Read Pahari, Mahasu लुका 17 Bible Online

लुका 17 - Pahari, Mahasu bible

लुका 17

¹तैबै यीशुऐ आपणै च़ेलेऊ लै बोलौ, “लोगु कै पाप कौरना लै मुसीबत ता आशा ई, पर फिटकार तिऊं लोगु लै ज़ासरी वज़ाह कु इऐ मुसीबत आशा ई।

²ज़ुण इऊं छ़ोटेऊ मांझ़िया कु कास एक भी ज़ौबरीयै मुसीबता दी पा लौ, तेसलै ता आच़्छ़ौ इणौ हुआ थौ कि तेस आदमी रै गौल़ै दी घौरटा रौ ज़ौंदर बानियौ समुन्दरा दी पा।

³हाऊं तुमु खौबरदार कौराऊ। अगर तैरौ विश्वासी भाई तैरै विरोधा दी बुरौ कौरालौ, ता तेस डांटियौ सौमझ़ाऔ। अगर सेऊ पछता लौ ता तेस माफ कौरौ।

⁴अगर सेऊ दिना दी साता बारै भी तैरै विरोधा ई बुरौ कौरा, और आशीयौ बोला कि हाऊं पछताऊ मुं माफ कर, ता तू तेस माफ कर।”

⁵तैबै भेज़ै औन्दै च़ेलेउऐ प्रभु लै बोलौ, “आमारौ विश्वास बौड़ाऊ।”

⁶यीशुऐ तिउंलै ज़वाब दैऔ, “अगर तुमारौ विश्वास राई रै गुल़ै ज़ेती भी औआ थौ, ता तुमै एस किमु रै पेड़ा लै बोलालै, कि तू ज़ौड़ी कु पोटुइयौ समुन्दरा दी लाग। ता सेऊ तुमारी बूश माना थौ।”

⁷ज़ैबै कुण नुकुर डोखरै बाइयौ या भेरी च़ारियौ आशा सा, “का तेसरौ मालिक तेसलै इणौ बोला कि फेटी आश रोटी खा?

⁸का सेऊ इणौ ना बोलदौ, ‘पैहलै मुलै रोटी चाण, ज़ेबी झ़ांऊ हाऊं खाई-पी औ फारीक ना औलौ, तेबी झ़ांऊ मेरी सेवा कर तेथ बासिऐ खाऐ तू।’

⁹आपणौ हुकम पुरौ कौरना लै सेऊ मालिक आपणै तेस नुकरा लै शाबाशी केबी ना दैंदौ।

¹⁰इणै ऐ कौरीऐ ज़ैबै तुमै मैरौ हुकम माना लै, ता तुमुऐ भी इणौ बोलणौ आ कि आमै तारीफा रै जोगी नाईं आसतै। आमै ता नुकुर ई ज़ुण आपणौ फरज़ पुरौ कौरदै ई लागै औन्दै।”

¹¹यीशु आपणै च़ेलेऊ आइलै यरुशलेम शहरा लै च़ाल पौड़ौ, तैबै सै सामरीया और गलील इलाकै बाटीऐ लागै डेउंदै।

¹²ज़िणी सै एकी गांवा दी डेवै तिऐ दख दुडड़ै तिउंकै दस कोढ़ी मिलै।

¹³तिंउऐ ज़ोरै हाकै मारीयौ बोलौ, “ओ यीशु, ओ मालिक आमु माथै दया कर।”

¹⁴यीशुऐ तिऊं भिलै देखीयौ बोलौ, “डैऔ यरुशलेमा दी परमेश्‍वरा रै घौरा दी आपणै याजकु कै देखाल़ियौ। तैबै खरकच़ार डेउंदै-डेउंदै तिऊंरौ कोढ़ ठीक हुई गौ आ।”

¹⁵तिऊं मांझ़िऐ ज़ैबै एकीऐ देखौ कि हाऊं च़ांगौ हुई गो ऊ, ता सेऊ वापिस यीशु काऐ आशौ और ज़ोरै-ज़ोरै बोलदै लागौ, “हाऊं ठीक हुई गो ऊ परमेश्‍वरा री बौड़ाई च़ांई हुई।”

¹⁶सेऊ यीशु रै बांगणै माथै पौड़ीयौ यीशु रौ धन्यबाद कौरदै लागौ सेऊ आदमी एक सामरी थौ।

¹⁷यीशुऐ तेसकु पुछ़ौ, “का मुंइऐ दस कोढ़ी आदमी ठीक नाईं कियै, तैबै नौ आदमी किएई?”

¹⁸का परमेश्‍वरा री बौड़ाई कौरदै एका परदेशी वापस आशौ आ?

¹⁹यीशुऐ तेस आदमी लै बोलौ, “आबै उठ, और डेऊ तैरौ ज़ो विश्वास आ तिणीऐ तू च़ांगौ कियौ ई।”

²⁰ज़ैबै फरीसी लोगुऐ यीशु कु पुछ़ौ, “परमेश्‍वरा रौ राज़ केबी आशा आ?” तैबै यीशुऐ तिउंलै ज़वाब दैऔ, “परमेश्‍वरा रौ राज़ दिशणै रै रुपा दी नाईं आशदौ,

²¹और ना लोग इणौ बोलदै कि देखौ परमेश्‍वरा रौ राज़ इदै आ या तिऐ आ, देखौ परमेश्‍वरा रौ राज़ ता तुमु मांझ़िऐ आ।”

²²तैबै यीशुऐ च़ेलेऊ लै बोलौ, “इणै दीन आशणै ई ज़ेथदी तुमै मुं आदमी रै छ़ोहरु मांझ़िया कु एक दीन देखणौ च़ाहा लै पर नाईं देखी बौल़दै।”

²³लोग तुमुलै बोलालै, देखौ मसीह तिऐ आ या इदै आ। पर तुमुऐ डेउणौ नाईं और ना तिऊं पिछ़ु हुणौ।

²⁴कैलैकि ज़िणी, बिज़ल़ी गौईणी रै एकी धुरै कु दुजै धुरा झ़ांऊ च़ौमका आ, तिणी हाऊं आदमी रौ छ़ोहरु भी आपणै दिना दी पौगड़ौ हुआ सा।

²⁵पर एथकु पैहलै मुं आदमी रै छ़ोहरुऐ भौरी दुःख जा ई उठाउणै। और एस जुगा रै लोग मुं बिगानौ सौमझ़ा ई।

²⁶ज़िणौ आमारै पुराणै स्याणै नूह रै बौगता दी हुऔ आ, तिणी मुं आदमी रै छ़ोहरु रै बौगता दी भी हुआ सा।

²⁷ज़ेबी झ़ांऊ नूह समुन्दरी ज़हाज़ा दी ना डैऔ, सेज़ै दिना झ़ांऊ लोग खा-पिआ थै और तिऊं मांझ़िऐ शादी-ब्याह हुआ थै। तैबै इणौ पाणी लागौ कि सब कुछ़ खातम हुऔ।

²⁸और तिणी ई, ज़िणौ लूत नावां रै आदमी रै बौगता दी, ज़ुण आमारौ पुराणौ स्याणौ थौ, कि लोग थै खान्दै-पिंदै और लेण-देण कौरदै, पेड़-पौधै लाइंदै, और घौर बार चाणदै लागै औन्दै।

²⁹पर ज़ेज़ै दिनै लूत सदोम इलाकै कु निकल़ौ सेज़ै दिनै सौरगा कु आग और दारु बौरसै और तिदलै सारै लोग खातम कियै।

³⁰हाऊं आदमी रौ छ़ोहरु पौगड़ौ हुणै रै दिना दी भी इणौ हुणौ आ।

³¹सेज़ै दिनै ज़ुण छ़ापरा माथै औलौ और तेसरौ सामान औलौ घौरा भितै, तैबै सेऊ तेस समाना निंदै नाईं आशा, तिणी ज़ुण डोखरै दी औलौ सेऊ भी वापिस घौरै नाईं आशा।

³²लूता री छ़ेउड़ी याद छ़ाड़ौ (ज़ुणिऐ परमेश्‍वरा रौ हुकम नाईं मानौ और पिछ़ाऊं मुड़ियौ देखौ और सै तेबी ई लुणा रौ खाम्बौ बौणी)।

³³ज़ुण-कुण आपणै प्राण बौच़ाउणै च़ाहा लौ सेऊ तेस खातम कौरा, और ज़ुण कौरा तेस खातम सेऊ आ बौच़ावा।

³⁴हाऊं तुमुलै बोलाऊ, “सेज़ी राचीऐ दुई आदमी एकी च़ारपाई माथै औलै सुतै औन्दै तिऊं मांझ़िऐ कु एक निणौ और दुजौ छ़ाड़णौ तिऐ।”

³⁵दुई छ़ेउड़ी ज़ांज़ै पिशदै औली तिऊं मांझ़िऐ कु एक निणी दुजी छ़ाड़णी तिऐ।

³⁶दुई ज़ौणै डोखरै दी औलै एक निणौ एक छ़ाड़णौ तिऐ।

³⁷इणै शुणियौ तिंउऐ यीशु कु पुछ़ौ, “ओ प्रभु आ एज़ी बुशै किऐ औणी आ?” यीशुऐ तिउंलै बोलौ, “ज़िणौ गौरुड कौठै हुणै कु पौतौ लागा कि इदरा बाटीऐ कुछ़ मौरौ औन्दौ आ, तिणी ज़ेबी तुमै भी इणी बुशै शुणा लै या देखा लै तैबै तुमुकै भी पौतौ लागा कि सेऊ बौगत नज़दीक आ।”