Read Pahari, Mahasu लुका 6 Bible Online

लुका 6 - Pahari, Mahasu bible

लुका 6

¹तैबै आरामा वाल़ै दिना दी यीशु आपणै च़ेलेऊ आइलै डोखरेऊ बाटीऐ थौ लागौ औन्दौ डेउंदै, तेसरै च़ेलै लागै डोखरै कु गीऊंआ रै सीलै चोड़ियौ और हाथा दी मांडियौ खान्दै।

²तैबै फरीसीउ मांझ़िऐ कु कुछ़ लोगुऐ तिउंलै बोलौ, ज़ेज़ौ काम आरामा रै दिना दी नाईं जान्दौ कौरणौ, सेज़ौ काम तुमै कैलै कौरा ई?

³यीशुऐ तिउंलै ज़वाब दैऔ का तुमुऐ धौर्म शास्त्रा दी नाईं पौड़ौ? ज़ेबी राज़ौ दाऊद और तेसरै साथी भुखै थै, तिउंकै खाणा लै कुछ़ भी नाईं थौ, तैबै राज़ै दाऊदै का कियौ?

⁴सेऊ परमेश्‍वरा रै घौरा दी डैऔ और तिऐ परमेश्‍वरा लै चड़ाई औन्दी भोगा री रोटी खाई और आपणै साथीऊ लै भी देई, ज़ो सिरफ याजक ई खा थै।

⁵यीशुऐ तिउंलै इणौ भी बोलौ, “आदमी रौ छ़ोहरु, आरामा रै दिना रौ भी प्रभु ऊ।”

⁶एकी औज़ौ आरामा रै दिना दी यीशु आराधनालय दी डेइयौ शिक्षा दैंदै लागौ, तिऐ एक आदमी थौ ज़ासरौ सुल़टौ हाथ बिमारी कौरी शुकौ औन्दौ थौ।

⁷तैबै कुछ़ फरीसी और शास्त्री लोग यीशु माथै आरोप लाइणा लै तेसरी ताकी दी थै रौऐ औन्दै, कि का यीशु एस आदमी आरामा वाल़ै दिना दी च़ांगौ कौरा की नाईं कौरदौ?

⁸पर यीशु तिंउरै मौना रै विच़ार ज़ाणा थौ एज़ी तांइयै यीशुऐ तेस शुकै औन्दै हाथ वाल़ै आदमी लै बोलौ, “उठ सामनै आशीयौ खौड़ौ ऊ।” तैबै सेऊ आदमी उठीयौ खौड़ौ हुऔ।

⁹यीशुऐ लोगु कु पुछ़ौ, “आरामा रै दिना दी का नियम ठीक आ, भौलौ कौरणौ, या बुरौ कौरणौ? प्राण बौच़ाउणौ या झ़ांगणौ।”

¹⁰तैबै यीशुऐ फिदीआलै देखीयौ तेस शुकै औन्दै हाथा वाल़ै आदमी लै बोलौ, “आपणौ हाथ औगांऊ कर।” तिणीऐ हाथ औगांऊ कियौ, तैबै तेसरौ हाथ तेबी ठीक हुऔ।

¹¹तैबै शास्त्री और फरीसीउ रै भौरी रोश आशै और सै आपु मांझ़िऐ गुणमुणादै लागै कि आमै एस यीशु आइलै का कौरुलै?

¹²सेज़ै दिना दी यीशु पहाड़ी माथै प्राथना कौरदै डैऔ और परमेश्‍वरा कु प्राथना कौरदै-कौरदै सारी राच बिताई।

¹³ज़ेबी दुसौ हुऔ तैबै यीशुऐ आपणै च़ेलै औटाऐ और तिऊं मांझ़िऐ कु बाराह च़ेलै छ़ांटै और यीशुऐ तिउंलै प्रेरित बोलौ।

¹⁴और सै च़ेलै एज़ै ई: शिमौन ज़ासरौ नाऊं यीशुऐ पतरस छ़ाड़ौ, पतरसा रौ भाई आन्द्रियास और याकूब, यहुन्ना और फिलिप्पुस और बरतुल्मै।

¹⁵मत्ती, थोमा, और हलफई रौ छ़ोहरु याकूब और शिमौन ज़ुण देशभक्त थौ।

¹⁶और याकुबा रौ छ़ोहरु यहुदा और यहुदा इस्करियोती ज़ुणिऐ यीशु बासिऐ पकड़वाऔ आ।

¹⁷तैबै यीशु आपणै च़ेलेऊ आइलै पहाड़ी कु तौल़ै उतरौ सिधी ज़ागाह दी खौड़ौ हुऔ और तिऐ तेसरै च़ेलेऊ री बौड़ी भीड़ कौठै हुई, और सारै यहुदिया यरुशलेम, सूर और सैदा इलाकै रै लोग ज़ुण-ज़ुण समुन्दरा रै नज़दीक रौआ थै सै भी तिऐ आशै।

¹⁸ज़ो शिक्षा शुणदै और आपणी बिमारी कु च़ांगै हुणा लै यीशु काऐ आशा थै, और यीशु, बुरी आत्मा कौरी परेशान लोगु भी ठीक कौरा थौ।

¹⁹सारै लोग यीशु छ़ुइणौ च़ाहा थै कैलैकि यीशु कु च़ांगै कौरणै री शक्ति निकल़ा थी और सब च़ांगै हुआ थै।

²⁰तैबै तिणीऐ आपणै च़ेलेऊ भिलै देखीयौ बोलौ, “आशीष वाल़ै ई तुमै ज़ो निउलै ई। कैलैकि परमेश्‍वरा रौ राज़ तुमारौ आ।

²¹आशीष वाल़ै ई सै लोग, ज़ो आबै भुखै ई। कैलैकि तिउंलै रौज़ीयौ मिला सा और सै ज़ुण आबै लेराई सै हसा ई।

²²आशीष वाल़ै ई तुमै, ज़ुण आदमी रै छ़ोहरु री वज़ाह कु दुःख उठावा ई, और लोग तुमु आइलै दुश्मनी छ़ाड़ाई और तुमु पोरु गाड़ाई, तुमारी बेइज़्ज़ती कौरा ई, और तुमारौ नाऊं बुरौ सौमझ़ियौ काटाई।

²³सेज़ै दिनै तुमै खुश हुइयौ नाच़णौ, कैलैकि देखौ तुमुलै सौरगा दी बौड़ौ इनाम आ, तिंउरै बाब-दादै भी, भविष्यवाणी कौरणै वाल़ै भविष्यवक्ता आइलै तिणौ कौरा थै।”

²⁴यीशुऐ तौंइऐ बोलौ, “तुमुलै फिटकार आ ज़ुण तुमै सेठ ई। तुमुलै दु:खा रै दीन आशणै ई कैलैकि तुमारौ ऐश-आराम तुमुलै मिली गौ आ।

²⁵फिटकार तुमुलै ज़ुण रौज़ै औन्दै ई। तुमुलै भोखे रौइणा रै दीन आशणै ई। आज़ ज़ो तुमै नीफिक्री कौरी हौसाई। तुमारी इऐ खुशी, दुखा दी बौदलिणी ई।

²⁶फिटकार आ तुमुलै ज़ेबी आदमी तुमारी बौड़ाई कौरा ई, सै तुमुलै दुःख मौनावा ई, कैलैकि तिंउरै नान-बुढु भी झ़ुठै भविष्यवक्तु आइलै इणौ कौरा थै।”

²⁷हाऊं तुमु शुणनै वालेऊ लै बोलाऊ कि आपणै दुश्मना आइलै प्यार कौरौ। और ज़ुण तुमारौ बुरौ कौरा आ तेसरौ भौलौ कौरौ।

²⁸ज़ुण तुमुलै श्राप दिआ लौ तेसलै आशीष दैऔ, ज़ुण कौरालौ तुमारी बेइज़्ज़ती तेसलै कौरौ प्राथना।

²⁹ज़ुण तुमारै एकी गौलौण्टै दी थापै ला लौ तेस भिलै दुजौ गौलौण्टौ भी मुड़ाऔ और ज़ुण तुमारी धोती छ़ुड़ावा लौ तेसकै आपणौ कुरतौ भी दैऔ।

³⁰ज़ुण तुमु कु कुछ़ मांगा लौ तेसकै दैऔ और ज़ुण ताऊं कु निंआ लौ तेसकु तिऐं चीज़ वापिस ना मांगै।

³¹ज़िणौ तुमै लोगु कु च़ाहा ई कि लोग तुमु आइलै कौरा, तुमै भी तिऊं आइलै तिणौ कौरौ।

³²अगर तुमै आपु आइलै प्यार कौरणै वालेऊ आइलै प्यार कौरा ई तै का बड़ी बात आ। कैलैकि पापी भी, आपु आइलै प्यार कौरणै वाल़ेऊ आइलै प्यार कौरा ई।

³³अगर तुमै तिऊं आइलै भौलाई कौरालै ज़ो तुमु आइलै भौलाई कौरा ई, तै का बड़ी बात आ, कैलैकि पापी लोग भी इणौ कौरा ई।

³⁴अगर तुमै तिउंकै उधार दिआई ज़ासकु वापिस मिलणै री आश छ़ाड़ाई, तै का बौड़ी बात आ, कैलैकि पापी लोग भी पापी लोगु कै उधार दिआई और बासिऐ मांगा ई तेती वापिस।

³⁵तुमै आपणै दुश्मना आइलै प्यार छ़ाड़ौ और भौलाई कौरौ, और बासिऐ वापिस ना मांगणै री आश छ़ाड़ियौ छ़ुटकारौ दैऔ, तैबै तुमुलै सौरगा दी बौड़ौ इनाम मिला सा। और तुमै परमपरधान परमेश्‍वरा रै लोल़डै बौणा ई। कैलैकि सेऊ, तिऊं लोगु लै ज़ो धन्यबाद नाईं कौरदै, और बुरै लोगु लै, भी भौलौ आ।

³⁶ज़िणौ तुमारौ बाब परमेश्‍वर दया कौरणै वाल़ौ आ तिणी तुमै भी दयालु बौणौ।

³⁷कासी दी भी झ़ुठै आरोप नाईं लाऔ तैबै तुमु दी भी झ़ुठै आरोप नाईं लागदै, कासी भी बुरै नाईं चाणौ, तैबै तुमु भी कोई गलत नाईं च़ाणदौ, माफ कौरौ तैबै तुमुलै माफी मिला।

³⁸दैऔ ता तुमुलै भी दिआई, लोग पुरौ पाथौ च़ेसी-च़ेसीयौ और हिलाई-हिलाइयौ और ढाल़ी-ढाल़ीयौ तुमारी उंगाल़ी दी पा ई, कैलैकि ज़ेज़ै पाथै कौरीऐ तुमै नापा लै सेज़ै पाथै कौरीऐ तुमुलै भी नापा ई।

³⁹तैबै यीशुऐ तिउंलै औनैणै देइयौ बोलौ का एक शेड़ौ दुजै शेड़ै कै बाट देखाल़ी बौल़ा सा? का इणै कौरी सै दुइया खाल़ी दी ना पौड़दै?

⁴⁰च़ेलौ केबी भी आपणै गुरु कु बौड़ौ नाईं औन्दौ पर ज़ुणी च़ेलै पुरौ कौरी औलौ शिखौ औन्दौ, सेऊ आपणै गुरु ज़िणौ औआ सा।

⁴¹तू आपणै भाई री आखी दी सांगर कैलै देखा ई का तांउकै आपणी आखी रौ डिगंच़ौ नाईं च़ौगरिंदौ?

⁴²ज़ैबै तांउकै आपणी आखी रौ डिगंच़ौ नाईं दिशदौ तैबै तू आपणै भाई लै किणौ बोली सौका ई कि “भाई टेक हाऊं तेरी आखी रौ सांगर गाड़ाऊ? ओ कौपटी पैहलै आपणी आखी रौ डिगंचौ गाड़, तैबै तू आपणै भाई री आखी कु तेस सांगर आच़्छ़ै कौरी गाड़ी सौका ई।”

⁴³कैलैकि केज़ौ भी आच़्छ़ौ पेड़ इणौ नाईं आ ज़ेथकु निकामौ फल़ निकल़ा और ना ई आ निकामौ पेड़ इणौ, ज़ेथकु आच़्छ़ै फल़ निकल़ा।

⁴⁴हर पेड़ तेसरै फल़ा कौरी रवाइया आ। कैलैकि लोग झ़ाड़ी मांझ़िया कु फेड़ु नाईं चोड़दै, और ना (कुईणी) झांगड़ा कु अंगूर चोड़दै।

⁴⁵भौलौ आदमी आपणै भौलै ज़िवा कु भौली बुशै ला सा, और बुरौ आदमी ला सा आपणै बुरै ज़िवा कु बुरी बुशै। ज़ो तुमारै ज़िवा दी औलौ, सेऊ निकल़ा मुआं कौरी बाइरै।

⁴⁶ज़ैबै तुमै मैरौ बोलौ नाईं शुणदै, तैबै तुमै मुलै, “ओ प्रभु-ओ प्रभु कैलै बोलाई?

⁴⁷ज़ुण-कुण मुकाऐ आशा और मेरी बुशेऊ शुणा और माना, हाऊं तुमुलै बोलाऊ कि सेऊ कास ज़िणौ आ।

⁴⁸सेऊ तेस आदमी ज़िणौ आ ज़ुणिऐ घौरा चाणदी बारै ज़बीन डुंगी खोदियौ पाकी ज़ागाह दी पौई बोशाल़ी आ, और ज़ेबी नौं आशी भौरुईयौ और तेसरौ छ़ालौ तेस घौरा दी लागौ पर सेऊ घौर हिलौ भी नाईं कैलैकि सेऊ घौर पाकी ज़ागाह दी थौ बौणौ औन्दौ।

⁴⁹ज़ुण वच़न शुणियौ नाईं मानदौ सेऊ तेस आदमी ज़िणौ आ ज़ुणिऐ बाल़ु माथै बिण पौई ऐ घौर चाणौ और ज़ेबी नौ आशी भौरुईयौ सेऊ घौर खरकच़ार सिकी गौ आ और सिकी औ तेसरौ सत्यानाष हुई गौ आ”