Read Pahari, Mahasu प्रेरित 10 Bible Online

प्रेरित 10 - Pahari, Mahasu bible

प्रेरित 10

¹कैसरिया इलाकै दी कुरनेलियुस नावां रौ एक आदमी थौ, ज़ुण इतालियानी नावां रै गुटा रौ आफसर थौ।

²सेऊ भौगत थौ और आपणै सारै टौबरा आइलै परमेश्‍वरा कु डौरा थौ, और गरीब लोगु लै दाण दिआ थौ, और रोज़ परमेश्‍वरा कु प्राथना कौरा थौ।

³एकी दिनै दुसकै चिजै पैहरै दी एक साफ दर्शण देखौ कि परमेश्‍वरा रौ एक दूत तेस काऐ भितै आशीयौ तेसलै बोलौ, “ओ कुरनेलियुस।”

⁴कुरनेलिउसै सेऊ बौड़ै ध्याना कौरी देखौ और डौरीऔ बोलौ, “ओ प्रभु का बोलाई?” दूतै तेसलै बोलौ, “तेरी प्राथना और तैरै दैऔ औन्दौ दाण याद कौरना लै परमेश्‍वरा काऐ पौउंच़ी गौऐ।

⁵आबै याफा गांवा दी आदमी भेज़ीयौ, शमौन ज़ासलै पतरस भी बोलाई आपु काऐ औटाऊ।

⁶सेऊ च़ामड़ै चाणनै वाल़ै शमौना, रै काऐ आ रौ औन्दौ ज़ासरौ घौर समुन्दरा रै डिका काऐ आ।”

⁷तैबै सेऊ दूत ज़ुणिऐ इऐ बुशै बोली थी तिदरु डैऔ तैबै कुरनेलियुसै आपणै दुई नुकुरु मांझ़िआ कु एक भौगत सिपाई आपु काऐ औटाऔ,

⁸और तेस काऐ सारी बुशै बोलीयौ सेऊ याफा गांवा लै भेज़ौ।

⁹दुजै दिनै ज़ेबी सै चीन आदमी ज़ो कुरनेलियुसै भेज़ै थै हांडदै-हांडदै इलाकै दी पौउंच़णै वाल़ै थै ता, सेज़ै बौगतै पतरस प्राथना कौरदै छ़ापरा माथै डैऔ।

¹⁰तेसकै भूख लागी और सेऊ कुछ़ खाणौ च़ाहा थौ, पर ज़ेबी तिऐ खाणै री त्यारी कौरदै थै लागै औन्दै, ता पतरस बैहोश हुऔ।

¹¹तैबै तिणीऐ देखौ कि सौरग खुली गौ। और एक बौड़ी च़ादर च़ारिया कुणै कु लटकाइयौ धौतरी माथै आशदै लागी ऐन्दी।

¹²ज़ेथदी धौतरी माथा रै सारै जानवर और किड़ै-मकौड़ै, और च़िड़ु-च़िटकोरु थै।

¹³तेसकै एक इणी हाक शुणुई कि, “ओ पतरस उठ, झ़ांग और खा।”

¹⁴पर पतरसै बोलौ, “नाईं प्रभु बिलकुल नाईं, कैलैकि मुंइऐ इबी झ़ांऊ कोई भी गान्दी और अशुद्ध च़ीज़ नाईं खाई।”

¹⁵तैबै दुजी बारै तेसकै हाक शुणुई कि, “ज़ो कुछ़ परमेश्‍वरै शुद्ध कौरी गौ आ तेसलै तू अशुद्ध नाईं बोल।”

¹⁶चिआ बारै इणौ हुऔ। तैबै सै च़ादर तिदरु तेबी सौरगा भिलै वापिस डेई।

¹⁷ज़ेबी पतरस आपणै ज़िवा दी एज़ी बुशै सुंच़दै थौ लागौ औन्दौ, कि ज़ो दर्शण मुंइऐ देखौ आ तेसरौ मतलब का औलौ?, ता तेबी सै आदमी ज़ो कुरनेलियुसै थै भेज़ै औन्दै, शमौना रै घौरा लोड़ीयौ दारा काऐ खौड़ै हुऐ,

¹⁸और हाका देइऔ पुछ़दै लागै कि, “का शमौन ज़ासलै पतरस बोलाई इदै आ पाउणौ?”

¹⁹पतरस ता तेस दर्शणा रै बारै दी थौ सुंच़दै लागौ औन्दौ, तेबी पवित्र आत्मै तेसलै बोलौ, “देख चीन आदमी ताऊं लोड़दै ई लागै औन्दै।

²⁰आबै उठीयौ तौल़ै डेऊ, और निडर हुइयौ तिऊं आइलै डेऊ कैलैकि मुंइऐ ई सै भेज़ै औन्दै।”

²¹तैबै पतरसै तिऊं काऐ डेइऔ बोलौ, “देखौ ज़ास लोड़दै तुमै लागै औन्दै ई, सेऊ हाऊं ऊ। तुमै कैलै ई आशै औन्दै?”

²²तिंउऐ बोलौ, “कुरनेलियुस आफसर ज़ुण धौर्मी और परमेश्‍वरा कु डौरणै वाल़ौ, और ज़ासरौ सारी यहुदी ज़ाती दी नाऊं आ, तिणीऐ परमेश्‍वरा रै पवित्र दूता री बुशै शुणी कि तुमु आपणै घौरा कै औटाइयौ तुमु कु परमेश्‍वरा रै वचन शुणा।”

²³तैबै तिणीऐ सै भितरै औटाऐ और तिउंरी सेवा की, दुजै दिनै पतरस तिऊं आइलै च़ाल पौड़ौ, और याफा इलाकै रै कुछ़ विश्वासी भाई भी तेस आइलै डेवे।

²⁴दुजै दिना बासिऐ सै कैसरिया इलाकै दी पौउंच़ै, और कुरनेलियुस आपणै रिश्तेदारु, और खानदानी रै लोगु ज़ागदै थौ लागौ औन्दौ।

²⁵ज़ैबै पतरस भितरै आशौ ता, कुरनेलियुस तेसकु मिलौ और तेसरै बांगणै माथै पौड़ीयौ तेसकै ढाल की।

²⁶पर पतरसै सेऊ खौड़ौ चुंगिऔ तेसलै बोलौ, “खौड़ौ ऊ। मुकै झुकियौ ढाल नाईं कर, हाऊं भी ता ताऊं ज़िणी आदमी ऊ।”

²⁷और तेस आइलै बुशै लाइंदै-लाइंदै भितरै डैऔ, और भौरी लोगु कौठै देखीयौ,

²⁸पतरसै तिउंलै बोलौ, “तुमै ज़ाणाई की दुजी ज़ाती दी मिलणौ और तिऊं रै काऐ डेउणौ आमु यहुदिऊ लै बुरौ आ, पर परमेश्‍वरै मुकै बोलौ आ, कि केज़ै भी आदमी लै गान्दौ या अशुद्ध नाईं बोलु।

²⁹एथीलै हाऊं ज़ेबी तुमुऐ औटाऔ ऊ तेबी ई बिण बोलै आशो ऊ। आबै हाऊं पुछ़ाऊ कि तुमुऐ हाऊं केज़ै कामा लै औटाऔ ऊ?”

³⁰कुरनेलियुसै बोलौ, “एज़ै बौगता दी च़ार दीन पैहलै हाऊं आपणै घौरा दी प्राथना कौरदै थौ लागौ औन्दौ। ता देखौ एक आदमी च़ौमकिलौ जुड़कै भिड़ीयौ, मुकाऐ आशीयौ खौड़ौ हुऔ

³¹और बोलदै लागौ कि, ‘ओ कुरनेलियुस तेरी प्राथना शुणी गोई आ, और तेरी भेंट परमेश्‍वरा काऐ याद किऐ ई।

³²एथीलै याफा इलाकै दी कुछ़ आदमी भेज़ीयौ शमौन ज़ासलै पतरस बोलाई ओरु औटाऊ। सेऊ समुन्दरा रै डिका काऐ शमौना रै घौरा दी आ रौऔ औन्दौ, ज़ुण च़ामड़ै रौ काम कौरा आ, सेऊ तुमुकै परमेश्‍वरा री तौरफा कु खौबर शुणावा आ।’

³³तैबै मुंइऐ तेबी ई ताऊं काऐ आदमी भेज़ै ई और ताऐं आच़्छ़ौ किऔ कि तू आशो ई। आबै आमै सारै इदै परमेश्‍वरा काऐ ई, ज़ो कुछ़ परमेश्‍वरै ताउंकै बोलौ आ तेस शुणु।”

³⁴तैबै पतरसै बोलौ, “आबै मुकै पौतौ लागी गौ आ कि परमेश्‍वर कासी भी ऊंच़-नीच़ नाईं मानदौ।

³⁵बल्कि हर ज़ाती कु ज़ुण आदमी परमेश्‍वरा कु डौरा और भौलै काम कौरा, सेऊ तेसकै आच़्छ़ौ लागा।

³⁶ज़ेज़ौ वचन परमेश्‍वरै इस्राइलिऊ कै दैऔ आ, ज़ेबी तिणीऐ यीशु मसीह रै ज़ौरिऐ (ज़ुण सारेऊ रौ प्रभु आ) शान्ति री खौबर शुणाई,

³⁷सेज़ौ वचन तुमै ज़ाणाई, ज़ो यहुन्ना बपतिस्मौ रै परचारा बासिऐ गलील परदेशा कु शुरु हुइयौ यहुदिया परदेशा री भौरी ज़ागाह दी फैअली गौ आ।

³⁸परमेश्‍वरै किणै कौरीऐ यीशु मसीह रौ पवित्र आत्मा और शक्ति कौरीऐ अभिषेक कियौ आ। सेऊ भौलाई कौरा थौ और भौरी बिमार लोगु शैताना रै हाथा कु बौच़ावा थौ, कैलैकि परमेश्‍वर तेस आइलै थौ।

³⁹आमै तिऊं सारै कामा रै शाजत ई। ज़ो यीशुऐ यहुदिया रै परदेश और सारै यरुशलेम शहरा दी किऐ ई, पर यहुदी मुख्येउऐ सेऊ क्रुसा माथै टांगीऔ पोरु झ़ांगौ आ।

⁴⁰पर सेऊ परमेश्‍वरै चिजै दिनै ज़िउंदौ किऔ, और पौगड़ौ भी किऔ आ।

⁴¹सारेऊ लोगुऐ सेऊ नाईं देखौ बल्कि तिऊं मांझ़िऐ ज़ुण परमेश्‍वरै पैहलै कु थै छ़ांटै औन्दै, मतलब आमु मांझ़िऐ ज़ुणिऐ तेसरै ज़िउंदै हुणै बासिऐ तेस आइलै रोटी खाई-पीई आ।

⁴²और तिणीऐ आमुलै हुकम दैऔ कि सारै लोगु लै परचार कौरौ और गवाही दैऔ, कि यीशु ई सेऊ आ ज़ो परमेश्‍वरै मौरै औन्दै और ज़िउंदै ऊ रौ फैसलै कौरणै वाल़ौ चाणौ आ।

⁴³तेसरी गवाही सारै पुराणै भविष्यवक्ता दिआई, कि ज़ुण भी तेस माथै विश्वास कौरालौ तेसलै यीशु रै नावां कौरी पापा री माफी मिला आ।”

⁴⁴पतरस इणी बुशै बोलदै थौ लागौ औन्दौ कि पवित्र आत्मा सारै वचन शुणनै वाल़ेऊ माथै आशौ।

⁴⁵और ज़ेती यहुदी विश्वासी लोग पतरसा आइलै थै आशै औन्दै सै सारै हैरान हुऐ कि दुजी ज़ाती रै लोगु माथै भी पवित्र आत्मा रौ दाण मिली गौ आ।

⁴⁶कैलैकि तिंउऐ सै ओरी-ओरी बोली बोलदै और परमेश्‍वरा री बौड़ाई कौरदै शुणै।

⁴⁷एथ माथै पतरसै बोलौ, “का कुण पाणी रोकी सौका आ कि तिउंलै बपतिस्मौ ना मिला ज़ासकै आमु ज़िणौ परमेश्‍वरा कु पवित्र आत्मा मिलौ आ?”

⁴⁸और पतरसै हुकम दैऔ कि तुमै यीशु मसीह रै नावां कौरी बपतिस्मौ निऔं। तैबै तिंउऐ तेसकु औरज़ कौरी कि आमु आइलै कुछ़ दिना झ़ांऊ औज़ौ रौऊ।