Read Pahari, Mahasu प्रेरित 19 Bible Online

प्रेरित 19 - Pahari, Mahasu bible

प्रेरित 19

¹ज़ेबी अपुल्लोस कुरिन्थुस शहरा दी थौ ता पौलुस माथलै सारै परदेशा बाटीऐ इफिसुसा दी आशौ। तिऐ तेसकै कुछ़ च़ेलै मिलै।

²तिणीऐ तिउंलै बोलौ, “का तुमुऐ विश्वास कौरदी बारै पवित्र आत्मा पाऔ आ?” तिंउऐ तेसलै बोलौ, “आमुऐ ता पवित्र आत्मा री बुशै भी नाईं शुणी।”

³पौलुसै तिउंलै बोलौ, “तैबै तुमुऐ कासरौ बपतिस्मौ नियौं आ?” तिंउऐ बोलौ, “यहुन्ना रौ बपतिस्मौ।”

⁴पौलुसै तिउंलै बोलौ, “यहुन्नै ता इणै बोलीयौ ना बौदुल़णै रौ बपतिस्मौ दैऔ, कि ज़ो मुं बासिऐ आशणै वाल़ौ आ, मतलब यीशु माथै विश्वास कौरेऊ।”

⁵इणौ शुणियौ तिंउऐ प्रभु यीशु रै नावां दी बपतिस्मौ नियौं।

⁶ज़ैबै पौलुसै तिऊं माथै हाथ छ़ाड़ै ता पवित्र आत्मा तिऊंदी आशौ और सै अलग-अलग बोली बोलदै और भविष्यवाणी कौरदै लागै।

⁷इऐ सारै लगभग बारह आदमी थै।

⁸तैबै पौलुस आराधनालय दी डेइयौ चीन मिहनै झ़ांऊ बिण डौरै थाकौ बोलदै लागी, और परमेश्‍वरा रै राज़ा रै बारै दी बुशै लाइंदै और सौमझ़ाउंदै थाकौ लागी।

⁹ज़ैबै कुछ़ लोगुऐ काट्ठै हुइयौ तेसरी नाईं मानी पर लोगु मांझ़िऐ एस गुटा रै बारै दी बुरौ बोलदै लागै ता, तिणीऐ सै पोरु छ़ाड़ै, और च़ेलै अलग किऐ, और हर दिनै तिऊं आइलै तुरत्रुसा री पाठशाला दी स्वाल-ज़वाब कौरा थौ।

¹⁰दुई साला झ़ांऊ इणी थाकौ हुंदै लागी, इदरा झ़ांऊ कि आसिया परदेशा दी रौइणै वाल़ै का यहुदी, का दुजी ज़ातीऊ, सारेउऐ प्रभु रौ वचन शुणौ।

¹¹परमेश्‍वर पौलुसा रै ज़ौरिऐ शक्ति वाल़ै नोखै काम देखावा थौ।

¹²इदरा झ़ांऊ कि साफै और जुड़कै लोग तेसदी छ़ुआइंयौ बिमारु माथै छ़ाड़ा थै और तिउंरी बिमारी ठीक हुआ थी और बुरी आत्मा भी तिऊंकु पोरु भागा थी।

¹³पर कुछ़ यहुदी लोग ज़ुण ज़ादु टुणै कौरा थै, सै इणौ लागै कौरदै ज़ासदी बुरी आत्मा हुआ थी तिऊं माथै प्रभु यीशु रै नावां कौरी फुकरा थै और बोला, थै कि ज़ेथरौ परचार पौलुस कौरा, हाऊं तुमुकै तेसी रै नावां कौरी बाइरै आशणै रौ हुकम दिआऊ।

¹⁴सिक्कवा नावां रै एक यहुदी बौड़ै याजकु रै सात छ़ोहरु थै ज़ुण इणौ कौरा थै।

¹⁵पर बुरी आत्मै तिउंलै ज़वाब दैऔ कि, “यीशु हाऊं ज़ाणाऊ और पौलुस भी रवावा, पर तुमै कुण ई?”

¹⁶तैबै सेऊ आदमी ज़ासदी बुरी आत्मा थी तिऊं भिलै पौड़ौ और सै आपणै वंशा दी किऐ और इणै झिड़ै-पोथै कि सै तेस घौरा कु नांगै और घायल हुइयौ भागै।

¹⁷इऐ बुशै इफिसुस शहरा दी रौइणै वाल़ै सारै यहुदी और दुजी ज़ातीऊ कै भी पौतौ लागी, और सै भौरी डौरी गौऐ। और प्रभु यीशु रै नावां री बौड़ाई हुंदै लागी।

¹⁸ज़ुणिऐ विश्वास कियौ थौ तिऊं मांझ़िया कु भौरी लोगुऐ आशीयौ आपणै बुरै काम मानी गौऐ।

¹⁹ज़ादु कौरणै वाल़ेऊ मांझ़िया कु भौरीउऐ आपणी-आपणी पोथी जौन्त्री कौट्ठै कौरीयौ सारेऊ काऐ ज़ाल़ी, ज़ैबै तिंउरै तेथरै पैसै ज़ोड़ै ता पचास हज़ार च़ांदी रै सिकेऊ रै बराबर निकल़ौ।

²⁰इणै कौरी प्रभु रौ वचन शक्ति कौरीऐ फैलदै लागौ और काम कौरदै लागौ।

²¹ज़ैबै इऐ बुशै हुई गोई ता पौलुसै आत्मा दी सुंच़ी गौ कि मकिदुनीया और अखाया बाटीऐ यरुशलेमा लै डेऊ, और बोलौ, “यरुशलेम शहरा दी डेइयौ मुंइऐ रोम देखणौ भी ज़ुरुरी आ।”

²²एथीलै आपणी सेवा कौरणै वाल़ेऊ मांझ़िया कु तीमुथियुस और इरास्तुस मकिदुनीया इलाकै दी आपु कु औगाड़िऐ भेज़ीयौ आपु कुछ़ दिना झ़ांऊ आसिया परदेशा रै इफिसुसा दी रौई गौ।

²³सेज़ै बौगतै एज़ै पंथा (ज़ो प्रभु री बाटा दी हाण्डणै वाल़ै थै) रै बारै दी बौड़ौ शोर-शराबौ हुऔ।

²⁴कैलैकि देमेत्रियुस नावां रौ एक सुनार अरतिमिसा देवी रौ च़ांदी रौ मन्दिर चौणाइयौ कारीगरु कै भौरी काम दिलावा थौ।

²⁵तिणीऐ सै और इणै काम कौरणै वाल़ै कारीगर कौट्ठै कौरीयौ बोलौ, “ओ भाईओ, तुमै ज़ाणाई कि एस काम कौरना लै आमुलै केती पैसै मिला ई।

²⁶तुमै देखा और शुणाई कि सिरफ इफिसुसा शहरा दी नाईं, बल्कि सारै आसिया रै सारै गांवा दी इणै बोलीयौ पौलुसै सौमझ़ाऐ और बहकाऐ कि ज़ो हाथा री कारीगरी आ सेऊ ईश्वर नाईं आ।

²⁷एथ कौरी आबै सिरफ एथरौ डौर नाईं भी नाईं कि आमारौ एऊ काम खातम हुआ पर एऊ भी कि बौड़ी देवी अरतिमिसा रौ मन्दिर भी बेकार सौमझ़िणौ। ज़ास सारै आसिया रै लोग और धौतरी रै लोग पुज़ा आ, एथरौ मन्दिर भी पोरु ढाल़णौ।”

²⁸सै इणै शुणियौ रोशा कौरी भौरुई गौऐ और हाकै मारीयौ बोलदै लागै कि, “इफिसिउ री देबी अरतिमिस, बौड़ी महान आ!”

²⁹और सारै इलाकै दी शोर-शराबौ हुई गौ, और लोगुऐ मकिदुनीया रै गयुस और अरिस्तर्खुस ज़ो पौलुसा रै साथी थै, पाकड़ै और घीशियौ रंगशाला दी आणै।

³⁰ज़ैबै पौलुसै तिऊं काऐ भितरै डेउणौ च़ाऔ ता च़ेलेउऐ सेऊ डेउणै नाईं दैऔ।

³¹आसिया रै आफसरु मांझ़िया कु भी कई गोष्टणुऐ तेसलै खुशी री खौबर भेज़ीयौ औरज़ कौरी की रंगशाला दी डेउणै रौ खौतरौ ना निऐं।

³²तिऐ कोई दिया थौ ओर हाकै कोई दिया थौ ओर हाकै कैलैकि खुंबल़ी दी बौड़ी गड़बड़ी थी औन्दै लागी ऐन्दी, और भौरी लोगु कै ता इणौ पौतौ भी नाईं थौ कि आमै कौट्ठै कैलै ई हुऐ औन्दै।

³³तैबै तिंउऐ सिकन्दर ज़ो यहुदिउऐ खौड़ौ थौ कियौ औन्दौ, भीड़ा मांझ़िया कु औगाड़िऐ बौड़ाऔ। सिकन्दर बौच़णा लै हाथा कौरी साना देइयौ भीड़ा रै लोगु काऐ ज़वाब दैणौ च़ाहा थौ।

³⁴पर ज़ैबै तिउंकै पौतौ लागौ कि इयौ यहुदी आ और मुर्तिऊ री पुज़ा नाईं कौरदौ, ता सारै कौट्ठै हुइयौ हाकै मारदै लागै कम सै कम दुई घंटै झ़ांऊ, “इफिसियों री देबी अरतिमिस महान आ।”

³⁵तैबै इलाकै रै मुख्यै, लोग शांत किऐ और बोलौ, “ओ इफिसुसा रै लोगुओ, सब ज़ाणाई कि इफिसुस इलाकौ महान देवी अरतिमिस और आसमाना कु छ़ुटी ऐन्दी मुर्तिऊ री ज़ागाह आ।

³⁶एथीलै इऐ खातम नाईं हुई सौकदी आच़्छ़ौ आ कि च़ुटुक थाकौ और बिण सुंच़ै कुछ़ ना कौरौ।

³⁷कैलैकि तुमुऐ इऐ आदमी आणेई ज़ो ना ता मन्दिर लुटणै वाल़ेई और ना आमारी देवी री बुराई कौरदै।”

³⁸“एथीलै अगर देमेत्रियुस और तेसरै साथी कारीगरु कै कासकु शिकायत आ ता कचैहरी खुली ऐन्दी आ और फैसलै कौरणै वाल़ै भी आसती। तिऐ एकी दुजै माथै आरोप लाएऊ।

³⁹पर अगर तुमै केज़ी ओर बुशै पुछ़णी च़ाहा ई ता तेथरौ फैसलौ आमारी खुंबल़ी दी हुणौ आ।

⁴⁰कैलैकि आज़कै झ़ौगड़ै रौ इलज़ाम आमु माथै लागणै रौ डौर आ, कैलैकि एथरौ कोई कारण नाईं आसतौ, और आमै इऐं भीड़ कौट्ठै हुणै रौ कोई ज़वाब नाईं देई सौकदै।”

⁴¹इणै बोलीयौ तिणीऐ खुंबल़ी बन्द की।