Read Pahari, Mahasu प्रेरित 12 Bible Online

प्रेरित 12 - Pahari, Mahasu bible

प्रेरित 12

¹सेज़ै बौगतै हेरोदेस राज़ै कलिसिया रै कुछ़ लोगु सताउणा लै ज़ेला दी पाऐ ई।

²तिणीऐ यहुन्ना च़ेलै रौ भाई याकूब तलवारी कौरी झ़ौंगाऔ आ।

³ज़ैबै तिणीऐ देखौ कि यहुदी लोग एसकु खुश हुआई तैबै तिणीऐ पतरस भी। सेज़ौ बौगत बिण संज़ेड़ै री रोटी रै साज़ै रै दीन थै।

⁴हेरोदेसै पतरस पाकड़ियौ ज़ेला दी पाऔ, और च़ार-च़ार सिपाई च़ार पहरा दी च़ोउकीदारी दी छ़ाड़ै। एथीलै ताकी फसह रै साज़ै बासिऐ तेस फैसलै कौरना लै लोगु काऐ आणा।

⁵पतरस भौरी दिना झ़ाऊं ज़ेला दी बन्द थौ। पर सारी कलिसिया तेसलै ज़िवा लाइयौ परमेश्‍वरा कु प्राथना कौरदै थी लागी ऐन्दी।

⁶ज़ेबी हेरोदेस तेस फैसलै कौरना लै लोगु काऐ आणनै वाल़ौ थौ, सेज़ी राची पतरस दुई ज़ंज़ीरा दी बानौ औन्दौ दुई सिपाईउ रै बिच़ा दी थौ सुतौ औन्दौ। और सिपाई दारा काऐ च़ोअकीदारी कौरदै थै लागै औन्दै।

⁷तैबै खरकच़ार परमेश्‍वरा रौ एक दूत तेस काऐ आशीयौ खौड़ी हुऔ, तिऐ ज़ेला री कोठरी दी प्याशौ च़ौमकौ, और सौरगदूतै पतरसा री पाशुड़ी दी लाइयौ सेऊ उज़ीयाऔ और बोलौ, “फेटी उठ।” तैबै तेसरै हाथा कु ज़ंज़ीरै खुलीयौ धौनी छ़ुटी।

⁸तैबै सौरगदूतै तेसलै बोलौ कि, “गाची बान, और आपणै बूट ला।” पतरसै तिणी कियौ। तौंइऐ सौरगदूतै तेसलै बोलौ, “आपणै जुड़कै भिड़ीयौ मुं पिछ़ु हांड।”

⁹सेऊ तिदरु निकल़ियौ तेस पिछ़ु च़ाल पौड़ौ। पर इणौ नाईं ज़ाणा थौ कि ज़ो कुछ़ परमेश्‍वरा रौ दूत कौरदै आ लागौ औन्दौ सेऊ सौच़्च़ आ, पर सेऊ सौमझ़ौ कि हाऊं सुइणै देखदै लागौ औन्दौ।

¹⁰तैबै सै पैहलै और दुजै पैहरै कु निकल़ियौ तेस लोऐ रै बौड़ै दारा काऐ पौउंच़ै। ज़ो इलाकै री तौरफा दी आ। सेऊ बौड़ौ दार तिऊं कालै आपु खुली गौ, और सै तिदरु निकल़ियौ एकी गल़ी दी डै और तेबी ई परमेश्‍वरा रौ दूत तेस छ़ाड़ियौ तिदरु पोरु डैऔ।

¹¹तैबै पतरसा कै होश आशी और तिणीऐ बोलौ “आबै मुंइऐ सौच़्च़ ज़ाणी गौ कि परमेश्‍वरै आपणौ दूत भेज़ीयौ हाऊं हेरोदेसा रै हाथा कु छ़ुड़ाई ऐरौ ऊ, और यहुदी मुख्यै री सारी सोच़ा माथै पाणी फेरी गौ आ।”

¹²पतरसै इणौ ज़ाणियौ कि परमेश्‍वरै हाऊं छ़ुड़ाऔ ऊ, यहुन्ना (ज़ासलै मरकुस भी बोला थै) री आमा मरियमा रै काऐ आशौ तिऐ भौरी विश्वासी कौट्ठै हुइयौ प्राथना कौरदै थै लागै औन्दै।

¹³ज़ैबै तिणीऐ बौड़ै दारा री खिड़की खटखटाई, ता रुदे नावां री छ़ेउड़ी देखदै आशी।

¹⁴तिंआइऐ पतरसा री वाच़ रवाई ओर खुशी कौरीऐ दार नाईं खोलौ, पर फेट मारीयौ भितरै डेई और बोलौ, कि पतरस दारा काऐ खौड़ौ आ।

¹⁵तिंउऐ तिंआलै बोलौ, “तू पागल हुई गोई” पर तिंआऐ हिम्मत्ती कौरीयौ बोलौ कि पतरस ई आ। तैबै तिंउऐ बोलौ, “पतरसा रौ दूत औणौ आ।”

¹⁶पर पतरस दारा खटखटाउंदै थाकौ लागी: तैबै तिंउऐ खिड़की खोली और पतरसा देखीयौ हैरान हुऐ।

¹⁷तैबै तिणीऐ साना कौरी तिउंलै बोलौ च़ुटुक थाकौ। और बोलौ कि परमेश्‍वरै किणै कौरी सेऊ ज़ेला कु बाइरै गाड़ौ आ। तौंइऐ बोलौ, “याकूब और भाईऊ कै इऐं बूश बोलेऊ।” आपु डैऔ तिदरु निकल़ियौ दुजी ज़ागाह लै।

¹⁸दोअती ज़ेला रै सिपाईउ मांझ़िऐ खलबली मच़ी गोई कि पतरसा रौ का हुऔ।

¹⁹ज़ैबै हेरोदेसै पतरसा लोड़णै रौ हुकम दैऔ ता तेसकै सेऊ नाईं मिलौ, तैबै हेरोदेसै च़ोअकीदारु री ज़ांच़ कौरी और हुकम दैऔ कि तिऊं पोरु झ़ांगौ। हेरोदेस यहुदिया परदेशा छ़ाड़ियौ कैसरिया इलाकै थोड़ै बौगता लै डेइयौ रौउंदै लागौ।

²⁰हेरोदेस सूर और सैदा रै रौइणै वाल़ै लोगु लै भौरी थौ रोशु औन्दौ। एथीलै सै कौट्ठै हुइयौ हेरोदेसा काऐ आशै, और बलास्तुस ज़ुण राज़ै रौ खास आदमी थौ तेस मौनाइयौ मेल-मिलाप कौरणौ च़ाऔ, कैलैकि राज़ै रै देशा कु तिंउरै देशा रौ पालन-पोषण हुआ थौ।

²¹और सेज़ै दिनै ज़ेबी हेरोदेसै तिऐ रौइणै वाल़ै लोगु कु मिलणै रौ थौ गाड़ौ औन्दौ, हेरोदेसै राज़ै रै जुड़कै भिड़ीयौ राज़गादी माथै बोशौ और तिउंलै भाषण दैंदै लागौ।

²²तैबै लोग हाकै मारीयौ बोलदै लागै, “इऐ ता आदमी री नाईं, बल्कि ईश्वरा री बुशै ई।”

²³तेबी ई परमेश्‍वरा रै एकी दूतै हेरोदेसा लै सौज़ा, कैलैकि तिणीऐ परमेश्‍वरा री बौड़ाई नाईं की। सेऊ किड़ै लागीयौ मौरौ।

²⁴पर परमेश्‍वरा रौ वचन लगातार फैलदै लागौ और भौरी विश्वासी लोग बौड़दै लागै।

²⁵ज़ैबै बरनबास और शाऊलै आपणी सेवा पुरी की तैबै सै यरुशलेम शहरा कु वापिस डेवै और तिंउऐ यहुन्ना ज़ासलै मरकुस भी बोलाई, आपु आइलै नियौं।