Read Pahari, Mahasu यहुन्ना 8 Bible Online

यहुन्ना 8 - Pahari, Mahasu bible

यहुन्ना 8

¹पर यीशु आपणै च़ेलेऊ आइलै जैतूना री पहाड़ी माथै डैऔ।

²दोउत राची ई सेऊ तौंइऐ परमेश्‍वरा रै घौरा रै खौल़ै दी आशौ। और भौरी लोग तेस काऐ आशै और सेऊ बोशियौ तिऊं लै शिक्षा दैंदै लागौ।

³तैबै शास्त्री और फरीसीऐ एक छ़ेउड़ी आणी ज़ो गान्दै काम कौरदी बारै पाकड़ुई गोई थी, और सै मांझ़ा दी खौड़ी कौरीयौ यीशु लै बोलौ,

⁴“ओ गुरु, इऐ छ़ेउड़ी गान्दै कामा कौरदी बारै पाकड़ुई आ।

⁵मुसा रै नियमा दी मुसै आमुलै हुकम दैऔ आ कि इणी छ़ेउड़ी ढोल़ीयाइयौ पोरु झांगणी। आबै तू इऐं छ़ेउड़ी रै बारै दी का बोलाई?”

⁶तिंउऐ यीशु अज़माउणा लै एज़ी बूश बोली ताकी तेस माथै गौलती लाइणा लै केज़ी बूश पाकड़ा। पर यीशु उटै झुकियौ औंउठी कौरी ज़मीना दी लिखदै लागौ।

⁷ज़ैबै सै काठै-काठै पुछ़दै लागै, ता यीशुऐ सिधौ हुइयौ बोलौ, “तुमु मांझ़िया कुण आ ज़ुणिऐ पाप नाईं कियौ, सेऊ पैहलै इयां दी ढोल़ा री ला लौ।”

⁸और तैबै उटै पौड़ीयौ ज़मीना दी लिखदै लागौ।

⁹पर सै इणै ज़ाणियौ कि आमै पापी तिदरु बौड़ै कु छ़ोटै झ़ांऊ, एक-एक कौरीऐ निकल़ी गौऐ, और यीशु एखुली रौई गौ।

¹⁰यीशुऐ खौड़ै हुइयौ तियांलै बोलौ, “ओ बौइण, सै कियै डेवै ई? का कोइऐ ताऊं माथै सौज़ा रौ हुकम नाईं दैऔ?”

¹¹तिआऐं बोलौ, “ओ प्रभु, कोइऐ नाईं।” यीशुऐ बोलौ, “हाऊं भी ताऊं माथै सौज़ा रौ हुकम नाईं दैंदौ। आपणै घौरै डेऊ, और आबै केबी भी पाप नाईं कौरणौ।”

¹²यीशुऐ तौंइऐ लोगु लै बोलौ, “धौतरी रौ प्याशौ हाऊं ऊ। ज़ुण मुं पिछ़ु आशा लौ सेऊ न्यारै दी नाईं औआ लौ, पर ज़िन्दगी रौ प्याशौ पा लौ ज़ेथ कौरी ज़िन्दगी मिला आ।”

¹³फरीसीउऐ तेसलै बोलौ, “तू आपणी गवाही आपु दिआई, तेरी गवाही सौच़्च़ी नाईं।”

¹⁴यीशुऐ तिउंलै ज़वाब दैऔ, “अगर हाऊं आपणी गवाही आपु ई दिआऊ, तैबै भी मेरी गवाही ठीक आ, कैलैकि हाऊं ज़ाणाऊ कि हाऊं किदरा कु ऊ आशौ औन्दौ और केशी डिआऊ? पर तुमै नाईं ज़ाणदै कि हाऊं किदरा कु आशौ औन्दौ या केशी डिआऊ।

¹⁵तुमै शरीरा रै मुताबिक फैसलौ कौरा ई। हाऊं कासी रौ फैसलौ नाईं कौरदौ।

¹⁶और अगर हाऊं फैसलौ कौरुलौ भी, ता मैरौ फैसलौ सौच़्च़ौ आ। कैलैकि हाऊं एखुली नाईं, पर हाऊं ऊ, और बाब आ ज़ुणिऐ हाऊं भेज़ौ औन्दौ ऊ।

¹⁷तुमारै मुसा रै नियमा दी भी लिखौ औन्दौ आ कि दुई ज़ौणा री गवाही मिलियौ ठीक हुआ आ।

¹⁸एक ता हाऊं आपणी गवाही आपु ई दिआऊ और दुजौ मैरौ बाब मेरी गवाही दिआ सा ज़ुणिऐ हाऊं भेज़ौ औन्दौ ऊ।”

¹⁹तिंउऐ तेसलै बोलौ, “तैरौ बाब किऐ आ?” यीशुऐ ज़वाब दैऔ, “ना ता तुमै मुं ज़ाणदै और ना मैरौ बाब, अगर मुं ज़ाणाई ता मैरौ बाब भी ज़ाणाई।”

²⁰एज़ी बुशै तिणीऐ परमेश्‍वरा रै घौरा रै खौल़ै दी शिक्षा दैंदी बारै नाज़ा रै कोठारा दी बोली ई, और कोइऐ सेऊ नाईं पाकड़ौ, कैलैकि तेसरौ दु:खा रौ और मौरणै रौ बौगत इबी झ़ांऊ नाईं आशौ थौ।

²¹तैबै यीशुऐ तिउंलै बोलौ, “हाऊं डिआऊ, और तुमै मुं लोड़ाई और आपणै पापा दी मौरा ई। ज़िऐ हाऊं डिआऊ तिऐ तुमै नाईं आशी बौल़दै।”

²²एथ माथै यहुदी मुख्येउऐ बोलौ, “का एऊ आपु ई झ़ांगिया मौरा। ज़िणौ एऊ बोला आ, ज़िऐ हाऊं डिआऊ तिऐ तुमै नाईं आशी बौल़दै?”

²³यीशुऐ तिउंलै बोलौ, “तुमुऐ दुनिया दी जनम नियौं आ और हाऊं सौरगा कु आशौ ऊ। तुमै दुनिया रै ई पर हाऊं दुनिया रौ नाईं।

²⁴एथीलै मुंइऐ तुमुलै बोलौ कि तुमै आपणै पापा दी मौरा लै, कैलैकि अगर तुमै विश्वास नाईं कौरालै कि हाऊं सेऊ ऊ, ता आपणै पापा दी मौरा लै।”

²⁵यहुदी मुख्येउऐ यीशु लै बोलौ, “तू कुण ई?” तिणीऐ तिउंलै बोलौ, “सेऊ ऊ ज़ो तुमुकै पैहलै ओउलै ऊ बोलदै लागौ औन्दौ।

²⁶तुमारै बारै दी मुंइऐ भौरी कुछ़ बोलणौ और फैसलौ कौरणौ आ। पर मैरौ भेज़णै वाल़ौ सौच़्च़ौ आ, ज़ो मुंइऐ तेसकु शुणौ आ तेसीई दुनिया रै लोगु लै बोलाऊ।”

²⁷सै इणौ नाईं सौमझ़ै कि एऊ आमुकै आपणै बाब परमेश्‍वरा रै बारै दी बोलदै लागौ औन्दौ।

²⁸तैबै यीशुऐ बोलौ, “ज़ेबी तुमै मुं आदमी रौ छ़ोहरु उंच़ै माथै च़ुंगालै, ता ज़ाणालै कि हाऊं सेऊ ऊ। हाऊं आपु कु कुछ़ नाईं कौरदौ पर ज़िणौ मैरै बाबै मुकै शिखाऔ तिणी ई एज़ी बुशै बोलाऊ।

²⁹मैरौ भेज़णै वाल़ौ मुं आइलै आ। तिणीऐ हाऊं एखुली नाईं छ़ाड़ौ कैलैकि हाऊं सौदा सेज़ौ काम कौराऊ ज़ेथ कौरी सेऊ खुश हुआ आ।”

³⁰सेऊ एज़ी बुशै बोलदै ई थौ लागौ औन्दौ थौ कि भौरी आदमीऐ यीशु माथै विश्वास किऔ।

³¹तैबै यीशुऐ तिऊं यहुदिऊ लै बोलौ ज़ुणिऐ तेस माथै विश्वास किऔ थौ, “अगर तुमै मैरै वचना शुणियौ माना ई, ता सौच़्च़ी मैरै च़ेलै बौणा ई।

³²तुमै सौच़्च़ाई ज़ाणालै, और सौच़्च़ाई तुमु आज़ाद कौरा आ।”

³³तिंउऐ तेसलै ज़वाब दैऔ, “आमै ता अब्राहमा रै वंशा कु ई, और केबी भी कासी रै नुकुर नाईं हुऐ। तैबै तू किणौ बोलाई कि तुमै आज़ाद हुआई?”

³⁴यीशुऐ तिउंलै ज़वाब दैऔ, “हाऊं तुमुलै सौच़्च़ौ-सौच़्च़ौ बोलाऊ कि ज़ुण-कुण पाप कौरा सेऊ पापा रौ नुकुर औआ।

³⁵नुकुर सौदा घौरा दी नाईं रौइंदौ। छ़ोहरु सौदा रौआ आ।

³⁶एथीलै अगर छ़ोहरु तुमु आज़ाद कौरालौ, ता सौच़्च़ी तुमै आज़ाद हुआई।

³⁷हाऊं ज़ाणाऊ कि तुमै अब्राहमा रै वंशा कु ई। तैबै भी तुमै मैरौ वचन नाईं अपणाउंदै, एथीलै तुमै मुं झ़ांगणौ च़ाहा ई।

³⁸हाऊं तुमुलै सेज़ी बुशै बोलाऊ, ज़ो मुइंऐ देखी ई, ज़ेबी हाऊं आपणै बाबा आइलै थौ। और तुमै तेसीई कौरा ई ज़ो तुमुऐ आपणै बाबा कु शुणौ आ।”

³⁹तिंउऐ तेसलै ज़वाब दैऔ, “आमारौ पुरखा ता अब्राहम आ।” यीशुऐ तिउंलै बोलौ, “अगर तुमै अब्राहमा री सन्तान औलै, ता अब्राहमा ज़िणौ काम कौरा थै।

⁴⁰पर आबै तुमै मुं ज़िणौ आदमी झ़ांगणौ च़ाहा ई, कैलैकि मुइंऐ तुमुलै सेज़ौ सौच़्च़ाई रौ वचन बोलौ ज़ो परमेश्‍वरा कु शुणौ। इणौ ता अब्राहमै भी नाईं किऔ थौ।

⁴¹तुमै आपणै बाबा ज़िणौ काम कौरा ई।” तिंउऐ तेसलै बोलौ, “आमै गान्दै कामा कु पैदै नाईं हुऐ, आमारौ एका बाब आ मतलब कि परमेश्‍वर।”

⁴²यीशुऐ तिउंलै बोलौ, “अगर परमेश्‍वर तुमारौ बाब हुआ थौ, ता तुमै मुं आइलै प्यार कौरा थै। कैलैकि हाऊं परमेश्‍वरा री तौरफा कु आशौ औन्दौ ऊ। हाऊं आपु कु नाईं आशौ, पर तिणीऐ हाऊं भेज़ौ।

⁴³तुमै मेरी बुशै कैलै नाईं सौमुझ़दै? एथीलै कि तुमै मैरौ वचन नाईं शुणी बौल़दै।

⁴⁴तुमै आपणै बाब शैताना कु ई और आपणै बाबा री मौरज़ी पुरी कौरणी च़ाहा ई। सेऊ ता पैहलै कु खुनी आ और सेऊ सौच़्च़ाई माथै नाईं टेकौ, कैलैकि सौच़्च़ाई तेसदी आसती नाईं। ज़ेबी सेऊ झ़ूठ बोला आ, ता सेऊ आपणै स्वभाव कु बोला आ। कैलैकि सेऊ झ़ुठौ आ और झ़ुठा रौ बाब आ।

⁴⁵पर हाऊं ज़ो सौच़्च़ौ बोलाऊ, एथीलै तुमै मैरौ विश्वास नाईं कौरदै।

⁴⁶तुमु मांझ़िआ कु कुण मुं पापी माना ई? अगर हाऊं सौच़्च़ौ बोलाऊ, ता तुमै मैरौ विश्वास नाईं कौरदै?

⁴⁷ज़ो कुछ़ परमेश्‍वरा री तौरफा कु हुआ सा, सेऊ परमेश्‍वरा री बुशै शुणा सा। और तुमै एथीलै नाईं शुणदै कि परमेश्‍वरा री तौरफा कु नाईं आ।”

⁴⁸इणौ शुणियौ यहुदिउऐ तेसलै बोलौ, “का आमै ठीक नाईं बोलदै कि तू सामरी ई, और ताऊं दी बुरी आत्मा आ?”

⁴⁹यीशुऐ ज़वाब दैऔ, “मुंदी बुरी आत्मा नाईं आ। पर हाऊं आपणै बाबा री इज़्ज़त कौराऊ और तुमै मेरी बुराई कौरा ई।”

⁵⁰पर हाऊं आपणी तारीफ नाईं च़ांहादौ। ओ एक आसती आ ज़ुण च़ाहा सा कि मेरी तारीफ हुआ और एथरौ फैसलौ कौरा सा।

⁵¹हाऊं तुमुलै सौच़्च़ौ-सौच़्च़ौ बोलाऊ कि, “अगर केज़ौ आदमी मैरै वच़ना माथै च़ाला लौ ता सेऊ केबी भी ना मौरदौ।”

⁵²यहुदिउऐ तेसलै बोलौ, “आबै आमुऐ ज़ाणी गौ कि ताऊं दी बुरी आत्मा सा। अब्राहम मौरी गौ आ, और भविष्यवक्ता भी गौऐ मौरी, और तू बोलाई ‘अगर कोई मैरै वचना माथै च़ाला लौ ता सेऊ केबी भी नाईं मौरदौ।’

⁵³आमारौ पुरखा अब्राहम ता गौ मौरी। का तू तेसकु बौड़ौ ई? और भविष्यवक्ता भी गौऐ मौरी। तू आपुलै का सौमझ़ाई?”

⁵⁴यीशुऐ ज़वाब दैऔ, “अगर हाऊं आपणी बौड़ाई कौरुलौ, ता मेरी बौड़ाई कुछ़ नाईं, पर मेरी बौड़ाई कौरणै वाल़ौ मैरौ बाब आ, ज़ासलै तुमै बोलाई कि सेऊ तुमारौ परमेश्‍वर आ।

⁵⁵तुमुऐ ता सेऊ नाईं ज़ाणौ। पर हाऊं तेस ज़ाणाऊ। अगर हाऊं बोलु कि हाऊं तेस नाईं ज़ाणदौ तैबै हाऊं तुमु ज़िणौ झ़ुठौ बौणा ऊ, पर हाऊं तेस ज़ाणाऊ और तेसरै वचना माथै च़ालाऊ।

⁵⁶तुमारौ पुरखा अब्राहम मैरै दिना देखणे री आशी दी भौरी मौगन थौ। और तिणीऐ देखौ और खुश हुऔ।”

⁵⁷यहुदिउऐ तेसलै बोलौ, “इबी झ़ांऊ ता तू पचास साला रौ भी नाईं, तैबै भी तांइऐ अब्राहम देखौ आ?”

⁵⁸यीशुऐ तिउंलै बोलौ, “हाऊं तुमुलै सौच़्च़ौ-सौच़्च़ौ बोलाऊ, कि हाऊं अब्राहमा रै पैदै हुणै कु पैहले ऊ।”

⁵⁹तैबै तिंउऐ इऊं बुशै शुणियौ तेसदी लाइणा लै पात्थर च़ुंगै, पर यीशु च़ोरुइयौ परमेश्‍वरा रै घौरा कु निकल़ी गौ।