Read Pahari, Mahasu प्रेरित 21 Bible Online

प्रेरित 21 - Pahari, Mahasu bible

प्रेरित 21

¹ज़ैबै आमै तिऊं छ़ाड़ियौ किश्ती दी च़ौड़ै ता, सिधी बाटा दी कोसा टापु दी आशै, और दुजै दिनै रुदुसा टापु दी तिदरु डै पतरा टापु लै।

²तिऐ एक किश्ती फिनके परदेशा लै डेउणै वाल़ी मिली, और आमै तेथदी च़ौड़ियौ च़ाल पौड़ै।

³ज़ैबै साइप्रस दिशौ ता, आमुऐ सेऊ उल़टी भिलै छ़ाड़ौ, और सीरिया परदेशा लै डेइयौ सूरा देशा दी डेवै। कैलैकि तिऐ किश्ती कु समान उतारणौ थौ।

⁴च़ेलेऊ कु मिलियौ आमै तिऐ सात दिना झ़ांऊ रौऐ, तिंउऐ पवित्र आत्मा कु शिखीयौ पौलुसा कु औरज़ कौरी कि यरुशलेम शहरा लै नाईं डैऔ।

⁵सात दिना बासिऐ ज़ेबी तिदरु आमारै डेउणै रौ बौगत आशौ, ता आमै तिदरु डेई गौऐ। और सारेउऐ, छ़ेउड़ी और छ़ोहरुऐ आमै इलाकै कु बाइरै झ़ांऊ पौउंच़ाऐ। और आमुऐ डिका काऐ धौनी झुकियौ प्राथना की।

⁶तैबै एकी दुजै कु मिलणै बासिऐ, आमै किश्ती दी च़ौड़ै, और सै डेवे आपणै-आपणै घौरै।

⁷तैबै आमै सूर देशा कु किश्ती रौ सफर पुरौ कौरीयौ पतुलिमयिसा इलाकै दी पौउंच़ै और विश्वासी भाईऊ कु मिलियौ तिऊं आइलै एकी दिना दी रौऐ।

⁸दुजै दिनै आमै तिदरु डेइयौ कैसरिया परदेशा दी आशै, और फिलिप्पुस परचार कौरणै वाल़ै रै घौरा कै ज़ो प्रेरितुऐ खास कौरी विधवा छ़ेउड़ीऊ री सेवा लै थै छ़ांटै औन्दै तिऊं साता मांझ़िया कु एक थौ डेइयौ तेसरै काऐ रौऐ।

⁹तेसरी च़ार बिण ब्याई छ़ोटुड़ी थी, ज़ुण भविष्यवाणी कौरा थी।

¹⁰ज़ैबै आमै भौरी दिना झ़ांऊ तिऐ रौऐ, ता अगबुस नावां रौ एक भविष्यवक्ता यहुदिया परदेशा कु आशौ।

¹¹तिणीऐ आमु काऐ आशीयौ पौलुसा रौ गाचौ नियौं और आपणै हाथ-बांगणै बानियौ बोलौ, “पवित्र आत्मा इणौ बोला आ, कि ज़ास आदमी रौ इयौ गाचौ आ तेस यरुशलेमा दी यहुदी इणौ बाना ई और दुजी ज़ातीऊ रै हाथा दी सौंभाल़ा ई।”

¹²ज़ेबी आमुऐ इऐ बुशै शुणी ता आमै और तिदलै लोगुऐ पौलुसा कु औरज़ कौरी कि यरुशलेमा लै नाईं डेवे।

¹³पर पौलुसै ज़वाब दैऔ, तुमै लेरी-लेरीयौ मैरौ ज़िऊ कैलै चोड़ाई? हाऊं ता प्रभु यीशु रै नावां री ताइंऐ यरुशलेमा दी बानिणा लै नाईं बल्कि मौरणा लै भी तयार ऊ।

¹⁴ज़ैबै तिणीऐ नाईं मानौ ता आमै इणै बोलीयौ च़ुटुक थाकी गौऐ कि प्रभु री मौरज़ी पुरी हुआ।

¹⁵कुछ़ दिना बासिऐ आमुऐ तयारी की और यरुशलेमा लै च़ाल पौड़ै।

¹⁶कैसरिया परदेशा कु भी कुछ़ च़ेलै आमु आइलै च़ाल पौड़ै और आमै मनासौन नावां रै साइप्रसा रै पैहलै च़ेलै रै काऐ निऐं और आमै तेसरै काऐ थाकै।

¹⁷ज़ेबी आमै यरुशलेमा दी पौउंच़ै ता विश्वासी भाई बड़ी खुशी कौरीऐ आमुकु मिलै।

¹⁸दुजै दिनै पौलुसै आमै याकुबा काऐ निऐं, ज़िऐ सारै स्याणै कौट्ठै थै।

¹⁹तैबै तिणीऐ तिउंकै ढाल कौरीयौ ज़ो-ज़ो काम परमेश्‍वरै तेसरी सेवा कौरीऐ दुजी ज़ाती मांझ़िऐ किऐ थै सै सारै बारी-बारिऐ बोलै।

²⁰तिंउऐ इणै शुणियौ परमेश्‍वरा री बौड़ाई की ई, तैबै तेसलै बोलौ, ओ भाई तू ता ज़ाणाई कि यहुदिऊ मांझ़िया कु कई हज़ारुऐ विश्वास कियौ आ, और मुसा रै सारै नियम आच़्छ़ा कौरी माना ई।

²¹यहुदी विश्वासिऊ कै तैरै बारै दी बोलौ आ औन्दौ कि तू दुजी ज़ाती दी रौइणै वाल़ै यहुदिऊ कै मुसा रै नियम नाईं मानणै रै बारै दी शिखावा ई और बोलाई कि ना आपणै लोल़डेऊ रौ खतना कौराऔ, और ना यहुदी रिवाज़ मानौ।

²²तैबै का कौरुलै लोग ज़ुरुरी शुणाई कि तू आशौ औन्दौ ई।

²³एथीलै ज़ो आमै ताउंकै बोली ई तेस कर, आमुकै इदै च़ार आदमी ई ज़ुणिऐ परमेश्‍वरा कु मन्नत मांगी ऐन्दी।

²⁴तिऊं नीईंयौ तिऊं आइलै आपु भी शुद्ध हुणै री विधी पुरी कर। और तिउंकै खौरच़ौ दै ताकी सै आपणै बाल़ कौटावा, तैबै सारै ज़ाणाई कि ज़ो बुशै तिउंकै तैरै बारै दी बोली ऐन्दी तिऊंदी कोई सौच़्च़ाई नाईं आ पर तू आपु भी कानून मानियौ तिऊं ज़िणौ हाण्डा ई।

²⁵पर तिऊं दुजी ज़ाती रै बारै दी ज़ुणिऐ विश्वास कियौ आ आमुऐ इणौ फैसलौ कौरीयौ लिखौ आ कि सै मुर्तिऊ काऐ बौल़ी कौरै औन्दै मांस और लोऊ कु, और गौल़ै फैंच़ै औन्दै मांसा कु, और गान्दै कामा कु दूर रौआ।

²⁶दुजै दिनै पौलुस तिऊं लोगु नीईंयौ और आपु तिऊं आइलै शुद्ध हुइयौ परमेश्‍वरा रै घौरा दी डैऔ। और तिऐ बोली गौ कि शुद्ध हुणै रै दिना ई मतलब तिऊं मांझ़िया कु हर एकी लै बौल़ी च़ौड़ाउणै रै दीन केबी झ़ांऊ पुरै हुआई।

²⁷ज़ेबी सै सात दीन पुरै हुणै वाल़ै थै, तैबै आसिया परदेशा रै यहुदिऊ ऐ पौलुस परमेश्‍वरा रै घौरा दी देखीयौ सारै लोग च़ितल़ाऐ और हाकै देइयौ सेऊ पाकड़ी गौ।

²⁸ओ इस्राइलिऊ ओ आमारी मज़द कौरौ एऊ सेज़ौ आदमी आ ज़ो लोगु और नियमा रै और इऐं ज़ागाह रै विरोधा ई सारी ज़ागाह दी सारै लोगु कै शिखावा आ, इदरा झ़ांऊ कि दुजी ज़ाती भी परमेश्‍वरा रै घौरा दी आणियौ तिणीऐ इऐ पवित्र ज़ागाह गांदी कौरी आ।

²⁹तिंउऐ इणौ एथीलै बोलौ थौ कैलैकि एथकु पैहलै इफिसुसा रै लोग त्रुफिमुस पौलुसा आइलै इलाकै दी देखौ थौ, और सै सौमझ़ै कि पौलुसै सेऊ परमेश्‍वरा रै घौरा दी आणौ आ।

³⁰तैबै सारै इलाकै दी हालौ पोड़ी गौ और लोग फेटा मारीयौ कौट्ठै हुऐ और पौलुस पाकड़ियौ परमेश्‍वरा रै घौरा कु बाइरै घीशियौ आणौ, आपु किऐ फेटी दार बन्द।

³¹ज़ैबै सै तेस झ़ांगणौ च़ाहा थै ता तिंउरै मुख्यै कै खौबर पौउंच़ी कि सारै यरुशलेमा दी हालौ पौड़ी गौ आ।

³²तैबै सेऊ फेटी सिपाईउ और सुबेदार नीईंयौ तिऊं काऐ तौल़ै फेटै मारीयौ आशौ, और भीड़ा रै लोगुऐ सिपाईउ रौ मुख्यौ और सिपाईउ देखीयौ पौलुस पिटणौ छ़ाड़ी गौ।

³³तैबै मुख्यै पौलुसा काऐ आशीयौ सेऊ पाकड़ौ और दुई शांगल़ी कौरी बानणै रौ हुकम देइयौ पुछ़दै लागौ कि इयौ कुण आ और इणीऐ का कियौ आ?

³⁴पर भीड़ा मांझ़िया कु कुण कुछ़ बोलदै लागै और कुण कुछ़, ज़ैबै हालै री वज़ाह कु तेसकै सौच़्च़ाई पौतौ नाईं लागी, तैबै तिणीऐ एखुलै दी निणै रौ हुकम दैऔ।

³⁵ज़ैबै सेऊ पैड़ीऊ दी पौउंच़ौ ता इणौ हुऔ कि भीड़ा रै दबाव री वज़ाह कु फौज़ीउऐ सेऊ च़ुंगियौ पा निणौ पौड़ौ।

³⁶कैलैकि लोगु री भीड़ हालौ पाइंदै लागी कि एस पोरु झ़ांगौ।

³⁷ज़ैबै सै पौलुस एखुलै दी निणै वाल़ै थै ता तिणीऐ पलटना रै मुख्यै लै बोलौ कि का मुलै इज़ाज़त आसती आ कि हाऊं तुमुकै कुछ़ बोलु, तिणीऐ बोलौ, का तू युनानी बोली ज़ाणाई?

³⁸का तू सेज़ौ मिस्र देशा रौ नाईं ज़ुणिऐ पैहलै बानिऔ हथियार वाल़ै च़ार हज़ार लोग ज़ांगल़ा दी निऐं?

³⁹पौलुसै बोलौ, नाईं हाऊं ता यहुदी लोगु किलकिया परदेशा रै ज़ानै-मानै तरसूस इलाकै रौ रौइणै वाल़ौ ऊ। हाऊं ताऊं कु औरज़ कौराऊ कि मुं लोगु आइलै बुशै लाइणै दै।

⁴⁰ज़ैबै तिणीऐ हुकम दैऔ ता पौलुसै पैड़ीऊ दी खौड़ी हुइयौ लोगु कै हाथा कौरी च़ुटुक रौइणै रौ इशारौ कियौ ज़ैबै सै च़ुटुक रौई गौऐ ता सेऊ इब्रानी बोली दी बुशै लाइंदै लागौ।