Read Pahari, Mahasu प्रेरित 11 Bible Online

प्रेरित 11 - Pahari, Mahasu bible

प्रेरित 11

¹तैबै विश्वासी भाईउऐ और च़ेलेउऐ शुणौ ज़ुण यहुदिया परदेशा दी थै, कि दुजी ज़ाती रै लोगुऐ भी परमेश्‍वरा रौ वचन मानी गौ आ।

²और पतरस ज़ेबी यरुशलेमा दी आशौ, ता यहुदी विश्वासी लोग तेसकु सवाल-ज़वाब कौरदै लागै,

³कि “ताऐं दुजी ज़ाती रै लोगु आइलै ज़ुण बिणा खतना किऐ औन्दै ई कैलै खाऔ-पिऔ?”

⁴तैबै पतरसै तिउंकै सारी बुशै ज़ो कुरनिलियुसा रै घौरा दी हुई थी शुरु कु शुणाई

⁵कि हाऊं याफा इलाकै दी प्राथना कौरदै थौ लागौ औन्दौ, और मुंइऐ एक दर्शण देखौ कि सौरग खुली गौ। और एक बौड़ी च़ादर च़ारिया कुणै कु लटकाइयौ तौल़ै आशदै लागी ऐन्दी।

⁶ज़ैबै मुंइऐ देखौ ता तिऐं च़ादरी दी सारै जानवर और किड़ै-मकौड़ै, और च़िड़ु-च़िटकोरु थै।

⁷और मुंइऐ एक हाक भी शुणी, “ओ पतरस उठ, झ़ांग और खा।”

⁸मुंइऐ बोलौ, “नाईं प्रभु, नाईं। कैलैकि कोई भी अशुद्ध और गान्दी च़ीज़ इबी झ़ांऊ नाईं खाई।”

⁹दुजी बारै सौरगा कु हाक शुणुई कि, “ज़ो कुछ़ परमेश्‍वरै शुद्ध कौरी गौ आ तेसलै तू अशुद्ध नाईं बोल।”

¹⁰चिआ बारै इणौ हुऔ। तैबै सै च़ादर तिदरु तेबी सौरगा भिलै वापिस डेई।

¹¹और देखौ, चीन आदमी तेबी मुकाऐ आशै ज़ो कैसरिया इलाकै कुरनेलियुसै मुकाऐ थै भेज़ै औन्दै।

¹²तैबै पवित्र आत्मै मुलै तिऊं आइलै निडर हुइयौ डेउणा लै बोलौ, और सै छ़ौ भाई भी मुं आइलै च़ाल पौड़ै। और आमै तेस आदमी रै काऐ डेवे।

¹³तिणीऐ आमुलै बोलौ, “कि एक दूत मुकाऐ आशौ और तिणीऐ मुलै बोलौ, कि याफा लै आपणै आदमी भेज़ीयौ शमौन ज़ासलै पतरस बोलाई तेस इदै आपणै घौरै औटाऊ।

¹⁴सेऊ ताउंकै इणी बुशै बोला आ, ज़ेथ कौरी तू और तैरौ सारौ घौर छ़ुटकारौ पा आ।”

¹⁵ज़ेबी हाऊं तिऊं आइलै बुशै लाइंदै लागौ, ता पवित्र आत्मा तिऊं माथै इणौ आशौ ज़िणौ शुरु दी आमु माथै आशौ आ।

¹⁶तैबै मुकै परमेश्‍वरा री एज़ी बूश याद आशी। ज़ो तिणीऐ बोली थी, कि, “यहुन्नै ता पाणी रौ बपतिस्मौ दैऔ पर तुमुलै पवित्र आत्मा रौ बपतिस्मौ मिला आ।”

¹⁷“एथीलै ज़ैबै परमेश्‍वरै तिउंलै भी सेज़ौ दाण दैऔ आ ज़ो आमुकै प्रभु यीशु मसीह माथै विश्वास कौरीयौ मिलौ थौ। ता हाऊं कुण थौ ज़ुण परमेश्‍वर रोकी सौका थौ?”

¹⁸इणौ शुणियौ यहुदी विश्वासी च़ुटुक थाकै, और परमेश्‍वरा री बौड़ाई कौरदै लागै, “तैबै ता परमेश्‍वर दुजी ज़ातीऊ लै भी सौदा री ज़िन्दगी दिया ज़ैबै सै पापा री माफी मांगियौ यीशु माथै विश्वास कौरालै।”

¹⁹भौरी लोग तेस सताव री वज़ाह कु ज़ो स्तिफनुसा री वज़ाह कु पौड़ै थै, वारै-पारै बिखरी गौऐ थै, सै परचार कौरदै-कौरदै फिनिकै परदेश, साइप्रस टापु और अन्ताकिया रै इलाकै दी पौउंच़ै। पर सै यहुदी लोगु रै अलावा ओरी कासी कै परमेश्‍वरा रै वचन नाईं शुणावा थै।

²⁰पर तिऊं मांझ़िऐ कुछ़ विश्वासी साइप्रस टापु और कुछ़ कुरेनी रै रौइणै वाल़ै थै, ज़ुण अन्ताकिया दी आशीयौ दुजी ज़ातीऊ कै भी प्रभु रौ वचना शुणाउंदै लागै।

²¹प्रभु री शक्ति तिऊं माथै थी, भौरी दुजी ज़ाती रै लोग विश्वास कौरीयौ प्रभु भिलै मुड़ै।

²²ज़ैबै तिंउरै बारै दी यरुशलेमा शैहरा री कलिसिया दी पौतौ लागौ, ता तिंउऐ बरनबास अन्ताकिया इलाकै लै भेज़ौ।

²³बरनबास तिऐ पौउंच़िऔ, और परमेश्‍वरा री बौड़ी दया देखीयौ खुश हुऔ, और तिंउरै विश्वास बौड़ाउणा लै बोलौ, “कि तना-मौना कौरी प्रभु कु च़िपकै रौऔ।”

²⁴बरनबास एक भौलौ आदमी थौ, सेऊ पवित्र आत्मा और विश्वासा कौरी भरपूर थौ। ओर भौरी लोगुऐ प्रभु यीशु माथै विश्वास कियौ।

²⁵तैबै बरनबासै अन्ताकिया इलाकै छ़ाड़ियौ शाऊला लोड़दै तरसुसा गांवा लै च़ाल पौड़ौ।

²⁶ज़ैबै सेऊ तेसकु मिलौ ता तिणीऐ सेऊ आपु आइलै अन्ताकिया इलाकै लै आणौ। तैबै पौलुस ओर बरनाबास एकी साला झ़ांऊ कलिसिया रै लोगु आइलै मिलदै और भौरी लोगु कै प्रभु यीशु री खुश-खौबरी शुणाउंदै थाकै लागी। और च़ेलै सौभी कु पैहलै अन्ताकिया इलाकै दी “मसीह” बौणै।

²⁷सेज़ै बौगतै कुछ़ विश्वासी ज़ुण भविष्यवक्ता थै यरुशलेम शहरा कु अन्ताकिया इलाकै दी आशै।

²⁸तिऊं मांझ़िया कु अगबुस नावां एकी भविष्यवक्तै खौड़ी हुइयौ पवित्र आत्मा रै ज़ौरिऐ बोलौ, “कि सारी धौतरी दी काल़ पौड़ा। और सेऊ काल़ क्लौदियुस राज़ै रै बौगता दी पौड़ौ।

²⁹तैबै च़ेलेउऐ फैसलौ कियौ कि आमै आपणी-आपणी कौमाई कु कुछ़ पैसै कौठै कौरीयौ यहुदिया परदेशा दी रौइणै वाल़ै विश्वासी भाईऊ लै कुछ़ मज़द भेज़ु लै।

³⁰तिंउऐ तिणी कियौ। बरनबास और शाऊला रै हाथा दी यहुदी स्याणेऊ लै कुछ़ पैसै भेज़ै।”