Read Pahari, Mahasu यहुन्ना 9 Bible Online

यहुन्ना 9 - Pahari, Mahasu bible

यहुन्ना 9

¹यीशुऐ डेउंदी बारै एक आदमी देखौ ज़ुण ज़नमा कु शेड़ौ थौ।

²तेसरै च़ेलेउऐ तेसकु पुछ़ौ, “ओ गुरु, कुणिऐ पाप किऔ थौ कि एऊ शेड़ौ पैदौ हुऔ, इणी आदमीऐ या एसरै मां-बाबै?”

³यीशुऐ ज़वाब दैऔ, “ना ता इणीऐ पाप किऔ थौ, ना ता एसरै मां-बाबै, पर एऊ एथीलै हुऔ कि परमेश्‍वरा रै काम एसदी पौगड़ौ हुआ।”

⁴“ज़ुणिऐ हाऊं भेज़ौ औन्दौ ऊ, आमै तेसरै काम दीन ई दिना दी कौरणै ज़ुरुरी ई। सै राच आशणै वाल़ी आ ज़ेथदी कोई काम नाईं कौरी बौल़दै।

⁵ज़ेबी झ़ांऊ हाऊं धौतरी दी ऊ तेबी झ़ांऊ हाऊं धौतरी रौ प्याशौ ऊ।”

⁶इणौ बोलीयौ तिणीऐ ज़मीना दी थुकौ। और तेस थुका कौरी माटौ सीनौ किऔ, और सेऊ माटौ तेस शेड़ै री आखी दी लाइऔ,

⁷तेसलै बोलौ, “डेऊ, शिलोमा रै कुंऐ दी आखी धोऊ” (शिलोह रौ मतलब आ “भेज़ौ औन्दौ”)। तिणीऐ डेइऔ आखी धोई, और देखदै हुइयौ वापिस आशौ।

⁸तैबै तेसरै पड़ोसी और ज़ुणिऐ सेऊ भीखा मांगदै देखौ थौ, बोलदै लागै, “का एऊ सेऊ नाईं, ज़ुण बोशियौ भीख मांगा थौ?”

⁹कुछ़ लोगुऐ बोलौ, “एऊ सेऊ ऊ आ।” दुजेउऐ बोलौ, “नाईं, पर तेसी ज़िणौ कुण ओर आ।” तिणीऐ बोलौ, हाऊं सेऊ ऊ।

¹⁰तैबै सै तेसकु पुछ़दै लागै, “तू देखदै किणै कौरी लागौ ई?”

¹¹तिणीऐ ज़वाब दैऔ, “यीशु नावां रै एकी आदमीऐ माटौ सीनौ किऔ, और मेरी आखी दी लाइऔ बोलौ, ‘शिलोह रै कुंऐ दी डेइऔ धोऊ,’ तैबै हाऊं डैऔ और आखी धोई और देखदै लागौ।”

¹²तिंउऐ तेसकु पुछ़ौ, “सेऊ किऐ आ? तिणीऐ बोलौ, हाऊं नाईं ज़ाणदौ।”

¹³लोगुऐ सेऊ ज़ुण पैहलै शेड़ौ थौ फरीसीउ काऐ नीं गौ।

¹⁴ज़ेज़ै दिनै यीशुऐ माटौ सीनौ कौरीयौ तेसरी आखी खोली थी, सेऊ आरामा रौ दीन थौ।

¹⁵तैबै फरीसीउऐ भी तेसकु पुछ़ौ कि तू देखदै किणै कौरी लागौ ई। तिणीऐ तिउंलै बोलौ, “तिणीऐ मेरी आखी दी माटौ लाऔ, तैबै मुंइऐ आखी धोई ई, आबै देखाऊ ऊ।”

¹⁶एथ माथै कुछ़ फरीसी लोग बोलदै लागै, “एऊ आदमी परमेश्‍वरा री तौरफा कु नाईं, कैलैकि सेऊ आरामा रौ दीन नाईं मानदौ।” दुजेउऐ बोलौ, “पापी आदमी इणै निशाण किणै कौरीऐ देखाल़ी बौल़ा आ?” और तिऊं मांझ़िऐ फूट पौड़ी गोई।

¹⁷तिंउऐ तेस शेड़ै आदमी लै तौंइऐ बोलौ, “तिणीऐ तेरी आखी खोली गोई। तू तेसरै बारै दी का बोलाई?” तिणीऐ बोलौ, “सेऊ भविष्यक्ता आ।”

¹⁸पर यहुदी मुख्यै कै विश्वास नाईं हुऔ कि सेऊ शेड़ौ थौ और आबै देखा आ, ज़ेबी झ़ांऊ तिंउऐ तेसरै, ज़ासरी आखी खुली गोई थी, मां-बाब औटाइयौ

¹⁹तिऊंकु पुछ़ौ, “का एऊ तुमारौ छ़ोहरु आ, ज़ासलै तुमै बोलाई कि शेड़ौ पैदौ हुऔ थौ? तैबै आबै एऊ किणौ देखी बौल़ा आ?”

²⁰तेसरै मां-बाबै ज़वाब दैऔ, “आमै ता ज़ाणी कि एऊ आमारौ छ़ोहरु आ, और शेड़ौ पैदौ हुऔ थौ।

²¹पर आमै इणौ नाईं ज़ाणदै कि आबै एऊ किणै कौरीऐ देखा आ, और ना इणौ ज़ाणदै कि कुणिऐ एसरी आखी ठीक की ई। एऊ स्याणौ आ। एसी कु पुछ़ौ। एऊ आपणै बारै दी आपु बोला आ।”

²²एज़ी बुशै तेसरै मां-बाबै एथीलै बोली कैलैकि सै यहुदी मुख्यै कु डौरा थै, कैलैकि यहुदी मुख्यै कौट्ठै हुई गौऐ थै कि अगर कुण विश्वास कौरालौ कि एऊ मसीह आ, ता आराधनालय कु पोरु गाड़ी ई।

²³एथीलै तेसरै मां-बाबै बोलौ, “एऊ स्याणौ आ, एसी कु पुछ़ौ।”

²⁴तैबै तिंउऐ तेस आदमी कु ज़ो शेड़ौ थौ, दुजै बारै औटाइयौ तेसलै बोलौ, “सौच़्च़ौ बोलीयौ परमेश्‍वरा री बौड़ाई कर। आमै ता ज़ाणी कि सेऊ आदमी पापी आ।”

²⁵तिणीऐ ज़वाब दैऔ, “हाऊं नाईं ज़ाणदौ कि सेऊ पापी आ कि नाईं। हाऊं एक ई बूश ज़ाणाऊ कि हाऊं शेड़ौ थौ और आबै देखाऊ।”

²⁶तिंउऐ तेसलै तौंइऐ बोलौ, “तिणीऐ ताऊं आइलै का किऔ? और किणै कौरी तेरी आखी ठीक कौरी आ?”

²⁷तिणीऐ तिउंलै बोलौ, “मुंइऐ ता तुमुलै बोली गौ आ, और तुमुऐ नाईं शुणौ। आबै दुजै बारै कैलै शुणनौ च़ाहा ई? का तुमै भी तेसरै च़ेलै हुणौ च़ाहा ई?”

²⁸तैबै सै तेसलै बुरौ-भौलौ बोलीयौ बोलदै लागै, “तू ई तेसरौ च़ेलौ, आमै ता मुसा रै च़ेलै ई।

²⁹आमै ज़ाणी कि परमेश्‍वरै मुसा आइलै बुशै लाई। पर एस आदमी नाईं ज़ाणदै कि एऊ केशी कु आशौ आ।”

³⁰तिणीऐ तिऊं लै ज़वाब दैऔ, “एज़ी ता हैरानी री बूश आ कि तुमै नाईं ज़ाणदै कि सेऊ किदलौ आ, तैबै भी तिणीऐ मेरी आखी खोली गोई।

³¹आमै ज़ाणी कि परमेश्‍वर पापीऊ री नाईं शुणदौ, पर अगर कोई परमेश्‍वरा रौ भौगत आ और तेसरी मौरज़ी माथै हाण्डा आ, ता सेऊ तेसरी शुणा आ।

³²ज़ेबी कु धौतरी चाणी आ तेबी ओउलै केबी भी आमुऐ नाईं शुणौ कि कुणिऐ पैदाइशी कु शेड़ै री आखी ठीक कौरी ई।

³³अगर एऊ आदमी परमेश्‍वरा री तौरफा कु नाईं औलौ, ता कुछ़ भी नाईं कौरी बौल़ा थौ।”

³⁴तिंउऐ तेसलै ज़वाब दैऔ, “तू ता बिल्कुल ई पापा दी पैदौ हुऔ ई, तू आमुलै का शिखावा ई?” और तिंउऐ सेऊ बाइरै गाड़ी गौ।

³⁵यीशुऐ शुणौ कि तिंउऐ सेऊ बाइरै गाड़ी गौ आ, और ज़ेबी सेऊ मिलौ ता तेसलै बोलौ, “का तू आदमी रै छ़ोहरु माथै विश्वास कौरा ई?”

³⁶तिणीऐ ज़वाब दैऔ, “ओ प्रभु, सेऊ कुण आ, कि हाऊं तेस माथै विश्वास कौरु?”

³⁷यीशुऐ तेसलै बोलौ, “ताइंऐ सेऊ देखौ भी आ, और ज़ुण ताऊं आइलै बुशै लाइंदै आ लागौ औन्दौ सेऊ आ।”

³⁸तिणीऐ बोलौ, “ओ प्रभु, हाऊं ताऊं माथै विश्वास कौराऊ।” और तेसलै ढाल की ई।

³⁹तैबै यीशुऐ बोलौ, “हाऊं एस धौतरी दी फैसलौ कौरदै ऊ आशौ औन्दौ ताकी ज़ुण नाईं देखदै सै देखा और ज़ुण देखा आ सै शेड़ै औआ।”

⁴⁰ज़ुण फरीसी तेस आइलै थै तिंउऐ एज़ी बुशै शुणियौ तेसलै बोलौ, “का आमै भी शेड़ै ई?”

⁴¹यीशुऐ तिउंलै बोलौ, “अगर तुमै शेड़ै औलै ता पापी नाईं औआ थै पर आबै बोलाई कि आमै देखी ई, एथीलै तुमुलै माफी नाईं मिलदी।”