Read Pahari, Mahasu लुका 7 Bible Online

लुका 7 - Pahari, Mahasu bible

लुका 7

¹ज़ैबै यीशुऐ लोगु कै सारी बुशै शुणाई गोई, तैबै यीशु कफरनहूम गांवा दी आशौ।

²तिऐ रोमी सिपाईउ रै आफसरा रौ एक नुकुर, ज़ो तेसरौ भौरी गौरतौ नुकुर थौ सेऊ नुकुर एती बिमार थौ कि मौरणै वाल़ौ थौ।

³तिणी फौज़िए यीशु रै बारै दी शुणौ तैबै तिणीऐ यहुदी लोगु रै कई स्याणै औरज़ कौरना लै यीशु काऐ भेज़ै ताकी यीशु आशीयौ मैरौ नुकुर च़ांगौ कौरा।

⁴सै स्याणै यीशु काऐ आशै और बौड़ी औरज़ कौरीयौ यीशु लै बोलदै लागै कि, “सेऊ इणै लायक आसती आ कि तू तेस माथै दया कौरा।”

⁵कैलैकि सेऊ फौज़ी आमारी ज़ाती आइलै प्यार कौरा सा और तिणीऐ ई आमु कालै आराधनालय रौ घौर चाणौ आ।

⁶तैबै यीशु तिऊं आइलै तेस फौज़ी रै घौरा लै च़ाल पौड़ौ पर ज़ेबी यीशु तेसरै घौरा रै नज़दीक पौउंच़ौ, तैबै तिणी फौज़ीऐ आपणै कुछ़ गोश्टण यीशु काऐ इणै सौमझ़ाइयौ भेज़ै कि, “ओ प्रभु एती कौष्ट ना कौरौ (इदै आशणै रौ) कैलैकि हाऊं इणै लायक नाईं आसतौ कि तुमै मैरै घौरा कै आशा।

⁷एथीलै मुंइऐ आपुलै इणै लायक ना सौमझ़ौ कि तुमु काऐ आशु, पर तिदरा कु वच़न बोल, तैबै मैरौ नुकुर च़ांगौ हुआ सा।

⁸हाऊं भी एक फौज़ीऊ मुकै हक्क आ और कई सिपाई मैरै हाथा दी आ, ज़ेबी हाऊं एकी लै बोलाऊ आश तैबै सेऊ आशा सा, और दुजै लै बोलु लै डेऊ तैबै डेवा सा, अगर आपणै कास नुकरा लै बोलु लै कि इणौ कर, तैबै सेऊ तिणी कौरा सा।”

⁹इणै शुणियौ यीशु कै हैरानी हुई तैबै यीशुऐ पिछ़ाऊं फिरीऔ तिऊं लोगु लै बोलौ ज़ो तेस पिछ़ु थै आशदै लागै औन्दै, “हाऊं तुमुलै बोलाऊ कि मुंइऐ इस्राइल देशा रै लोगु दी भी इणौ विश्वास नाईं देखौ।”

¹⁰तैबै सै लोग ज़ो फौज़ीऐ यीशु काऐ थै भेज़ै औन्दै सै वापिस घौरै डेवै और तिंउऐ सेऊ बिमार नुकुर च़ांगौ हुऔ औन्दौ देखौ।

¹¹तेथ बासिऐ यीशु आपणै च़ेलेऊ आइलै नाइना रै गांवा-शहरा दी डैऔ तेस आइलै लोगु री बौड़ी भीड़ भी थी डेउंदै लागी ऐन्दी।

¹²ज़ैबै सै तेस गांवा री खोल़ी काऐ पौउंच़ै, तैबै तिंउऐ देखौ की लोग एक मौड़ौ निंदै थै लागै औन्दै बाइरै। ज़ो आपणी मां रौ एकलौतौ छ़ोहरु थौ, और तेसरी मां विधवा थी। और साथा दी गांवा रै भौरी लोग थै।

¹³ज़ैबै प्रभुऐ सै विधवा देखी ता तेसरै तिंया माथै बौड़ी तरस आशी और तिंया लै बोलौ, “नाईं लेर।”

¹⁴तैबै यीशुऐ नज़दीक डेइयौ सै खाट छ़ुईं, तैबै खाट च़ुंगणै वाल़ै रुकै। तैबै यीशुऐ बोलौ, “हाऊं ताऊं लै बोलाऊ ओ ज़वान छ़ोहरु उठ।”

¹⁵तैबै सेऊ मौड़ौ ज़िउंदौ हुऔ, उठीयौ बोशौ और बुशै लाइंदै लागौ तैबै सेऊ छ़ोहरु, यीशुऐ तेसरी आमा कै सौम्भाल़ौ।

¹⁶इणै देखीयौ सारै लोग भौरी हैरान हुऐ और परमेश्‍वरा री बौड़ाई कौरीयौ बोलदै लागै, “कि आमु मांझ़िऐ एक बौड़ौ भविष्यवक्ता आशी गौ आ, और आज़ परमेश्‍वर आपु आमु मांझ़िऐ पौगड़ौ हुऔ आ।”

¹⁷सै बुशै यहुदिया और आस-पड़ोसा रै सारै परदेशा दी फौइली गोई।

¹⁸यीशुऐ ज़ो कुछ़ कियौ थौ तेथरै बारै दी यहुन्ना रै च़ेलेउऐ यहुन्ना काऐ बोलौ।

¹⁹तैबै यहुन्नै आपणै दुई च़ेलै यीशु काऐ इणै पुछ़णा लै भेज़ै की, “का आशणै वाल़ौ मसीहा तू ई आ, या आमै कास ओरी पौखुलै?”

²⁰यहुन्ना रै दुई च़ेलै यीशु काऐ आशीयौ बोलदै लागै, “यहुन्ना बपतिस्मौ दैणै वाल़ै, आमै ताऊं काऐ इणौ पुछ़णा लै भेज़ै ई, कि का आशणै वाल़ौ मसीहा तू ई? या आमै कास ओरी पौखुलै?”

²¹सेज़ै बौगतै यीशुऐ भौरी बिमार और दुखी लोग च़ांगै किऐ ई, और कई आदमी बुरी आत्मा कु आज़ाद किऐ ई, और भौरी शेड़ेवै कै आखी देई।

²²तैबै यीशुऐ यहुन्ना रै च़ेलेऊ लै बोलौ, “ज़ो कुछ़ तुमुऐ देखौ और शुणौ आ डेइयौ तेस यहुन्ना कै बोलौ, कि शेड़ै देखा ई, लौंगड़ै ई हांडा, कोढ़ी हुआई ठीक, टौणै ई शुणा, मौरै औन्दै हुआई ज़िउंदै, और गरीब लोगु लै शुणाउवा खुशी री खौबर।

²³और आशीष वाल़ै ई सै लोग, ज़ुण मुं माथै शक नाईं कौरदै कि हाऊं मसीहा आसती ऊ कि नाईं।”

²⁴ज़ेबी यहुन्ना रै च़ेलै यीशु काऐ कु डेवै तैबै यीशु यहुन्ना रै बारै दी लोगु आइलै बोलदै लागौ, “तुमै शुनशान ज़ागाह दी का देखदै थै डैऔ औन्दै? का बागुरा कौरी हिलणै वाल़ै शाऊंटै देखदै?

²⁵तैबै तुमै का देखदै थै डेवै औन्दै? च़ोगै-बागै भिड़ै औन्दै आदमी देखदै डेवै थै? नाईं कैलैकि ज़ो आदमी च़ोगै-बागै भिड़ाई सै ठाटा कौरी आपणै मैहला दी रौआ ई।

²⁶तैबै तुमै का देखदै थै डैऔ औन्दै, कास गुरु देखदै? ओ, हाऊं तुमुलै बोलाऊ सेऊ भविष्यवक्ता कु भी बौड़ौ आ।”

²⁷यहुन्ना ई सा सेऊ दूत ज़ासरै बारै दी पवित्रशास्त्रा दी इणौ लिखौ औन्दौ। कि देख हाऊं आपणौ दूत ताऊं कु औगाड़िऐ भेज़ाऊ, सेऊ ताऊं कु औगाड़िऐ डेइयौ ताऊं कालै तेरी बाट तैयार कौरा।

²⁸तैबै यीशुऐ तौंइऐ बोलौ, “हाऊं तुमुलै बोलाऊ की इबी झ़ांऊ कोई भी इणौ आदमी पैदौ नाईं हुऔ ज़ो यहुन्ना कु बौड़ौ आ। पर परमेश्‍वरा रै राज़ा दी ज़ुण छ़ोटै कु छ़ोटौ आ सेऊ यहुन्ना कु भी बौड़ौ गुरु आ,”

²⁹तैबै सारै लोगुऐ और मामलै निणै वाल़ेउऐ ज़ुणिऐ यहुन्ना कु बपतिस्मौ निऔं थौ तिंउऐ इणै शुणियौ मानी ऐरौ कि परमेश्‍वर धौर्मी आ।

³⁰पर फरीसीउ और नियमा रै धौर्म शास्त्रिउऐ परमेश्‍वरा री बूश नाईं मानी, कैलैकि तिंउऐ यहुन्ना रै बपतिस्मौ निणा लै मौना की थी।

³¹यीशुऐ तौंइऐ बोलौ, “हाऊं एज़ै जुगा रै लोगु रै बारै दी तुमु काऐ किणौ बोलु, और एज़ै जुगा रै लोगु रौ औनैणौ कास आइलै दैऔ।

³²कैलैकि सै इणै छ़ोहरु ज़िणै ई, ज़ुण बजारा दी डेइयौ खेल खेलाई और सै आपणै गोश्टणु कु शिकायत कौरा ई कि, ‘आमुऐ तुमुलै शादी रै गेत गाऐ ई पर तुमै ता नाच़ै नाईं, और आमुऐ दुखा रै गाअणै गाऐ पर तुमै ना लेरै।’

³³बपतिस्मौ दैणै वाल़ै यहुन्नै सौदा ब्रौत छ़ाड़ै ई। और कादी अंगुरा रौ रस नाईं पिऔ, और तिणीऐ पर तुमै बोलाई इणौ कि तेसदी आ बुरी आत्मा।

³⁴हाऊं आदमी रौ छ़ोहरु, खा पिआ ऊ, पर तुमै बोलाई इणौ कि हाऊं पेटु और सुरी पिणै वाल़ोऊ, मामलै निणै वाल़ेऊ और पापी लोगु रौ गोश्टण ऊ

³⁵पर ज़ुण परमेश्‍वरा री शिक्षा मानियौ च़ाला ई तिउंरी ज़िन्दगी कु परमेश्‍वरा रौ ज्ञान सौच़्च़ौ साबित हुआ आ।”

³⁶तैबै एकी फरीसी आदमीऐ ज़ासरौ नाऊं शमौन थौ यीशु कु औरज़ की, कि मैरै घौरै आशीयौ मुं आइलै रोटी खाऔ, तैबै यीशु फरीसी आदमी रै घौरा कै डेइयौ तेस आइलै रोटी खान्दै बोशौ।

³⁷तेस इलाकै री एक पापीण छ़ेउड़ी, इणै शुणियौ कि यीशु फरीसी रै घौरा दी आ रोटी खान्दै बोशौ औन्दौ, तिऐं छ़ेउड़ीऐ यीशु काऐ एकी शंखमोरा री शीशी दी खुश्बुदार तेल आणौ,

³⁸और यीशु री लाता काऐ आशीयौ लेरदै लागी और यीशु रै बांगणै आपणै आशु कौरीऐ भिज़ाऐ और आपणै बाल़ा कौरीऐ गुशै, और यीशु रै बांगणै दी खोबु देइयौ तेस खुश्बुदार तेला मांडदै लागी।

³⁹इणै देखीयौ सेऊ फरीसी ज़ुणिऐ यीशु थौ औटाऔ औन्दौ, आपणै मौना दी सुंच़दै लागौ कि, “अगर यीशु भविष्यवक्ता हुआ थौ तैबै एसकै पौतौ लागा थौ की ज़ो छ़ेउड़ी एस छ़ुईंदै आ लागी ऐन्दी सै कुण और किणी छ़ेउड़ी आ, कैलैकि इऐ छ़ेउड़ी ता पापीण आ।”

⁴⁰यीशुऐ तेसरै मौना रै विच़ार ज़ाणियौ तेसलै बोलौ, “ओ शमौन मुंइऐ ताउंलै कुछ़ बोलणौ आ।” शमौनै बोलौ “ओ गुरु बोलौ”

⁴¹यीशुऐ एक औनैणै देइयौ तेसलै बोलौ, “एकी सेठा रै दुई करज़दार थै एकी कै थौ पांज़ शौ दिनार, (पांज़ शौ दिना री दिहाड़ी रै बराबर) दुजै कै थौ पचास दिनारा रौ कौरज़ (पचास दिना री दिहाड़ी रै बराबर)

⁴²ज़ैबै तिऊं करज़दारा कै वापिस दैणा लै कुछ़ ना रौ तैबै तिणी सेठै तिऊं दुइया रौ कौरज़ माफ किऔ, आबै इऊं दुई मांझ़िया कु सेठा आइलै कुण छ़ाड़ा ज़ादौ प्यार?”

⁴³शमौनै ज़वाब दैऔ, “मेरी सौमझ़िऐ सेऊ ज़ासरौ ज़ादौ कौरज़ माफ हुऔ आ” यीशुऐ तेसलै बोलौ ताऐं ठीक ज़वाब दैऔ आ।

⁴⁴तैबै तिऐं छ़ेउड़ी भिलै फिरीऔ यीशुऐ शमौना लै बोलौ, “का तू इऐ छ़ेउड़ी देखा ई?” हाऊं तैरै घौरा कै आशौ ताऐं मैरै लाता धोइणा लै पाणी नाईं दैऔ पर इऐं छ़ेउड़ीऐ मेरी लातै आपणै आशु कौरीऐ धोई और बाल़ा कौरीऐ ई गुशी।

⁴⁵ताऐं मुंदी खोबु नाईं दैऔ पर ज़ेबी कु हाऊं आशो ऊ तेबी ओउलै इऐ छ़ेउड़ी मैरै बांगणै दी खोबु दैंदै लागी औन्दी।

⁴⁶ताऐं मैरै मुंडा दी तेल नाईं मांडौ पर इऐं छ़ेउड़ीऐ मैरै बांगणेऊ दी खुश्बुदार मैहंगौ तेल मांडौ आ।

⁴⁷एथीलै हाऊं ताउंलै बोलाऊ की इंयारै पाप ज़ो भौरी थै आबै माफ हुई गौऐ कैलैकि इयांऐ भौरी प्यार कियौ आ पर ज़ासरै थोड़ै पाप माफ हुऐ सेऊ थोड़ौ प्यार कौरा आ।

⁴⁸यीशुऐ तिऐं छ़ेउड़ी लै बोलौ, “तैरै पाप माफ हुई गौऐ।”

⁴⁹तैबै ज़ो लोग तेस आइलै रोटी खान्दै थै बोशै औन्दै सै आपणै-आपणै मौना दी सुंच़दै लागै, “इयौ कुण आ ज़ो पाप भी माफ कौरा आ?”

⁵⁰पर यीशुऐ तिऐं छ़ेउड़ी लै बोलौ, “तैरै विश्वासा कौरीऐ तू बौच़ी गोई आ शान्ति कौरीऐ डेऊ।”