Read Pahari, Mahasu रोमियो 11 Bible Online

रोमियो 11 - Pahari, Mahasu bible

रोमियो 11

¹तैबै हाऊं पुछ़ाऊ, का परमेश्‍वरै आपणी ज़ौण-पौरज़ा पोरु शोटी गोई? नाईं, केबी भी नाईं। हाऊं भी ता इस्राइली थौ, इब्राहिमा रै वंश और बिन्यामिना रै गोत्रा मांझ़िऐ कु।

²परमेश्‍वरै आपणी सै ज़ौण-पौरज़ा नाईं शोटी, ज़ो तिणीऐ पैहला कु थी च़ुनी ऐन्दी का तुमै नाईं ज़ाणदै, कि परमेश्‍वर पवित्रशास्त्रा दी एलियाह भविष्यवक्ता रै बारै दी का बोला सा कि, “सेऊ इस्राइली लोगु रै विरोधा दी परमेश्‍वरा कु औरज़ कौरा आ?”

³तिणीऐ बोलौ, “ओ प्रभु तिऊंऐ तैरै भविष्यवक्ता पोरु झ़ांगै ई और तेरी बेदी शेलियौ बरबाद की गोई आ। और हाऊं एखुली बौच़ी गो ऊ ज़ुण इबी झ़ाऊं तेरी माना ऊ, और सै मुं झ़ांगणौ च़ाहा ई।”

⁴पर परमेश्‍वरै एलिय्याह भविष्यवक्ता लै बोलौ, “कि मुंइऐ आपु काल़ै सात हज़ार आदमी छ़ाड़ी ऐरै ई ज़ुणिऐ झ़ुठै बाल देवा री भौक्ती नाईं की।”

⁵एथीलै एज़ी रीती कु एज़ै बौगतै भी, परमेश्‍वरा री बौड़ी दया री वज़ाह कु इऊं यहुदी लोगु मांझ़िया कु कुछ़ लोग परमेश्‍वरै आपणै सौच़्च़ै लोग हुणा लै च़ुनै ई।

⁶अगर परमेश्‍वरै सै बौड़ी दया कौरी च़ुनै ई, ता तैबै तिऊं कौरमा कौरी नाईं ज़ेथरी मांग नियम कौरा थी। अगर एऊ कौरमा री वज़ाह कु आ ता बौड़ी दया तैबै बौड़ी दया नाईं रौआ।

⁷एथीलै नतीज़ौ का हुऔ? इणौ कि इस्राइली ज़ास लोड़दै ई लागै औन्दै, सेऊ तिउंकै नाईं मिलौ। पर ज़ुण च़ुनै औन्दै ई तिउंकै मिलौ, और बाकी लोगु रै ज़िऊ काठै की ई गौऐ।

⁸ज़िणौ पवित्रशास्त्रा दी आ लिखौ औन्दौ कि, “परमेश्‍वरै आज़ा झ़ांऊ तिउंरी औकल बन्द आ कौरी ऐन्दी, और तिउंरी आखी ता आसती पर तिउंकै सौच़्च़ाई दिशदौ नाईं और कौन्थु कु ता शुणा लै पर सौमझ़दै नाईं।”

⁹और दाऊद राज़ौ बोला आ कि, “तिऊं री रोटी तिउंलै ज़ाल, और गौल़ै री फाई, और ठोकर, और सौज़ा रौ कारण च़ांई हुऔ।

¹⁰तिऊं री आखी दी न्यारौ च़ांई हुऔ ताकी सै नाईं देखा, और तू सौदा तिऊं री पीठ दु:ख-मुसीबता रै भारै कौरीऐ झुकाई छ़ाड़ै।”

¹¹ता हाऊं पुछ़ाऊ कि, “का इस्राइली लोग ठोकर खाइयौ सौदा लै लोटी गौऐ? नाईं, केबी भी नाईं। पर तिंउरै विश्वास ना कौरणै री वज़ाह कु, दुज़ी ज़ाती रै लोगु लै छ़ुटकारौ मिलौ, ताकी इस्राइला रै लोग ज़ौल़ा।

¹²एथीलै अगर इस्राइली लोगु रौ विश्वास नाईं कौरणौ दुनिया रै लोगु लै बौड़ी आशीष बौणौ आ ता ज़ेबी सारै इस्राइली लोग परमेश्‍वरा माथै विश्वास कौरालै तैबै दुज़ी ज़ाती रै लोग औज़ौ भी भौरी आशीष पा लै।”

¹³हाऊं तुमु दुजी ज़ातीऊ रै लोगु लै इऐं बूश बोलाऊ, ज़ैबै कि हाऊं दुजी ज़ाती रै लोगु लै प्रेरित ऊ, ता हाऊं आपणी सेवा कौरणै दी गौरब कौराऊ।

¹⁴ताकी केज़ी रीती कु हाऊं आपणै ज़ाती रै लोगु कु जलन कौराइयौ तिऊं मांझ़िऐ कु कुछ़ लोगु रौ छ़ुटकारौ कौराऊ।

¹⁵कैलैकि ज़ेबी इस्राइली लोगु रौ त्याग कौरणै री वज़ाह कु दुनिया रै लोगु लै परमेश्‍वरा आइलै मेल-ज़ोल हुऔ, ता का तिऊंरौ मसीह अपणाउणौ मौरै औन्दै मांझ़िऐ कु ज़िउंदै हुणै रै बराबर ना हुआ लौ?

¹⁶ज़ेबी भैंटा री पैहली पिठै री पीड़ी परमेश्‍वरा लै आ, ता सारौ मुछ़ौ औन्दौ पिठौ भी परमेश्‍वरा लै आ, और ज़ेबी ज़ौड़ परमेश्‍वरा लै आ, ता शाऊंटौ भी परमेश्‍वरा लै आ।

¹⁷इस्राइला रै लोग जैतून रै एक पेड़ा री डाल़ीऊ ज़िणी ई और स्याणै अब्राहम, इसहाक, याकूब, तेस पेड़ा री ज़ौड़ी ज़िणै ई। दुज़ी ज़ाती रै लोग ज़ांगल़ी डाल़ी ज़िणै ई, ज़ो कलम कौरीयौ तिऊं काटी ऐन्दी डाल़ीऊ री ज़ागाह दी तेस पेड़ा दी लाई, आबै सै डाल़ी तिऐं ज़ौड़ी री खुराका रै हक्कदार ई।

¹⁸ता तिऊं काटी ऐन्दी डाल़ीऊ कु आपुलै बौड़ियौ ना सौमझ़ौ, और अगर तू बौड़ियौ सौमझ़ा ई, ता याद छ़ाड़ै, कि ताऐं ज़ौड़ नाईं, पर ज़ौड़ ताऊं सौम्भाल़ा आ।

¹⁹तैबै तू आपणै ज़िवा दी इणौ ना सुंच़ै कि डाल़ी एथीलै काटी आ कि, “मुंदी कलम लाइआ।”

²⁰इयौ सौच़्च़ौ आ कि, सै ता बिण विश्वासा री वज़ाह कु छांगीयौ अलग किऐ ई, पर तू विश्वासा कौरीयौ बौणी रौआ ई। एथीलै घमण्डी ना हुऐ, पर डौर कर,

²¹कैलैकि ज़ैबै परमेश्‍वरै पेड़ा री आपणी डाल़ी माथै दया ना कौरी, ता ताऊं माथै भी दया ना कौरदौ।

²²एथीलै परमेश्‍वरा री दया और सखताई माथै ध्यान दै! ज़ो लोटी गौऐ, तिऊं माथै सखताई, पर ताऊं माथै दया, तू तेसरी दया दी बौणी रौऊ, नाईं ता, ताऊं भी काटाई।

²³अगर इस्राइला रै लोग भी विश्वासा कौरालै, ता तिऊं भी तेसदी तौंइऐ कलम कौरीयौ ज़ोड़ा आ, कैलैकि परमेश्‍वर तिऊं ज़ोड़ी सौका आ।

²⁴कैलैकि अगर तू तेस जैतूना कु, ज़ो शौकली कु ज़ांगल़ी आ काटी ऐरौ आ, और गुणा रै विरुद्ध आच़्छ़ै जैतूना दी ज़ोड़ी गौ, ता इऐ ज़ो स्वाभाविक डाल़ी आ, आपणै ई जैतूना दी ज़ोड़ीयौ फेटी ज़ौमा।

²⁵ओ प्यारै साथी विश्वासिउओ, किऐ इणौ ना च़ांई हुऔ, कि तुमै आपुलै बुद्धिमान सौमझ़ा लै। एथीलै हाऊं तुमु माथै एज़ै भेद पौगड़ै कौरणै च़ाहा ऊ, कि इस्राइल देशा रौ एक हिस्सौ तेबी झ़ाऊं अणज़ाण बौणी रौआ आ, ज़ेबी झ़ांऊ दुजी ज़ाती रै सारै लोग पुरी रीती कौरी मसीह माथै विश्वास ना कौरालै।

²⁶और एज़ी रीती कौरी सारै इस्राइला रै लोग छ़ुटकारौ पा आ। ज़िणौ पवित्रशास्त्रा दी आ लिखौ औन्दौ कि, “छ़ुड़ाउणै वाल़ौ यरुशलेमा कु आशा सा, और बुराई याकुबा रै वंशा कु दूर कौरा आ।

²⁷और तिऊं आइलै मैरौ इणौ ई वायदौ औलौ, ज़ैबै कि हाऊं तिऊं रै पाप पोरु बिसरा ऊ।”

²⁸यहुदी लोग परमेश्‍वरा रै दुश्मन ई कैलैकि सै खुशी री खौबरी माथै विश्वास नाईं कौरणै च़ांहदै, और एथरौ फाइदौ तुमुलै हुऔ। पर परमेश्‍वर तिऊं आइलै प्यार कौरा आ एथीलै तिणीऐ सै आपुलै च़ुनै कैलैकि एऊ सेज़ौ वायदौ आ ज़ो तिणीऐ तिउंरै स्याणेऊ आइलै कियौ थौ।

²⁹कैलैकि परमेश्‍वर आपणै वरदाना कु, और बुलाहटा कु केबी आपणौ ज़िऊ नाईं बौदलिंदौ।

³⁰कैलैकि ज़िणौ तुमुऐ पैहलै परमेश्‍वरा री हुकम नाईं मानी पर इबी तिऊं री हुकम ना मानणै कु तुमु माथै दया हुई।

³¹तिणी ई यहुदिउऐ भी ऐबै हुकम नाईं मानै कि तुमु माथै ज़ो दया हुआ सा, इणै कौरी तिऊं माथै भी दया हुआ।

³²परमेश्‍वर बोला आ कि सारै लोग हुकम ना मानदै और पापा दी फौसै औन्दै, कैलैकि परमेश्‍वर सारेऊ माथै दया देखाउणौ च़ाहा थौ।

³³आहा! परमेश्‍वरा री बौड़ी दया रौ धन और बुद्धी और ज्ञान केती गैहरौ आ! कोई भी तेसरै बिच़ारा रै बारै दी बोली नाईं सौकदौ! और कोई भी तेसरी बाट नाईं सौमझ़ी सौकदौ!

³⁴प्रभु रौ ज़िऊ कुण ज़ाणी सौका? या तेसरौ सलाहकार कुण बौणी सौका आ?

³⁵या कुणिऐ परमेश्‍वरा लै केबी कुछ़ दैऔ आ, ज़ो कि सै बौदल़ौ च़ाहा ई?

³⁶कैलैकि सारी च़िज़ै परमेश्‍वरा री तौरफा कु ई। तिणीऐ सब कुछ़ चाणौ आ तेसी लै आ सब कुछ़, तेसरी महिमा जुगै-जुगै औन्दी थाका लागी, आमीन।