Read Pahari, Mahasu रोमियो 14 Bible Online

रोमियो 14 - Pahari, Mahasu bible

रोमियो 14

¹अगर कुण विश्वासा दी कमज़ोर आ, ता तेस आपणी संगती दी अपणाऔ। पर तेसरै बिच़ारा रै बारै दी बैहंसबाज़ी नाईं कौरौ।

²कैलैकि कुछ़ लोगु रौ विश्वास आ, कि सारौ कुछ़ खाणौ ठीक आ, पर ज़ो विश्वासा दी कमज़ोर आ, सेऊ साग पात ई खाआ।

³और मांस खाणै वाल़ौ मांस नाईं खाणै वाल़ौ बेकार ना ज़ाणा, और नाईं खाणै वाल़ौ मांस खाणै वाल़ै माथै आरोप ना ला। कैलैकि परमेश्‍वर तिऊं दुइया अपणावा आ।

⁴ता तुमुऐ कासी रै सेवका माथै आरोप नाईं च़ांई लाइणै। सेऊ च़ाऊ आच़्छ़ौ कौरा च़ाऊ बुरौ कौरा इऐ तेसरै मालिका री ज़िम्मेबारी आ। कैलैकि प्रभु तेसरै आच़्छ़ै कौरना लै मज़द कौरा सा।

⁵तिणी ई कोई ता एकी दिना कु दुजौ दीन बौड़ियौ माना आ, और कोई सारै दीन एकी ई ज़िणै माना सा। हर एक आपणै ज़िवा दी पाकौ कौरालौ कि ज़िणौ सेऊ सुंच़ा सा तिणी कौरा आ।

⁶ज़ो केज़ौ दीन माना सा, सेऊ प्रभु लै इज़्ज़त दैणा लै माना आ। ज़ुण कुछ़ भी खा सा, सेऊ प्रभु लै खाआ, कैलैकि सेऊ परमेश्‍वरा रौ धन्यबाद कौरा आ। और ज़ुण कुछ़ च़िज़ै नाईं खान्दौ, सेऊ प्रभु लै नाईं खान्दौ और सेऊ परमेश्‍वरा रौ धन्यबाद कौरा।

⁷कैलैकि आमु मांझ़िऐ कु ना ता कोई आपुलै ज़िउंदौ और ना कोई आपुलै मौरदौ।

⁸कैलैकि अगर आमै जीउंदै ई, ता प्रभु लै जीउंदै ई। और अगर मौरी ता प्रभु लै मौरी ई। च़ाऊ आमै ज़िवी या मौरी, आमै प्रभु रै ई।

⁹कैलैकि मसीह एथीलै मौरौ और ज़िउंदौ भी हुऔ कि सेऊ मौरै औन्दै और ज़िउंदेऊ रौ, दुइया रौ प्रभु हुआ।

¹⁰तू आपणै विश्वासी भाई माथै कैलै आरोप ला ई? या तू तैबै कैलै आपणै विश्वासी भाई बेकार ज़ाणाई? आमु सारेऊ रौ फैसलौ परमेश्‍वर ई कौरा आ।

¹¹कैलैकि पवित्रशास्त्रा दी आ लिखौ औन्दौ, “प्रभु बोला आ, मेरी ज़िन्दगी री शौपतै कि हर एक आदमी रै घुंडै मैरै सामनै झुकाई, और हर एक ज़ौणौ परमेश्‍वर माना ई।”

¹²ता तैबै आमु मांझ़िऐ कु हर एक परमेश्‍वरा कै आपणौ-आपणौ लेखौ दिआ।

¹³एथीलै एथ बासी आमु एकी दुजै माथै आरोप नाईं जांदौ लाइणौ पर तुमै इणी ई आपणै ज़िवा दी ठाणौ कि कोई दुजै विश्वासी लै परमेश्‍वरा माथै विश्वास ना कौरणै री वज़ाह ना बौणा।

¹⁴हाऊं ज़ाणाऊ, और प्रभु यीशु कु मुकै इणौ पाकौ हुऔ कि कोई भी खाणै री च़ीज़ आपकु आपुलै अशुद्ध नाईं। पर ज़ो तिंया च़ीज़ अशुद्ध सौमझ़ा आ, तेसलै अशुद्ध आ।

¹⁵अगर तुमारौ विश्वासी भाई तुमु री रोटी री वज़ाह कु निराश हुआ आ, ता तैबै तू प्यारा री रीती कु नाईं च़ालदौ। अगर तुमारै खाणै री वज़ाह कु तुमारौ विश्वासी भाई परमेश्‍वरा माथै विश्वास कौरणौ पोरु छ़ाड़ा ता तेस खाणौ नाईं खा। कैलैकि मसीह तेस विश्वासी भाई लै भी मौरौ आ।

¹⁶एथीलै ज़ो कुछ़ तुमै कौरा ई ता सेऊ आच़्छ़ौ आ पर ज़ुण एस बुरौ सौमझ़ा ता तुमै इणौ कौरणौ पोरु छ़ाड़ौ।

¹⁷कैलैकि परमेश्‍वरा रै राज़ा दी खाणौ पिणौ एती ज़ुरुरी नाईं। पर ज़ुरुरी बूश इऐ आ कि परमेश्‍वरा आइलै धौर्मी ज़िन्दगी बिताउणी, शान्ति और पवित्र आत्मा दी खुशी मौनाउणी।

¹⁸और ज़ुण-कुण इणी रीती कौरी मसीह री सेवा कौरा आ, परमेश्‍वर तेसकु खुश हुआ आ और लोग भी तेसरै बारै दी आच़्छ़ी बुशै लाइऔ तेसरी इज़्ज़त कौरा ई।

¹⁹एथीलै आमै तिऊं आच़्छ़ी बुशु री कोशिषा दी लागी रौआ ज़ेथ कौरी लोग आपु मांझ़िऐ शान्ति दी रौआ और एकी दुजेऊ विश्वासा दी मज़बूत कौरा।

²⁰तुमारै खाणै री वज़ाह कु परमेश्‍वरा रै कामा दी रुकावट ना हुआ। याद छ़ाड़ौ कि खाणै री सारी च़िज़ै शुद्ध ई, अगर कुण तुमारै खाणै री वज़ाह कु पापा दी पौड़ा आ ता इणौ गलत आ।

²¹भौलौ ता एऊ आ, कि तू ना मांस खाऐ और ना सूर पिऐ, ना कुछ़ इणौ कौरै, ज़ेथकु तैरौ भाई विश्वासा कु भौटकीऔ पापा दी पौड़ा।

²²तैरौ ज़ो विश्वास आ, तेस परमेश्‍वरा रै सामनै आपणै मौना दी छ़ाड़। भौलौ आ सेऊ, ज़ो तिंया बुशा दी, ज़ो सेऊ ठीक सौमझ़ा आ, आपुलै आरोपी नाईं बौणदौ

²³पर ज़ुण शक कौरा सा, और तैबै भी खा सा, ता सेऊ सौज़ा रौ हक्कदार हुआ आ, कैलैकि सेऊ विश्वासा कौरी नाईं खांदौ। और ज़ो कुछ़ विश्वासा कु नाईं आ, सेऊ पाप आ।