Read Pahari, Mahasu यहुन्ना 3 Bible Online

यहुन्ना 3 - Pahari, Mahasu bible

यहुन्ना 3

¹नीकुदेमुस नावां रौ एक आदमी ज़ुण फरीसी थौ, ज़ुण यहुदिऊ रौ खास स्याणौ थौ।

²तिणीऐ राची यीशु काऐ आशीयौ तेसलै बोलौ, “ओ गुरु, आमै ज़ाणी कि तू परमेश्‍वरा री तौरफा कु आशौ औन्दौ गुरु ई, कैलैकि कोई इऊं नोखै काम ज़ेज़ै तू देखाल़ाई, अगर परमेश्‍वर तेस आइलै नाईं औआ थौ, ता नाईं देखाल़ी बौल़दौ।”

³यीशुऐ तेसलै ज़वाब दैऔ, “हाऊं तुमुलै सौच़्च़ौ-सौच़्च़ौ बोलाऊ, अगर कुण दुजी बारै पैदौ नाईं हुआ लौ ता परमेश्‍वरा रौ राज़ नाईं देखी बौल़दौ।”

⁴नीकुदेमुसै तेसलै बोलौ, “आदमी ज़ेबी बुड़ौ औई जाआ, तैबै सेऊ किणै कौरीऐ जनम नीं सौका? का सेऊ आपणी आमारै गौरबा दी दुजी बारै डेइयौ जनम नीं बौल़ा आ?”

⁵यीशुऐ ज़वाब दैऔ, कि हाऊं तुमुलै सौच़्च़ौ-सौच़्च़ौ बोलाऊ, “ज़ेबी झ़ांऊ केज़ौ भी आदमी पाणी और आत्मा कु पैदौ नाईं हुआ लौ सेऊ परमेश्‍वरा रै राज़्य दी नाईं डेई बौल़दौ।

⁶कैलैकि ज़ुण शरीरा कु आ ज़न्मौ औन्दौ। सेऊ शरीर आ, और ज़ुण आ पवित्र आत्मा कु ज़न्मौ औन्दौ। सेऊ आ आत्मा।

⁷हैरान ना हुऐ कि मुंइऐ ताउंलै बोलौ आ, ‘तुमुऐ दुजी बारै ज़नम निणौ ज़ुरुरी आ।’

⁸बागुर ज़ेज़ी भिलै बौइणौ च़ाहा सा, सेज़ी भिलै बौआ सा और तू बागुरा री हाक शुणाई, पर नाईं ज़ाणदौ कि सै किदरौ बौआ और केशी डिया? ज़ुण भी आत्मा कु ज़न्मौ औन्दौ आ, सेऊ इणी ई आ”।

⁹नीकुदेमुसै तेसलै ज़वाब दैऔ, “एज़ी बुशै किणै कौरीऐ हुआई?”

¹⁰इणै शुणियौ यीशुऐ तेसलै बोलौ, “तू इस्राइलिऊ रौ गुरु हुईऔ भी इऊं बुशै नाईं सौमुझ़दौ?

¹¹हाऊं ताउंलै सौच़्च़ौ-सौच़्च़ौ बोलाऊ कि आमै ज़ो कुछ़ ज़ाणी ई, तेसी बोली ई, और ज़ो आमुऐ देखौ औन्दौ आ, तेसी री गवाही देई ई, और तुमै आमारी गवाही नाईं मानदै।

¹²ज़ेबी मुंइऐ तुमुलै धौतरी री बुशै बोली, और तुमैं विश्वास नाईं कौरदै, अगर हाऊं तुमुकै सौरगा री बुशै बोलु लै, ता तैबै तुमै किणै कौरीऐ कौरा ई विश्वास?

¹³मुं आदमी रै छ़ोहरु छ़ाड़ियौ कोई भी सौरगा दी नाईं डैऔ, सिरफ सेऊ ज़ुण सौरगा कु तौल़ै आशौ, ज़ुण सौरगा दी आ।

¹⁴और ज़ेज़ी रीती कौरी मुसै ज़ांगला दी साप उंच़ै माथै चौड़ाऔ, सेज़ी रीती कौरी ज़ुरुरी आ की मुं आदमी रौ छ़ोहरु भी उंच़ै माथै चौड़ाऊणौ च़ांई।

¹⁵ताकी ज़ुण मुं माथै विश्वास कौरालौ सेऊ सौदा री ज़िन्दगी पा।

¹⁶“कैलैकि परमेश्‍वरै धौतरी रै लोगु आइलै इणौ प्यार छ़ाड़ौ कि परमेश्‍वरै आपणौ एकलौतौ छ़ोहरु दैऔ, ताकी ज़ुण-कुण भी तेस माथै विश्वास कौरालौ सेऊ नाश नाईं औआ, पर सौदा री ज़िन्दगी पा।

¹⁷परमेश्‍वरै आपणौ छ़ोहरु धौतरी दी एज़ी ताइंऐ नाईं भेज़ौ, कि धौतरी रै लोगु माथै सौज़ा रौ हुकम दिआ, पर एज़ी ताइंऐ कि धौतरी रै लोग तेसरै ज़ौरिऐ छ़ुटकारौ पा।

¹⁸ज़ुण मुं माथै विश्वास कौरा आ, तेस माथै सौज़ा रौ हुकम नाईं औन्दौ, पर ज़ुण विश्वास नाईं कौरदौ, सेऊ आरोपी बौणी जा। एथीलै की तिणीऐ परमेश्‍वरा रै एकलौतै छ़ोहरु रै नावां माथै विश्वास नाईं कियौ।

¹⁹और सौज़ा रै हुकमा रौ कारण एऊ आ की प्याशौ धौतरी दी आशौ आ, और आदमीउऐ न्यारौ प्याशै कु प्यारौ ज़ाणौ कैलैकि तिंउरै काम बुरै थै।

²⁰कैलैकि ज़ुण बुराई कौरा सा, सेऊ सौच़्च़ाई कु नफरत छ़ाड़ा सा, और प्याशै रै नज़दीक नाईं आशदौ, इणौ ना च़ांई हुऔ कि तेसरै बुरै कामा माथै आरोप लागा।

²¹पर ज़ुण सौच़्च़ाई माथै आण्डा सा, सेऊ प्याशै रै नज़दीक आशा आ ताकी तेसरै काम पौगड़ै औआ, कि सै परमेश्‍वरा री तौरफा कु ई किऐ औन्दै।”

²²तेथ बासिऐ यीशु और तेसरै च़ेलै यहुदिया परदेशा दी आशै। और सेऊ तिऊं आइलै रौइयौ बपतिस्मौ दैंदै लागौ।

²³यहुन्ना भी शालेमा शहरा रै नज़दीक ऐनोन गांवा दी बपतिस्मौ दिआ थौ, कैलैकि तिऐ भौरी पाणी थौ, और लोग आशीयौ बपतिस्मौ नियां थै।

²⁴यहुन्ना तेबी झ़ांऊ ज़ेला दी नाईं पाऔ थौ

²⁵तिऐ यहुन्ना रै च़ेलेऊ रौ कास यहुदी आइलै शुद्धी रै बारै दी सवाल-ज़वाब हुऐ।

²⁶और तिंउऐ यहुन्ना काऐ आशीयौ तेसलै बोलौ, “ओ गुरु, ज़ेज़ौ आदमी यरदना नौईं पार भिला रौ ताऊं आइलै थौ, और ज़ासरी ताइंऐ गवाही देई आ। देख, सेऊ बपतिस्मौ दिआ सा, और सारै लोग तेस काऐ आशा ई।”

²⁷यहुन्नै ज़वाब दैऔ, ज़ेबी झ़ांऊ आदमी लै सौरगा कु नाईं दिआ लै, तेबी झ़ांऊ सेऊ कुछ़ नाईं पाई बौल़दौ।

²⁸तुमै ता आपु ई मैरै गवाह, कि मुंइऐ बोलौ, “हाऊं मसीह नाईं, पर तेसकु औगाड़िऐ ऊ भेज़ौ औन्दौ।”

²⁹लाड़ी ता लाड़ै री हुआ आ पर लाड़ै रौ गोश्टण ज़ुण खौड़ौ तेसरी शुणा, लाड़ै री बुशेऊ शुणियौ भौरी खुश हुआ। ऐबै मेरी बौड़ी खुशी पुरी हुई आ।

³⁰ज़ुरुरी आ कि सेऊ बौड़ा, और हाऊं घौटू।

³¹“ज़ो सौरगा कु आशा सा, सेऊ सारेऊ कु आच़्छ़ौ आ। ज़ो आशा सा धौतरी कु सेऊ आ धौतरी रौ। और धौतरी री ई बुशै बोला सा: ज़ो सौरगा कु आशा आ सेऊ सारेऊ कु माथै आ।

³²ज़ो कुछ़ तिणीऐ देखौ, और शुणौ आ, तेथी री गवाही दिआ आ। और कुछ़ ई लोग तेस माथी विश्वास कौरा ई।

³³पर ज़ुणिऐ तेसरी गवाही मानी गोई तिणीऐ एज़ी बुशु माथै मोहर लाई गोई कि परमेश्‍वर सौच़्च़ौ आ।

³⁴कैलैकि ज़ो परमेश्‍वरै आ भेज़ौ औन्दौ, सेऊ परमेश्‍वरा री बुशै बोला सा। कैलैकि परमेश्‍वर तेसकै पवित्र आत्मा नापी-तोलीऔ नाईं पर रौज़ीयौ दिया आ।

³⁵बाब परमेश्‍वर छ़ोहरु कु प्यार छ़ाड़ा आ, और तिणीऐ सारी च़िज़ै तेसरै हाथा दी देई गोई आ।

³⁶ज़ुण परमेश्‍वरा रै छ़ोहरु माथै विश्वास कौरा सा, सौदा री ज़िन्दगी तेसरी आ। पर ज़ुण परमेश्‍वरा रै छ़ोहरु री नाईं मानदौ, तेसलै सौदा री ज़िन्दगी नाईं मिलदी, पर परमेश्‍वरा रै सौज़ा तेस माथै रौआ ई।”