Read Pahari, Mahasu रोमियो 1 Bible Online

रोमियो 1 - Pahari, Mahasu bible

रोमियो 1

¹हाऊं पौलुस इऐं चिट्ठी लिखाऊ, ज़ुण यीशु मसीह रौ सेवक आ, परमेश्‍वरै हाऊं प्रेरित हुणा लै ऊ च़ुनौ औन्दौ, और परमेश्‍वरा री तिऐं खुशी री खौबरी रौ परचार कौरना लै अलग कौरी ऐरौ ऊ।

²ज़ास खुशी री खौबरी लै तिणीऐ पैहला कु आपणै भविष्यवक्ता रै ज़ौरिऐ पवित्रशास्त्रा दी,

³आपणै छ़ोहरु आमारै प्रभु यीशु मसीह रै बारै दी वायदौ किऔ थौ। ज़ो शरीरा कु ता दाऊद राज़ै रै वशां कु पैदौ हुऔ।

⁴और पवित्र आत्मा री शक्ति कौरी सेऊ मौरै औन्दै मांझ़िऐ कु ज़िउंदै हुऔ। इणै कौरीऐ साबित हुऔ की सेऊ परमेश्‍वरा रौ छ़ोहरु आ। सेऊ यीशु मसीह आमारौ प्रभु आ।

⁵मसीह रै ज़ौरिऐ आमुकै बौड़ी दया और प्रेरितु री सेवकाई मिली, कि तेसरै नाऊं री वज़ाह कु सारी ज़ाती रै लोग मसीह माथै विश्वास कौरीयौ तेसरी माना,

⁶ज़ास मांझ़िऐ कु तुमै भी यीशु मसीह रै हुणा लै औटाऐ औन्दै ई।

⁷इऐ चिट्ठी रोम इलाकै रै तिऊं सौभी रै नावां दी आ ज़ुण परमेश्‍वरा रै गौरतै ई, और तेसरै पवित्र लोग हुणा लै औटाऐ औन्दै ई। आमारै बाब परमेश्‍वर और प्रभु यीशु मसीह री तौरफा कु तुमुलै बौड़ी दया और शान्ति थाका मिलदै लागी।

⁸पैहलै हाऊं तुमु सारेऊ लै यीशु मसीह रै ज़ौरिऐ आपणै परमेश्‍वरा रौ धन्यबाद कौराऊ कि तुमारै विश्वासा री बुशै सारी धौतरी रै लोगु मांझ़िऐ ई औन्दै लागी ऐन्दी।

⁹परमेश्‍वर ज़ासरी सेवा हाऊं आपणै पुरै ज़िवा कौरीऐ तेसरै छ़ोहरु री खुशी-खौबरी रै बारै दी कौराऊ, सेऊ ई मैरौ शाजत आ, की हाऊं आपणी प्राथना दी तुमु लगातार याद कौरदै थाकाऊ लागी,

¹⁰और रोज़ आपणी प्राथना दी औरज़ कौराऊ कि परमेश्‍वरा री मौरज़ी रै मुताबिक तुमु कु मिलदै आशु।

¹¹कैलैकि हाऊं तुमु कु मिलणै री आश कौराऊ। ताकी हाऊं तुमुलै विश्वासा दी मज़बूत कौरना लै केज़ी आत्मिक आशीष देऊ ज़ेथ कौरी तुमै पाक्कै हुआ।

¹²मैरौ मतलब इणौ आ कि हाऊं तुमु मांझ़िऐ दी हुइयौ, तुमु आइलै तेस विश्वासा रै ज़ौरिऐ ज़ो मुंदी, और तेस विश्वासा रै ज़ौरिऐ ज़ो तुमु दी आ, एकी दुजेऊ विश्वासा दी मज़बूत कौरदै रौआ।

¹³और ओ प्यारै साथी विश्वासिउओ हाऊं नाईं च़ाहांदौ कि तुमै एज़ी बुशा कु अणज़ाण रौऔ कि मुंइऐ घौड़ी-घौड़ीऐ तुमु काऐ आशणौ च़ाऔ, कि ज़िणौ मुंइऐ दुजी ज़ातीऊ मांझ़िऐ च़ेलै चाणै ई तिणी ई तुमु मांझ़िऐ भी चाणु, पर इबी झ़ांऊ एथदी रुकावट थाकी पौड़दै लागी।

¹⁴हाऊं युनानिऊ और दुजी बोली बोलणै वाल़ेऊ रौ, और बुद्धी वाल़ेऊ और ज़ासकै बुद्धी नाईं आसती तिऊं लोगु कै खुश-खौबरी शुणाउणै रौ करज़दार ऊ।

¹⁵और हाऊं तुमुलै भी ज़ो रोमा इलाकै दी रौआ ई, खुशी री खौबर शुणाउणा लै बिलकुल तैयार ऊ।

¹⁶कैलैकि हाऊं यीशु मसीह री खुश-खौबरी माथै पुरौ विश्वास कौराऊ, परमेश्‍वर आपणी शक्ति कौरीऐ तिऊं सौभीऊ बौच़ावा ज़ुण खुश-खौबरी माथै विश्वास कौरा ई, पैहलै यहुदी तेथ बासिऐ तिऊं ज़ुण यहुदी नाईं ई।

¹⁷कैलैकि तिऐं खुश-खौबरी दी परमेश्‍वरा री धार्मिकता विश्वासा कु और विश्वासा लै पौगड़ी हुआ आ ज़िणौ पवित्रशास्त्रा दी आ लिखौ औन्दौ, “विश्वासा कौरीऐ धौर्मी लोग ज़िउंदै रौआ ई।”

¹⁸परमेश्‍वरा रै रोश ता तिऊं लोगु री सारी बुराई और अधर्मा दी सौरगा कु पौगड़ौ हुआ, ज़ुण आपणै बुरै काम कौरणै रै ज़ौरिऐ लोगु परमेश्‍वरा री सौच़्च़ाई ज़ाणना लै रोका ई।

¹⁹एज़ी ताइंऐ कि परमेश्‍वरा रै बारै दी ज्ञान तिंउरै मौना दी पौगड़ौ आ कैलैकि परमेश्‍वरै आपु ऊ तिऊं माथै पौगड़ौ किऔ आ।

²⁰परमेश्‍वरा री सौदा री तागत और गुण नाईं देखिंदै। पर परमेश्‍वरा रै धौतरी चाणनै रै बौगता कु तिणीऐ इणौ देखा ई गौ कि इऐ कास ज़िणै ई। एथीलै तिऊं लोगु कै एज़ी बुशा लै केज़ौ बाहनौ नाईं आसतौ कि, “आमै परमेश्‍वर नाईं ज़ाणदै।”

²¹इदरा झ़ाऊं कि तिंउऐ परमेश्‍वर ज़ाणियौ भी तेसरौ इज़्ज़तमान और धन्यबाद नाईं कियौ ज़ेथरै सेऊ लायक आ, पर गलत बिच़ार कौरदै लागै, इदरा झ़ांऊ कि तिंउऐ तिणौ नाईं सुंच़ौ ज़िणौ तिऊं सुंच़णौ च़ांई थौ।

²²सै आपुलै बुद्धिमान बोलीयौ मुर्ख बौणी गौऐ।

²³और तिंउऐ सौदा ज़िउंदै रौउणै वाल़ै और महिमा वाल़ै परमेश्‍वरा री भौक्ती पोरु छ़ाड़ियौ, नाश हुणै वाल़ै आदमी, और च़ौड़कु और धौण, और लौअराणै वाल़ै जन्तु री मुर्तिऊ री भौक्ती कौरी।

²⁴एज़ी वज़ाह कु परमेश्‍वरै सै तिंउरै मौना री इच़्छ़ा रै मुताबिक गान्दै कामा लै छ़ाड़ी गौऐ, कि सै आपु मांझ़िऐ आपणै शरीरा रै गांदै कामा कौरीयौ आपणी बेइज़्ज़ती कौरा।

²⁵कैलैकि तिंउऐ परमेश्‍वरा री सौच़्च़ाई बौदल़ियौ झ़ूठ चाणी गोई, और धौतरी री आराधना और सेवा की, ना कि तेस धौतरी चाणनै वाल़ै री ज़ो सौदा बौड़ाई रै लायक आ। आमीन।

²⁶एथीलै परमेश्‍वरै सै बुरै बिच़ारा रै वशा दी छ़ाड़ी गौऐ। इदरा झ़ांऊ की तिउंरी छ़ेउड़ी भी ज़ाइज़ रिश्तै छ़ाड़ियौ नाज़ाइज़ रिश्तै छ़ाड़दै लागी।

²⁷तिणी ई मौरद भी छ़ेउड़ी आइलै ज़ाइज़ रिश्तै छ़ाड़ियौ आपु मांझ़िऐ गान्दै काम कौरीयौ बरबाद औन्दै लागै, और मौरदुऐ-मौरदु आइलै गान्दै काम कौरीयौ आपणी गौलती री ठीक सौज़ा पाई।

²⁸ज़ेबी तिंउऐ परमेश्‍वर नाईं पराणनौ च़ाऔ, ता परमेश्‍वरै भी सै तिउंरै निकामै मौना रै वशा दी छ़ाड़ी गौऐ कि सै गान्दै काम कौरा।

²⁹एथीलै सै सारै रौंगा रै अधर्मी, बुराई, और लोभ, और कूड़-कौपटा कु भौरुइऔ। और चिड़नौ, और लोऊ, और झ़ौगड़ै, और छल-कपट, और मीशा कु भौरुइऔ, और चुगली वाल़ै,

³⁰बदनाम कौरणै वाल़ै, परमेश्‍वरा कु नफरत कौरणै वाल़ै, दुजेऊ री इज़्ज़त नाईं कौरणै वाल़ै, घमण्डी, शेखी मारनै वाल़ै, बुरी-बुरी बुशेऊ मानणै वाल़ै, मां बाबा री हुकम नाईं मानणै वाल़ै,

³¹बिण औकली वाल़ै, विश्वासा दी धोखौ दैणै वाल़ै, आच़्छ़ै प्यारा रै बिणा काठै बौणी गौऐ ई।

³²सै ता परमेश्‍वरा री इऐं विधी ज़ाणाई, कि इणै-इणै काम कौरणै वाल़ै मौरणा री सौज़ा रै लायक ई, तैबै भी ना सिरफ आपु ई एज़ै काम कौरदै, पर इणै काम कौरणै वाल़ेऊ कु खुश भी हुआई।