Read Pahari, Mahasu प्रेरित 26 Bible Online

प्रेरित 26 - Pahari, Mahasu bible

प्रेरित 26

¹अग्रिप्पै पौलुसा लै बोलौ, “ताउंकै आपणै बारै दी बोलणै री इज़ाज़त आ।” तैबै पौलुसै आपणौ हाथ कौरी च़ुटुक थाकणै रै इशारै कौरीऔ बोलदै लागौ,

²“ओ राज़ौ अग्रिप्पा ज़ेती बुशु रौ यहुदी मुख्यै मुं माथै आरोप ला ई, आज़ ताऊं काऐ हाऊं तिऊंरौ ज़वाब दैणा लै आपुलै खुशी माना ऊ,

³खास कौरीऐ एथीलै कि तू यहुदिऊ रै सारै रीती-रिवाज़ा और विवाद ज़ाणाई। एथीलै हाऊं ताऊं कु औरज़ कौराऊ कि तू मेरी बुशै ध्याना कौरी शुणा।”

⁴“मैरौ च़ाल-च़लण लोल़डी ओउलै कु आपणै लोगु मांझ़िऐ और यरुशलेमा दी ज़िणौ थौ, सै सारै यहुदी ज़ाणाई।

⁵अगर सै मेरी गवाही दैणी च़ाहा लै, ता लोल़डी ओउलै कु मुं ज़ाणाई कि फरीसी हुइयौ आपणै धौर्मा रै सारेऊ कु काठै नियमा माथै च़ालोऊ।”

⁶आबै तेस वायदै रै आशी री वज़ाह कु ज़ो परमेश्‍वरै आमारै नान-बुड़ु आइलै कियौ थौ, मुं माथै केस च़ालदै लागौ औन्दौ।

⁷सेज़ै वायदै रै पुरै हुणै री आश छ़ाड़ियौ, आमारै बाराह गोत्रै आपणै सारै ज़िवा कौरीऐ राच-दीन परमेश्‍वरा री आराधना की ई आ। ओ राज़ौ, एज़ी आश छ़ाड़णै री बारै दी यहुदी मुं माथै आरोप ला ई।

⁸ज़ैबै कि परमेश्‍वर मौरै औन्दै भी ज़िउंदै कौरा आ, ता तुमै इऐं बूश विश्वासा रै लायक कैलै ना सौमझ़दै?

⁹मुंइऐ भी सौमझ़ौ थौ कि यीशु नासरी रै नावां रै विरोधा दी मुंइऐ भौरी कुछ़ कौरणौ च़ांई।

¹⁰मुंइऐ यरुशलेमा दी इणौ औ कियौ। और बौड़ै याजकु कु हक्क पाइयौ भौरी पवित्र लोग कैदा दी पाऐ, और ज़ेबी तिऊं झ़ांगा थै तेबी हाऊं भी तिंउरै विरोधा दी राज़ी औआ थौ।

¹¹हर आराधनालय दी हाऊं तिऊं सतावा थौ और यीशु री बुराई कौरावा थौ, और इणौ रोशा कौरी पागल हुई गौ थौ कि दुजै इलाकै दी डेइयौ भी तिऊं सतावा थौ।

¹²इणै कौरी ज़ेबी हाऊं बौड़ै याजकु कु हक्क और हुकम पाइयौ दमिश्का लै थौ लागौ औन्दौ डेउंदै।

¹³ता ओ राज़ौ, बाटा दी दुसकै बौगतै मुंइऐ सौरगा कु सुरजा रै प्याशै कु भी बौड़ियौ एक प्याशौ, आपणै और आपु आइलै साथा रै लोगु फिदीआलै च़मकदै देखौ।

¹⁴ज़ेबी आमै सारै धौनी लोटी गौऐ, ता मुंइऐ इब्रानी बोली दी मुं आइलै इणौ बोलदै एक बूश शुणी, “ओ शाऊल ओ शाऊल तू मुं कैलै सतावा ई? पोइनै माथै लात लाइणी ताउंलै कठिण आ।”

¹⁵मुंइऐ बोलौ, “ओ प्रभु तू कुण ई?” प्रभुऐ बोलौ, “हाऊं यीशु ऊ ज़ास तू सतावा ई।

¹⁶पर तू उठ, आपणै बांगणै माथै खौड़ौ ऊ। कैलैकि मुंइऐ ताउंकै एथीलै दर्शण दैऔ आ कि ताऊं इऊं बुशु रौ गवाह और च़ेलौ चाणु, ज़ो ताऐं देखी ई, और तिउंलै भी ज़ेथलै हाऊं ताउंलै दर्शण दिआऊ।

¹⁷और हाऊं ताऊं तैरै लोगु और दुजी ज़ाती रै लोगु कु बौच़ावा ऊ। ज़ास काऐ ताऊं हाऊं आबै एथीलै भेज़ाऊ

¹⁸ताकी तू तिउंरी आखी खोला कि सै न्यारै कु प्याशै भिलै, और शैताना रै हक्‍का कु परमेश्‍वरा भिलै मुड़ा। तैबै पापा री माफी और तिऊं लोगु आइलै ज़ुण मुं माथै विश्वास कौरीयौ पवित्र हुऐ ई, राज़ कौरा।”

¹⁹“एथीलै ओ राज़ौ अग्रिप्पा, मुंइऐ सौरगा रै दर्शणा री बूश नाईं टाल़ी,

²⁰पर पैहलै दमिश्का रै, तैबै यरुशलेमा रै, तैबै यहुदिया रै सारै देशा दी रौइणै वाल़ेऊ, और दुजी ज़ातीऊ कै परचार कौरदै थाकौ लागी, कि मन बौदल़ौ और परमेश्‍वरा भिलै फीरीयौ मन बौदुल़णै लायक काम कौरौ।

²¹इऊं बुशु री वज़ाह कु यहुदी मुं परमेश्‍वरा रै घौरा दी पाकड़ियौ झ़ांगणै री कोशिश कौरा थै।

²²पर परमेश्‍वरा री मज़दा कौरीऐ हाऊं आज़ झ़ांऊ ज़िउंदौ ऊ, और छ़ोटै-बौड़ै सारेऊ काऐ गवाही शुणावा ऊ। और इऊं बुशै छ़ाड़ियौ ओर कुछ़ ना बोलदौ ज़ो भविष्यवक्तुऐ और मुसै भी बोली कि हुणै वाल़ी ई,

²³कि मसीह इऐ दु:ख जा ई उठाउणै और सेऊ सौभी कु पैहलै मौरै औन्दै मांझ़िया कु ज़िउंदै हुइयौ, आमारै लोगु और दुजी ज़ाती रै लोगु काऐ प्याशै रौ परचार कौरा ई।”

²⁴ज़ेबी सेऊ इणै कौरी ज़वाब दैंदै थौ लागौ औन्दौ, तैबै फेस्तुसै हाकै देइयौ बोलौ, “ओ पौलुस तू पागल ई। और भौरी शिखीयौ तू पागल बौणी गोई।”

²⁵पर पौलुसै बोलौ, “ओ महामहिम फेस्तुस, हाऊं पागल नाईं ऊ बल्कि सौच़्च़ाई और औकला री बूश बोलाऊ।

²⁶राज़ौ भी ज़ास काऐ हाऊं बिण डौरै ऊ लागौ औन्दौ बोलदै, इऊं बुशु ज़ाणा। और मुकै विश्वास आ कि इऊं बुशु मांझ़िया कु कोई भी तिऊंकु छ़िपी ऐन्दी नाईं, कैलैकि इऐ घटना केज़ै कुणे दी नाईं हुई।

²⁷ओ राज़ौ अग्रिप्पा, का तू भविष्यवक्ताऊ रौ विश्वास कौरा ई? ओ हाऊं ज़ाणाऊ कि तू विश्वास कौरा ई।”

²⁸तैबै अग्रिप्पै पौलुसा लै बोलौ, “तू थोड़ौ सौमझ़ाइयौ मुं मसीह चाणनौ च़ाहा ई?”

²⁹पौलुसै बोलौ, “परमेश्‍वरा कु मेरी प्राथना सा कि का थोड़ौ का भौरी, सिरफ तू ई नाईं ज़ेती लोग आज़ मेरी शुणाई, इऊं बानणा छ़ाड़ियौ सै मुं बाशीऐ बौणा।”

³⁰तैबै राज़ौ और आफसर और बिरनीके और तिऊं आइलै बोशै औन्दै उठीयौ खौड़ी हुऐ, और तिदरु पोरु डेवै।

³¹और ज़िणी सै बाइरै थै डेउंदै लागै औन्दै ता आपु मांझ़िऐ चौपड़िंदै लागै, “एऊ आदमी इणौ ता कुछ़ भी ना कौरदौ, ज़ो मौउता री सौज़ा और कैदा दी पाइणै लायक औलौ।”

³²अग्रिप्पै फेस्तुसा लै बोलौ, “अगर एऊ आदमी कैसरा राज़ै कु औरज़ नाईं कौरा थौ ता आज़ाद हुई सौका थौ।”