Read Pahari, Mahasu लुका 22 Bible Online

लुका 22 - Pahari, Mahasu bible

लुका 22

¹बिण संज़ेड़ै री रोटी रौ साज़ौ, ज़ेथरी शुरुआत फसह रै साज़ै कु औआ थी, सेऊ साज़ौ नज़दीक आशी गौ आ।

²सेज़ै बौगतै बौड़ै याजक लोग और यहुदी शास्त्री यीशु पाकुड़नै और झ़ांगणै रौ मौकौ लोड़दै थै लागै औन्दै, पर सै लोगु कु डौरा थै।

³तैबै शैतान यहुदा भितै आशौ, ज़ासलै इस्करियोती बोला थै और सेऊ यीशु रै बारह च़ेलेऊ मांझ़िऐ कु एक थौ।

⁴सेऊ बौड़ै याजकु और परमेश्‍वरा रै घौरा रै च़ोकीदारु रै मुख्यै काऐ डैऔ। ताकी यीशु पाकुड़नै रै तरीका रै बारै दी चौपड़ा।

⁵सै भौरी खुश हुऐ, और तेसलै इनाम दैणै रौ वायदौ भी कियौ।

⁶यहुदा सेज़ी बुशा लै तैयार हुई गौ, और तेबी कु सेऊ यीशु पकड़ाउणा री ताकी दी रौ, कि ज़ेबी यीशु काऐ भौरी भीड़ ना औली, सेज़ै बौगतै सेऊ, यीशु पौकड़ाई बौल़ा।

⁷तैबै बिणा संज़ेड़ै री रोटी रै साज़ै रौ दीन आशौ ज़ेबी यहुदी लोगु रै हर टबर फसह रै साज़ै दी गाबड़ु री बौल़ी च़ड़ावा थै।

⁸यीशुऐ पतरस और यहुन्ना इणै बोलीयौ भेज़ै कि, “डैऔ आमारै फसह रै साज़ै री रोटी खाणै रौ इन्तज़ाम कौरौ।”

⁹च़ेलेउऐ यीशु कु पुछ़ौ, “गुरुजी तुमै कियै च़ाहा ई कि आमै फसह रै साज़ै री रोटी रौ इन्तज़ाम कौरी?”

¹⁰यीशुऐ तिउंलै बोलौ, “देखौ शहरा दी पौउंच़िऔ तुमुकै एक आदमी मिला काछ़ा माथै पाणी री बोटलोई कौरी डेउंदै लागौ औन्दौ, ज़ेज़ै घौरा दी सेऊ डिआलौ, तुमै भी तेस पिछ़ु सेज़ै घौरा दी डेवेऊ।”

¹¹और तेस घौरा रै स्याणै लै बोलेऊ। “गुरु ताउंलै इणौ बोला कि मुकालै तैयार कियौ औन्दौ कौमरौ केज़ौ आ? ज़ियै हाऊं आपणै च़ेलेऊ आइलै फसह रै साज़ै री रोटी खाऊ।”

¹²तैबै सेऊ तुमुकै माथली मंज़ली दी सज़ाऔ औन्दौ कौमरौ देखाल़ा, तिऐ तुमै फसह री रोटी रौ इन्तज़ाम कौरेऊ।

¹³तैबै ज़िणौ यीशुऐ तिउंलै बोलौ थौ, तिऊं च़ेलेउऐ तिऐ डेइयौ तिणौ देखौ, और तिंउऐ तिऐ फसह रै साज़ै री रोटी तैयार की।

¹⁴ज़ेबी रोटी खाणै रौ बौगत आशौ ता यीशु आपणै बारह च़ेलेऊ आइलै रोटी खान्दै बोशौ। यीशु च़ेलेऊ आइलै आखरी बारै रोटी खाआ

¹⁵तैबै यीशुऐ तिउंलै बोलौ, “मेरी बौड़ी इच़्छ़ा थी कि हाऊं दुःख भोगणे और मौरणै कु पैहलै तुमु आइलै बोशियौ एज़ै फसह रै साज़ै री रोटी खाऊ।”

¹⁶कैलैकि हाऊं तुमुलै बोलाऊ, “कि ज़ेबी झ़ांऊ इऐ बुशै परमेश्‍वरा रै राज़्य दी पुरी नाईं औआ ली, तेबी झ़ांऊ हाऊं इऐं फसह री रोटी दुजी बारै केबी ना खान्दौ।”

¹⁷तैबै यीशुऐ अंगुरा रै रसा रौ खोरु च़ुंगौ और परमेश्‍वरा रौ धन्यबाद की इयौ, आपणै च़ेलेऊ लै देइयौ बोलौ एस आपु मांझ़िऐ बांटौ।

¹⁸कैलैकि हाऊं तुमुलै बोलाऊ कि ज़ेबी झ़ांऊ परमेश्‍वरा रौ राज़ नाईं आशा लौ तेबी झ़ांऊ हाऊं अंगुरा रौ रस केबी ना पिन्दौ।

¹⁹तैबै यीशुऐ रोटी च़ुंगी और परमेश्‍वरा रौ धन्यबाद कौरीयौ चोड़ी और इणै बोलीयौ आपणै च़ेलेऊ कै देई कि, “इयौ मैरौ ज़िसम आ ज़ो तुमुलै दैऔ औन्दौ,। मुं याद कौरना लै इणौ कौरेऊ।”

²⁰इणै कौरीऐ रोटी खाइयौ यीशुऐ अंगुरा रै रसा रौ खोरु भी इणै बोलीयौ दैऔ, “एस अंगुरा रौ रस तुमै मैरौ लोऊ सौमझ़ौ ज़ो भौरी लोगु तिंउरै पापा कु बौच़ाउणा लै बौइणै वाल़ौ आ। मैरै मौरणै कु परमेश्‍वर लोगु आइलै एक नौऐं रिश्तै रौ वायदौ पाकौ कौरा आ।

²¹पर देखौ मुं पौकड़ाउणै वाल़ौ इदै आ आमु आइलै रोटी खान्दै लागौ औन्दौ।

²²कैलैकि हाऊं ज़ुण परमेश्‍वरा री तौरफा कु भेज़ौ औन्दौ ऊ मैरौ मौरणौ ता इणी भी आ, ज़िणौ पवित्रशास्त्रा दी आ लिखौ औन्दौ। पर फिटकार आ तेस आदमी लै ज़ुण मुं पकड़ावा आ।

²³तैबै सै च़ेलै आपु मांझ़िऐ एकी दुजै कु पुछ़दै लागै कि आमु मांझ़िऐ कुण औलौ ज़ुण इणै काम कौरा?”

²⁴तैबै तिऊंरौ झ़ौगड़ौ भी हुऔ कि आमु मांझ़िऐ कु बौड़ौ कुण आ?

²⁵यीशुऐ तिउंलै बोलौ, “दुजी ज़ाती रै राज़ै आपणै लोगु माथै राज़ कौरा ई, और तिऊं माथै हक्क छ़ाड़ाई, और सै तिउंलै फाइदै वाल़ौ बोलाई।”

²⁶पर तुमै इणौ ना बोलेऊ, ज़ुण तुमु मांझ़िऐ बौड़ौ आ तिणीऐ छ़ोटौ बौणनी, और ज़ुण आ परधान तिणीऐ बौणनी सेवा कौरणै वाल़ौ।

²⁷कैलैकि बौड़ौ कुण आ सेऊ ज़ुण रोटी खान्दै आ बोशौ औन्दौ या सेऊ ज़ुण तिउंरी सेवा कौरदै आ लागौ औन्दौ? का सेऊ नाईं ज़ुण रोटी खान्दै आ बोशौ औन्दौ? और हाऊं तुमु मांझ़िऐ सेवा कौरणै वाल़ै ज़िणौ ऊ।

²⁸और तुमै भी मुं आइलै परखणै रै बौगतै दी सौदा रौऐ ई।

²⁹ज़िणौ मैरै बाबै परमेश्‍वरै मुकालै राज़ दैऔ औन्दौ तिणी हाऊं भी तुमु कालै राज़ दिआऊ।

³⁰ताकी तुमै मैरै राज़ा दी मुं आइलै बोशियौ खा पिआ लै और राज़गादी माथै बोशियौ इस्राइला रै बारह गोत्रा रै लोगु रौ फैसलौ कौरा।

³¹प्रभुऐ बोलौ, “शमौन! ओ शमौन, देख शैतानै तुमै गीऊं बाशी छ़ांटणा लै मुकु मांगी गौऐ।

³²पर मुंइऐ तैरै बारै दी परमेश्‍वरा कु औरज़ कौरी एरी आ ताकी तैरौ मुं माथै विश्वास खातम ना हुआ। और ज़ेबी तू पौरखणै बासिऐ, वापिस आशा लौ तेबी आपणै भाईऊ भी विश्वासा दी मज़बूत कौरा।”

³³शमौनै यीशु लै बोलौ, “प्रभु हाऊं ताऊं आइलै ज़ेला ई डेउणा लै और मौरणा लै भी तैयार ऊ।

³⁴यीशुऐ शमौन पतरसा लै बोलौ, ‘हाऊं ताऊं लै बोलाऊ कि आज़ राची कुखड़ै रै बाशणे कु पैहलै आपणै मुंआ कु चिआ बारै बोलाई कि तू मुं नाईं ज़ाणदौ।’ ”

³⁵तैबै यीशुऐ आपणै च़ेलेऊ कु पुछ़ा, “ज़ेबी मुंइऐ तुमै बिण बटुऐ, बिण झ़ोल़ै, और बिण बुटै खुशी री खौबर शुणाउणा लै भेज़ै थै का तुमुलै केज़ी च़िज़ा री कामी हुई आ?” च़ेलेउऐ बोलौ! “केज़ी च़िज़ा री नाईं।”

³⁶यीशुऐ तिउंलै बोलौ, “पर आबै ज़ासकै बटुऔ औलौ सेऊ आपुकै निआंलौ, झ़ोल़ौ भी निऔं, और ज़ासकै तलवार नाईं औली सेऊ आपणै जुड़कै बेच़ीयौ खरीदा लौ।

³⁷कैलैकि हाऊं तुमुलै बोलाऊ, ‘ज़ो पवित्रशास्त्रा दी आ लिखौ औन्दौ। कि सेऊ बुरै लोगु आइलै गिणुऔ औन्दौ सेऊ मुलै पुरौ हुणौ ज़ुरुरी आ, कैलैकि मैरै बारै दी लिखी ऐन्दी बुशै सौच़्च़ी पुरी औणै वाल़ी आ।’

³⁸च़ेलेउऐ बोलौ, ‘देख इदै दुई तलवारी ई, यीशुऐ बोलौ मोकती ई।’ ”

³⁹तैबै यीशु तेस कौमरै कु निकल़ियौ रोज़कै ज़िणौ जैतून नावां री पहाड़ी माथै डैऔ, और तेसरै च़ेलै भी तेस आइलै च़ाल पौड़ै।

⁴⁰तिऐ पौउंच़िऔ यीशुऐ आपणै च़ेलेऊ लै बोलौ, “प्राथना कौरदै थाकौ लागी ताकी तुमै मुसीबता दी ना पौड़ा”

⁴¹सेऊ च़ेलेऊ कु तकरीबन तीस मिटर दूर डैऔ और धौनी घुंडै माथै टेकियौ प्राथना कौरदै लागौ,

⁴²“ओ बाब, अगर तू च़ाहा ई ता, मुकाऐ कु एस दुखा रौ खोरु पोरु निऊं। तैबै भी मेरी नाईं तुमारी मौरज़ी पुरी च़ांई हुई।”

⁴³तैबै सौरगा कु एक दूत पौगड़ौ हुऔ, और तिणीऐ यीशु लै शक्ति देई।

⁴⁴यीशु भौरी दुखी हुइयौ प्राथना कौरदै लागौ, यीशु रै ज़िवा रौ दुःख एती बौड़ी गौ कि तेसरौ पसिनौ मानौ लोऊ रै टिपु बौणीयौ ज़मीना माथै पौड़दै लागौ।

⁴⁵तैबै यीशु प्राथना कौरीयौ उठौ और आपणै च़ेलेऊ काऐ आशौ पर निराशा री वज़ाह कु यीशुऐ सै च़ेलै सुतै औन्दै देखै।

⁴⁶यीशुऐ तिउंलै बोलौ, “तुमै कैलै ई सुतदै लागै औन्दै? ‘उठौ और प्राथना कौरौ’ नाईं ता मुसीबता ई पौड़ा ई।”

⁴⁷ज़ेबी यीशु प्राथना रै बारै दी थौ बोलदै लागौ औन्दौ, तेबी लोगु री बौड़ी भीड़ तिऐ पौउंच़ी गोई। तिऊं बारह च़ेलेऊ मांझ़िया कु एक च़ेलौ ज़ासरौ नाऊं यहुदा थौ, तिऐं भीड़ा कु औगाड़ी-औगाड़िऐ थौ आण्डदै लागौ औन्दौ। यहुदा यीशु खोबीयाऊंदै यीशु काऐ आशौ।

⁴⁸यीशुऐ तेसलै बोलौ, “ओ यहुदा का तू खोबु देइयौ आदमी रौ छ़ोहरु पौकड़ावा ई?”

⁴⁹यीशु रै साथीऊ ऐ ज़ैबै देखौ कि का हुणै वाल़ौ आ, यीशु लै बोलौ “का आमै तलवार च़लाउलै?

⁵⁰तिऊं मांझ़िऐ कु एकीऐ परधान याजका रै नुकरा दी तलवारी री लाई और तेसरौ सुल़टौ कौन्थु काटौ।”

⁵¹तेथ माथै यीशुऐ बोलौ, “बस आबै नाईं कौरौ इणौ और यीशुऐ तेस नुकरा रौ कौन्थु छ़ुंऔ और च़ांगौ कियौ।

⁵²तैबै यीशुऐ बौड़ै याजकु और परमेश्‍वरा रै घौरा रै च़ोकीदारु रै मुख्यै और स्याणेऊ लै बोलौ, ज़ुण यीशु पाकुड़दै थै आशै औन्दै, का तुमै डाकु सौमझ़ियौ तलवारी और डिंगै कौरीऐ ई मुं पाकुड़दै आशै औन्दै?

⁵³ज़ेबी हाऊं परमेश्‍वरा रै घौरा दी हर दिना दी तुमु आइलै थौ तेबी ता तुमुऐ हाऊं पाकड़ौ नाईं। पर एज़ौ तुमारौ बौगत आ, और नयारै रौ हक्क आ।”

⁵⁴तैबै तिंउऐ यीशु पाकड़ियौ परधान याजका रै घौरै निऔं। और पतरस यीशु पिछ़ु दूर-दूर थौ आण्डदै लागौ औन्दौ।

⁵⁵च़ोकीदारुऐ याजका रै गौड़ा दी आग ज़ाल़ी और फिदीआलै बोशी गौऐ, पतरस भी तिऊं मांझ़िऐ आशीयौ बोशी गौ।

⁵⁶एकी नुकराणिऐ आगी रै प्याशै दी पतरस देखौ और तेसलै बोलौ, “एऊ भी ता यीशु आइलै साथाई थौ।”

⁵⁷पर पतरसै तिंआलै इणै बोलीयौ इनकार कियौ, “ओ बौइण हाऊं ता एस नाईं ज़ाणदौ।”

⁵⁸थोड़ै बौगता बासिऐ तौंइऐ एकी आदमीऐ पतरसा देखीयौ बोलौ, “तू भी ता तिऊं मांझ़िया कु ई।” पतरसै बोलौ, “ओ भाई, हाऊं नाईं ऊ।”

⁵⁹करीब एकी घन्टै बासिऐ तौंइऐ एक आदमी काठै कौरीऐ बोलदै लागौ, “एऊ भी ज़रूर यीशु आइलै थौ, कैलैकि एऊ गलीली आ।”

⁶⁰पतरसै बोलौ, “ओ भाई, हाऊं नाईं ज़ाणदौ कि तू का ई बोलदै लागौ औन्दौ।” और सेऊ बोलदै ई थौ लागौ औन्दौ कि तेबी कुखड़ौ बाशौ।

⁶¹तैबै प्रभु यीशुऐ पतरसा भिलै मुड़ियौ देखौ और पतरसा कै सै बुशै याद आशी गोई, ज़ो यीशुऐ पतरसा लै बोली थी कि, “आज़ कुखड़ै रै बाशणै कु पैहलै चिया बारै तू मैरौ इनकार कौरा ई।”

⁶²सेऊ बाइरै डेइयौ डीकरी-डीकरीयौ लेरदै लागौ।

⁶³आबै ज़ुणी च़ोकीदारुऐ यीशु पाकड़ौ औन्दौ थौ, सै यीशु री मज़ाका उड़ाइयौ यीशु पिटदै लागै।

⁶⁴और यीशु री आखी माथै हाथा लाइयौ पुछ़दै लागै कि, “भविष्यवाणी कौरीयौ बोल कि ताऊं दी कुणिऐ लाई आ।”

⁶⁵और तिंउऐ यीशु री भौरी बुराई की और यीशु रै विरोधा ई भौरी बुशै बोली।

⁶⁶ज़ैबै दुजौ दीन हुऔ तैबै लोगु रै स्याणै, बौड़ै याजक और यहुदी शास्त्री कौठै हुऐ और यीशु आपणी खुंबल़ी दी आणियौ तेसकु पुछ़दै लागै,

⁶⁷“अगर तू मसीहा ई ता आमु आइलै बोल।” यीशुऐ तिउंलै बोलौ, “अगर हाऊं तुमु आइलै बोलु लै ता तुमै विश्वास नाईं कौरदै।”

⁶⁸और अगर पुछ़ुलै, ता तुमुऐ ज़वाब ना दैणौ।

⁶⁹पर इबी कु आदमी रौ छ़ोहरु ज़ो सौभी कु शक्ति वाल़ौ आ, परमेश्‍वरा री सुल़टी भिलै बोशी थाका सा।

⁷⁰एज़ी बुशा माथै सारेऊ ऐ बोलौ, “तैबै का तू परमेश्‍वरा रौ छ़ोहरु ई?” यीशुऐ तिउंलै बोलौ, “तुमै ठीक ई बोलाई कैलैकि हाऊं परमेश्‍वरा रौ छ़ोहरु ऊ।”

⁷¹तैबै तिंउऐ बोलौ, “आमुकै आबै तौंइऐ गवाही री ज़ुरत नाईं आसती कैलैकि आमुऐ आपु ई एसरै मुआं कु बोलदै शुणी गौ आ।”