Read Pahari, Mahasu प्रेरित 16 Bible Online

प्रेरित 16 - Pahari, Mahasu bible

प्रेरित 16

¹तैबै सेऊ दिरबै और लुस्त्रा इलाकै दी भी डैऔ। तिऐ तीमुथियुस नावां रौ एक च़ेलौ थौ, सेऊ कास यहुदी विश्वासी छ़ेउड़ी रौ छ़ोहरु थौ, पर तेसरौ बाब थौ युनानी देशा रौ।

²सेऊ लुस्त्रा और इकुनियुमा इलाकै रै विश्वासी भाईऊ मांझ़िऐ सारेऊ कु भौलौ और आच़्छ़ौ आदमी थौ।

³पौलुस तेस आपु आइलै निणौ च़ाहा थौ। और ज़ो यहुदी लोग सेज़ी ज़ागाह दी थै तिंउरी वज़ाह कु पौलुसै तीमुथियुसा रौ खतनौ कियौ, कैलैकि सै सारै ज़ाणा थै कि तेसरौ बाब युनानी देशा रौ थौ।

⁴तैबै पौलुस और तेसरै साथी तिदरु इलाकै-इलाकै दी डेइयौ विश्वासिऊ कै तिऊं बिधी शिखाउंदै लागै ज़ो बिधी यरुशलेमा रै च़ेलेउऐ और स्याणेउऐ चाणी थी।

⁵इणै कौरीऐ कलिसिया विश्वासा दी बौड़दै लागी और हर दिना दी गिनती दी भी भौरी बौड़ी।

⁶सै फ्रूगिया और गलातिया परदेशा बाटीऐ डै, कैलैकि पवित्र आत्मै तिउंलै आसिया रै इलाकै दी वचन शुणाउणा लै नाईं थी कौरी ऐन्दी।

⁷ज़ैबै सै मुसिया परदेशा दी पौउंच़ै, ता सै बितूनिया परदेशा लै डेउणौ च़ाहा थै। पर पवित्र आत्मै सै डेउणै नाईं दै।

⁸तैबै सै मुसिया कु त्रोआसा दी आशै।

⁹तिऐ पौलुसै राची एक दर्शण देखौ, कि एक मकिदुनीया इलाकै रौ आदमी खौड़ौ हुइयौ तेसलै औरज़ कौरीऔ बोलदै लागौ औन्दौ, कि “वारै मकिदुनीया दी आशीयौ आमारी मज़द कर।”

¹⁰तेस दर्शण देखणै बासिऐ तेबी आमुऐ मकिदुनीया इलाकै लै डेउणै रौ फैसलौ कियौ, इणौ ज़ाणियौ कि परमेश्‍वरै आमै तिउंकै खुशी री खौबरी शुणाउणा लै औटाऐ ई।

¹¹एथीलै त्रोआसा कु आमै पाणी री किश्ती दी सुमात्राके टापु और दुजै दिनै नियापुलिसा इलाकै दी आशै।

¹²तिदरु आमै फिलिप्पी दी पौउंच़ै, ज़ो मकिदुनीया परदेशा रौ इलाकौ आ, और रोमियो री बस्ती आ। आमै तेस इलाकै दी कुछ़ दिना झ़ांऊ रौऐ।

¹³आरामा रै दिना दी आमै इलाकै कु बाइरै नौईं काऐ इणौ सौमझ़ियौ डेवै थै, कि तिऐ प्राथना कौरणै री ज़ागाह मिला ली, पर तिऐ थी कुछ़ छ़ेउड़ी कौठै हुई ऐन्दी, आमै तिऊं काऐ बोशियौ बुशै लाइंदै लागै।

¹⁴तिऐ एक लुदिया नावां री छ़ेउड़ी थी, ज़ुण परमेश्‍वरा री भगतण थी, ज़ो थुआतीरा री एक बेंगणी रौंगा रै जुड़कै बेच़णै वाल़ी थी, सै थी तिउंरी बुशु शुणदै लागी ऐन्दी। परमेश्‍वरै तिंआरौ ज़िऊ खोलौ ताकी सै पौलुसा री बुशै ध्याना कौरी शुणा।

¹⁵ज़ैबै तिंआऐ सित टौबरुऐ बपतिस्मौ निऔं, तैबै तिंआऐ आमुकु औरज़ कौरी कि, “अगर तुमै मुं प्रभु री आच़्छ़ी विश्वासी माना ई ता मेरी भिलै च़ालौ और तिऐ रौएऊ,” और तिंआऐ आमै मौनाइयौ आपणै घौरै निऐं।

¹⁶तैबै इणौ हुऔ ज़ैबै आमै प्राथना कौरणै री ज़ागाह लै थै लागै औन्दै डेउंदै, तैबै आमुकै एक दासी मिली ज़ासदी भविष्य बोलणै वाल़ी आत्मा थी। सै लोगु रौ भविष्य बोलीयौ आपणै मालिकु लै भौरी कुछ़ कमाइयौ आणा थी।

¹⁷सै आमु और पौलुसा पिछ़ु इणै बोलीयौ आशदै लागी कि, “इऐ आदमी परमपरधान परमेश्‍वरा रै दास ई, ज़ो आमुकै छ़ुटकारै री खुश खौबरी शुणावा ई।”

¹⁸सै भौरी दिना झ़ांऊ इणौ थाकी कौरदै लागी। इणौ रोज़ शुणी-शुणियौ पौलुस दुखी हुऔ, और पिछ़ाऊं फिरीऔ पौलुसै तिऐं बुरी आत्मा लै बोलौ, “हाऊं ताऊं लै यीशु मसीह रै नावां कौरी हुकम दिआऊ कि इऐं छ़ेउड़ी कु बाइरै निकुल़।” और सै तियांकु तेबी निकल़ी गोई।

¹⁹ज़ैबै तियांरै मालिकुऐ देखौ कि आमारौ कौमाई री आश खातम हुई गोई तैबै तिंउऐ पौलुस और सिलास पाकड़ै और झ़ीड़ी-झ़ीड़ीयौ परधानु और अधिकारिऊ काऐ आणै।

²⁰तिंउऐ सै सौज़ा देणै वाल़ै आफसरा काऐ आणै, और बोलौ, “इऐ यहुदी ई और आमारै इलाकै दी आशीयौ गड़बड़ी फैलाउंदै ई लागै औन्दै।

²¹इऐ इणै रिवाज़ा और बुशै ई लागै औन्दै शिखाउंदै ज़ो आमु रोमी लोगु लै मानणी और अपणाउणी ठीक नाईं आसती।”

²²तैबै भीड़ा रै लोग भी पौलुस और सिलासा रै खिलाफा दी खौड़ै हुऐ, और आफसरुऐ तिंउरै जुड़कै च़िरै और तिऊंदी बैंत लाइणै रौ हुकम दैऔ।

²³भौरी बैंत लौआइयौ सै ज़ेला दी पाऐ और ज़ेलरा लै हुकम दैऔ कि तिउंरी च़ोउकीदारी कौरा।

²⁴ज़ेलरै हुकम मानियौ सै ज़ेला रै भितलै कौमरै दी निऐं और तिंउरै बांगणै काठा दी शांगल़ी दी बानै।

²⁵आधी राचीऐ पौलुस और सिलास प्राथना कौरदै और परमेश्‍वरा रै भजन गाइंदै थै लागै औन्दै, ओर कैदी थै लागै औन्दै तिउंरी शुणदै।

²⁶तेबी एकदम एक बौड़ौ भूइंच़ल़ आशौ और ज़ेला री पौई हिली गोई। तेबी ज़ेला रै सारै दार खुली गौऐ, और कैदीऊ री बेड़ी (शांगल़ी) भी खुली गोई।

²⁷ज़ेलर उठौ, और ज़ेला रै सारै दार खुलै देखीयौ सुंच़ौ कि सारै कैदी भागी गौऐ, ता तिणीऐ आपणी तलवार झ़ीड़ी और आपु दी लाइयौ मौरणौ च़ाहा थौ।

²⁸पर पौलुसै ज़ोरै हाका देइयौ बोलौ, “(नाईं डौर) आपणौ नुकसान नाईं कर कैलैकि आमै सारै इदै ई।”

²⁹तैबै ज़ेलरै दिवौ औणाऔ और भितरै डैऔ, तैबै कांबी-कांबीयौ पौलुस और सिलासा रै बांगणै माथै पौड़ौ।

³⁰और तिऊं बाइरै नीईंयौ तिउंलै बोलौ, “ओ महान गुरुओ, छ़ुटकारै पाइणा लै हाऊं का कौरुलै?”

³¹तिंउऐ बोलौ, “प्रभु यीशु मसीह माथै विश्वास कर तैबै तू और तैरौ घौर छ़ुटकारौ पा ई।”

³²तैबै पौलुस और सिलासै तेसकै और तेसरै टौबरा कै प्रभु रौ वचन शुणाऔ।

³³राची तेबी ई ज़ेलरै सै तिदरु निऐं तिंउरै ज़खम धोऐ, तिणीऐ आपणै पुरै टौबरा आइलै तेबी ई बपतिस्मौ निऔं।

³⁴और ज़ेलरै सै आपणै घौरै निऐं, तिउंलै रोटी देई, तैबै सारै टौबरुऐ परमेश्‍वरा माथै विश्वास कौरीयौ खुशी मौनाई।

³⁵आगली दोउती आफसरुऐ ज़ेलरै कै चिट्ठी भेज़ी कि तिऊं आदमी ज़ेला कु ओरु छ़ाड़ौ।

³⁶सिपाइऐ इऐ बुशै पौलुसा कै बोली, कि “आफसरै तुमु ज़ेला कु छ़ाड़णै रौ हुकम देई गौ आ। एथीलै आबै निकल़ियौ शान्ति कौरीऐ डैऔ।”

³⁷पर पौलुसै बोलौ, “तिऊं आदमीउऐ आमै बिण गौलती रै लोगु मांझ़िऐ पिटे ई और ज़ेला दी पाऐ ई हालांकी आमै रोमी ई। आबै का आमु इदरु च़ुटुकच़ार गाड़ाई? इणौ नाईं पर आबै सै आपु आशीयौ आमु इदरु बाइरै निआं लै।”

³⁸सिपाइउऐ इऐ बुशै आफसरु काऐ बोली, और सै इणौ शुणियौ कि पौलुस और सिलास रोमी ई ता सै भौरी डौरै,

³⁹और आशीयौ तिऊंकु माफी मांगी, और बाइरै नीईंयौ तिऊंकु औरज़ कौरी कि एस इलाकै कु पोरु डैऔ।

⁴⁰तैबै पौलुस और सिलास ज़ेला कु निकल़ियौ लुदिया रै घौरै डेवै, और विश्वासी भाईऊ कु मिलियौ तिउंकै शान्ति मिली, और सै तिदरु डेवै।