैरै बाबै मुकै सब कुछ़ सौंभाल़ी गौ आ। कोई ना ज़ाणदौ कि छ़ोहरु कुण आ, सिरफ बाब ज़ाणा सा, और बाब कुण आ इणौ भी कोई ना ज़ाणदौ सिरफ छ़ोहरु या ज़ास माथै छ़ोहरु तेस पौगड़ौ कौरणै च़ाहा लौ।

²³तैबै यीशुऐ आपणै च़ेलेऊ भिलै मुड़ियौ एखुलै दी बोलौ, भौली सै आखी ज़ो इणौ देखदै ई लागी औन्दी।

²⁴कैलैकि हाऊं तुमुलै बोलाऊ कि भौरी भविष्यवक्तुऐ, और राज़ेऊ ऐ च़ाऔ कि सै तिऐं बूश देखा और शुणा, ज़ो बुशै तुमुऐ हाऊं कौरदै देखौ और बोलदै शुणौ ऊ, पर सै इऊं बुशै ना देखी बौल़ै और ना शुणी बौल़ै।”

²⁵एकी दिनै ज़ेबी यीशु शिक्षा दैंदै थौ लागौ औन्दौ ता एक शास्त्री उठौ और इणै बोलीयौ यीशु पौरखदै लागौ, कि सौदा री ज़िन्दगी पाइणा लै मुंइऐ का जा सा कौरणौ?

²⁶यीशुऐ तेसलै ज़वाब दैऔ, “मुसा रै नियमा दी का सा लिखौ औन्दौ? और ताऐं किणौ पौड़ौ आ?

²⁷तिणी आदमीऐ ज़वाब दैऔ, इणौ आ लिखौ औन्दौ कि, ‘तू आपणै ज़िवा कौरीऐ, आपणै पुरै प्राणा कौरीऐ, सारी शक्ति कौरीऐ और पुरै दिमागा कौरीऐ परमेश्‍वरा आइलै प्यार कर, और ज़िणौ प्यार तू आपु आइलै कौरा ई तिणौ प्यार तू आपणै आस-पड़ोसा रै लोगु आइलै भी कर।’

²⁸यीशुऐ शास्त्री लै बोलौ, ‘तू ठीक बोलाई, इणौ ई कर तैबै ताउंलै सौदा री ज़िन्दगी मिला आ।’

²⁹पर तिणी शास्त्री ऐ आपुलै धौर्मी सौमझ़िऔ यीशु कु पुछ़ौ कि, मैरौ पड़ोसी कुण आ?

³⁰यीशुऐ तेसलै बोलौ, ‘कि एक काआणी शुण, एक आदमी यरुशलेम शहरा कु यरीहो गांवा लै थौ लागौ औन्दौ डेउंदै, बाटा दी सेऊ च़ोर-डाकुऐ घेरौ और तेसरै जुड़कै च़िरै और सेऊ पिटीऔ अदमौरौ कियौ, और आपु भागै तिदरु पोरु।

³¹तैबै इणौ हुऔ कि सेज़ी बाटा दी एक यहुदी याजक आशौ तिणीऐ सेऊ अदमौरौ आदमी देखौ और तेसकु बारुइयौ तिदरु पोरु डैऔ।

³²इणी एक लेवी ज़ाती रौ आदमी भी तेशी आलै आशौ और सेऊ भी तेसकु बारुइयौ तिदरु पोरु डैऔ।

³³तैबै सामरी परदेशा रौ आदमी तेशी आलै आशौ और तिणीऐ सेऊ अदमौरौ आदमी देखौ और तेस माथै तरस खाई।

³⁴सेऊ तेस अदमौरै आदमी काऐ आशौ और तेसरै ज़खमा दी तेल और दवाई लाइयौ पट्टी बानी और आपणै गादै माथै बोशाल़ीयौ आपु आइलै एकी सरायं दी निऔं तिऐ तेसरी सेवा की।

³⁵दुजै दिनै तिणी सामरी आदमीऐ सरायं रै मालिका कै दुई दिनार दै, और बोलौ एसरी सेवा कौरै ज़ो कुछ़ तैरौ औज़ौ लागा लौ तेस हाऊं वापसी दी आशीयौ ताऊं कै दिआऊ।’

³⁶तेथ बासिऐ यीशुऐ तेस शास्त्री लै बोलौ, ‘आबै तेरी सौमझ़ी दी तेस अदमौरै आदमी ज़ुण डाकुऐ पिटौ, तेसरौ पड़ोसी कुण बौणौ तिऊं चिआ मांझ़िया कु ज़ुण तेशी आलै बाटा दी आशै ई?’

³⁷तिणी शास्त्री ऐ ज़वाब दैऔ, ‘सेऊ आदमी ज़ुणिऐ तेस अदमौरै आदमी माथै दया की आ।’ यीशुऐ बोलौ, ‘डेऊ तू भी इणौ कर।’ ”

³⁸ज़ैबै यीशु और तेसरै च़ेलै डेउंदै थै लागै औन्दै तैबै यीशु एकी गांवा दी डैऔ, तिऐ मारथा नावां री एकी छ़ेउड़ीऐ यीशु आपणै घौरै निऔं

³⁹तिंआरी एक बौइण थी ज़ासरौ नाऊं मरियम थौ, मरियम यीशु री लाता काऐ बोशियौ यीशु रै वच़न शुणा थी।

⁴⁰पर मारथा रोटी चाणदै-चाणदै निराश हुई गोई थी तैबै मारथा तिऊं काऐ आशीयौ बोलदै लागी, “ओ प्रभु का ताउंकै फिकर नाईं आसती कि मेरी बौइणिऐ हाऊं कामा कौरना लै एखुली छ़ाड़ी गो ऊ? आबै इआंलै बोल कि मेरी मज़द कर।”

⁴¹यीशुऐ तिंआलै ज़वाब दैऔ, “मारथा ओ मारथा तू भौरी बुशा लै फिकर कैलै कौरा ई और तू घबरा कैलै ई?

⁴²पर एक बूश ज़ुरुरी आ कि मरियमै सै आच़्छ़ी ज़ागाह च़ुनी गोई ज़ो तिंआकु कादी ना छ़ुड़ाइंदी।”