Read Pahari, Mahasu प्रेरित 3 Bible Online

प्रेरित 3 - Pahari, Mahasu bible

प्रेरित 3

¹पतरस और यहुन्ना दिना रै चिजै पौहरै प्राथना कौरना लै परमेश्‍वरा रै घौरा लै थै लागै औन्दै डेउंदै।

²और लोग थै लागै औन्दै एक ज़नमा कु लौंगड़ौ आदमी निंदै, ज़ास सै रोज़ परमेश्‍वरा रै घौरा रै दारा काऐ ज़ासलै “बड़ीया” दार बोलाई, बोशाल़ा थै ताकी सेऊ परमेश्‍वरा रै घौरा दी डेउणै वाल़ै लोगु कु भीख मांगा।

³ज़ैबै तिणीऐ पतरस और यहुन्ना परमेश्‍वरा रै घौरा दी डेउंदै देखै, ता तिणीऐ तिऊंकु भीख मांगी।

⁴पतरसै यहुन्ना आइलै तेस भिलै बौड़ै ध्याना कौरीऐ देखीयौ बोलौ, “हामु भिलै देख।”

⁵और सेऊ तिऊंकु कुछ़ मिलणै री आश छ़ाड़ियौ तिऊं भिलै देखदै लागौ।

⁶तैबै पतरसै बोलौ, “सुनौ-च़ांदी ता मुकै आसतौ नाईं, पर ज़ो मुकै आसा तेस हाऊं ताउंकै दिआऊ। यीशु मसीह नासरी रै नावां कौरी उठ और हांड-फिर।”

⁷और पतरसै तेसरौ सुल़टौ हाथ पाकड़ियौ सेऊ उठाऔ। और तेबी ई तेसरी टांगा और घुंडेऊ दी तागत आशी गोई

⁸सेऊ उछ़ल़ीऔ खौड़ौ हुऔ और हांडदै-फिरदै लागौ। हांडियौ, उछ़ल़ीऔ और परमेश्‍वरा री बौड़ाई कौरदै-कौरदै तिऊं आइलै परमेश्‍वरा रै घौरा रै खौल़ै दी डैऔ।

⁹सारै लोगुऐ सेऊ हांडदै-फिरदै और परमेश्‍वरा री बौड़ाई कौरदै देखीयौ,

¹⁰सेऊ रवाई गौ कि एऊ सेऊ ऊ आ ज़ुण परमेश्‍वरा रै घौरा रै बड़ीया दारा काऐ बोशियौ भीख मांगा थौ। और एज़ी बुशा कु ज़ो तेस आइलै हुई थी सै भौरी हैरान हुऐ।

¹¹ज़ेबी तिणीऐ पतरस और यहुन्ना थै पाकड़ै औन्दै ता सारै लोग भौरी हैरानी कौरीऐ तेस परमेश्‍वरा रै घौरा दी ज़िऐ सुलेमाना रौ खौल़ौ थौ, तिऊं काऐ फेटी मारीयौ आशै।

¹²इणै देखीयौ पतरसै लोगु लै बोलौ, “ओ इस्राइली लोगुओ, तुमै एस आदमी देखीयौ हैरान कैलै हुआई, और हामु भिलै इणौ पा कैलै देखा ई कि ज़ाण ता हामुऐ आपणी शक्ति कौरीऐ एऊ आदमी हांडणै-फिरणै लायक कियौ।

¹³अब्राहम, इसहाक और याकुबा रौ परमेश्‍वर, और आमारै नाना बुड़ु रै परमेश्‍वरै आपणै सेवक यीशु री बौड़ाई की, ज़ुण तुमुऐ झ़ौंगाउणा लै यहुदी मुख्येऊ रै हाथा दी पौकड़ाऔ थौ, और ज़ेबी पिलातुसै तेस पोरु छ़ाड़णै रौ विच़ार कियौ, तेबी तुमुऐ तेसरै सामनै तेसरौ इनकार कियौ।

¹⁴तुमुऐ तेस पवित्र और धौर्मी रौ इनकार कियौ, और औरज़ कौरी की एक खुनी आदमी तुमुलै आज़ाद कौरा।

¹⁵और तुमुऐ सौदा री ज़िन्दगी दैणै वाल़ौ झ़ांगौ पोरु, ज़ुण परमेश्‍वरै मौरै औन्दै मांझ़िया कु ज़िउंदौ कियौ आ। और एज़ी बुशा रै शाजत आमै ई।

¹⁶और मसीह यीशु रै नावां माथै विश्वासा री वज़ाह कु, एऊ आदमी ज़ास तुमै ज़ाणाई, और इबी देखदै भी लागै औन्दै, तागत मिली आ। और एऊ आदमी यीशु रै नावां माथै विश्वास कौरणै री वज़ाह कु बिल्कुल भौलौ-च़ांगौ हुऔ आ, ज़िणौ कि तुमै आपु ई देखदै लागै औन्दै।”

¹⁷“ओ भाईओ, आबै हाऊं ज़ाणाऊ कि तुमुऐ और तुमारै गुरुऐ अणज़ाणै दी यीशु झ़ौंगाऔ आ, कैलैकि तुमै नाईं ज़ाणा थै कि सेऊ मसीहा सा।

¹⁸पर ज़ेज़ी बुशै परमेश्‍वरै सारै भविष्यवक्ता रै ज़ौरिऐ पैहले बोली गोई थी, कि सेऊ मसीह दु:ख उठावा और मौरा, सै सारी बुशै तिणीऐ इणी पुरी की।

¹⁹एथीलै, मन बौदल़ौ और परमेश्‍वरा काऐ वापस आशौ कि तुमारै पाप माफ हुआ, ज़ेथ कौरी प्रभु रै सामनै शान्ति रै दीन आशा,

²⁰और सेऊ यीशु भेज़ा ज़ो मसीहा सा, ज़ुण पैहला ओउलै तुमु कालै च़ुनौ औन्दौ।

²¹ज़ुरुरी आ कि सेऊ सौरगा दी तेबी झ़ांऊ रौआ ज़ेबी झ़ांऊ कि सेऊ सारी बुशु रौ सुधार ना कौरालौ ज़ेथरी बुशै पुराणै बौगता ओउलै परमेश्‍वरै आपणै भविष्यवक्ता रै मुआं कौरी बोली आ।”

²²ज़िणौ कि मुसा भविष्यवक्तै बोलौ, “प्रभु परमेश्‍वर तुमारै भाईऊ मांझ़िआ कु तुमु कालै मुं ज़िणौ एक भविष्यवक्ता भेज़ा आ, ज़ो कुछ़ सेऊ तुमुलै बोलालौ, तेसरी शुणेऊ।

²³पर हरेक आदमी ज़ो तेस भविष्यवक्ता री नाईं शुणा लौ, लोगु मांझ़िया कु तेस पोरु झ़ांगाई।

²⁴शमुएला कु, बासिऐ रै भविष्यवक्ता झ़ांऊ ज़ुणिऐ भी भविष्यवाणी की आ तिऊं सारेउऐ एज़ै दिना री खुश-खौबरी शुणाई आ।

²⁵तुमै सारै भविष्यवक्ताऔं री सन्तान और सेज़ै वायदै रै हक्कदार ई, ज़ो परमेश्‍वरै तुमारै नाना-बुड़ु आइलै कियौ आ, ज़ेबी तिणीऐ अब्राहमा लै बोलौ, ‘तैरै वंशा रै ज़ौरिऐ धौतरी रै सारै लोगु लै आशीष मिला आ।’

²⁶परमेश्‍वरै आपणौ सेवक यीशु मौरै औन्देऊ मांझ़िया कु ज़िउंदौ कौरीयौ सारेऊ कु पैहलै तुमु काऐ भेज़ौ, ताकी तुमु सारेऊ मांझ़िया कु हर एक आपणै पाप वाल़ी ज़िन्दगी छ़ाड़ियौ परमेश्‍वरा भिलै फिरा।”