Read Pahari, Mahasu लुका 2 Bible Online

लुका 2 - Pahari, Mahasu bible

लुका 2

¹सेज़ै दीनु दी औगस्तुस नावां रै रोमी राज़ै हुकम दैऔ कि रोमी राज़ा रै सारै लोग आपणै-आपणै नाऊं दर्ज़ कौरौ।

²इऐ पैहली नाऊं लिखाई थी, और इऐ तेबी हुई ज़ेबी क्विरिनियुस नावां रौ आदमी सीरिया देशा रौ आफसर थौ।

³तैबै सारै लोग आपणै नाऊं लिखाउंदै आपणै-आपणै इलाकै दी डेवै।

⁴युसुफ भी ज़ुण गलील परदेशा रै नासरत गांवा रौ थौ, आपणै नावां लिखाउंदै यहुदा परदेशा दी दाऊदा राज़ै रै गाऊं बैतलैहमा दी डैऔ। कैलैकि सेऊ दाऊदा री खानदानी रौ थौ।

⁵सेऊ आपणी मंगेतर मरियमा आइलै ज़ुण गौरकड़ी थी तिऐ नाऊं लिखाउंदै डैऔ।

⁶तिंउरै तिऐ रौइणा रै बौगता दी मरियमा रै, औल़खिणा रै दीन पुरै हुऐ।

⁷मरियमा रै तिऐ पैहलौ ज़ाऔ हुऔ और तिंआऐ सेऊ जुड़कै दी मेटाइयौ खोरली दी छ़ाड़ौ, कैलैकि तिउंकै सरायं दी रौइणा लै ज़ागाह नाईं थी।

⁸सेज़ै इलाकै दी कुछ़ भेराल़डु थै ज़ुण राची, थाचा दी रौइयौ आपणै शाल़ा री च़ोकीदारी कौरा थै। भेराल़डु आपणी भेरीऊ ज़ागदै

⁹सेज़ी राची परमेश्‍वरा रौ एक दूत तिऊं काऐ आशौ और तिऊं भेराल़डु रै च़ारौ तौरफा दी प्याशौ च़ौमकौ। तैबै तेस देखीयौ सै भौरी डौरी गौऐ

¹⁰तिणी दूतै तिउंलै बोलौ, “डौरौ नाईं” कैलैकि हाऊं तुमुकै आज़ बौड़ी खुशी री खौबर शुणाउवाऊ ज़ो सारै लोगु लै आ।

¹¹आज़ दाऊदा रै इलाकै बैतलैहम गांवा दी तुमारौ छ़ुटकारौ कौरणै वाल़ौ पैदौ हुई गौ आ ज़ो प्रभु मसीह आ।

¹²और तेसरी निशाणी तुमुलै इणी सा, कि तुमुकै एक मांऊ खोरली भितै जुड़कै दी मेटाऔ औन्दौ मिला सा।

¹³तैबै तिऐ सौरगदूता आइलै सौरगा रै भौरी दूत परमेश्‍वरा री बौड़ाई कौरदै और इणै बोलदै दिशै,

¹⁴“सौरगा दी परमेश्‍वरा री बौड़ाई च़ांई हुई। और धौतरी माथै तिऊं लोगु लै शान्ति च़ांई मिली ज़ासकु परमेश्‍वर खुश हुआ आ।”

¹⁵ज़ेबी सौरगदूत तिऊं काऐ कु सौरगा लै डेवै तैबै भेराल़डु आपु मांझ़िऐ बोलदै लागै कि, आशौ आमै बेतलैहमा लै डेई ई ज़ो बूश प्रभुऐ आमुकै शुणाई आ तिऐं आमै देखी ई।

¹⁶तैबै सै तिदरु फेटी डेवै, तिंउऐ तिऐ मरियम, युसुफ और खोरली भितै सेऊ मांऊ देखौ।

¹⁷इणै देखीयौ तिऊं भेराल़डुऐ सै बूश ज़ो एस मांऊ रै बारै दी पैहलै शुणी थी सै सारेऊ कै बोली।

¹⁸भेराल़डु री इऊं बुशै शुणियौ सारै लोग हैरान हुऐ ज़ो तिऐ थै।

¹⁹पर मरियमै इऐ सारी बुशै शुणियौ आपणै ज़िवा दी छ़ाड़ी और सुंच़दै लागी।

²⁰भेराल़डु लै, ज़िणौ सौरगदूतै बोलौ औन्दौ थौ तिणौ सारौ शुणियौ और देखीयौ परमेश्‍वरा री बौड़ाई और स्तुति कौरी-कौरीयौ तिदरु वापिस डेवै।

²¹आठा दिना बासिऐ ज़ैबै तेस मांऊ रौ खतना हुऔ। तैबै तेसरौ नाऊं यीशु छ़ाड़ौ ज़ो सौरगदूतै तेसरै गर्भा दी आशणै कु पैहलै बोलौ थौ।

²²कुछ़ बौगता बासिऐ मुसा भविष्यवक्ता रै नियमा कौरीऐ तिंआरै शुद्ध हुणै रै दीन पुरै हुऐ, तिंउऐ यीशु परमेश्‍वरा रै घौर यरुशलेमा दी निऔं।

²³ज़िणौ प्रभु रै नियमा दी थौ लिखौ औन्दौ कि केज़ौ भी पैहलौ छ़ोहरु प्रभु कालै पवित्र हुआ सा।

²⁴और प्रभु रै नियमा दी ज़िणौ ठीक थौ, कबुतरा रै ज़ोड़ै या पंडुका रै ज़ो कबुतरा ज़िणै हुआई देखणा लै, तिंउऐ सै आणियौ बौल़ी किऐ।

²⁵सेज़ै बौगता दी यरुशलेमा दी शमौन नावां रौ एक आदमी थौ ज़ुण धौर्मी और परमेश्‍वरा रौ भौगत थौ, सेऊ पवित्र आत्मा कौरीऐ भरपूर थौ, और सेऊ आपणै लोगु इस्राइला लै सुख शान्ति पौखदै थौ लागौ औन्दौ।

²⁶पवित्र आत्मै तेसरै ज़िवा दी बूश थी पाई ऐन्दी कि, ज़ेबी झ़ांऊ तू परमेश्‍वरा री तौरफा कु भेज़ौ औन्दौ मसीहा ना देखा लौ तेबी झ़ांऊ तू नाईं मौरदौ।

²⁷और पवित्र आत्मा रै बोलणै माथै शिमौन परमेश्‍वरा रै घौरा दी डैऔ और सेज़ै दिना दी मरियम और युसुफा रै भी मांऊ यीशु परमेश्‍वरा रै घौरा दी थौ आणौ औन्दौ ज़िणौ तिंउरै नियमा दी थौ।

²⁸और शिमौन भी तिऐ थौ, तिणीऐ सेऊ मांऊ आपणी उंगाल़ी दी पाकड़ौ और परमेश्‍वरा री बौड़ाई कौरदै लागौ।

²⁹ओ प्रभु, ऐबै तू आपणौ दास शान्ति कौरीऐ आपु काऐ औटाऊ। ज़िणौ तैरै वच़ना दी आ।

³⁰कैलैकि मेरी आखी ऐ छ़ुटकारौ दैणै वाल़ौ देखी गौ आ।

³¹ज़ुण ताऐं सौभी लोगु लै भेज़ौ आ।

³²और सेऊ एक इणौ प्याशौ आ ज़ुण सारै देशा और दुजी ज़ाती रै लोगु रै सामनै परमेश्‍वर पौगड़ौ कौरा आ, और तैरै आपणै लोग इस्राइला लै बड़ाई आ।

³³यीशु रै बारै दी ज़ो कुछ़ शमौन थौ बोलदै लागौ औन्दौ, तेसरी बुशै शुणियौ तेसरै मां बाब हैरान हुऐ।

³⁴तैबै शमौन तिउंलै आशीष देई और बोलौ, “मरियम! एऊ मांऊ ता परमेश्‍वरा री तौरफा कु च़ुनौ औन्दौ निशाण आ, भौरी सारै इस्राइली लोग एस नाईं मानदै और एज़ी बूश तिऊं इस्राइला लोगु नाश कौरा ई पर भौरी सारै इस्राइली लोग बौच़णै ई, ज़ासरै विरोधा ई बुशै ला ई।

³⁵भौरी लोगु रै विच़ार पौगड़ौ हुणै ई और तुमुकै भौरी दु:ख हुणौ आ ज़िणौ तलवारी कौरी वार-पार छ़ेद हुआ आ।”

³⁶एक, भविष्यवाणी कौरणै वाल़ी छ़ेउड़ी थी ज़ासरौ नाऊं हन्ना थौ। सै भी सेज़ै बौगतै तिऐ थी। और सै अशेर खानदानी मांझ़िऐ कु फनुऐल नावां रै आदमी री छ़ोटूड़ थी। ज़ेबी तिंआरी शादी हुई तेथकु साता साला बासिऐ तिंआरौ बोउटौ मौरौ पोरु और सै विधवा हुई। और सै भौरी बुढ़ी थी।

³⁷ऐबै तिंआरी उमर 84 साल थी और सै परमेश्‍वरा रै घौरा छ़ाड़ियौ केशी ना डिआ थी। सै ब्रौत और प्राथना कौरी कौरीयौ राची दिनै परमेश्‍वरा री आराधना कौरा थी।

³⁸और सेज़ै बौगतै तिऐ आशीयौ परमेश्‍वरा रौ धन्यबाद कौरदी थी लागी औन्दी, और तिऊं सभी कै ज़ुण यरुशलेम रै छ़ुटकारै पौखदै थै लागै औन्दै, यीशु रै बारै दी बुशै लाइंदै लागी।

³⁹ज़ैबै युसुफ और मरियमै प्रभु रै नियमा कौरीऐ सारौ काम पुरौ कियौ, तैबै सै गलील परदेशा दी आपणै गांव नासरता लै डेई गौऐ।

⁴⁰यीशु बौड़दै लागौ, आत्मा दी मज़बूत और औकल बुद्धी कौरीऐ भी भौरिदौ लागौ, और परमेश्‍वरा री दया तेस माथै थी।

⁴¹हर सालै यीशु और यीशु रै मां-बाब फसह रै साज़ै मनाउणा लै यरुशलेमा लै डिआ थै इणौ कौरणौ सारै यहुदी लोगु लै ज़रूरी थौ।

⁴²ज़ेबी यीशु बारह साला रौ थौ। तैबै सै सारै साज़े लै यरुशलेमा लै डेवे, ज़िणै सै हर सालै डिआ थै।

⁴³ज़ैबै सै साज़ै रै दीन पुरै हुऐ तैबै सै आपणै घौरै वापिस डेवै और मांऊ यीशु रौऔ यरुशलेम दी, और तेसरै मां-बाबा कै ना लागौ पौतौ।

⁴⁴तैबै तिंउऐ सौमझ़ौ कि सेऊ ओरी लोगु आइलै औलौ। एकी दीन हांडियौ बितणै बासिऐ सै यीशु आपणै पड़ौसी और ज़िऐ तिंउरै ज़ाणनै वाल़ै थै तिऐ लोड़दै लागै।

⁴⁵पर ज़ैबै तिऊं कै यीशु नाईं मिलौ तैबै सै लोड़दै-लोड़दै यरुशलेमा दी वापिस पौउंच़ै।

⁴⁶और चीज़ै दिना बासिऐ तिंउऐ यीशु परमेश्‍वरा रै घौरा रै खौल़ै दी तिऊं मांझ़िऐ बोशौ औन्दौ देखौ ज़ुण तिऐ शिक्षा दिया थै। और सेऊ तिउंरी शुणदै और सवाला पुछदै तेसरै मां-बाबै देखौ।

⁴⁷ज़ेती भी तिऐ शुणदै थै लागै औन्दै सै सब यीशु री औकल और ज़वाबा शुणियौ हैरान थै।

⁴⁸तैबै यीशु रै मां-बाब आपणै छ़ोहरु देखीयौ हैरान हुऐ और तेसरी आमै मरियमै तेसलै बोलौ ओ मैरौ छ़ोहरु ताइंऐ आमु आइलै इणौ बरताव कैलै कियौ। देख तैरौ बाब और हाऊं केती परेशानी कौरीऐ थै ताऊं लोड़दै लागै औन्दै।

⁴⁹यीशुऐ तिऊं लै बोलौ तुमै मुं लोड़दै कैलै ई लागै औन्दै का तुमु के ठेऊ नाईं कि मुं परमेश्‍वरा रै घौरा दी रौइणौ ज़रूरी आ।

⁵⁰पर ज़ो बूश यीशुऐ तिऊं आइलै बोली, सै तेसरै मां-बाबा के नाईं सौमझ़ुई,

⁵¹तैबै सेऊ तिऊं आइलै नासरत गांवा दी आशौ और तिऊं आइलै रौ और तेसरी मांऐ मरियमै इऐ सारी बुशै आपणी ज़िवा दी छ़ाड़ी।

⁵²यीशु औकली दी और शरीरा दी परमेश्‍वर और आदमी री कृपा कौरी बौड़दै लागौ।