Read Pahari, Mahasu यहुन्ना 13 Bible Online

यहुन्ना 13 - Pahari, Mahasu bible

यहुन्ना 13

¹फसह रै साज़ै कु पैहलै, ज़ेबी यीशुऐ ज़ाणी गौ कि मैरौ बौगत आशी गौ आ कि धौतरी छ़ाड़ियौ वापिस बाबा काऐ डेऊ, ता आपणै लोगु कु ज़ुण तेस पिछ़ु हाण्डा थै ज़िणौ प्यार सेऊ छ़ाड़ा थौ, सौदा झ़ांऊ तिणौऔ प्यार कौरा।

²ब्याल़की रोटी खाणै रै बौगता दी, शैतानै शमौना रै छ़ोहरु यहुदा इस्करियोती रै ज़िवा दी इणी बूश पाई गोई कि तेस पकड़ावा,

³“यीशुऐ, इणौ ज़ाणीऔ कि बाबै सब कुछ़ मैरै हाथा दी कौरी गौ आ। और हाऊं परमेश्‍वरा रै काऐ कु आशौ औन्दौ, और परमेश्‍वरा रै काऐ वापिस डिआऊ,

⁴यीशु रोटी छ़ाड़ियौ उठौ और आपणै उपरा रै जुड़कै पोरु खोलै, और आपणी कौमरा दी गाची बानिऔ।

⁵ओखरा दी पाणी भौरीऔ च़ेलेऊ रै बांगणै धोउंदै और ज़ेज़ी गाची तेसरी कौमरा दी थी बानी ऐन्दी तेथ कौरी गुशदै लागौ।”

⁶ज़ेबी सेऊ शमौन पतरसा काऐ आशौ, तैबै पतरसै तेसलै बोलौ, “ओ प्रभु, का तू मैरै बांगणै धोआई?”

⁷यीशुऐ तेसलै ज़वाब दैऔ, “ज़ो हाऊं कौराऊ, तू एथरौ मतलब नाईं ज़ाणदौ, पर एथ बासिऐ सौमझ़ा ई।”

⁸पतरसै तेसलै बोलौ, “तू मैरै बांगणै केबी ना धोआलौ!” इणै शुणियौ यीशुऐ तेसलै बोलौ, “अगर हाऊं तैरै बांगणै नाईं धोऊ लै, ता मुं आइलै तैरौ कुछ़ भी रिश्तौ नाईं।”

⁹शमौन पतरसै बोलौ, “ओ प्रभु, ता मैरै बांगणै नाईं, पर हाथ और मूंड़ भी धोऊ।”

¹⁰यीशुऐ तेसलै बोलौ, “ज़ो धोउई गौ आ तेस बांगणै रै सिवाऐ ओर कुछ़ धोउणै री ज़ुरत नाईं, पर सेऊ बिलकुल साफ आ, और तुमै शुद्ध ई पर सौभी रै सौभी नाईं।”

¹¹सेऊ ता आपणै पकड़ाउणै वाल़ौ ज़ाणा थौ एथीलै तिणीऐ बोलौ, “कि तुमै सौभी रै सौभी शुद्ध नाईं।”

¹²ज़ेबी तिणीऐ तिंउरै बांगणै धोई गौऐ, और आपणै जुड़कै भिड़ीयौ बोशी गौ, ता तिउंलै बोलदै लागौ, “का तुमै सौमझ़ै ई कि मुंइऐ तुमु आइलै का किऔ?

¹³तुमै मुलै गुरु और प्रभु बोलाई, और ठीक ई बोलाई, कैलैकि हाऊं सेऊ ऊ।

¹⁴अगर मुंइऐ प्रभु और गुरु हुइयौ तुमारै बांगणै धोऐ ई, ता तुमुऐ भी एकी दुजै रै बांगणै धोउणै च़ांई।

¹⁵कैलैकि मुंइऐ तुमुलै नमुनौ देखाल़ी गौ आ कि ज़िणौ मुंइऐ तुमु आइलै किऔ आ, तुमुऐ भी तिणी ई कौरणौ।

¹⁶हाऊं तुमुलै सौच़्च़ौ-सौच़्च़ौ बोलाऊ, नुकुर आपणै मालिका कु बौड़ौ नाईं आ, और ना भेज़ौ औन्दौ आपणै भेज़णै वाल़ै कु।

¹⁷तुमै एज़ी बुशै ज़ाणाई और अगर तिऊं माना भी लै, ता तुमै आशीष वाल़ै ई।

¹⁸हाऊं तुमु सौभी रै बारै दी नाईं बोलदौ। ज़ुण मुंइऐ च़ुनी गौऐ, तिऊं हाऊं ज़ाणाऊ। पर एऊ एथलै आ कि पवित्रशास्त्रा रौ वचन पुरौ हुआ, ‘ज़ुण मुं आइलै गोष्टुइयौ रोटी खाआ, तिणीऐ मुलै धोखौ दैऔ आ।’

¹⁹आबै हाऊं एथरै हुणै कु पैहलै तुमुलै बोलाऊ ताकी ज़ेबी इणौ हुआ लौ ता तुमै विश्वास कौरा कि हाऊं सेऊ ऊ।

²⁰हाऊं तुमुलै सौच़्च़ौ-सौच़्च़ौ बोलाऊ कि ज़ुण मैंरै भेज़ै औन्दै अपणावा, सेऊ मुं अपणावा। और ज़ुण मुं अपणावा सेऊ मैंरै भेज़णै वाल़ौ अपणावा।”

²¹एज़ी बुशै बोलीयौ यीशु आत्मा दी भौरी दु:खी हुऔ और एज़ी गवाही देई, “हाऊं तुमुकै सौच़्च़ौ-सौच़्च़ौ बोलाऊ कि तुमु मांझ़िआ कु एक मुं पकड़ावा सा।”

²²च़ेलै डौरी-डौरीयौ कि एऊ कासरै बारै दी बोला आ, एकी दुजै भिलै देखदै लागै।

²³तेसरै च़ेलै मांझ़िआ कु एक ज़ासकु यीशु प्यार कौरा थौ, यीशु री छ़ाती भिलै झुकियौ थौ बोशौ औन्दौ।

²⁴शमौन पतरसै तेस भिलै इशारै कौरीऔ तेसकु पुछ़ौ, “बोल ता, एऊ कासरै बारै दी बोला आ?”

²⁵तैबै तिणीऐ तिणी ई यीशु भिलै झुकियौ तेसकु पुछ़ौ, “ओ प्रभु, सेऊ कुण आ?”

²⁶यीशुऐ ज़वाव दैऔ, “ज़ासलै हाऊं एज़ी रोटी रौ गासड़ु डुबाइयौ देऊ लै सेऊ आ।” और तिणीऐ गासड़ु डुबाइयौ शमौन इस्करियोती रै छ़ोहरु यहुदा लै दैऔ।

²⁷गासड़ु खांदै ऐ, शैतान तेसदी बौसी गौ। तैबै यीशुऐ तेसलै बोलौ, “ज़ो तू कौरा ई, शिगरी कर।”

²⁸पर बोशै औन्दै मांझ़िआ कु कोइऐ ना ज़ाणौ कि तिणीऐ एज़ी बूश तेसलै कैलै बोली आ।

²⁹यहुदा कै पैसेऊ री थोउली रौआ थी, कुणी-कुणिऐ सौमझ़ौ कि यीशु तेसकै बोलदै लागौ औन्दौ कि ज़ो कुछ़ आमुकै साज़ै लै च़ांई तेस खरीदिऔ आण, या इणौ कि कुछ़ गरीबा लै दै।

³⁰और सेऊ गासड़ु खाइयौ तेबी बाइरै डैऔ। और एऊ राचकौ बौगत थौ।

³¹ज़ेबी सेऊ बाइरै डैऔ ता यीशुऐ बोलौ, “आबै आदमी रै छ़ोहरु री बौड़ाई हुई आ, और परमेश्‍वरा री बौड़ाई तेसी दी हुई आ।

³²अगर तेसी दी परमेश्‍वरा री बौड़ाई हुई आ, ता परमेश्‍वर भी आपु तेसरी बौड़ाई कौरा आ, और फेटी कौरा।

³³लोल़डेउओ, हाऊं थोड़ै बौगता झ़ांऊ तुमु काऐ ऊ। तैबै तुमै मुं लोड़ाई, और ज़िणौ मुंइऐ यहुदिऊ लै बोलौ, ‘ज़िऐ हाऊं डिआऊ तिऐ तुमै नाईं आशी बौल़दै, तिणी ई, हाऊं आबै तुमुलै भी बोलाऊ।’

³⁴हाऊं तुमुलै एक नौंवौ हुकम दिआऊ, कि एकी दुजै कु प्यार कौरौ। ज़िणौ मुंइऐ तुमु आइलै प्यार किऔ आ, तिणी ई तुमै भी एकी दुजै कु प्यार कौरौ।

³⁵अगर तुमैं आपु मांझ़िऐ प्यार छ़ाड़ा लै, ता इणै कौरीऐ सारै ज़ाणालै कि तुमै मैरै च़ेलै ई।”

³⁶शमौन पतरसै तेसलै बोलौ, “ओ प्रभु, तू केशी डिआई?” यीशुऐ तेसलै ज़वाब दैऔ, “ज़िऐ हाऊं डिआऊ तिऐ तू इबी नाईं आशी बौल़दौ। पर एथ बासिऐ तू मुं पिछ़ु आशा ई।”

³⁷पतरसै तेसलै बोलौ, “ओ प्रभु, इबी हाऊं ताऊं पिछ़ु कैलै ना आशी सौकदौ? हाऊं ता तेरी ताइंऐ मौरणा लै भी त्यार ऊ।”

³⁸यीशुऐ ज़वाब दैऔ, “का तू मुलै आपणै प्राण दिआई? हाऊं ताऊं लै सौच़्च़ौ-सौच़्च़ौ बोलाऊ कि कुखड़ै बाशणै कु पैहलै तू चिया बारै बोलाई कि तू मुं नाईं ज़ाणदौ।