Read Pahari, Mahasu प्रेरित 24 Bible Online

प्रेरित 24 - Pahari, Mahasu bible

प्रेरित 24

¹पांज़ दिना बासिऐ हनन्याह परधान याजकै कई स्याणै और तिरतुल्लुस नावां रौ बकील आपु आइलै कैसरिया इलाकै दी आणै। तिंउऐ आफसरा काऐ पौलुसा माथै आरोप लाऐ।

²ज़ेबी पौलुस औटाऔ ता तिरतुल्लुस तेस माथै आरोप लाइयौ बोलदै लागौ कि: “ओ महामहिम फेलिक्स, तेरी वज़ाह कु आमारै देशा दी शान्ति औआ आ। और तैरै इन्तज़ाम कौरी एज़ी ज़ाती लै कई बुराई सुधरा ई।

³एज़ी बूश आमै हर ज़ागाह दी हर तरिकै कौरी धन्यबाद कौरीयौ मानी।

⁴एथीलै हाऊं तुमारौ ज़ादौ बौगत नाईं निणौ च़ाहंदौ, हाऊं ताऊं कु औरज़ कौराऊ छ़ौंअटी आमारी एक-दुई बुशै शुण।

⁵कैलैकि एऊ दुनिया रै सारै यहुदी मांझ़िऐ हालौ मौच़ावा आ, और नासरीउ रै पंथा रौ मुख्यौ आ।

⁶तिणीऐ परमेश्‍वरा रौ घौर भी अशुद्ध कौरणौ च़ाऔ, पर आमुऐ सेऊ पाकड़ी गौ आमुऐ तेसलै आपणै नियमा कौरी सौज़ा दैणी थी।

⁷पर सिपाई रै मुख्यै लूसियासै सेऊ ज़ौबरीयै आमारै हाथा कु छ़ुड़ाऔ,

⁸और एस माथै आरोप लाइणै वाल़ेऊ लै ताऊं काऐ आशणै रौ हुकम दैऔ। इऊं सारी बुशै ज़ेथरै बारै दी आमै एस माथै आरोप लाई, तुमुकै आपु एस पौरखियौ सौच़्च़ाई रौ पौतौ लागा।”

⁹यहुदिउऐ भी तेसरौ साथ देइयौ बोलौ, ओ इऐ बुशै सौच़्च़ी ई।

¹⁰“ज़ैबै आफसरै पौलुसा लै बोलणै रौ इशारौ कियौ ता पौलुसै बोलौ, ज़ैबै मुकै इणौ पौतौ लागौ कि तुमै भौरी साला ओउलै एज़ी ज़ाती रै लोगु रौ फैसलै कौरदै लागै औन्दै एथीलै आबै हाऊं खुश हुइयौ आपणै ब्यान दिआऊ।

¹¹तू आपु ज़ाणी सौका ई कि ज़ेबी कु हाऊं यरुशलेमा दी परमेश्‍वरा रै घौरा दी आराधना कौरदै आशो ऊ ता मुं इदै बाराह दिना कु ज़ादौ बौगत भी ना हुऔ।

¹²तिंउऐ हाऊं ना परमेश्‍वरा रै घौरा दी, ना आराधनालय दी और ना इलाकै दी कासी आइलै बुशेऊ लाइंदै और हालै मच़ाउंदै देखौ।

¹³और ना ता इउंकै इऊं बुशु रौ ज़ेथरौ आबै इऐ मुं माथै आरोप ला ई, ना ताऊं काऐ सौच़्च़ साबित कौरी सौकदै।

¹⁴पर हाऊं ताऊं काऐ एज़ी बूश माना ऊ, कि ज़ेज़ै पंथा लै इऐ बेकार पंथ बोलाई, तेथी कौरी हाऊं आपणै नाना-बुड़ु रै परमेश्‍वरा री आराधना कौराऊ। और ज़ेज़ी बुशै नियम-कानूना दी और भविष्यवक्ताऊ री किताबी दी लिखी ऐन्दी तिऊं सारेऊ माथै विश्वास कौराऊ।

¹⁵और परमेश्‍वरा कु आश छ़ाड़ाऊ ज़ो सै आपु भी छ़ाड़ाई, कि परमेश्‍वर धौर्मी और अधर्मी दुइया ज़िउंदै कौरा आ।

¹⁶एथीलै हाऊं भी परमेश्‍वर और आदमी काऐ आपणौ मन साफ बेकसूर छ़ाड़णै री कोशिश कौराऊ।

¹⁷भौरी साला बासिऐ हाऊं आपणै लोगु कै दाण पौउंच़ाउंदौ, और भैंटा च़ौड़ाउंदै यरुशलेमा दी आशौ थौ।

¹⁸तेबी ई तिंउऐ हाऊं परमेश्‍वरा रै घौरा दी, शुद्ध हुइयौ, एखुली और बिण हालै मच़ाइयौ, भैंटा च़ड़ाउंदै देखौ, पर तिऐ आसिया रै कुछ़ यहुदी थै। पर इणौ ठीक थौ कि,

¹⁹अगर तिउंकै मैरै विरोधा दी कुछ़ बूश थी ता इदै तुमु काऐ आशीयौ मुं माथै आरोप ला थै।

²⁰या सै आपु बोलालै, कि ज़ेबी हाऊं बौड़ी खुंबल़ी मांझ़िऐ खौड़ौ थौ ता तिंउऐ मुंदी केज़ी गलती देखी आ?

²¹इऐं एकी बुशा छ़ाड़ियौ ज़ो मुंइऐ तिऊं मांझ़िऐ खौड़ै हुइयौ हाकै देइयौ बोलौ थी, मौरै औन्दै रै ज़िउंदै हुणै रै बारै दी आज़ मैरौ तुमु आइलै केस हुंदै लागौ औन्दौ।”

²²फेलिक्सै ज़ो एज़ै पंथा री बुशु आच़्छ़ा कौरी ज़ाणा थौ, सै इणै बोलीयौ टाल़ी गोई, “ज़ेबी सिपाईउ रौ मुख्यै लूसियास आशा लौ, ता तुमारी बुशु रौ फैसलौ कौराऊ।”

²³और सिपाई लै हुकम दैऔ कि पौलुसा लै थोड़ी छ़ूट देइयौ तेसरी रखवाल़ी कौरेऊ, पर तेसरै गोश्टणा मांझ़िया कु कासी भी तेसरी सेवा कौरणै कु नाईं रोकेऊ।

²⁴“कुछ़ दिना बासिऐ फेलिक्स आफसरै आपणी छ़ेउड़ी द्रुसिल्ला, ज़ो यहुदी थी, साथा दी कैसरिया इलाकै दी आणी और पौलुस औटाइयौ तेस विश्वासा रै बारै दी ज़ो मसीह यीशु माथै आ, तेसकु शुणौ।

²⁵ज़ेबी सेऊ धार्मिक, सौबर और आशणे वाल़ै फैसलै रै बारै बुशै लाइंदै थौ लागौ औन्दौ, ता फेलिक्सै डौरी-डौरीयौ ज़वाब दैऔ, इबी तू डेऊ ज़ेबी मुकै बौगत औलौ तेबी ताऊं हाऊं औज़ौ औटावा ऊ।”

²⁶तेसकै पौलुसा कु कुछ़ पैसै निणै री आश थी, एथीलै सेऊ घौड़ी-घौड़ीऐ तेस औटाइयौ तेस आइलै बुशै ला थौ।

²⁷पर ज़ेबी दुई सालै बिती गोई ता पुरकियुस फेस्तुस, फेलिक्सा री ज़ागाह दी आफसर बौणौ। और फेलिक्सै यहुदिऊ खुश कौरना लै पौलुस कैदा दी छ़ाड़ौ।