Read Pahari, Mahasu प्रेरित 6 Bible Online

प्रेरित 6 - Pahari, Mahasu bible

प्रेरित 6

¹सेज़ै बौगता दी च़ेलेऊ री गिनती भौरी बौड़दै लागी, तैबै युनानी बोली बोलणै वाल़ै च़ेलै इब्रानी बोली बोलणै वाल़ै च़ेलेऊ लै लौड़दै लागै, कि हर दिना री सेवा दी आमारी विधवा छ़ेउड़ीऊ री पूछ़-ताछ़ नाईं हुंदी।

²तैबै तिऊं बारह च़ेलेउऐ, विश्वासिऊ री खुंबल़ी कौट्ठै की और बोलौ, “इणौ ठीक नाईं कि आमै परमेश्‍वरा रै वचन छ़ाड़ियौ खाणै-पिणै री सेवा कौरदै लागी।

³एथीलै, ओ भाईओ आपु मांझ़िया कु सात आदमी ज़ासरौ च़ाल-च़लण आच़्छ़ौ आ, पवित्र आत्मा कौरी भरपूर ई, और औकली वाल़ै ई, तिऊं छ़ांटौ, कि आमै तिउंकै एज़ौ काम सौम्भाल़ु।

⁴पर आमै ता प्राथना, वचना रौ परचार और शिक्षा दैंदै थाकी लागी।”

⁵इऐ बूश सारी खुंबल़ी कै आच़्छ़ी लागी, और तिंउऐ स्तिफनुस नावां रौ एक आदमी ज़ुण विश्वास और पवित्र आत्मा कु भौरुऔ थौ, और फिलिप्पुस, प्रुफुरुस, नीकानोर, तिमोन, और परमिनास, और अन्ताकिया रौ नीकुलाउस ज़ुण यहुदी गुटा दी आशी गौ थौ, छ़ांटै।

⁶और च़ेलेऊ काऐ नीईंयौ खौड़ै किऐ, च़ेलेऊ ऐ तिऊं माथै प्राथना कौरीऔ हाथ छ़ाड़ै और सेवा कौरना लै छ़ांटै।

⁷परमेश्‍वरा रौ वचन फैलदै थौ लागौ औन्दौ और यरुशलेमा दी च़ेलेऊ री गिनती भौरी बौड़ी गोई। और भौरी यहुदी याजकुऐ भी एज़ौ गुट अपणाई गौ।

⁸स्तिफनुस दया और शक्ति कौरी भौरुइऔ लोगु मांझ़िऐ बौड़ै-बौड़ै नोखै काम और निशाण देखावा थौ।

⁹तैबै तेस आराधनालय दी ज़ो आज़ाद हुऐ औन्दै गुलाम लोगु री थी, तिऊं मांझ़िऐ कुछ़ लोग कुरेनी, सिकन्दरिया, किलकिया, और आसिया कु थै आशै औन्दै, सै उठीयौ स्तिफनुसा कु वाद-विवाद कौरदै लागै।

¹⁰तैबै भी सेऊ इणै औकली और आत्मा कौरी बोला थौ कि सै तेसरौ विरोध नाईं कौरी बौल़ै।

¹¹तैबै तिंउऐ कुछ़ लोग खौड़ै किऐ कि सै तेसरौ इणौ बोलीयौ विरोध कौरा कि, “आमुऐ एऊ मुसा और परमेश्‍वरा रै विरोधा ई बुराई री बुशै बोलदै शुणौ आ।”

¹²तैबै तिंउऐ स्तिफानुसा रै खिलाफा दी लोग और यहुदी स्याणै, और यहुदी शास्त्री भड़काइयौ, सेऊ पाकड़ियौ बौड़ी खुंबल़ी दी आणौ।

¹³और झ़ुठै शाजत खौड़ै किऐ, ज़ुणिऐ इणौ बोलौ, “कि एऊ आदमी इऐं पवित्र ज़ागाह और मुसा रै नियमा रै विरोधा ई बार-बार बोला आ।

¹⁴कैलैकि आमुऐ एऊ इणौ बोलदै शुणौ आ कि सेऊ ऊ यीशु नासरी एस परमेश्‍वरा रौ घौर पोरु ढाल़ा आ, और तिऊं नियम पोरु मिटावा ज़ो मुसा रै ई आमुकै दैऔ औन्दै।”

¹⁵तैबै बौड़ी खुंबल़ी दी बोशै औन्दै लोगुऐ, तेस भिलै बौड़ै ध्याना कौरी देखौ ता तिंउऐ तेसरौ मुं सौरगदूता बाशीऐ च़ौमकौ औन्दौ देखौ।