Read Pahari, Mahasu लुका 8 Bible Online

लुका 8 - Pahari, Mahasu bible

लुका 8

¹तेथ बासिऐ यीशु इलाकै-इलाकै और गांवा-गांवा दी डेइयौ परचार कौरदै-कौरदै परमेश्‍वरा रै राज़्या रौ खुशी री खौबर शुणाउवा थौ, और तेसरै बारह च़ेलै भी तेस आइलै थै।

²कुछ़ छ़ेउड़ी भी यीशु आइलै थी ज़ुण पेहलै यीशुऐ बुरी आत्मा और बिमारी कु च़ांगी की गोई थी। सै छ़ेउड़ी एज़ी थी, मरियम ज़ो मगदल गांवा री थी ज़ासकु यीशुऐ सात बुरी आत्माऐं गाड़ी थी।

³और हेरोदेस राज़ै रै भौण्डारी खुज़ा री बोउटी योअन्ना और सुसन्नाह नावां री छ़ेउड़ी और भौरी ओर छ़ेउड़ी। सै आपणै धन ज़यदाद कौरीऐ यीशु और तेसरै च़ेलेऊ री सेवा कौरा थी।

⁴ज़ैबै बौड़ी भीड़ कौठै हुई और इलाकै-इलाकै रै लोग यीशु काऐ आशै, तैबै तिणीऐ औनैणै देइयौ तिउंलै बोलौ,

⁵“एक बीजा बौइणै वाल़ौ बीजा बौइंदै निकल़ौ बीज बौइणै वाल़ौ बौइंदी बारै कुछ़ बीज पौड़ौ बाटा दी, सेऊ बीज फैंच़ुऔ और च़िड़ु-च़िटकेरुऐ च़ुणौ।

⁶और कुछ़ बीज पौड़ौ पथरियाल़ी ज़मीना दी सेऊ बीज ज़ौमौ पर बिण पाणिऐ शुकौ पोरु।

⁷कुछ़ बीज पौड़ौ कौंडियाल़ी झ़ाड़िऊ मांझ़िऐ, सेऊ बौड़िदैं-बौड़िदैं दाबुऔ पोरु झ़ाड़िऊ थाल

⁸कुछ़ बीज पौड़ौ आच़्छ़ी ज़मीना दी, और सेऊ ज़ौमियौ शौ गुणौ फौल़ौ।” इणै बोलीयौ यीशुऐ तौंइऐ ज़ोरै बोलौ, “तुमै मैरै औनैणौ रै मतलब सौमझ़णौ च़ाहा ई, ता तुमै ध्याना देइयौ सुच़ेऊ कि तुमै का शुणाई।”

⁹यीशु रै च़ेलेउऐ यीशु कु पुछ़ौ, “एस औनैणै रौ मतलब का सा?”

¹⁰तैबै यीशुऐ तिउंलै ज़वाब दैऔ, “इबी झ़ांऊ लोग नाईं ज़ाणा थै कि परमेश्‍वर आशीयौ लोगु रै ज़िवा दी राज़ कौरा आ। तुमुकै ता एस भेता रै बारै दी मुंइऐ सब कुछ़ आ बोलौ औन्दौ, पर ज़ासरै ज़िवा दी परमेश्‍वरा रौ राज़ नाईं, इऐ काआणी तिऊं लोगु लै आ।। इणै लोग देखा ता ई रौंगै, पर सुंच़दै नाईं, और शुणा ता ई रौंगै पर सौमुझ़दै नाईं।”

¹¹औनैणै रौ मतलब इणौ आ, “कि बीज परमेश्‍वरा रौ वच़न आ।

¹²ज़ो बीज बाटा दी पोड़ौ तेथरौ मतलब आ कि कुछ़ लोग परमेश्‍वरा रौ वच़न ता ई शुणा पर आपणै ज़िवा दी ना छ़ाड़दै, तैबै शैतान तिंउरै ज़िवा कु खरकच़ार आशीयौ परमेश्‍वरा रौ वच़न च़ोरा, ताकी लोग विश्वास कौरीयौ छ़ुटकारौ ना पा।

¹³ज़ो बीज पथरियाल़ी ज़मीना दी पौड़ौ तेथरौ मतलब आ इणौ, कि लोग खरकच़ार खुशी कौरीऐ वच़न माना ई पर ज़ैबै विश्वासा री वज़ाह कु केज़ौ भी कौष्ट या सताव आशा, तैबै सै फेटी फशटा ई कैलैकि सै परमेश्‍वरा रौ वच़न आपणै ज़िवा दी नाईं बसाल़दै।

¹⁴और ज़ो बीज झ़ाड़िऊ मांझ़िऐ पौड़ौ थौ सेऊ खौड़ी ना उखरांदौ। तेथरौ मतलब इणौ आ। कि कुछ़ लोग परमेश्‍वरा रौ वच़न शुणाई। बासिऐ धौतरी री च़िन्ता दी, रुपाऐ-पैसै, ज़िन्दगी रै सुखा दी फसियौ परमेश्‍वरा रै विश्वासा दी नाईं बौड़दै।

¹⁵ज़ो बीज आच़्छ़ी ज़मीना दी पौड़ौ थौ, सौ भौरी फौल़ा। तेथरौ मतलब इणौ आ कि कुछ़ लोग परमेश्‍वरा रौ वच़न आच़्छ़ै कौरीऐ शुणाई और तेस वच़ना माथै च़ाला ई और विश्वासा दी बौड़ाई इणै आदमी तेस बीजा बाशीऐ ई ज़ो बीज शौ पाथै फौल़ा आ।”

¹⁶“कोई भी आदमी लम्प ज़ालियौ ओखरा थाल नाईं छ़ाड़दौ और ना पलंगा थाल छ़ाड़दौ, पर तेस घौरा दी उंच़ी ज़ागाह दी छ़ाड़ाई ताकी भितरै आशणै वाल़ै लोगु लै प्याशौ लागा।

¹⁷कैलैकि कोई भी च़ीज़ मेरी नौज़री कु छ़िपी औन्दी ना आसती, ज़ो पौगड़ौ ना कौरियाली, और ना ई कुछ़ छ़ुपौंदौ आसतौ, ज़ो प्याशै दी ना आणियालौ।

¹⁸एथीलै होशियार रौएऊ कि तुमै किणौ शुणाई? कैलैकि ज़ासकै आसा तेसलै औज़ौ मिला, और ज़ासकै कुछ़ा नाईं तेसकु सेऊ भी पोरु निंआई आ ज़ास सेऊ आपणौ सौमझ़ा।”

¹⁹यीशु री मां और भाई यीशु काऐ आशै, पर भीड़ हुणा री वज़ाह कु सै यीशु काऐ नाईं डेई बौल़ै।

²⁰तेस आइलै कुणौ एकीऐ बोलौ, “तेरी मां और तैरौ भाई बाइरै खौड़ौ ई, सै ताऊं कु मिलणौ च़ाहा ई।”

²¹यीशुऐ तिऊं लै ज़वाब दैऔ, “मेरी मां और भाई इऐ सब लोग ई ज़ो परमेश्‍वरा रौ वच़न शुणाई और तेथ माथै च़ाला ई।”

²²तैबै एकी दिनै यीशु और तेसरै च़ेलै किश्ती दी च़ौड़ै और यीशुऐ तिउंलै बोलौ, “च़ालौ आमै झ़िला पारभिलै डेई।” तैबै तिंउऐ किश्ती खुंटीकु खोली गोई।

²³और किश्ती च़ालदै लागी, पर यीशु गौ सुती, और तेबी झ़िला दी तेज़ बागुर लागी, इदरा झ़ांऊ कि किश्ती दी पाणी भौरिंदै लागौ सै सारै मुसीबता दी थै।

²⁴तैबै तिऊं च़ेलेउऐ नज़दीक डेइयौ यीशु उज़ीयाऔ और बोलौ “गुरुजी-गुरुजी आमै नाश ई औन्दै लागौ औन्दै।” तैबै यीशु उठौ और तेज़ बागुर और पाणी रौ छ़ालौ डांटौ, तैबै सै पाणी रै छ़ालै और तेज़ बागुर शान्त हुई और शाई पौड़ी गोई।

²⁵तैबै यीशुऐ तिऊं च़ेलेऊ लै बोलौ, “तुमारौ विश्वास कियै थौ?” तैबै सै डौरी गौऐ हैरान हुइयौ आपु मांझ़िऐ चौपड़िदै लागै, “इयौ कुण औलौ इणौ पा कि पाणी और बागुरा लै हुकम दिआ इऐ एसरी बूश माना ई?”

²⁶तैबै सै गिरासेनिऊ रै इलाकै दी पौउंच़ै ज़ो झ़िला पारभिलै गलील इलाकै रै सामनै आ।

²⁷ज़िणी यीशु झ़िला रै डिका काऐ किश्ती कु उतरौ तिणी सेज़ै इलाकै रौ एक आदमी यीशु कु मिलौ, ज़ासदी बुरी आत्माऐं थी, सेऊ आदमी भौरी दिना ओउलै ना ता जुड़कै भीड़ा थौ और ना ता घौरा कै रौआ थौ पर तिऐ रौआ थौ ज़ियै मौरै औन्दै लोगु दाबा ई।

²⁸सेऊ आदमी यीशु देखीयौ राड़ै मारदै लागौ और यीशु काऐ धौनी पौड़ीयौ हाकै देइयौ बोलदै लागौ, “ओ परमपरधान परमेश्‍वरा रै छ़ोहरु यीशु तू मुकु का च़ाहा ई? हाऊं ताऊं कु औरज़ कौराऊ कि तू मुलै दुःख नाईं दै।”

²⁹कैलैकि यीशुऐ तिऊं बुरी आत्माऐं लै तेस आदमी कु बाइरै निकुल़णै रौ हुकम थौ दैंदै लागौ औन्दौ। और सै बुरी आत्माऐं तेस आदमी दी घौड़ी-घौड़ीऐ आशा थी लोग तेस आदमी शांगल़ी और रशेउ दी बाना थै तिऊं भी सेऊ पोरु च़ोड़ा थौ और सै बुरी आत्माऐं तेस शुनशान ज़ागाह दी नियां थी।

³⁰यीशुऐ तिऐं बुरी आत्मा कु पुछ़ौ, “कि तैरौ का नाऊं?” बुरी आत्मै बोलौ मैरौ नाऊं आ “सेना।” कैलैकि तेसदी भौरी बुरी आत्मा थी लागी ऐन्दी।

³¹तिऊं बुरी आत्मै यीशु कु औरज़ की, कि आमु नौरका री खाल़ी दी ना पाऔ।

³²तिऐ पाहाड़ा माथै सुंगरु रौ गोल़ थौ च़ौरदे लागौ औन्दौ तिऐं बुरी आत्मै यीशु कु औरज़ की कि आमु इऊं सुंगरु दी भेज़ तैबै यीशुऐ तिउंलै हुकम दैऔ।

³³तैबै सै बुरी आत्माऐं तेस आदमी कु निकल़ी औ तिऊं सुंगरु भिलै डेई। तैबै सुंगरु रौ गोल़ मातौल़ै दुड़ियौ झ़िला दी पौड़ै और डुबियौ मौरै।

³⁴तिऊं सुंगरु च़ारणै वाल़ै इणै देखीयौ तिदरु पोरु भागै और इलाकै, गांवा दी डेइयौ लोगु कै इऐ खुशी री खौबर शुणाई।

³⁵ज़ो तिऐ हुऔ थौ तेस देखणा लै लोग आशै और यीशु काऐ आशीयौ, ज़ास आदमी कु बुरी आत्माऐं निकल़ी थी सेऊ आदमी तिंउऐ यीशु रै बांगणै काऐ जुड़कै भिड़ीऔ और शान्त बोशौ औन्दौ देखौ, इणै देखीयौ सै लोग डौरी गौऐ।

³⁶और ज़ुणिऐ भी सेऊ आदमी ठीक हुंदै देखौ थौ तिंउऐ तिऊं ओरी लोगु कै बोलौ की सेऊ बुरी आत्मा कु बिमार आदमी किणै कौरीऐ ठीक हुऔ आ।

³⁷तैबै गिरासेनिऊ इलाकै रै नज़दीका रै सारै लोगुऐ यीशु कु औरज़ की छ़ौंअटी आमारै इलाकै कु पोरु डेऊ। कैलैकि सै भौरी डौरी गौऐ थै तैबै यीशु किश्ती दी च़ौड़ीऔ तिदरु डेउंदै लागौ।

³⁸ज़ास आदमी कु बुरी आत्माऐं निकल़ी थी सेऊ यीशु कु औरज़ कौरदै लागौ कि मुं आपु आइलै दैऔ रौइणै पर यीशु सेऊ वापिस भेज़ौ और तेसलै बोलौ,

³⁹कि आपणै घौरै डेऊ और लोगु काऐ बोल कि परमेश्‍वरै ताऊं माथै दया कौरीयौ किणै बौड़ै-बौड़ै काम किऐ ई, सेऊ आदमी तिदरु डेइयौ सारै इलाकै दी बोलदै लागौ कि यीशुऐ मुं आइलै किणै बौड़ै-बौड़ै काम किएई।

⁴⁰ज़ैबै यीशु वापिस आशौ तैबै लोग खुशी कौरीऐ यीशु कु मिलै कैलैकि सै लोग यीशु पौखदै थै लागै औन्दै।

⁴¹तैबै आराधनालय रौ एक मुख्यौ यीशु काऐ आशौ तेसरौ नाऊं याईर थौ, सेऊ यीशु री लातेऊ माथै पौड़ीयौ यीशु कु औरज़ कौरदै लागौ कि छ़ौंअटी मैरै घौरै च़ालौ।

⁴²कैलैकि तेसरी एका मांई थी बारह बौरशा री, सै मांई मौरणै वाल़ी थी, ज़ैबै यीशु डेउंदै लागौ तैबै लोगु री बौड़ी भीड़ यीशु आइलै थी डेउंदै लागी ऐन्दी।

⁴³तैबै एक छ़ेउड़ी ज़ासदी बारह बौरशा ओउलै लोऊ बौइणै री बिमारी थी, तिआऐं आपणै इलाज़ा कौरना लै आपणी सारी कौमाई खौर्च़ की गोई थी, पर तैबै भी तिंआलै किऐ भी च़ंगाई नाईं मिलौ।

⁴⁴सै छ़ेउड़ी भीड़ा मांझ़िऐ कु यीशु पिछ़ु आशी और तिआऐं यीशु रै च़ोल़ै रौ धुरौ छ़ुऔं और तेबी तिंआरौ लोऊ बौइणौ बन्द हुऔ।

⁴⁵तैबै यीशुऐ बोलौ, “हाऊं कुणिऐ छ़ुंओऊ?” ज़ैबै सारै लोग मुकुरदै लागै तैबै पतरस और तेसरै साथीऊ ऐ यीशु लै बोलौ, “गुरुजी” तुमु माथै एतरी भीड़ आ पौड़दै लागी ऐन्दी। तैबै आमै किणै कौरी बोली बौल़ी, कि तुमै कुणिऐ छ़ुऐं ई

⁴⁶पर यीशुऐ बोलौ, “कुणिऐ हाऊं छ़ुऔं ऊ कैलैकि मुकै च़ौगरुऔ आ, कि मुकु शक्ति निकल़ी आ।”

⁴⁷ज़ैबै तिऐं छ़ेउड़ीऐ देखौ कि यीशु कै पौतौ लागी गौ आ तैबै सै कांबी-कांबीऔ यीशु काऐ आशी और यीशु री लातेऊ माथै पौड़ीयौ सारेऊ लोगु काऐ बोलदै लागी कि मुंइऐ केज़ै कारण यीशु छ़ुंऔ आ और आबै हाऊं एकदम किणी च़ांगी हुई गोई।

⁴⁸यीशुऐ तिंआलै बोलौ, “धीया, तैरै विश्वासा कौरीऐ तू ठीक हुई ई शान्ति कौरीऐ डेऊ।”

⁴⁹ज़ैबै यीशु बुशै लाइंदै थौ लागौ औन्दौ तेबी आराधनालय रै मुख्यै याईरा रै घौरा कु कुछ़ लोग आशीयौ याईरा लै बोलदै लागै, “कि तेरी मांई मौरी गोई आ आबै गुरु लै कौष्ट नाईं दै।”

⁵⁰यीशुऐ इणै शुणियौ याईरा लै बोलौ, “डौर नाईं सिरफ विश्वास छ़ाड़ तैबै तेरी मांई पोरु बौच़ा आ।”

⁵¹याईरा रै घौरा कै पौउंच़ियौ यीशुऐ पतरस, यहुन्ना, याकूब और तिऐं मांई रै मां-बाबा छ़ाड़ियौ कोई भी भितरै तिऐं मांई काऐ नाईं दै आशणै।

⁵²तिऐ सारै लोग छ़ाती पिटीयौ लेरदै थै लागै औन्दै तिऐं मांई लै पर यीशुऐ तिउंलै बोलौ लेरौ नाईं कैलैकि इऐ मांई मौरी नाईं भी नाईं सुती ऐन्दी आ।

⁵³लोग इणै ज़ाणियौ कि मांई मौरी गोई आ यीशु रौ मज़ाक उड़ाउंदै लागै।

⁵⁴तैबै यीशुऐ तिऐं मांई रौ हाथ पाकड़ौ और तिंया लै हाका देइयौ बोलौ, “ओ मांई उठ”

⁵⁵तैबै सै मांई ज़िउंदी हुई गोई, और सै खरकच़ार उठीयौ बोशी। तैबै यीशुऐ तिऐं मांई रै मां-बाबा लै बोलौ कि इऐं मांई लै कुछ़ खाणा लै दैऔ।

⁵⁶मांई रै मां-बाब हैरान हुऐ पर यीशुऐ तिउंकै च़ितलाऔ कि ज़ो इदै हुऔ आ कासी कै ना बोलेऊ।