Read Pahari, Mahasu प्रेरित 27 Bible Online

प्रेरित 27 - Pahari, Mahasu bible

प्रेरित 27

¹ज़ैबै फिस्तुस आफसरै इणौ पाकौ कियौ कि आमै बौड़ी किश्ती दी इटली देशा लै डेई, ता तिंउऐ पौलुस और कुछ़ ओर कैदी भी यूलियुस नाऊं औगस्तुस राज़ै री फौज़ा रै सिपाई रै हाथा दी सौंभाल़ी गौऐ।

²अद्रमुतियुमा शहरा रै एकी किश्ती दी ज़ो आसिया इलाकै रै डिका काऐ डेउणा लै तैयार थी। तेथदी आमै बोशै और च़ाल पौड़ै, अरिस्तर्खुस नाऊं थिस्सलुनीके रौ एक मकिदुनी भी आमु आइलै थौ।

³दुजै दिनै आमै सैदा इलाकै दी रुकै, और यूलियुसै पौलुसा माथै दया कौरीयौ सेऊ तेसरै गोश्टणु काऐ डेउणै दैऔ, कि तेसकै ज़ो च़ांई तेस दिया।

⁴तिदरु आमुऐ तौंइऐ सफर शुरु कियौ तैबै आमै किश्ती दी बोशियौ साइप्रस टापु रै ओला दी च़ालै, कैलैकि बागुर थौ भौरी लागौ औन्दौ।

⁵किलकिया और पंफूलिया शहरा रै नज़दीक समुन्दरा बाटीऐ लुसीया परदेशा रै मुरा शहरा दी डेवै।

⁶तिऐ सिपाई कै इटली देशा लै डेउणै वाल़ी सिकन्दरिया शहरा री एक किश्ती मिली, और तिणीऐ आमै तिदरा दी बोशाल़ै।

⁷ज़ैबै आमै भौरी दिना झ़ांऊ सुल-सुलै हाण्डीयौ बौड़ी मुश्कल़ा कौरी कनिदुसा शहरा काऐ पौउंच़ै, ता बागुर आमु औगांऊ बौड़णै नाईं दिया थौ, एथीलै आमै सलमोनै रै सामनै क्रेतै टापु रै ओला दी च़ालै।

⁸तेथरै डिका बाटीऐ मुश्कल़ा कौरी डेइयौ “शुभलंगरबारी” नावां री एक ज़ागाह दी पौउंच़ै, तिदरु लसवा इलाकौ नज़दीक थौ।

⁹ज़ैबै भौरी दीन बिती गौऐ और पाणी रै सफरा दी मुश्कल़ एथीलै हुआ थी कि ब्रौता रै दीन बिती गौऐ थै। पौलुसै सै सारै इणै बोलीयौ सौमझ़ाऐ,

¹⁰“ओ भाईओ, मुकै इणौ ज़ाणिया कि एस सफरा दी मुश्कल़ और भौरी नुकसान, हुणै वाल़ौ आ, ना सिरफ समान और किश्ती रौ बल्कि आमारै प्राणा रौ भी।”

¹¹पर सिपाइऐ पौलुसा कु बौड़ियौ किश्ती च़लाउणै वाल़ै और मुख्यै री बूश ज़ादी मानी।

¹²सै ज़ागाह शेल़ै काटणा लै ठीक नाईं थी, एथीलै सारेउऐ सुंच़ौ कि तिदरु किश्ती किणै कौरीऐ फीनिक्सा दी पौउंच़ा ताकी तिऐ शेल़ै कु बौच़ा। इऐ क्रेतै टापु रै डिका री एक ज़ागाह सा ज़ेथरै दार च़ारौ तरफा दी खुला ई।

¹³ज़ैबै थोड़ी-थोड़ी बागुर लागदै लागी, तिंउऐ इणै सुंच़ीयौ कि आमारौ मतलब पुरौ हुई गौ आ, ता लांगर च़ुंगी और डिका डिका दी क्रेतै टापु रै डिका बाटीऐ डेउंदै लागै।

¹⁴पर कुछ़ बौगता बासिऐ धौनी कु भौरी बागुर च़ाली, ज़ेथलै यूरकुलीन बोलाई।

¹⁵ज़ैबै बागुर किश्ती दी लागी ता किश्ती खौड़ी नाईं टेकी बौल़ी, एथीलै आमुऐ सै बौइणै देई और बौइंदै-बौइंदै च़ालदै थाकै लागी।

¹⁶तैबै कौदा नावां रै एकी टापु बाटीऐ बौइंदै-बौइंदै मुश्कल़ा कौरीऐ छ़ोटी-छ़ोटी किश्ती वंशा दी की।

¹⁷तैबै किश्ती च़ौलाउणै वाल़ेउऐ छ़ोटी किश्ती च़ुंगी और बौड़ी किश्ती तौल़ा कु माथै झ़ांऊ लोअल़ी कौरीऐ बानी, और सूरतिस टापु माथै फौसणै रै डौरा कु पाल और समान उतारीयौ बौइयौ डेउंदै लागै।

¹⁸दुजै दिनै ज़ैबै आमुऐ बागुरा कौरी भौरी धाकै खाऐ ता किश्ती कु समाना शोटदै लागै।

¹⁹और चिजै दिनै तिंउऐ आपणै हाथा कौरी किश्ती रै रौशै समान शोटी गौऐ।

²⁰ज़ैबै भौरी दिना झ़ांऊ ना ता सुरज दिशौ ना सौरगा रै तारै दिशै और बागुर थौ लागौ औन्दौ ता आखरी दी आमुकै बौच़णै री आश भी खातम हुई।

²¹ज़ैबै तिंउऐ बिण रोटीऐ भौरी दीन बिताऐ तैबै पौलुसै तिऊं मांझ़िऐ खौड़ै हुइयौ बोलौ, “ओ भाईओ आच़्छ़ौ इणौ थौ कि तुमै मेरी बूश माना थै और क्रेतै टापु कु नाईं च़ाला थै, तैबै ना ता इऐ मुसीबत आशा थी और ना नुकसान हुआ थौ।

²²पर आबै हाऊं तुमु सौमझ़ावाउ की हिम्मत छ़ाड़ौ, कैलैकि तुमु मांझ़िया कु कासी रै भी प्राण नाईं डेउणै, पर किश्ती रौ नुकसान हुआ।

²³कैलैकि परमेश्‍वर ज़ासरौ हाऊं ऊ, और ज़ासरी आराधना कौराऊ, तेसरै दूतै आखरी राची मुकाऐ आशीयौ बोलौ,

²⁴‘ओ पौलुस नाईं डर! तैरौ कैसर राज़ै काऐ खौड़ौ हुणौ ज़ुरुरी आ। परमेश्‍वरै सारै ज़ो ताऊं आइलै सफर कौरा ई, तिउंलै ज़िन्दगी रौ दाण दैऔ आ।’

²⁵एथीलै, ओ भाईओ, हिम्मत छ़ाड़ौ। कैलैकि हाऊं परमेश्‍वरा माथै विश्वास कौराऊ, कि ज़िणौ मुलै बोलौ औन्दौ आ तिणी हुआ।

²⁶पर आमुऐ केज़ै ढोकडू माथै जा रौइणौ।”

²⁷ज़ैबै चौदवी राच आशी और आमै अद्रिया समुन्दरा दी थै लागै औन्दै भटकदै, ता आधी राचीऐ किश्ती च़लाउणै वाल़ेऊ कै पौतौ लागौ कि आमै केज़ै देशा रै नज़दीक पौउंच़दै लागै औन्दै।

²⁸तैबै तिंउऐ समुन्दरा री गहराई नापी ज़ो सेंतिस मिटर थी, और थोड़ौ आगुड़ै डेइयौ नापी औज़ौ तिऐ थी सताइस मिटर।

²⁹तैबै ढोकै कु टकराइणै रै डौरा कु तिंउऐ किश्ती दी पिछ़ भिलै च़ार लांगरै लाऐ, और राच खुलना लै प्राथना कौरदै लागै।

³⁰पर ज़ै किश्ती च़लाउणै वाल़ै किश्ती कु भागणौ च़ाहा थै और आगलै हिस्सै कु लांगर टालनै रै बाहनै कर छ़ोटी किश्ती समुन्दरा दी उतारी गोई थी।

³¹ता पौलुसै सिपाईउ और च़ोअकीदारु लै बोलौ, “अगर इऐ किश्ती दी नाईं रौआ लै ता तुमै भी ना बौच़णै।”

³²तैबै सिपाइउऐ रौशै काटियौ डोंगी तौल़ै पाई गोई।

³³ज़ैबै राच खुलनै वाल़ी थी तैबै पौलुसै इणै बोलीयौ सारै रोटी खाणा लै औरज़ की, “आज़ चौदह दीन हुई गौऐ तुमै झ़ौरी कौरीयौ भुखै रौऐ और कुछ़ रोटी ना खाई।

³⁴एथीलै तुमु सौमझ़ावा ऊ कि कुछ़ खाऔ, ज़ेथ कौरी तुमै बौच़ा। कैलैकि तुमु मांझिया कु कासी रै मुंडा रौ एक बाल़ भी ना छ़ुटदौ।”

³⁵इणै बोलीयौ तिणीऐ रोटी कौरी और सारेऊ काऐ परमेश्‍वरा रौ धन्यबाद कियौ और चोड़ियौ खांदै लागौ।

³⁶तैबै सै सारै भी हिम्मत कौरीयौ रोटी खांदै लागै।

³⁷आमै सारै मिलियौ किश्ती दी दुई शौ छियतर लोग थै।

³⁸ज़ैबै सै रोटी खाइऔ रौज़ै, ता गीऊं समुन्दरा दी शोटीयौ किश्ती औल़खी कौरदै लागै।

³⁹ज़ैबै दुसौ हुऔ ता तिंउऐ सेऊ देश नाईं रवावौ, पर एक ज़ागाह देखी ज़ेथरौ कुणौ च़ोकुणौ थौ, और सुंच़दै लागै कि अगर हुई सौका ता किश्ती एथीई माथै रुकाई।

⁴⁰तैबै तिंउऐ लांगर खोलिऔ समुन्दरा दी पाऐ और तेबी पतवारा रै रौशै ढीलै कौरी गौऐ, और बागुरा रै सामनै छ़ोटै पालै खोलियौ डिका भिलै च़ालै।

⁴¹पर दुई समुन्दरा बिच़ा दी तिंउऐ किश्ती टेकाई। किश्ती रौ आगलौ हिस्सौ इणौ फौसी गौ कि हिलौ भी नाईं और पिछ़लौ हिस्सौ लागौ छ़ालेऊ कौरी चुटदै।

⁴²फौज़ी सुंच़ा थै इणौ कि कैदीऊ पोरु झ़ांगी ई इणौ ना च़ांई हुऔ कि कैदी तैरीयौ पोरु ना भागा।

⁴³पर सिपाइऐ पौलुस बौच़ाउणै री इच़्छ़ा कौरी सै इणै कौरना लै रोकै, और हुकम दैऔ कि ज़ुण तैहरी ज़ाणा सै पैहलै तैहरीयौ डिका काऐ डिआ।

⁴⁴और बाकी डियालै, कुण पाटड़ेऊ और ज़ुखडेऊ रै सहारै कौरी। इणै कौरी सारै ठीक-ठाक किश्ती कु उतरियौ डिका काऐ पौउंच़ै।