Read Pahari, Mahasu यहुन्ना 1 Bible Online

यहुन्ना 1 - Pahari, Mahasu bible

यहुन्ना 1

¹पुरै संसार चाणनै कु पैहलै वचन थौ, और वचन परमेश्‍वरा आइलै थौ, और वचन ई परमेश्‍वर थौ।

²एऊ ई पैहलै परमेश्‍वरा आइलै थौ।

³परमेश्‍वरै सारौ कुछ़ तेसी कौरी चाणौ, ज़ो कुछ़ हुऔ आ तिऊं मांझ़िआ कु केज़ी भी च़िज़ै तेसरै बगैर नाईं हुई।

⁴सेऊ सारी ज़िन्दगी रौ मूल़ आ और सेऊ आ ज़ुण सारै लोगु लै प्याशौ दिआ आ।

⁵प्याशौ न्यारै दी च़ौमका आ, और न्यारै सेऊ नाईं इशाऔ।

⁶परमेश्‍वरै एक आदमी भेज़ौ ज़ासरौ नाऊं यहुन्ना थौ।

⁷सेऊ एथीलै आशौ कि प्याशै री गवाही दिआ, ताकी सारै तेसरी गवाही कौरी तेस प्याशै माथै विश्वास कौरा।

⁸यहुन्ना आपु ता सेज़ौ प्याशौ नाईं थौ, पर सेऊ सेज़ै प्याशै री गवाही दैंदै आशौ थौ।

⁹सौच़्च़ौ प्याशौ ज़ुण हर एक आदमी प्याशलौ कौरा सा, सेऊ दुनिया रै लोगु मांझ़िऐ पौगड़ौ हुणै वाल़ौ थौ

¹⁰सेऊ दुनिया दी थौ, पुरी दुनिया तेसी कु हुई, पर दुनिया रै लोगुऐ सेऊ नाईं रवावौ।

¹¹सेऊ आपणै लोगु काऐ आशौ पर तेसरै आपणै लोगुऐ सेऊ नाईं अपणाऔ।

¹²पर ज़ुणिऐ सेऊ अपणाऔ, तिउंकै तिणीऐ परमेश्‍वरा री सन्तान हुणै रौ हक्क दैऔ, तिउंकै भी ज़ुण तेस माथै विश्वास छ़ाड़ाई।

¹³सै ना ता आपणै मां-बाबा कु, ना शरीरा री मौरज़ी कु, ना आदमी री मौरज़ी कु, पर परमेश्‍वरा कु पैदै हुऐ ई।

¹⁴और वचन आदमी बौणौ। बौड़ी दया और सौच़्च़ाई कु भरपूर हुईऔ आमु मांझ़िऐ वास कियौ, और आमुऐ तेसरी इणी महिमा देखी, ज़िणी बाबा रै एकलौतै री बौड़ाई।

¹⁵यहुन्नै तेसरै बारै दी गवाही देई, और हाका देइऔ बोलौ, “एऊ सेज़ौ आ, ज़ासरै बारै दी मुंइऐ बोलौ की ज़ुण मुं बासिऐ आशा आ, सेऊ मुकु भी बौड़ौ आ, कैलैकि सेऊ मुकु पैहलै थौ।”

¹⁶कैलैकि तेसरी भरपुरी कौरी आमु सौभी माथै बौड़ी दया मिली।

¹⁷एथीलै कि नियम ता मुसा रै ई दैऔ ऐन्दै, पर परमेश्‍वरै बौड़ी दया और सौच़्च़ाई यीशु मसीह रै ज़ौरिऐ देखा ई।

¹⁸परमेश्‍वर कोइऐ केबी नाईं देखौ, सिरफ एकलौतौ छ़ोहरु ज़ुण आपु ई परमेश्‍वर आ और बाबा री उंगाल़ी दी आ, तिणीऐ परमेश्‍वर पौगड़ौ कियौ।

¹⁹यहुन्ना री गवाही एज़ी आ, कि ज़ेबी यहुदिऊ रै मुख्यै लोगुऐ यरुशलेमा कु याजक और लेवी तेसकु इणौ पुछ़णा लै भेज़ै, “कि तू कुण ई?”

²⁰तैबै तिणीऐ सौच़्च़ौ बोलौ, “हाऊं मसीह नाईं ऊ।”

²¹तैबै तिंउऐ तेसकु पुछ़ौ, “तैबै तू कुण ई? का तू एलियाह भविष्यवक्ता ई?” तिणीऐ बोलौ, “हाऊं नाईं ऊ।” “तैबै का तू भविष्यवक्ता ई?” तिणीऐ ज़वाब दैऔ, “नाईं।”

²²तैबै तिंउऐ तेसकु पुछ़ौ, “तैबै तू कुण ई? ताकी आमै आपणै भेज़णै वाल़ेऊ कै ज़वाब दैऔ।” तू आपणै बारै दी का बोलाई?

²³यहुन्नै यशायाह भविष्यवक्ता रै लिखै औन्दै वचना रै ज़ौरिऐ बोलौ, कि “हाऊं शुनशान ज़ागाह दी एक आदमी री हाक ऊ, प्रभु कालै आशणा लै बाट त्यार कौरौ, ज़ो बिल्कुल साफ और सिधी आ।”

²⁴सै फरीसीउ री तरफा कु थै भेज़ै औन्दै।

²⁵तिंउऐ तेसकु एज़ौ सवाल पुछ़ौ, “अगर तू मसीह नाईं ई, और ना एलियाह आसतौ, ना सेज़ौ भविष्यवक्ता, तैबै बपतिस्मौ कैलै दिआई?”

²⁶यहुन्नै तिउंलै ज़वाब दैऔ, “हाऊं ता पाणी कौरी बपतिस्मौ दिआऊ पर तुमु मांझ़िऐ एक आदमी खौड़ौ आ ज़ास तुमै नाईं ज़ाणदै।

²⁷ज़ुण मुं बासिऐ आशणै वाल़ौ आ, ज़ासरै बुटा रै हाऊं तसमै खोलणै रै लाईक भी नाईं।”

²⁸एज़ी बुशै यरदन नौईं पारभिलै बैतनिय्याह गांवा दी हुई, ज़िऐ यहुन्ना बपतिस्मौ दिया थौ।

²⁹दुजै दिनै तिणीऐ यीशु आपु भिलै आशदै देखीयौ बोलौ, “देखौ, एऊ परमेश्‍वरा रौ च़ेल़टु आ ज़ुण आपु बौल़ी हुइयौ धौतरी रै पाप उठाइयौ नियां सा।

³⁰एऊ सेऊ आ, ज़ासरै बारै दी मुंइऐ बोलौ थौ, ‘कि एक मौरद मुं पिछ़ु आशा आ ज़ुण मुकु भी बौड़ौ सा, कैलैकि सेऊ मुकु भी पैहलै थौ।’

³¹हाऊं ता तेस ज़ाणा भी नाईं थौ कि सेऊ मसीही आ, पर एथीलै हाऊं पाणी कौरी बपतिस्मौ दैंदै लागौ औन्दौ कि सेऊ इस्राइला माथै पौगड़ौ हुआ।”

³²और यहुन्नै एज़ी गवाही देई, “कि मुंइऐ आत्मा कबुतरा ज़िणी सौरगा कु उतुरदै देखी आ, और सै तेस माथै रुकी गोई।

³³हाऊं ता तेस नाईं रवावा थौ, पर ज़ुणिऐ हाऊं पाणी कौरी बपतिस्मौ दैंदै भेज़ौ ऊ, तिणीऐ मुलै बोलौ, ‘ज़ास माथै तू आत्मा उतुरदै और रुकदै देखा लौ, सेऊ पवित्र आत्मा कौरी वपतिस्मा दैणै वाल़ौ आ।’

³⁴मुंइऐ सेऊ देखौ, और तुमुकै सौच़्च़ौ बोलौ आ कि एऊ परमेश्‍वरा रौ छ़ोहरु आ।”

³⁵दुजै दिनै तौंइऐ यहुन्ना और तेसरै च़ेलेऊ मांझ़िया कु दुई ज़ौणै खौड़ै थै हुऐ औन्दै,

³⁶और तिणीऐ यीशु ज़ुण डेउंदै थौ लागौ औन्दौ, देखीयौ बोलौ, “देखौ, एऊ परमेश्‍वरा रौ च़ेल़टु आ।”

³⁷तैबै सै दुई च़ेलै तेसरी इणी बुशै शुणियौ यीशु पिछु च़ाल पौड़ै।

³⁸यीशुऐ सै मुड़ियौ पिछ़ाड़िऐ आशदै देखै और तिउंलै बोलौ, “तुमै कास लोड़दै ई लागै औन्दै?” तिंउऐ तेसलै बोलौ, “ओ गुरु, तू कियै रौआ ई?”

³⁹यीशुऐ तिउंलै बोलौ, “च़ालौ, पोरु देखौ।” तैबै तिंउऐ डेइयौ तेसरी रौइणै री ज़ागाह देखी, और सेज़ै दिनै तेसीई आइलै रौऐ। कैलैकि ब्याल़कै लगभग च़ार बाज़ी गौऐ थै।

⁴⁰तिऊं दुई मांझिया कु, ज़ुण यहुन्ना री बुशै शुणियौ यीशु पिछ़ु आशै थै, एक शमौन पतरसा रौ भाई आन्द्रियास थौ।

⁴¹तिणीऐ पैहलै आपणै सगै भाई शमौना कु मिलियौ तेसलै बोलौ, “आमुकै ख्रिस्ट, या मसीह, मिली गौ आ।”

⁴²तिणीऐ सेऊ यीशु काऐ नियौं। यीशुऐ तेस देखीयौ बोलौ, “तू यहुन्ना रौ छ़ोहरु शमौन ई, ताउंलै कैफा बोलाई,” या पतरस ज़ेथरौ मतलब पात्थर आ।

⁴³दुजै दिनै यीशुऐ सुंच़ी गौ आ कि हाऊं गलील परदेशा लै डिआऊ। सेऊ फिलिप्पुसा कु मिलौ और बोलौ, “मुं पिछ़ु हांड।”

⁴⁴फिलिप्पुस, आन्द्रियास और पतरसा रै इलाकै बैतसैदा रौ रौइणै वाल़ौ थौ।

⁴⁵फिलिप्पुस नतनएला कु मिलौ और तेसलै बोलौ, “ज़ासरै बारै दी मुसा भविष्यवक्तुऐ पवित्रशास्त्रा दी और भविष्यवक्तुऐ बोलौ आ, सेऊ आमुकै मिली गौ आ। सेऊ युसुफा रौ छ़ोहरु, यीशु नासरी आ।”

⁴⁶नतनएलै तेसलै बोलौ, “का कोई आच़्छ़ी च़ीज़ भी नासरता कु निकल़ा आ?” फिलिप्पुसै तेसलै बोलौ, “च़ालियौ देख।”

⁴⁷यीशुऐ नतनएल आपु भिलै आशदै देखीयौ, तेसरै बारै दी बोलौ, “देखौ, एऊ पाकौ इस्राइली आ, एसदी कोई कपट नाईं।”

⁴⁸नतनएलै तेसलै बोलौ, “तू मुं किणै कौरीऐ ज़ाणाई?” यीशुऐ तेसलै ज़वाब दैऔ, “एथकु पैहलै कि फिलिप्पुसे तू औटाऔ, ज़ेबी तू फेड़ु रै पेड़ा थालै थौ, तेबी मुंइऐ तू देखौ ई।”

⁴⁹नतनएलै तेसलै ज़वाब दैऔ, “ओ गुरु, तू परमेश्‍वरा रौ छ़ोहरु ई। तू इस्राइला रौ महाराज़ौ ई।”

⁵⁰यीशुऐ तेसलै ज़वाब दैऔ, “मुंइऐ ज़ो कुछ़ ताऊं लै बोलौ कि मुंइऐ तू फेड़ु रै पेड़ा थालिऐ देखोई, का तू तैबै कौरा ई विश्वास? तू एथकु भी बौड़ै-बौड़ै काम देखा ई।”

⁵¹यीशुऐ तौंइऐ बोलौ, “हाऊं तुमुलै सौच़्च़ौ-सौच़्च़ौ बोलाऊ कि तुमै सौरग खुलौ औन्दौ, और परमेश्‍वरा रै सौरगदूतु मुं आदमी रै छ़ोहरु माथै उतुरदै और उपरै डेउंदै देखा ई।”