Read Pahari, Mahasu यहुन्ना 10 Bible Online

यहुन्ना 10 - Pahari, Mahasu bible

यहुन्ना 10

¹“हाऊं तुमुलै सौच़्च़ौ-सौच़्च़ौ बोलाऊ कि ज़ुण-कुण दारा बाटीऐ भेरी रै बाड़ै दी नाईं आशा लौ, पर और केशी यालै आशा लौ, सेऊ च़ोर और डाकु आ।

²पर सेऊ भेरी रौ भेराल़ड़ु आ ज़ुण दारा बाटीऐ भितरै आशा आ।

³तेसलै दारा खोलणै वाल़ै दार खोलाई, और भेरी तेसरी बाच़ शुणियौ रवावा ई, और सेऊ आपणी भेरीऊ लै नावां कौरीऐ औटाइया और बाइरै नियां आ।

⁴ज़ेबी सेऊ आपणी सारी भेरी बाइरै च़ौराउणा लै गाड़ा सा, ता तिऊंकु औगाड़ी-औगाड़िऐ आण्डा सा, और भेरी तेस आइलै पिछ़ाड़ी-पिछ़ाड़ी हुआई, कैलैकि सै भेरी तेसरी बाच़ शुणियौ रवावा ई।

⁵पर सै बिगानै पिछ़ु नाईं डेउंदी, और तेसकु ओरु-पोरु भागा ई, कैलैकि सै ओरी री बाच़ नाईं रवाउंदी।”

⁶यीशुऐ तिउंलै एऊ औनैणौ दैऔ आ, पर सै नाईं सौमझ़ै कि इऊं बुशु रौ का मतलब आ ज़ो आमु आइलै बोला आ।

⁷तैबै यीशुऐ तिउंलै तौंइऐ बोलौ, “हाऊं तुमु आइलै सौच़्च़ौ-सौच़्च़ौ बोलाऊ, कि ‘भेरीऊ लै भितरै आशणै रौ दार हाऊं ऊ।’

⁸ज़ेती मुकु पैहलै आशै ई सै सारै च़ोर और डाकु ई, पर मेरी भेरीउऐ तिउंरी नाईं शुणी।

⁹‘दार हाऊं ऊ।’ परमेश्‍वर मैरै ज़ौरिऐ आशणै वाल़ै लोगु बौच़ावा आ, और ज़ुण भितरै-बाइरै आशदै डेउंदै थाका लौ लागी तेसलै खाणा लै रोटी मिला आ।

¹⁰च़ोर केज़ै दुजै कामा लै नाईं पर सिरफ च़ोरी कौरदै और झ़ांगदै और नाश कौरदै आशा आ। हाऊं एथलै आशौ ऊ कि सौभी लै ज़िन्दगी मिला, और भौरी मिला।”

¹¹“आच़्छ़ौ भेराल़ड़ु हाऊं ऊ। आच़्छ़ौ भेराल़डु भेरीऊ लै आपणी ज़ान दिआ आ।

¹²ज़ो नुकुर औआ सेऊ ना ता भेराल़डु आ, और ना भेरीऊ रौ मालिक आ, शाल़टौ आशदै देखीयौ सेऊ भेरीऊ छ़ाड़िऔ भागा आ। और शाल़टौ तिऊं भेरीऊ माथै हामलौ कौरा आ और एक भेर पाकड़ियौ ओरीऊ तितर-बितर कौरा आ।

¹³सेऊ एथीलै भागा आ कि सेऊ नुकुर आ, और तेसकै भेरी री फिकर नाईं आसती।

¹⁴आच़्छ़ौ भेराल़ड़ु हाऊं ऊ। और हाऊं आपणी भेरीऊ ज़ाणाऊ, और मेरी भेरी मुं ज़ाणाई।

¹⁵ज़िणौ बाब मुं ज़ाणा आ तिणी ई हाऊं बाब ज़ाणाऊ और हाऊं आपणी भेरीऊ लै आपणी ज़ान दिआऊ।

¹⁶मेरी तौंइऐ भी भेरी ई, ज़ो एस बाड़ै री नाईं ई। मुं सै भी आणनी ज़ुरुरी ई। सै मेरी बाच़ शुणाली रवावा ई, तैबै एका शाल़ और एका भेराल़ड़ु हुआ।

¹⁷बाब एथीलै मुं आइलै प्यार छ़ाड़ा आ कैलैकि हाऊं आपणै प्राण दिआऊ ताकी हाऊं तौंइऐ ज़िउंदौ ऊ।

¹⁸कोई मैरै प्राण मुकु नाईं नींई बौल़दौ, पर हाऊं आपु ई दिआऊ, मुकै तेस प्राण देणै रौ भी हक्क आ और, तेस निणा रौ भी हक्क आ, कैलैकि एज़ौ हुकम मैरै बाबा कु आ मुलै मिलौ औन्दौ।”

¹⁹इऊं बुशु कौरीऐ यहुदिऊ दी आपु मांझ़िऐ फूट पौड़ी गोई।

²⁰तिऊं मांझ़िऊ कु भौरी ज़ौणै बोलदै लागै, “तेसदी बुरी आत्मा आ, और सेऊ पागल आ। तेसरी कैलै शुणाई?”

²¹ओरी लोगुऐ बोलौ, “एज़ी बुशै इणै आदमी री नाईं ज़ासदी बुरी आत्मा आ। का बुरी आत्मा शेड़ै री आखी ठीक कौरी बौल़ा आ?”

²²यरुशलेमा दी स्थापना रौ साज़ौ हुऔ। और हिऊंदा रौ मौसम थौ।

²³यीशु परमेश्‍वरा रै घौरा दी सुलेमाना री खौल़ै दी घुमदै थौ लागौ औन्दौ।

²⁴तैबै यहुदिउऐ सेऊ आशीयौ घेरौ और पुछ़ौ, “तू आमारौ ज़िऊ केबी झ़ांऊ धोखा दी छ़ाड़ाई? अगर तू मसीह ता आमु आइलै साफ-साफ बोल।”

²⁵यीशुऐ तिउंलै ज़वाब दैऔ, “मुंइऐ तुमुलै बोली गौ पर तुमै विश्वास ई ना कौरदै। ज़ो काम हाऊं आपणै बाबा रै हक्‍का कौरीऐ कौराऊ सै काम ई मैरै गवाह ई,

²⁶पर तुमै एथीलै विश्वास नाईं कौरदै कैलैकि तुमै मेरी भेरी मांझ़िया कु नाईं आसती।

²⁷मेरी भेरी मेरी हाक शुणियौ रवावा ई। हाऊं तिऊं ज़ाणाऊ, और सै मुं पिछ़ु-पिछ़ु आण्डाई।

²⁸और हाऊं तिउंलै सौदा री ज़िन्दगी दिआऊ। सै केबी भी नाश नाईं औआ ली, और कोई तिऊं मैरै हाथा कु नाईं नींई।

²⁹मैरौ बाब, ज़ुणिऐ सै मुकै देई ऐन्दी ई, सारेऊ कु बौड़ौ आ और कोई तिऊं बाबा रै हाथा कु नाईं नींई बौल़दौ।

³⁰हाऊं और मैरौ बाब एका ई।”

³¹यहुदी मुख्येउऐ तेसदी पात्थरै लाइणा लै तौंइऐ पात्थर च़ुंगै।

³²एथ माथै यीशुऐ तिउंलै बोलौ, “मुंइऐ तुमुकै बाबा री तौरफा कु भौरी भौलै काम देखाल़ै ई। तिऊं मांझ़िआ कु केज़ै कामा लै तुमै मुंदी पात्थरै लाआ ई?”

³³यहुदी मुख्येउऐ तेसलै ज़वाब दैऔ, “भौलै कामा लै आमै ताऊं दी पात्थरै नाईं लाइंदै पर परमेश्‍वरा री बुराई कौरना लै। और एथलै कि तू आदमी हुइयौ आपु ई परमेश्‍वर बौणा ई।”

³⁴यीशुऐ तिउंलै ज़वाब दैऔ, “का तुमारै पवित्रशास्त्रा दी नाईं आ लिखौ औन्दौ, ‘मुंइऐ बोलौ, तुमै ईश्वर ई?’

³⁵अगर तिणीऐ तिउंलै ईश्वर बोलौ ज़ास काऐ परमेश्‍वरा रौ वचन पौउंच़ौ (और पवित्रशास्त्रा री बूश गलत नाईं हुई बौल़दी),

³⁶ता ज़ुण बाबै पवित्र चाणीऔ धौतरी दी भेज़ौ आ, तुमै तेसलै बोलाई, ‘तू बुराई कौरा ई,’ एथीलै कि मुंइऐ बोलौ, ‘हाऊं परमेश्‍वरा रौ छ़ोहरु ऊ?’

³⁷अगर हाऊं बाबा रौ काम नाईं कौरदौ, ता मैरौ विश्वास नाईं कौरौ।

³⁸पर अगर हाऊं कौराऊ, ता च़ाऊ मैरौ विश्वास नाईं भी कौरौ। पर तिऊं कामा रौ ता विश्वास कौरौ, ताकी तुमै ज़ाणा और सौमझ़ा कि बाब मुंदी आ और हाऊं बाबा दी।”

³⁹तैबै तिंउऐ तौंइऐ तेस पाकुड़नै री कोशिश की पर सेऊ तिंउरै हाथा कु निकल़ी गौ।

⁴⁰तैबै यीशु यरदना नौईं पारभिलै सेज़ी ज़ागाह दी डेई गौ, ज़िऐ यहुन्ना पैहलै बपतिस्मौ दिआ थौ, और तिऐ रौऔ।

⁴¹भौरी लोग तेस काऐ आशीयौ बोला थै, “यहुन्नै ता कोई हैरानी वाल़ै काम नाईं देखाऐ, पर ज़ो कुछ़ यहुन्नै एसरै बारा दी बोलौ थौ, सेऊ सारौ सौच़्च़ौ थौ।”

⁴²और तिऐ भौरी लोगुऐ यीशु माथै विश्वास कियौ।