Read Pahari, Mahasu रोमियो 12 Bible Online

रोमियो 12 - Pahari, Mahasu bible

रोमियो 12

¹एथीलै ओ प्यारै साथी विश्वासिउओ, हाऊं तुमुकै परमेश्‍वरा री दया याद कौराइयौ औरज़ कौराऊ, कि आपणी ज़िन्दगी ज़िउंदी, और पवित्र, और परमेश्‍वरा कै आच़्छ़ौ लागणै वाल़ौ बौल़ी च़ौड़ाऔ। एऊ आ सौच़्च़ौ तरिकौ परमेश्‍वरा री भौक्ती कौरणै रौ।

²और इऊं दुनिया रै लोगु ज़िणै नाईं बौणौ। पर परमेश्‍वर आपणै सुंच़णै रौ तरिकौ बौदुल़णै दैऔ। और तुमारौ ज़िवा रै बौदल़िणै री वज़ाह कु तुमारौ च़ाल-च़लण भी बौदल़ुऔ च़ांई, ज़ेथ कौरी तुमै परमेश्‍वरा री भौली, और आच़्छ़ी लागणै वाल़ी, और पाकी इच़्छ़ा पौरखियौ ज़ाणदै थाकौ लागी।

³कैलैकि हाऊं तेस बौड़ी दया री वज़ाह कु ज़ो मुकै मिली आ, तुमु मांझ़िऐ हर-एकी आइलै बोलाऊ, कि ज़िणौ सौमझ़णौ च़ांई, तेथकु बौड़ियौ कोई भी आपुलै ना सौमझ़ा पर ज़िणौ परमेश्‍वरै हर एकी लै विश्वास नतीज़ै रै मुताबिक बांटी ऐरौ आ, तिणी ई सौमझ़दारी आइलै आपु सौमझ़ा।

⁴कैलैकि ज़िणौ आमारै एकी शरीरा दी भौरी आंग ई, और सौभी आंगा रौ एक ई काम नाईं आसतौ,

⁵तिणी ई आमै ज़ो भौरी ई, मसीह दी एक शरीर हुइयौ आपु मांझ़िऐ एकी दुजै रै आंग ई।

⁶और ज़ेबी तिऐं बौड़ी दया रै ज़ौरिऐ ज़ो परमेश्‍वरै आमुकै आ देई ऐन्दी, आमुलै अलग-अलग वरदान मिलै ई। ता ज़ासकै भविष्यवाणी रौ वरदान आ मिलौ औन्दौ, तिणीऐ सेज़ै बोल बोलणै च़ांई ज़ेथ कौरी सेऊ विश्वास कौरा कि परमेश्‍वरै तेसकै बोलै ई।

⁷अगर ओरीऊ री सेवा कौरणै रौ दाण आ मिलौ औन्दौ, ता तिणी ई सेवा दी लागी रौआ। अगर कुण शिखाउणै वाल़ौ आ, ता तिणी ई शिखाउंदै थाका लागी।

⁸ज़ासकै हौसलै दैणै वाल़ौ दाण आ मिलौ औन्दौ, सेऊ ओरीऊ लै होसलै दैणै दी लागी थाका। दाण दैणै वाल़ौ ज़िवा खोलियौ दाण दिआ। ज़ो अगुवाई कौरा, सेऊ ज़िवा लाइयौ कौरा। ज़ो दया कौरा, सै खुशी कौरी कौरा।

⁹दुजेऊ कु प्यार कौरणै रौ नाटक नाईं कौरौ, बुराई कु नफरत कौरौ। ज़िवा कौरी आच़्छ़ै कामा दी लागी थाकौ।

¹⁰एकी दुजै आइलै आपणै टौबरा ज़िणौ प्यारा कौरौ। रोज़ इज़्ज़त कौरणै दी एकी दुजै कु बौड़दै थाकौ लागी।

¹¹मैहनत कौरौ और आल़सी नाईं बौणौ। पुरै ज़िवा कौरी प्रभु री सेवा कौरदै थाकौ लागी।

¹²ज़ो आश आमुकै आ तेथरी वज़ाह कु खुश रौऔ। हर मुसीबता दी सौबर छ़ाड़ौ। हर बौगतै प्राथना कौरदै थाकौ लागी।

¹³परमेश्‍वरा रै लोग ज़ो कुछ़ ज़ुरुरी आ, तेथदी तिऊं री मज़द कौरौ। मैहमानबाज़ी दी लागी थाकौ।

¹⁴आपणै सताउणै वाल़ेऊ लै आशीष दैऔ। आशीष दैऔ शाप नाईं दैऔ।

¹⁵खुशी मनाउणै वाल़ेऊ आइलै खुशी मनाऔ। और लेरणै वाल़ेऊ आइलै लेरौ।

¹⁶ज़िणी आपणी परवाह कौरा ई तिणी दुजेऊ री भी परवाह कौरौ। घमण्डी नाईं बौणौ। पर गरीब लोगु अपणाउणा लै सौदा त्यार रौऔ। आपणी नौज़री दी बुद्धिमानी नाईं हुऔ।

¹⁷बुराई रै बौदल़ै कासी आइलै बुराई नाईं कौरौ। ज़ो बुशै सौभी लोगु काऐ भौली ई, तिऊं री फिकर कौरदै थाकौ लागी।

¹⁸ज़िदरा झ़ांऊ हुई सौका, तुमै आपणै भरसक सौभी आदमी आइलै मेल मिलाप छ़ाड़ौ।

¹⁹ओ प्यारै भाईओ, आपणौ बौदल़ौ ना नियौं। पर परमेश्‍वर तुमारौ बौदल़ौ निणै दैऔ, कैलैकि पवित्रशास्त्रा दी प्रभु इणौ बोला आ, “बौदल़ौ निणौ मैरौ काम आ, हाऊं ऊ बौदल़ौ निआंऊ।”

²⁰इणौ भी आ लिखौ औन्दौ, “अगर तुमारौ दुश्मना भोखौ आ, ता तेसलै रोटी खिलाऔ। अगर चिशौ आ, ता तेसलै पाणी पिलाऔ। कैलैकि तुमारै इणै कौरणै कु तेसरौ मूंड शौरमी कौरी उटौ पौड़ा आ।”

²¹बुराई कौरीयौ ना ज़ितौ पर भौलाई कौरी बुराई भी ज़ितौ।