Read Pahari, Mahasu यहुन्ना 7 Bible Online

यहुन्ना 7 - Pahari, Mahasu bible

यहुन्ना 7

¹इऊं बुशु बासिऐ यीशु गलील परदेशा दी घुमदै थाकौ लागी। कैलैकि यहुदी मुख्यै तेस झ़ांगणै री कोशिश थै कौरदै लागै औन्दै, एथीलै सेऊ यहुदी परदेशा दी घुमणौ नाईं च़ाआ थौ।

²यहुदिऊ रै ताम्बु रौ साज़ौ नज़दीक थौ।

³एथीलै तेसरै भाईउऐ तेसलै बोलौ, “इदरा कु यहुदिया परदेशा लै डेऊ, कि ज़ो काम तू कौरा ई तिऊं तैरै च़ेलै तिऐ भी देखा।

⁴कैलैकि इणौ कोइयौ ना औलौ ज़ुण मशहूर हुणौ च़ाहा और च़ोरुइयौ काम कौरा। अगर तू एज़ौ काम कौरा ई, ता आपु इऐं धौतरी दी पौगड़ौ औऊ।”

⁵कैलैकि तेसरै भाई भी तेस माथै विश्वास नाईं कौरा थै।

⁶तैबै यीशुऐ तिउंलै बोलौ, “मैरौ बौगत इबी झ़ांऊ नाईं आशौ, पर तुमुलै सारौ बौगत आ।

⁷दुनिया रै लोग तुमु कु दुश्मनी नाईं कौरी सौकदै, पर दुनिया रै लोग मुकु दुश्मनी छ़ाड़ाई कैलैकि हाऊं तेसरै विरोधा ई इऐं गवाही दिआऊ कि तेसरै काम बुरै ई।

⁸तुमै साज़ै दी डैऔ। हाऊं इबी एज़ै साज़ै दी नाईं डेउंदौ, कैलैकि इबी मैरै डेउणै रौ बौगत नाईं आशौ।”

⁹सेऊ तिऊंकु एज़ी बुशै बोलीयौ गलीला दी ई रौई गौ।

¹⁰पर ज़ेबी तेसरै भाई साज़ै दी डेई गौऐ ता यीशु आपु भी, पौगड़ै दी नाईं पर मानौ च़ोरुइयौ डैऔ।

¹¹साज़ै दी यहुदी मुख्यै लोग यीशु लोड़दै थै लागै औन्दै और लोगु कु पुछ़ा थै कि, “का यीशु आशी गौ आ?”

¹²और लोगु मांझ़िऐ तेसरै बारै दी च़ोरी-च़ोरीऔ भौरी का बुशै हुई: कुछ़ बोला थै, “सेऊ भौलौ आदमी आ।” और कुछ़ बोला थै, “नाईं, सेऊ लोगु बिशवाशा आ।”

¹³तैबै भी यहुदिऊ रै डौरै कोई भी आदमी यीशु रै बारै दी खुलीयौ नाईं बोला थै।

¹⁴ज़ेबी साज़ै रै आधै दूस बिती गौऐ। ता यीशु परमेश्‍वरा रै घौरा रै खौल़ै दी डेइयौ शिक्षा दैंदै लागौ।

¹⁵तैबै यहुदी रै स्याणै हैरान हुइयौ बोलौ, “एसकै बिण पौड़ी विद्या किणी आशी गोई?”

¹⁶यीशुऐ तिउंलै ज़वाब दैऔ, “मेरी शिक्षा मेरी आपणी नाईं, पर मैरै भेज़णै वाल़ै बाब परमेश्‍वरा री आ।

¹⁷अगर कोई परमेश्‍वरा री इच़्छ़ा दी हांडणौ च़ाहा, ता सेऊ इऐं शिक्षा रै बारै दी ज़ाणालौ कि इऐ परमेश्‍वरा री तौरफा कु आ या हाऊं आपणी तौरफा कु बोलाऊ।

¹⁸ज़ो आपणी तौरफा कु कुछ़ बोला आ, सेऊ आपणी ई बौड़ाई च़ाहा सा। पर ज़ो आपणै भेज़णै वाल़ै री बौड़ाई च़ाहा सा सेऊ ई इमानदार आ, और तेसदी कोई बेइमानी नाईं।

¹⁹का मुसै तुमुलै नियम नाईं दैऔ? तैबै भी तुमु मांझ़िया कु कोई नियमा दी नाईं हाण्डदौ। तुमै मुं कैलै झ़ांगणौ च़ाहा ई?”

²⁰लोगुऐ ज़वाब दैऔ, “तुमु दी बुरी आत्मा आ! तुमु कुण झ़ांगणौ च़ाहा सा?”

²¹यीशुऐ तिउंलै ज़वाब दैऔ, “मुंइऐ एक आरामा रै दिनै च़मतकार किऔ, और तुमै सारै हैरान हुआई।

²²तुमै बोलाई कि मुसै तुमुलै खतनौ कौरणै रौ हुकम आ दैऔ औन्दौ, एथीलै तुमै आरामा रै दिनै आदमी रौ खतनौ कौरा ई, पर इणौ नाईं सेऊ मुसा री तौरफा कु आ पर इऐ ता नाना-बुड़ु कु च़ाली ऐन्दी रीती आ।

²³ज़ेबी आरामा रै दिना दी आदमी रौ खतनौ कौरा ई ताकी मुसा रै नियमा रौ हुकम टौल़ौ ना च़ांई, ता तुमै मुं माथै एज़ी ताइंऐ रोश कैलै गाड़ाई कि मुंइऐ आरामा रै दिना दी एक आदमी आच़्छ़ा कौरीऐ च़ांगौ किऔ।

²⁴मूंह देखीयौ फैसलौ नाईं कौरौ, पर ठीक-ठीक फैसलौ कौरौ।”

²⁵तैबै कुछ़ यरुशलेमा दी रौइणै वाल़ै बोलदै लागै, “का एऊ सेऊ नाईं ज़ास यहुदी मुख्यै झ़ांगणै री कोशिश कौरदै ई लागै औन्दै?”

²⁶पर देखौ, “एऊ ता खुलम-खुलौ बुशै ला सा और कोई भी तेसलै कुछ़ नाईं बोलदै। का मुख्यैउऐ सौच़्च़ौ-सौच़्च़ौ ज़ाणी ऐरौ आ कि एऊ ई मसीह आ?

²⁷एस ता आमै ज़ाणी ई कि एऊ किदलौ आ। पर ज़ेबी मसीह आशा लौ ता कोई नाईं ज़ाणालौ कि सेऊ किदलौ आ।”

²⁸तैबै यीशुऐ परमेश्‍वरा रै घौरा रै खौल़ै दी शिक्षा दैंदी बारै औटाइयौ बोलौ, “तुमै मुं ज़ाणाई, और इणौ भी ज़ाणाई कि हाऊं किदलौ ऊ, हाऊं ता आपु नाईं आशौ, पर मैरौ भेज़णै वाल़ौ सौच़्च़ौ आ, तेस तुमै नाईं ज़ाणदै,

²⁹पर हाऊं तेस ज़ाणाऊ कैलैकि हाऊं तेसरी तौरफा कु और तिणीऐ हाऊं भेज़ौ ऊ।”

³⁰एज़ी बुशा माथै तिऊं मुख्यैउऐ सेऊ पाकुड़नौ च़ाऔ, तैबै भी कोइऐ तेसदी हाथ नाईं लाऔ कैलैकि यीशु रै मौरणै रौ ठीक बौगत इबी झ़ांऊ नाईं आशौ थौ।

³¹तैबै भी भीड़ा रै भौरी लोगुऐ तेस माथै विश्वास कियौ, और बोलदै लागै, “मसीह ज़ेबी आशा लौ ता का एथकु भी बौड़ै च़मतकार देखाल़ाई ज़िणै इणीऐ देखाल़ै ई?”

³²फरीसीउऐ लोगु कु यीशु रै बारै दी एज़ी बुशै च़ोरी-च़ोरीऔ लाइंदै शुणी। और बौड़ै याजकु और फरीसीउऐ तेस पाकुड़ना लै परमेश्‍वरा रै घौरा रै च़ोउकीदार भेज़ै।

³³एथ माथै यीशुऐ बोलौ, “हाऊं थोड़ै बौगता झ़ांऊ तौंइऐ तुमु आइलै ऊ, तैबै आपणै भेज़णै वाल़ै काऐ वापिस डिआऊ।

³⁴तुमै मुं लोड़ाई, पर नाईं मिलु लौ। और ज़िऐ हाऊं ऊ, तिऐ तुमैं नाईं आशी बौल़दै।”

³⁵एथ माथै यहुदी मुख्यै आपु मांझ़िऐ बोलदै लागै, “एऊ किऐ डिआ कि एऊ आमुकै नाईं मिला लौ? का एऊ तिऊं यहुदी लोगु काऐ डिआ ज़ो युनानिया दी तितर-बितर हुइयौ रौआ ई, और युनानिऊ मांझ़िऐ भी परचार कौरा?

³⁶एऊ का बोलणौ च़ाहा सा ज़ो इणीऐ बोली, कि ‘तुमै मुं लोड़ाई, पर नाईं मिलु लौ। और ज़ियै हाऊं ऊ, तिऐ तुमै नाईं आशी बौल़दै?’ ”

³⁷साज़ै रै आखरी दिनै, ज़ो बौड़ौ दीन आ, यीशु खौड़ौ हुऔ और औटाइयौ बोलौ, “अगर कोई चिशौ आ ता मुं काऐ आशा और पिया।”

³⁸ज़ुण मुं माथै विश्वास कौरालौ, ज़िणौ पवित्रशास्त्रा दी आ लिखौ औन्दौ, “तेसरै ज़िवा कु ज़िन्दगी दैणै वाल़ी पाणी री नौईं ज़ेथ कौरी ज़िन्दगी मिला बौइयौ निकल़ा।”

³⁹तिणीऐ एऊ वचन तिऐं पवित्र आत्मा रै बारै दी बोलौ, ज़ो विश्वास कौरणै वाल़ेऊ लै मिलणै वाल़ी थी। कैलैकि आत्मा इबी झ़ांऊ नाईं उतरौ थौ, यीशु इबी झ़ांऊ आपणी महिमा दी नाईं आशौ थौ।

⁴⁰तैबै भीड़ा मांझ़िया कु कुणिऐ एज़ी बुशै शुणियौ बोलौ, “सौच़्च़ी ई एऊ सेज़ौ भविष्यवक्ता आ ज़ास आमै ज़ागदै थै लागै औन्दै।”

⁴¹दुजै आदमीऐ बोलौ, “एऊ मसीह आ।” पर केज़ेउऐ बोलौ, “कैलै? का मसीह गलील परदेशा कु आशा आ?

⁴²का पवित्रशास्त्र दी इणौ नाईं आ लिखौ औन्दौ कि मसीह दाऊद रै वंशा कु और बैतलहम गांवा कु आशा ज़िऐ दाऊद रौआ थौ?”

⁴³तैबै तेसरी वज़ाह कु लोगु मांझ़िऐ फूट पौड़ी।

⁴⁴तिऊं मांझ़िऐ कुछ़ तेस पाकुड़नौ च़ाहा थै, पर कोइऐ तेसदी हाथ नाईं लाऔ।

⁴⁵तैबै सै परमेश्‍वरा रै घौरा रै च़ोउकीदार बौड़ै याजकु और फरीसीउ काऐ आशै। तिंउऐ तेसलै बोलौ, “तुमुऐ सेऊ कैलै नाईं आणौ?”

⁴⁶च़ोउकीदारुऐ ज़वाब दैऔ, “केज़ै आदमीऐ केबी भी इणी बुशै नाईं लाई।”

⁴⁷फरीसीउऐ तिउंलै ज़वाब दैऔ, “का तुमै भी ठौगुई गौऐ?

⁴⁸का सरदारु या फरीसीउ मांझ़िया कु कोइऐ भी तेस माथै विश्वास कियौ आ?

⁴⁹पर इऐ लोग ज़ो मुसा रै नियम नाईं ज़ाणदै, सै परमेश्‍वरा री तौरफा कु शापित ई।”

⁵⁰नीकुदेमुसै, ज़ो पैहलै एकी राचीऐ यीशु काऐ आशौ थौ और तिऊं मांझ़िआ कु एक थौ, तिणीऐ बोलौ,

⁵¹“का आमारौ नियम केज़ै आदमी लै, ज़ेबी झ़ांऊ पैहलै तेसरी शुणियौ सौमझ़ा नाईं लै कि सेऊ का कौरा आ, आरोपी चाणा ई?”

⁵²तिंउऐ तेसलै ज़वाब दैऔ, “का तू भी गलीला परदेशा रौ ई? पवित्रशास्त्रा दी पढ़ तैबै ताउंकै पौतौ लागा कि गलील परदेशा कु कोई भविष्यवक्ता पौगड़ौ ता ना हुऔ।”

⁵³तैबै सौभी आपणै-आपणै घौरै डेई गौऐ।