Read Pahari, Mahasu प्रेरित 28 Bible Online

प्रेरित 28 - Pahari, Mahasu bible

प्रेरित 28

¹“ज़ैबै आमै सारै डिका काऐ ठीक-ठाक पौउंच़ी गौऐ तैबै आमुकै पौतौ लागौ कि इऐं ज़ागाह लै माल्टा बोलाई।

²तिदलै लोगुऐ आमारौ भौरी ख्याल छ़ाड़ौ। कैलैकि पाणी लागणै री वज़ाह कु भौरी शेल़ौ थौ, और तिंउऐ आग ज़ाल़ियौ आमारौ स्वागत कियौ।

³ज़ैबै पौलुसै ज़ुखड़ै कौट्ठै कौरीयौ आगी माथै छ़ाड़ै, ता एक साप तौपीयौ बाइरै निकल़ौ और तेसरै हाथा दी मेशुऔ।

⁴ज़ैबै तिदलै लोगुऐ साप पौलुसा रै हाथा दी मेशुऔ औन्दौ देखौ, ता आपु मांझ़िऐ चौपड़िंदै लागै कि, पाकौ एऊ आदमी गुंडौ आ कि समुन्दरा कु बौच़ी गौ पर फैसलै कौरणै वाल़ी देवी नाईं च़ांहादी कि एऊ ज़िउंदौ रौआ।”

⁵तैबै तिणीऐ सेऊ साप आगी दी शोटौ, और पौलुसा दी कुछ़ ना हुऔ।

⁶पर सै लोग थै ज़ागदै लागै औन्दै कि आबै एऊ उशाआ और एकी घौड़ीऐ धौनी पौड़ीयौ मौरा, पर ज़ैबै सै काफी बौगता झ़ांऊ देखदै थै लागै औन्दै ता तिंउऐ देखौ कि तेसदी कुछ़ भी ना हुऔ, ता आपणै विच़ार बौदल़ियौ बोलदै लागै कि, “एऊ ता कुण दैऔ आ।”

⁷तिऐं ज़ागाह रै नज़दीक, तेस टापु रै परधान पुबलियुसा री ज़बीन थी। तिणीऐ आमै आपणै घौरै निऐं और चिया दिना झ़ांऊ आमारी सेवा-पाणी की ई।

⁸पुबलियुसा रौ बाब बुखार और पेचिसा कौरी भौरी बिमार थौ। पौलुसै तेस काऐ डेइयौ प्राथना कौरी और तेस माथै हाथा छ़ाड़ियौ सेऊ च़ांगौ कियौ।

⁹ज़ैबै इणौ हुऔ ता तिऐं ज़ागाह रै सारै बिमार पौलुसा काऐ आशै और च़ांगै हुइयौ डेवै।

¹⁰तिंउऐ आमारी बौड़ी इज़्ज़त की ई, और ज़ेबी आमै तिदरु डेउंदै लागै ता ज़ो आमुलै ज़ुरुरी थौ, सेऊ समान तिंउऐ आमारी किश्ती छ़ाड़ौ।

¹¹चिया मिहनै बासिऐ आमै सिकन्दरिया रै एकी किश्ती दी च़ाल पौड़ै, ज़ो तिऐ पुरै शेल़ै रै बौगतै रौऔ ज़ासरौ निशाण, “ज़ुड़ुऐ देऊ” थौ।

¹²तैबै सुरकूस शहरा दी आमै चिया दिना झ़ांऊ थाकै।

¹³तिदरु आमै घुमी-फीरीयौ रेगीयुमा दी आशै। और एकी दिना बासिऐ तेज़ बागुर च़ाली, तैबै आमै दुजै दिनै पुतियुली शहरा दी आशै।

¹⁴तिऐ आमुकै कुछ़ विश्वासी भाई मिलै ज़ुणिऐ आमुकु औरज़ कौरी कि सात दिना झ़ांऊ आमारै काऐ रौऔ। इणै कौरी आमै रोमा दी पौउंच़ै।

¹⁵ज़ैबै तिदलै विश्वासी भाईउऐ आमारै बारै दी शुणौ ता अप्पियुसा रै बज़ारा दी और चिया सरांय झ़ांऊ सै आमुकु मिलदै आशै, तिऊं देखीयौ पौलुसा कै हिम्मत आशी और तिणीऐ परमेश्‍वरा रौ धन्यबाद कियौ।

¹⁶ज़ैबै आमै रोमी शहरा दी पौउंच़ै, ता पौलुसा लै एक सिपाई आइलै ज़ो तेसरी रखवाल़ी कौरा थौ, एखुलै दी रौइणै रौ हुकम मिली गौ।

¹⁷चिया दिना बासिऐ पौलुसै यहुदिऊ रै मुख्यै लोग औटाऐ, और ज़ैबै सै कौट्ठै हुऐ ता तिउंलै बोलौ, “ओ भाईओ, मुंइऐ आपणै लोगु और आपणै नान-बुड़ु रीती-रिवाज़ा रै विरोधा दी कुछ़ भी ना कियौ, तैबै भी यरुशलेमा दी हाऊं कैदा दी पाइयौ रोमी मुख्यै रै हाथा दी सौंभाल़ौ।

¹⁸तिंउऐ हाऊं पौरखियौ छ़ाड़णौ च़ाऔ, कैलैकि मुंदी मौउता रै लायक कोई गलती नाईं थी।

¹⁹पर ज़ैबै यहुदी मुख्यै एथरै विरोधा दी बोलदै लागै, ता मुं कैसरा री औरज़ कौरणी पौड़ी एथलै नाईं कि मुंइऐ आपणै लोगु माथै आरोप लाइणौ थौ।

²⁰एथीलै मुंइऐ तुमै औटाऐ ई कि तुमु कु मिलु और बुशै-धाशै लाऊ। कैलैकि इस्राइला री आश छ़ाड़ना लै ऊ हाऊं इऐं शांगल़ी दी बानौ औन्दौ।”

²¹तै यहुदी मुख्येउऐ पौलुसा लै बोलौ, “ना आमुकै तैरै बारै दी यहुदिऊ कु चिट्ठी मिली, ना विश्वासी भाईऊ मांझ़िया कु कुणिऐ आशीयौ आमु काऐ तैरै बारै दी कुछ़ बोलौ, और ना बुरौ बोलौ।

²²पर तैरौ विच़ार का सा? तिऊं आमै ताऊं कु शुणनौ च़ांई, कैलैकि आमै ज़ाणी कि हर ज़ागाह दी लोग एथरै बारै दी बुशै ला ई।”

²³तैबै तिंउऐ तेसलै एक दीन छ़ांटौ, और भौरी लोग तिऐ कौट्ठै हुऐ तैबै पौलुसै परमेश्‍वरा रै राज़ा री गवाही देई, और मुसा रै नियमा और भविष्यवक्ता री किताबी कु यीशु रै बारै दी सौमझ़ाई-सौमझ़ाइयौ दोअती कु ब्याल़ी झ़ांऊ थाकौ शिखाउंदै लागी।

²⁴तैबै कुछ़ लोगुऐ ता इऊं बुशु माथै विश्वास कियौ, और कुछ़ लोगुऐ नाईं विश्वासा कियौ।

²⁵ज़ैबै सै एकी-दुजै कु राज़ी नाईं हुऐ ता पौलुसा री, इऊं बुशु छ़ाड़ियौ तिदरु डेई गौऐ “पवित्र आत्मै यशायाह भविष्यवक्ता रै ज़ौरिऐ आमारै नान-बुड़ु आइलै ठीक ई बोलौ आ,

²⁶‘डेइयौ इऊं लोगु लै बोल, शुणदै ता थाका ई लागी, पर सौमझ़दै नाईं, देखदै ता थाका ई लागी, पर दिशदौ नाईं।’

²⁷कैलैकि इऊं लोगु रौ ज़िऊ मोटौ और इउंरै कौन्थु भौरुई गौऐ, और इउंऐ आपणी आखी बन्द की ऐन्दी, ताकी इणौ ना हुआ कि सै आखी कौरी देखा, कौन्थु कौरी शुणा और ज़िवा कौरी सौमझ़ा, और बौदल़िया, और हाऊं इऊं च़ांगौ कौरु।”

²⁸“एथीलै तुमै ज़ाणौ कि परमेश्‍वरा रै छ़ुटकारै इऐ खुशी री खौबर दुजी ज़ातीऊ काऐ भेज़ी गोई आ, और सै अपणावा ई।”

²⁹ज़ेबी तिणीऐ इणौ बोलौ ता यहुदी आपु मांझ़िऐ चौपड़िंदै लागै और तिदरु पोरु भागै।

³⁰सेऊ पुरै दुई साला झ़ांऊ तिऐ आपणै किराय रै घौरा दी रौऔ,

³¹और ज़ो भी तेस काऐ आशा थै, तिऊं सौभी कु मिला थौ और बिण रुकै निडर हुइयौ परमेश्‍वरा रै राज़ा रौ परचार कौरा थौ और प्रभु यीशु मसीह री बुशै शिखाउंदै थाकौ लागी।