Read Pahari, Mahasu प्रेरित 14 Bible Online

प्रेरित 14 - Pahari, Mahasu bible

प्रेरित 14

¹इकुनियुमा रै गांवा दी इणौ हुऔ कि पौलुसा और बरनबासै आराधनालय दी डेइयौ इणौ परचार कियौ कि यहुदी और दुजी ज़ाती रै लोगु मांझ़िया कु भौरी लोगुऐ विश्वास कियौ।

²पर ज़ुणी यहुदिउऐ विश्वास नाईं कियौ तिंउऐ सै दुजी ज़ाती रै लोग आपणै वंशा दी किऐ और तिंउरै ज़िवा दी विश्वासी भाईऊ रै खिलाफ दुश्मनी पैदी की।

³पौलुस और बरनबास भौरी दिना झ़ांऊ तिऐ रौऐ और प्रभु माथै विश्वास छ़ाड़ियौ हिम्मत्ती कौरीऐ वचन शुणावा थै। तिंउरै ज़ौरिऐ प्रभु भौरी हैरानी वाल़ै काम कौरा थौ, और तिंउऐ इणौ साबित किऔ कि तिउंरी खौबर ज़ो बौड़ी दया रै बारै दी आ सौच़्च़ौ आ।

⁴पर इलाकै रै लोगु मांझ़िऐ फूट पौड़ी गोई थी, तिऊं मांझ़िऐ कुछ़ लोग यहुदिऊ आइलै और कुछ़ प्रेरित पौलुस और बरनबासा आइलै हुई गौऐ थै।

⁵तैबै दुजी ज़ाती रै लोग और यहुदी लोग, तिऊंरौ विरोध और तिऊं ढोल़ियाउणा लै आपणै स्याणेऊ आइलै तिऊं पिछ़ु दौड़ै।

⁶पर पौलुस और बरनबासा कै इणौ पौतौ लागौ और सै तिदरु लुकाउनिया परदेशा रै लुस्त्रा और दिरबै इलाकै दी और नज़दीका रै परदेशा लै भागै।

⁷और तिऐ खुश-खुशी री खौबरी शुणाउंदै लागै।

⁸लुस्त्रा दी एक आदमी थौ बोशौ औन्दौ, सेऊ बांगणै रौ अपंग थौ और ज़नमा कु लौंगड़ौ थौ सेऊ केबी भी ना हांडौ थौ।

⁹सेऊ पौलुसा री बुशै शुणदै थौ लागौ औन्दौ। पौलुसै तेस भिलै बौड़ै ध्याना कौरी देखौ कि तेसकै च़ांगै हुणै रौ विश्वास आ,

¹⁰और हाकै मारीयौ बोलौ, “आपणै बांगणै रै टेका दी सिधौ खौड़ौ ऊ।” तैबै सेऊ उछ़ल़ीऔ उठौ और हांडदै-फिरदै लागौ।

¹¹लोगुऐ पौलुसा रै इणै कामा देखीयौ लुकाउनिया री बोली दी हाकै मारीयौ बोलौ, “आज़ परमेश्‍वर आदमी रै रुपा दी आमु मांझ़िऐ आशौ आ।”

¹²तिंउऐ बरनबासा लै “ज्यूस” बोलौ, ज़ो युनानी रै देवा रौ नाऊं थौ, और पौलुसा लै “हिरमेस” बोलौ कैलैकि सेऊ भौरी बुशै लाइणै रौ मुख्यै थौ।

¹³“ज्युसा” रै तेस परमेश्‍वरा रै घौरा रौ माली (पुज़ारी) ज़ो तिंउरै शहरा रै सामनै थौ, पशु और फुला री माल़ा दारा काऐ आणियौ लोगु आइलै बौल़ी कौरणै च़ाहा थौ।

¹⁴पर ज़ैबै पौलुस और बरनबासै ज़ो प्रेरित थै इणौ शुणौ ता तिंउऐ भौरी दु:खी हुइयौ आपणै जुड़कै च़िरै, आपु पौड़ै लोगु भिलै और हाकै मारीयौ बोलदै लागै,

¹⁵“ओ लोगुओ, तुमै का कौरा ई, इणौ पा? आमै भी ता तुमु बाशीऐ दु:ख-सुख भोगणै वाल़ै आदमी ई, और तुमुकै परमेश्‍वरा री खुशी री खौबरी शुणाई, ताकी तुमै इऊं फुकौ री च़िज़ा कु अलग हुइयौ ज़िउंदै परमेश्‍वरा भिलै आशा, ज़ुणिऐ सौरग, धौतरी और समुन्दर और ज़ो कुछ़ तिणीऐ चाणौ।

¹⁶तिणीऐ भितै बौगता दी सारी ज़ाती रै लोग आपणी-आपणी बाटा दी हांडणै दै।

¹⁷तैबै भी परमेश्‍वरै आपणै बारै दी सौदा भौलाई कौरणै रै ज़ौरिऐ सबूत दैऔ। सौरगा कु पाणी और फसला रै बौगता दी भरपूर फसल देइयौ तुमुलै खाणौ और तुमारै ज़िऊ खुशी कौरी भौरदै थाकै लागी।

¹⁸इणै बोलीयौ तिंउऐ लोग बौड़ी मुश्कल़ा कौरीऐ रोकै ताकी लोग तिउंलै बौल़ी ना कौरा।

¹⁹पर कुछ़ यहुदिउऐ अन्ताकिया और इकुनियुम इलाकै कु आशीयौ भीड़ा रै लोग आपणै वंशा दी कौरीयौ, पौलुसा ढोल़ियाउंदै लागै, और मौरौ औन्दौ ज़ाणियौ सेऊ इलाकै कु घीशियौ बाइरै गाड़ौ।

²⁰पर ज़ैबै च़ेलै तेसरै च़ारौ तौरफा दी खौड़ै हुऐ ता पौलुस उठीयौ इलाकै दी डैऔ, और दुजै दिनै बरनबासा आइलै दिरबै गांवा लै डैऔ।”

²¹तेस इलाकै दी पौलुस और बरनाबास परमेश्‍वरा रै नावां री खुशी री खौबरी शुणाइयौ, और भौरी च़ेलै चाणियौ, तिदरु लुस्त्रा, इकुनियुम और अन्ताकिया लै डेवै,

²²हर गांवा दी च़ेलेऊ रै ज़िऊ विश्वासा दी मज़बूत कौरदै और इणौ परचार कौरा थै कि विश्वासा दी बौणी रौएऊ छ़ाड़ेऊ नाईं। “कैलैकि आमुऐ बौड़ै दु:ख उठाइयौ परमेश्‍वरा रै राज़ा दी जा डेउणौ।”

²³तैबै तिंउऐ हरेक कलिसिया दी तिऊं कालै मुख्यै चाणै, और ब्रौता छ़ाड़ियौ तिउंलै प्राथना कौरीयौ सै प्रभु रै हाथा दी सौंभाल़ै, ज़ास माथै तिंउऐ विश्वास कियौ थौ।

²⁴तैबै पौलुस और बरनबास पिसिदिया परदेशा बाटीऐ डेइयौ पंफूलिया परदेशा दी पौउंच़ै

²⁵तैबै पिरगा इलाकै दी वचन शुणाइयौ अतलिया गांवा दी आशै,

²⁶तिदरु सै किश्ती दी बोशियौ अन्ताकिया लै वापिस डेवै, ज़िदरु सै एज़ै कामा लै ज़ो तिंउऐ पुरौ कियौ आ, परमेश्‍वरा री बौड़ी दया कौरी भेज़ै थै।

²⁷अन्ताकिया दी पौउंच़ियौ तिंउऐ कलिसिया कौट्ठै की और तिऊं लोगु काऐ बोलौ, कि परमेश्‍वरै तिऊं आइलै रौइयौ किणै बौड़ै-बौड़ै काम किएई, और परमेश्‍वरै दुजी ज़ाती रै लोगु लै प्रभु यीशु माथै विश्वास कौरना लै मज़द कौरी।

²⁸तैबै पौलुस और बरनबास तिऐ च़ेलेऊ आइलै भौरी दिना दी रौऐ।