Read Pahari, Mahasu प्रेरित 13 Bible Online

प्रेरित 13 - Pahari, Mahasu bible

प्रेरित 13

¹अन्ताकिया इलाकै री कलिसिया दी कई भविष्यवक्ता और परचार कौरणै वाल़ै थै। ज़िणौ की बरनबास और शमौन ज़ुण काल़ौ थौ, और लुकियुस कुरेनी, और च़ोथै हिस्सै रौ राज़ौ हेरोदेसा रौ भाई मनाहेम, और शाऊल।

²ज़ेबी सै ब्रौता छ़ाड़ियौ प्रभु री आराधना कौरदै थै लागै औन्दै, ता पवित्र आत्मै बोलौ कि “मुकालै बरनबास और शाऊल अलग कौरौ ज़ेज़ी सेवा लै मुंइऐ इऐ चुने ई।”

³तैबै तिंउऐ ब्रौत और प्राथना कौरी और बरनबास और शाऊल परमेश्‍वरा रै सेवा रै कामा लै भेज़ै।

⁴तैबै बरनाबास और शाऊल पवित्र आत्मा रै भेज़ै औन्दै अन्ताकिया इलाकै कु सिलुकिया नावां री ज़ागाह लै डेवै। तिदरु पाणी री बौड़ी किश्ती दी साइप्रस टापु लै डेवै।

⁵तिऐ सलमीस नावां री ज़ागाह दी पौउंच़िऔ, तिंउऐ परमेश्‍वरा रौ वचन यहुदिऊ री आराधनालय दी शुणाऔ। यहुन्ना भी तिउंरी मज़द कौरा थौ।

⁶सै तेस टापु सारै गांवा दी डेइयौ पाफुस नावां री ज़ागाह झ़ांऊ पौउंच़ै। तिऐ तिउंकै बार-यीशु नावां रौ एक यहुदी आदमी मिलौ, ज़ुण ज़ादु-टोनौ, और हुणै वाल़ी झ़ुठी बुशै बोला थौ।

⁷सेऊ सिरगियुस पौलुसा नावां रौ आफसरा आइलै थौ, सेऊ बुद्धिमान आदमी थौ। सिरगियुस पौलुसै बरनबास और शाऊल आपु काऐ औटाऐ कैलैकि सेऊ परमेश्‍वरा रौ वचन शुणनौ च़ाहा थौ।

⁸पर इलीमास नावां रै ज़ादु-टोन्है कौरणै वाल़ै, (एऊ बार-यीशु रौ असली नाऊं थौ) तिऊंरौ विरोध कौरीयौ आफसर यीशु माथै विश्वास कौरणै कु रोकणौ च़ाऔ।

⁹तैबै शाऊलै ज़ासरौ नाऊं पौलुस भी आ, पवित्र आत्मा कौरी भौरुइऔ इलीमास ज़ादु-टोणै कौरणै वाल़ै भिलै बौड़ै ध्याना कौरी देखौ और बोलौ,

¹⁰“ओ सारी बुराई और च़ालाकी कौरी भरुऔन्दै शैताना रै छ़ोहरु, आच़्छ़ै कामा रौ दुश्मना, का तू परमेश्‍वरा री सिधी बाट दारखी कौरणौ नाईं छ़ाड़दौ?

¹¹आबै देख, प्रभु ताउंलै सौज़ा दैणै वाल़ौ आ। और तू कुछ़ बौगता झ़ांऊ शेड़ौ रौआ ई और सुरज नाईं देखदौ।” तेबी तेसरी आखी दी धुंधलौ और न्यारौ छ़ाई गौ, और सेऊ ओरु-पोरु तोपींदै लागौ ताकी कोई तेसरौ हाथ पाकड़ियौ हण्डावा।

¹²तैबै आफसरै ज़ो कुछ़ तिऐ हुऔ थौ तेस देखीयौ और प्रभु रै वचना शुणियौ हैरानी कौरीऐ प्रभु यीशु माथै विश्वास कियौ।

¹³पौलुस ओर तेसरै साथी पाफुसा इलाकै कु ज़हाज़ कौरीऐ पंफूलिया इलाकै रै पिरगा गांवा दी आशै। और यहुन्ना (मरकुस) तिऊं छ़ाड़ियौ यरुशलेमा लै वापिस आशौ।

¹⁴पिरगा कु औगांऊ बौड़ियौ सै पिसदिया रै नज़दीक अन्ताकिया इलाकै दी पौउंच़ै। और आरामा रै दिना दी आराधनालय दी डेइयौ बोशी गौऐ।

¹⁵मुसा रै नियम और पुराणै भविष्यवक्ता री किताबी कु पौड़णै बासिऐ आराधनालय रै मुख्यै लोगुऐ तिउंलै बोलौ, “ओ भाईओ, अगर तुमारै ज़िवा दी कुछ़ बूश आ लोगु कै बोलणै लै ता बोलौ।”

¹⁶तैबै पौलुसै खौड़ै हुइयौ और हाथा हिलाइयौ बोलौ, “ओ इस्राइली लोगुओ, और परमेश्‍वरा कु डौरणै वाल़े दुजी ज़ाती रै लोगुओ, शुणौ,

¹⁷इऊं इस्राइली लोगु रै परमेश्‍वरै आमारै नान-बुड़ु च़ुनी गौऐ, और ज़ेबी इऐ मिस्र देशा दी परदेशी हुइयौ रौआ थै, ता सै बौड़ाऐ। और आपणी शक्ति कौरीऐ सै तिदरु आज़ाद किऐ।

¹⁸हालांकी सै परमेश्‍वरा री बुशै भी नाईं माना थै, तैबै भी सेऊ कम सै कम चालिस साला झ़ांऊ शुनशान ज़ागाह दी तिऊं री देखभाल़ कौरदै थाकौ लागी,

¹⁹और कनान देशा री सात ज़ाती झ़ांगीयौ इस्राइली लोग तिऐ साड़ै च़ार शौ साला झ़ांऊ बौसाल़ै।

²⁰तेथ बासिऐ शमुएल भविष्यवक्ता झ़ांऊ परमेश्‍वरै यहुदी लोगु मांझ़िऐ फैसलै कौरणै वाल़ै छ़ाड़ै।

²¹ज़ेबी शमुएल तिऊंरौ मुख्यौ थौ तेबी तिंउऐ एक राज़ौ मांगौ। तैबै परमेश्‍वरै बिन्यामिना रै वंशा कु चालिस साला झ़ांऊ एक आदमी, मतलब कीशा रौ छ़ोहरु शाऊल तिऊं माथै राज़ौ चाणौ।

²²तैबै सेऊ अलग कौरीयौ दाऊद राज़ौ चाणौ। ज़ेथरै बारै दी तिणीऐ गवाही देई, कि मुकै एक आदमी, यिशै रौ छ़ोहरु दाऊद, मैरै ज़िवा ज़िणौ मिली गौ आ। एऊ मेरी सारी मौरज़ी पुरी कौरा आ।

²³तेसी रै वंशा कु परमेश्‍वरै आपणौ वायदौ कियौ औन्दौ इस्राइला कै एक छ़ुटकारै दैणै वाल़ौ, मतलब यीशु भेज़ौ आ।

²⁴ज़ासरै आशणै कु पैहलै यहुन्नै सारै इस्राइलिऊ मांझ़िऐ मन बौदुल़णै रै बपतिस्मौ रै बारै दी परचार कियौ।

²⁵ज़ेबी यहुन्ना आपणी सेवा पुरी कौरणै वाल़ौ थौ, ता तिणीऐ लोगु लै बोलौ कि तुमै मुं का सौमझ़ा ई? हाऊं मसीहा नाईं ऊ, पर देखौ मुं बासिऐ एक आशणै वाल़ौ आ, ज़ासरै हाऊं बुटा खोलणै रै लायक भी नाईं।”

²⁶“अब्राहमा री सन्तान, ओ मैरै भाईओ, तुमै ज़ुण दुजी ज़ाती रै परमेश्‍वरा कु डौराई। तुमुकै इऐ छ़ुटकारै री खौबर भेज़ी औन्दी।

²⁷यरुशलेमा दी रौइणै वाल़ै और तिंउरै स्याणेउऐ ना यीशु रवावौ और ना पुराणै भविष्यवक्ता री बुशै सौमझ़ी, ज़ो हर आरामा वाल़ै दिना दी पौड़ा ई, एथीलै सेऊ आरोपी चाणीऔ सै बुशै पुरी की।

²⁸तिंउऐ झ़ांगणै लायक तेसदी कोई गलती नाईं देखी, तैबै भी पिलातुसा कु ज़ुण रोमी सरकारा रौ आफसर थौ औरज़ कौरी की एस पोरु झ़ांगौ।

²⁹ज़ैबै तिंउऐ यीशु रै बारै दी लिखी ऐन्दी सारी बुशै पुरी की, ता सेऊ क्रुसा माथै कु धौनी उतारीयौ ओडाच़ी दी छ़ाड़ौ।

³⁰पर परमेश्‍वरै सेऊ मौरै औन्दै मांझ़िया कु ज़िउंदौ कियौ,

³¹और यीशु तिउंकै ज़ुण तेस आइलै गलीला परदेशा कु यरुशलेम शहरा लै आशै थै, भौरी दिना झ़ांऊ आपणै च़ेलेऊ कै दिशौ। लोगु मांझ़िऐ आबै सै ई गवाह ई।

³²आमै तुमुकै तेस वायदै रै बारै दी ज़ो नान-बुड़ु कु कियौ थौ, एज़ी खुश-खुशी री खौबरी शुणाई,

³³कि परमेश्‍वरै यीशु मौउता कु ज़िउंदौ कौरीयौ, सेज़ौ वायदौ आमारै लोल़डेऊ लै पुरौ कियौ आ। ज़िणौ भजन संहिता री किताबी दी दुजै पाठा दी आ लिखौ औन्दौ कि ‘तू मैरौ छ़ोहरु ई।’ आज़ मुंइऐ ताऊं लै जनम दैऔ आ।

³⁴और तेसरै इणै मौरणै बासिऐ ज़िउंदै हुणै रै बारै दी भी, कि सेऊ केबी ना शौड़दौ, परमेश्‍वरै इणौ बोलौ, हाऊं दाऊदा माथा री पवित्र और केबी ना खातम हुणै वाल़ी आशीष तुमु माथै कौराऊ।

³⁵एथीलै दाऊदै एक औज़ौ भजना दी भी बोलौ, ‘कि तू आपणै पवित्र आदमी शड़नै नाईं दैंदौ।’

³⁶कैलैकि दाऊद ता परमेश्‍वरा री मौरज़ी कौरीऐ आपणै बौगता दी सेवा कौरीयौ सौदा लै मौरी गौ, और आपणै नान-बुड़ु मांझ़िऐ मिली गौ, और शौड़ी भी गौऔ। एथीई कौरी आमै ज़ाणी की दाऊदै इऐ बूश आपणै बारै दी नाईं बोलौ।

³⁷पर दाऊदै यीशु रै बारै दी बोलौ आ, ज़ो परमेश्‍वरै ज़िउंदौ कियौ आ सेऊ नाईं शौड़ौ।

³⁸एथीलै, ‘ओ भाईओ, तुमै सौमझ़ौ कि यीशु रै ज़ौरिऐ पापा कु माफी पाइणै री खुश-खुशी री खौबरी तुमुलै देई ऐन्दी।’

³⁹और ज़ेज़ी बुशा दी तुमै मुसा रै नियमा रै ज़ौरिऐ बेकसूर नाईं बौणा थै, तिऊं सौभी दी हरेक विश्वास कौरणै वाल़ौ यीशु रै ज़ौरिऐ बेकसूर बौणा आ।”

⁴⁰एथीलै खौबरदार रौएऊ, इणौ ना च़ांई हुऔ कि ज़ो पुराणै भविष्यवक्ता री किताबी दी लिखौ औन्दौ, सेऊ तुमु माथै पौड़ा: (घौटा)

⁴¹ओ “बुराई कौरणै वाल़ेउओ, देखौ, और हैरान हुऔ, और मौरौ। कैलैकि हाऊं तुमारै दिना दी एक काम कौराऊ, इणौ काम कि अगर कुण तुमु मांझ़िया कु तेसरी बुशै भी ला लौ, ता तुमै केबी विश्वास ना कौरा।”

⁴²तैबै पौलुस और बरनबास आराधनालय कु बाइरै आशणै बासिऐ लोग तिऊंकु औरज़ कौरदै लागै कि दुजै आरामा वाल़ै दिना दी इऐ बुशै आमुकै औज़ौ शुणाएऊ।

⁴³ज़ैबै आराधनालय रै लोग उठी गौऐ ता यहुदी और यहुदी गुटा रै आशै औन्दै भौगत मांझ़िया कु भौरी लोग पौलुस और बरनबासा पिछ़ु डेई गौऐ। और तिंउऐ सै लोग सौमझ़ाऐ कि परमेश्‍वरा री दया दी सौदा बौणी रौएऊ।

⁴⁴दुजै आरामा रै दिना दी इलाकै रै सारै लोग परमेश्‍वरा रै वचन शुणना लै दोअती कौट्ठै हुई गौऐ।

⁴⁵पर यहुदी मुख्यै लोग भीड़ा रै लोगु देखीयौ रोशा कौरीऐ भौरुई गौऐ, और पौलुसा री बुराई कौरदै लागै।

⁴⁶तैबै पौलुस और बरनबासै बिण डौरी तिउंलै बोलौ, “ज़ुरुरी थौ कि पेहलै परमेश्‍वरा रौ वचन तुमुकै शुणाइया। अगर तुमै नाईं शुणदै और आपणौ ज़िऊ सौदा री ज़िन्दगी रै लायक नाईं सौमझ़दै, ता आमै दुजी ज़ाती रै लोगु भिलै मुड़ी (और तिउंकै परमेश्‍वरा रौ वचन शुणाई)।”

⁴⁷कैलैकि प्रभुऐ आमुकै इणौ हुकम दैऔ आ “मुंइऐ तुमै दुजी ज़ाती लै प्याशै चाणेई, ताकी दुनिया रै कुणै-कुणै झ़ांऊ सौभी लोगु रौ छ़ुटकारौ औलौ।”

⁴⁸इणै शुणियौ दुजी ज़ाती रै लोग खुश हुऐ, और परमेश्‍वरा रै वचना री बौड़ाई कौरदै लागै। ज़ेती लोग सौदा री ज़िन्दगी पाइणै वाल़ै थै, तिऊं सौभीऐ तेबी विश्वास कियौ।

⁴⁹तैबै परमेश्‍वरा रौ वचन सारै देशा दी फैलदै लागौ।

⁵⁰पर यहुदी लोगु रै मुख्यै उंच़ी ज़ाती री भौगत छ़ेउड़ी और इलाकै रै कुछ़ स्याणै लोग आपणै वंशा किऐ, तिऊंकु पौलुस और बरनबासा रौ विरोध कौराइयौ सै आपणै इलाकै कु बाइरै गौड़ाऐ।

⁵¹तैबै पौलुसै और बरनबासै तिऊं काऐ आपणी चैपली री धूड़ झ़ाड़ीयौ इणौ देखाऔ कि परमेश्‍वरै सै आपणी नौज़री कु दूर कौरी गौऐ और तिदरु निकल़ियौ इकुनियुमा गांवा लै डेवै।

⁵²च़ेलै खुशी कौरीऐ और पवित्र आत्मा कौरी भौरिंदै थाकै लागी।