Read Pahari, Mahasu रोमियो 15 Bible Online

रोमियो 15 - Pahari, Mahasu bible

रोमियो 15

¹ज़ुरुरी आ कि आमै ज़ुण विश्वासा दी मज़बूत ई, कमज़ोर लोगु री मज़द कौरु, ना कि सिरफ आपणौ ज़िऊ खुश कौरी।

²आमु मांझ़िऐ कु हर एक आपणै साथी विश्वासी री भौलाई लै खुश कौरा, कि तेसरौ विश्वासा मज़बूत हुआ।

³कैलैकि मसीहै आपणौ ज़िऊ खुश नाईं कियौ, पर ज़िणौ पवित्रशास्त्रा दी आ लिखौ औन्दौ कि, “तेरी बेइज़्ज़ती कौरणै वाल़ेउऐ मेरी बेइज़्ज़ती की आ।”

⁴ज़ेती बुशै पैहलै कु पवित्रशास्त्रा दी लिखी ऐन्दी, सै आमुलै शिक्षा दैणा लै लिखी ई कि आमै सौबर और पवित्रशास्त्रा री शान्ति रै ज़ौरिऐ आश छ़ाड़ा।

⁵हाऊं परमेश्‍वरा कु इणी प्राथना कौराऊ कि सेऊ तुमुलै सौबर, हौसलौ दिया, ताकी तुमै यीशु मसीह रै मुताबिक आपु मांझ़िऐ एक मन छ़ाड़ौ।

⁶ज़िणै कौरी तुमै कौट्ठै मिलियौ एक आवाज़ा दी आमारै परमेश्‍वर, प्रभु यीशु मसीह रै बाब परमेश्‍वरा री बौड़ाई कौरौ।

⁷एथीलै, तुमै एकी दुजै अपणाऔ ज़िणौ मसीह ऐ तुमै अपणाऐ ई। इणौ एथीलै कौरौ ताकी लोग परमेश्‍वरा री बौड़ाई कौरा।

⁸हाऊं बोलाऊ कि मसीह यहुदिऊ रौ सेवक इणै देखाउणा लै बौणौ कि परमेश्‍वर आपणै वायदै पुरै कौरना लै सौच़्च़ौ आ, ज़ो तिउंरै स्याणेऊ आइलै थै कौरै औन्दै।

⁹और दुजी ज़ाती रै लोग भी दया री वज़ाह कु परमेश्‍वरा री बौड़ाई कौरा। ज़िणौ पवित्रशास्त्रा दी आ लिखौ औन्दौ कि, “हाऊं दुज़ी ज़ाती रै लोगु मांझ़िऐ तैरौ धन्यबाद कौराऊ, और तैरै नावां रौ भजन गा ऊ।”

¹⁰और तौंइऐ पवित्रशास्त्रा रै एकी ज़ागाह दी आ लिखौ औन्दौ, “ओ, दुज़ी ज़ाती रै सारै लोगुओ, तेसरी ज़ौण-पौरज़ा आइलै खुशी मनाऔ।”

¹¹और तौंइऐ पवित्रशास्त्रा रै एकी ज़ागाह दी आ लिखौ औन्दौ, “ओ, दुज़ी ज़ाती रै सारै लोगुओ, प्रभु री बौड़ाई कौरौ। ओ, राज़्य-राज़्य रै सारै लोगुओ। तेसरौ गुणगाण कौरौ।”

¹²और तैबै यशायाह भविष्यवक्ता पवित्रशास्त्रा दी लिखा सा कि, “यिशै रौ एक वंश पौगड़ौ हुणौ आ, ज़ो दुजी ज़ातीऊ रै लोगु माथै राज़ कौरा आ, तेस माथै दुजी ज़ाती आश छ़ाड़ाई।”

¹³हाऊं प्राथना कौराऊ कि परमेश्‍वर ज़ुण आशा रौ दाता सा, तुमु विश्वास कौरणै दी भौरी सारी खुशी और शान्ति कौरी भौरा, कि पवित्र आत्मा री शक्ति कौरी तुमारी आश बौड़दै थाका लागी।

¹⁴ओ मैरै साथी विश्वासिउओ, हाऊं आपु भी तुमारै बारै दी पाकौ ज़ाणाऊ, कि तुमै भी आपु ई भौलाई कौरी भौरीया और तुमै आच़्छ़ा कौरी ज़ाणा कि तुमुऐ का कौरणौ आ। और एकी दुजेऊ कै शिखाउंदै थाकौ लागी।

¹⁵तैबै मुंइऐ किऐ-किऐ याद कौराउणा लै तुमुलै ज़ो बौड़ी दया कौरीयौ लिखौ, एऊ तिऐं बौड़ी दया री वज़ाह कु हुऔ, ज़ो परमेश्‍वरै मुकै देई आ।

¹⁶ताकी हाऊं दुजी ज़ातीऊ लै यीशु मसीह रौ सेवक हुइयौ, परमेश्‍वरा री खुश-खौबरी री सेवा याजकु बाशीऐ कौरु। ज़िणै कौरी दुज़ी ज़ातीऊ रै लोग, पवित्र आत्मा रै ज़ौरिऐ पवित्र कौरीयौ परमेश्‍वरा लै च़ौड़ाइया ज़ेथ कौरी सेऊ खुश हुआ।

¹⁷एथीलै हाऊं यीशु मसीह री वज़ाह कु परमेश्‍वरा री सेवा माथै गौरव कौरी सौका ऊ।

¹⁸कैलैकि तिऊं बुशै छ़ाड़ियौ मुकै ओर केज़ी बुशु रै बारै दी बोलणै री हिम्मत नाईं, ज़ो मसीहै दुजी ज़ातीऊ री अधीनता लै वचन, और करम,

¹⁹और च़िन-च़मतकार और नोखै कामु री शक्ति कु, और पवित्र आत्मा री शक्ति कु मैरै ज़ौरिऐ किऐ। इदरा झ़ांऊ कि मुंइऐ यरुशलेमा कु नीईंयौ च़ारौ तौरफ इल्लुरिकुमा झ़ांऊ मसीह री खुशी-खौबरी रौ पुरौ-पुरौ परचार कियौ।

²⁰पर मैरै ज़िवा री च़ाहा इणी आ, कि यीशु मसीह रै नावां रौ परचार तिऐ शुणाऊ ज़िऐ इबी झ़ाऊं यीशु मसीह रै बारै दी कोइऐ ना शुणौ, ताकी इणौ ना च़ांई हुऔ, कि दुजै री पौई माथै घौर चाणु।

²¹पर ज़िणौ पवित्रशास्त्रा दी आ लिखौ औन्दौ, तिणी ई च़ांईं हुऔ, “ज़ासकै मसीह रै बारै दी नाईं आ बोलौ औन्दौ, सै ई देखा ई और ज़ुणिऐ नाईं शुणौ, सै ई सौमझ़ाई।”

²²एथीलै हाऊं तुमु काऐ आशणै लै घौड़ी-घौड़ी रुकौ।

²³पर एस इलाकै दी ज़ुणिऐ मसीह रै बारै दी इबी झ़ाऊं नाईं शुणौ थौ तिउंकै मुंइऐ खुशी-खौबरी शुणाउणै रौ काम पुरौ कौरी गौ आ। और आबै भौरी सालै पौखणै बासिऐ तुमु काऐ बेसबरी कौरी मिलणौ च़ाहा ऊ।

²⁴एथीलै ज़ेबी हाऊं स्पेन देशा लै डेउलौ ता तुमु बाटीऐ मिलियौ डियाऊ कैलैकि मुकै पुरी आश आ, कि तेस सफरा दी हाऊं तुमु कु मिला ऊ, और ज़ेबी तुमारी संगती कु मैरौ मन कुछ़ भौरीया लौ, ता हाऊं च़ाहा ऊ कि तुमै मैरै औगांऊ रै सफरा दी मेरी मज़द कौरा।

²⁵पर इबी ता मुइंऐ यरुशलेम शैहरा रै विश्वासिऊ री सेवा कौरना लै यरुशलेमा लै डेउणौ आ।

²⁶कैलैकि मकिदुनीया और अखाया परदेशा रै लोगु कै इणौ आच़्छ़ौ लागौ, कि यरुशलेमा रै विश्वासी लोग ज़ो गरीब ई कुछ़ पैसै कौठै कौरु।

²⁷तिंउऐ इणौ खुशी कौरी कियौ, पर सै यरुशलेमा रै लोगु रै करज़दार ई, कैलैकि अगर दुज़ी ज़ाती रै लोग तिऊं री आत्मिक आशीषा दी साथी हुआ लै, ता तिउंलै भी ठीक आ, कि गरीबु री दाण देइयौ मज़द कौरा।

²⁸एथीलै हाऊं एस काम पुरौ कौरीयौ यरुशलेमा लै डियाऊ और ज़ो दाण तिउंलै कौट्ठै आ कियौ औन्दौ तेस तिउंकै दियाऊ तेथ बासिऐ हाऊं तुमु काऐ आशीयौ स्पेन देशा लै डियाऊ।

²⁹और हाऊं ज़ाणाऊ, कि ज़ेबी हाऊं तुमु काऐ आशु लौ, ता तुमु आइलै मसीहा री किम्मती आशीष बांटाऊ।

³⁰और ओ प्यारै साथी विश्वासिउओ, हाऊं प्रभु यीशु मसीह रै नावां कु तुमु कु औरज़ कौराऊ कि तुमै मुं आइलै परमेश्‍वरा कु प्राथना कौरीयौ लगातार मिलियौ रौ, पवित्र आत्मा रै प्यारा रै ज़ौरिऐ।

³¹कि हाऊं यहुदिया इलाकै रै अविश्वासिऊ कु बौच़ियौ रौऊ, और मेरी सै सेवा ज़ो यरुशलेमा लै आ, विश्वासी लोगु कै ठीक लागा।

³²और हाऊं परमेश्‍वरा री इच़्छ़ा कु तुमु काऐ खुशी आइलै आशीयौ तुमु आइलै आराम कौरु।

³³हाऊं प्राथना कौराऊ कि शान्ति रौ परमेश्‍वर तुमु सौभी आइलै साथाई रौआ, आमीन।