Read Pahari, Mahasu प्रेरित 20 Bible Online

प्रेरित 20 - Pahari, Mahasu bible

प्रेरित 20

¹ज़ैबै झ़ौगड़ौ शान्त हुऔ तैबै पौलुसै च़ेलै औटाइयौ सौमझ़ाऐ, और तिऊंकु मिलियौ मकिदुनीया परदेशा लै डैऔ।

²सेज़ै सारै परदेशा बाटीऐ डेइयौ और च़ेलेऊ कै भौरी हिम्मत देइयौ युनान परदेशा दी डैऔ।

³ज़ैबै चिया मिहनै बासिऐ सेऊ तिदरु किश्ती दी सीरिया परदेशा लै डेउणै वाल़ौ थौ, ता तिणीऐ शुणौ कि यहुदी तेस झ़ांगणै री ताकी दी रौऐ औन्दै, एथीलै तिणीऐ मकिदुनीया बाटीऐ वापिस डेउणै रै बारै दी सुंच़ौ।

⁴बिरीया रौ पुरूर्सा रौ छ़ोहरु सोपत्रुस, थिस्सलुनीकिया शहरा रै अरिस्तर्खुस, सिकुनदुस, दिरबै इलाकै रौ गयुस, तीमुथियुस और आसिया परदेशा रै तुखिकुस त्रुफिमुस तेस आइलै थै

⁵पर इऐ साथी आमुकु औगाड़िऐ डेई गौऐ थै, और त्रोआसा दी आमु ज़ागदै थै लागै औन्दै।

⁶बिणा संज़ेड़ै री रोटी रै साज़ै बासिऐ आमै फिलिप्पी कु किश्ती दी निकल़ै और पांज़ दिना दी तिऊं काऐ त्रोआसा दी पौउंच़ै और सात दिना झ़ांऊ तिऐ रौऐ।

⁷सप्ताह रै पैहलै दिनै ज़ेबी सै प्रभु भोज़ा लै कौट्ठै हुऐ, ता पौलुसै ज़ुण दुजै दिनै डेउणै वाल़ौ थौ, तिणीऐ तिऊं आइलै बुशै लाई। और आधी राची झ़ांऊ तिऊं आइलै बुशै लाई।

⁸ज़ेज़ै माथलै कौमरै दी आमै कौट्ठै थै, तेथदी भौरी लम्प थै ज़ौल़दै लागै औन्दै।

⁹और यूतुखुस नावां रौ एक ज़वान खिड़की माथै थौ बोशियौ गहरी निजा दी थौ लागौ औन्दौ डुल़ दै। ज़ैबै पौलुस काफी देरा झ़ांऊ थौ लागौ औन्दौ बुशु लाइंदै, ता सेऊ ज़वान निजा दी डुल़ीयौ चीजी मज़ली कु तौल़ै लोटौ, और कुछ़ विश्वासिउऐ तौल़ै डेइयौ सेऊ च़ुंगौ, पर सेऊ मौरी गौ थौ।

¹⁰पर पौलुस तेस काऐ आशीयौ तेसदी चिंबड़ौ और तेसकु गौल़ै मिलियौ बोलौ, “घौबराऔ नाईं कैलैकि एऊ इबी भी ज़िउंदौ आ।”

¹¹तैबै दुजी बारै माथलै कौमरै दी डेइयौ प्रभु भोज़ा री रीती पुरी की और काफी बौगता झ़ांऊ तिऊं आइलै बुशै लाई कि दोउत हुई गोई थी। तैबै सेऊ तिदरु डेई गौ।

¹²तिंउऐ सेऊ ज़वान ज़िउंदौ आणौ और भौरी शान्ति पाई।

¹³आमै पैहली किश्ती दी च़ौड़ियौ अस्सुस गांवा लै इणै विच़ारा कौरी च़ाल पौड़ै कि तिदरु आमै पौलुस भी नींई आपु आइलै, पर सेऊ पैदल डेउणौ च़ाहा थौ एथीलै तिणीऐ इणौ इन्तज़ाम कियौ थौ।

¹⁴ज़ैबै सेऊ अस्सुसा दी आमुकै मिलौ तैबै आमुऐ सेऊ आपु आइलै किश्ती दी च़ौड़ाइयौ मिलेतुसा इलाकै दी आणौ।

¹⁵तिदरु किश्ती दी आमै दुजै दिनै खियुसा इलाकै काऐ पौउंच़ै, आगलै दिनै आमै समुन्दरा पारभिलै सामोसा इलाकै दी आशै, तैबै दुजै दिनै मिलेतुस इलाकै दी पौउंच़ै।

¹⁶पौलुसै इणौ सुंच़ौ कि आमै इफिसुसा बाटीऐ डेई ताकी आमुकै आसिया परदेशा दी बौगत ना लागा कैलैकि सेऊ ज़ल्दी थौ कि अगर हुई सौका ता सेऊ पिन्तेकुस्ता रै साज़ै दी यरुशलेमा दी रौआ।

¹⁷तिणीऐ मिलेतुसा कु इफिसुसा लै खुशी री खौबर भेज़ी और कलिसिया रै स्याणै औटाऐ।

¹⁸ज़ेबी सै तेस काऐ आशै तिणीऐ तिउंलै बोलौ, “तुमै ज़ाणाई कि पैहलै दिना दी ज़ेबी हाऊं आसिया परदेशा दी आशौ, ता हाऊं तुमु आइलै इबी झ़ाऊं हर बौगतै किणौ रौऔ ऊ

¹⁹मतलब निउलै हुइयौ लेरी-लेरीयौ और सताव दी ज़ो यहुदिऊ ऐ मुं माथै किएई, हाऊं प्रभु री सेवा कौरदै थाकौ लागी।”

²⁰और ज़ो-ज़ो बुशै तुमारै फाइदै री थी, तिऊं बोलणा लै और लोगु कै घौरा-घौरा कै शिखाउणा लै हाऊं केबी ना शरमुऔ,

²¹बल्कि यहुदिऊ और दुजी ज़ातीऊ काऐ गवाही देई कि परमेश्‍वरा भिलै मन बदुल़णौ और आमारै प्रभु यीशु मसीह माथै विश्वास कौरणौ च़ांई।

²²आबै देखौ हाऊं आत्मा दी अगुवाई पाइयौ यरुशलेमा लै डिआऊ, और नाईं ज़ाणदौ कि तिऐ मुं आइलै का-का बिता।

²³सिरफ एती कि पवित्र आत्मा हर इलाकै दी गवाही देई-देइयौ मुलै बोला, कि बानण और दु:ख ताउंलै तैयार ई।

²⁴पर हाऊं आपणै प्राण कुछ़ ना सौमझ़दौ, कि तिऊं प्यारै ज़ाणु, पर एती कि हाऊं आपणी दौड़ और तिऐं सेवा पुरी कौरु, ज़ो मुकै परमेश्‍वरा री बौड़ी दया री खुशी री खौबरी माथै गवाही दैणा लै प्रभु यीशु मसीह कु मिली आ।

²⁵और देखौ हाऊं ज़ाणाऊ कि तुमै सारै ज़ास मांझ़िऐ मुंइऐ परमेश्‍वरा रै राज़ा रौ परचार कियौ आ, मैरौ मुं दुजी बारै नाईं देखा लै।

²⁶एथीलै आज़कै दिनै हाऊं तुमुकै गवाही देइयौ बोलाऊ, कि अगर तुमु मांझ़िया कु कुण बिणा यीशु माथै विश्वास कौरीयौ मौरा लौ ता सै मेरी गौलती नाईं आ।

²⁷कैलैकि हाऊं परमेश्‍वरा री सारी इच़्छ़ा तुमु काऐ बोलणा लै नाईं शरमुऔ।

²⁸एथीलै आपणी और आपणै शाल़ा री च़ोकसी कौरौ, ज़ेथ कौरी पवित्र आत्मै तुमै मुख्यै चाणेई, ताकी तुमै परमेश्‍वरा री तिऐं कलिसिया री देखभाल़ कौरा ज़ो तिणीऐ आपणै लोऊ कौरी खरीदै ई।

²⁹हाऊं ज़ाणाऊ कि मैरै डेउणै बासिऐ झ़ुठै शिक्षा दैणै वाल़ै तुमु मांझ़िऐ आशणेई ज़ुणिऐ कलिसिया दी भौरी नुकसान कौरणौ आ। सै खाणै वाल़ै शाल़टेऊ ज़िणै हुणेई ज़ुण भेरीऊ खाइयौ खातम कौरा ई।

³⁰तुमु मांझ़िऐ भी इणै-इणै आदमी उठाणै ई, ज़ो च़ेलेऊ आपु पिछ़ु झीड़ना लै दारखी-बांगी बुशै बोलाई।

³¹एथीलै उज़ीई रौएऊ, और याद कौरौ कि मुंइऐ चीन साला झ़ांऊ दीन राच लेरी-लेरीयौ हर एक खौबरदार कौरणौ नाईं छ़ाड़ौ।

³²और आबै हाऊं तुमु परमेश्‍वरा कै और तेसरी बौड़ी दया रै वचना कै सौंभाल़ा ऊ। ज़ो तुमु बौड़ाई सौका और सारै पवित्र किऐ औन्दै लोगु मांझ़िऐ तुमारी गवाही देइयौ तुमारौ हक्क देई सौका।

³³मुंइऐ कासी रै च़ांदी, सुनै और जुड़केऊ रौ लाल़च़ नाईं कियौ।

³⁴तुमै आपु ज़ाणाई कि सेज़ै हाथुऐ मेरी और मैरै साथीऊ री ज़ुरत पुरी की आ।

³⁵मुंइऐ तुमुकै सब कुछ़ कौरीयौ देखाऔ आ, इणै कौरीऐ मैहनत कौरीयौ गरीबु सौंभाल़ेऊ, और प्रभु यीशु रै वचन याद कौरणै ज़ुरुरी ई, ज़ो तिणीऐ आपु बोलेई “कि निणै कु दैणौ भौलौ आ।”

³⁶इणै बोलीयौ तिणीऐ घुण्डै झुकाऐ और तिऊं आइलै प्राथना कौरी,

³⁷तैबै सै सारै भौरी लेरै और पौलुसा रै गौल़ै मिलै और तेस खोबीयाऊंदै लागै।

³⁸सै एज़ी बुशा कु ज़ादै दुखी थै ज़ो तिणीऐ बोली थी, कि आबै दुजी बारै तुमै मैरौ मूंह नाईं देखदै। तैबै तिंउऐ सेऊ किश्ती झ़ांऊ पौउंच़ाऔ।