Read Pahari, Mahasu रोमियो 16 Bible Online

रोमियो 16 - Pahari, Mahasu bible

रोमियो 16

¹हाऊं च़ाहा ऊ कि तुमै फीबे री इज़्ज़त कौरा, ज़ुण साथी विश्वासी बौइण और किंख्रिया शैहरा री कलिसिया री दासी आ।

²और तुमु विश्वासी लोगु लै च़ांई, कि प्रभु दी तिंयारौ स्वागत कौरा। और ज़ेज़ी-केज़ी बुशा दी तिंया कै तुमारी ज़रूरत औली, तिंयारी मज़द कौरौ। कैलैकि तिंआऐ भी भौरीऊ री मतलब की मेरी भी मज़द की आ।

³प्रिसका बौइण और भाई अक्विला ज़ो यीशु मसीह दी मुं आइलै काम कौरणै वाल़ै ई, तिउंलै मेरी ढाल आ।

⁴तिंउऐ मेरी ताइंऐ आपणी ज़िन्दगी खौतरै दी पाई थी और सिरफ हाऊं नाईं, पर दुजी ज़ातीऊ री सारी कलिसिया भी तिऊंरौ धन्यबाद कौरा ई।

⁵तिंया कलिसिया लै भी ढाल, ज़ो तिंउरै घौरा दी कौट्ठै हुआई। मैरै प्यारै इपैनितुसा लै ज़ुण मसीह लै आसिया परदेशा रौ पैहलौ विश्वासी आ, ढाल।

⁶मरियमा लै ज़ुणिऐ तुमुलै भौरी मैहनत की आ, ढाल।

⁷भाई अन्द्रुनीकुस और बौइण युनियासा लै ज़ुण मेरी ज़ाती रै ई, और मुं आइलै कैदा ई थै, तिउंलै भी ढाल। इऐ प्रेरिता दी मशहूर ई, और मुं कु पैहलै मसीह रै च़ेलै बौणै थै,।

⁸अम्पलियातुसा लै, ज़ुण प्रभु दी मैरौ प्यारौ आ, ढाल।

⁹उरबानुसा लै भी, ज़ुण मसीह दी मुं आइलै काम कौरणै वाल़ौ आ, और आमारै प्यारै इस्तखुसा लै भी ढाल।

¹⁰अपिल्लेसा लै भी ज़ासरौ विश्वास पौरखिणै बासिऐ भी मसीह दी लगातार बौड़दै रौ, ढाल। अरिस्तुबुलुसा रै टौबरा लै भी ढाल।

¹¹मैरै ज़ाती रै हेरोदियोन भाई लै ढाल। नरकिस्सुसा रै टौबरा लै ज़ुण मसीह माथै विश्वास कौरा ई, ढाल।

¹²त्रुफैना और त्रुफौसा बौइणा लै ज़ुणिऐ प्रभु दी भौरी मैहनत की आ, ढाल। प्यारी पिरसिसा लै ज़ुणिऐ प्रभु दी भौरी मैहनत की आ, ढाल।

¹³रूफुसा लै ज़ुण परमेश्‍वरै खास काम कौरना लै च़ुनौ आ, और तेसरी मां ज़ुण मेरी भी मां ज़िणी आ, दुइया लै ढाल।

¹⁴असुंक्रितुस और फिलगोन और हिर्मेस और पत्रुबास और हिर्मेस और तिऊं रै साथा रै विश्वासी भाईऊ लै भी, ढाल।

¹⁵फिलुलुगुस और युलिया और नेर्युस और तेसरी बौइण, और उलुम्पास और तिंउरै साथा रै विश्वासी लोगु लै ढाल।

¹⁶आपु मांझ़िऐ प्यारा कौरी गौल़ै मिलियौ ढाल कौरौ। तुमुलै मसीहा री सारी कलिसिया रै सारै विश्वासियु री तौरफा कु ढाल।

¹⁷आबै ओ साथी विश्वासी भाईओ, हाऊं तुमु कु औरज़ कौराऊ, तुमै तिऊं लोगु कु खौबरदार रौऔ, ज़ुण तुमु मांझ़िऐ फूट पा ई और ओरी शिक्षा रै ज़ौरिऐ तुमारी शिक्षा री खिलाफ तुमु विश्वासा दी कमज़ोर कौरा ई। तिऊंकु दूर रौ।

¹⁸कैलैकि इणै लोग आमारै प्रभु मसीह रै नाईं, पर सै आपणै फाइदै लै सेवा कौरा ई। इऐ लोग मिठी-मिठी बुशा कौरी सिधै-साधै लोगु बहकावा ई।

¹⁹तुमारी हुकम मानणै री खौबर सारै लोगु मांझ़िऐ फौइली गोई आ, एथीलै हाऊं तुमारै बारै दी खुशी मौनावाउ। पर हाऊं इणौ च़ाहा ऊ, कि तुमै भलाईलै बुद्धी वाल़ै, पर बुराई लै भोल़ै बौणी रौ।

²⁰शान्ति रौ परमेश्‍वर शैतान शिगरी तुमारै बांगणै थालै नाश कौरावा सा। आमारै प्रभु यीशु मसीह री बौड़ी दया तुमु माथै औन्दै थाका लागी।

²¹मुं आइलै काम कौरणै वाल़ौ तीमुथियुसा री, और मेरी ज़ाती रै लुकियुस और यासोन और सोसिपत्रुसा री तुमुलै ढाल।

²²मेरी चिट्ठी लिखणेवाल़ै तिरतियुसा रौ प्रभु दी तुमुलै ढाल।

²³गयुस ज़ुण मेरी और कलिसिया री मैहमानबाज़ी कौरणै वाल़ौ आ तेसरी तुमुलै, ढाल। इरास्तुस ज़ो इलाकै रौ भण्डारी आ, और भाई क्वारतुसा री, तुमुलै ढाल।

²⁴हाऊं प्राथना कौराऊ कि आमारै प्रभु यीशु मसीह री बौड़ी दया तुमु सारेऊ माथै औन्दै थाकाली लागी।

²⁵आबै तुमुकै मेरी खुशी री खौबर ज़ो यीशु मसीह रै बारै दी आ परचार कौरीयौ तुमु विश्वासा दी मज़बूत कौरी सौका आ, कैलैकि भौरी पैहलै ओउलै इऐ खुश-खौबरी तुमु कु च़ोरुई थाकी।

²⁶पर आबै पौगड़ै हुइयौ ज़ो पैहला कु आ तेस परमेश्‍वरा रै हुकमा कौरी भविष्यवक्तु री किताबी रै ज़ौरिऐ सारी ज़ातीऊ कै बोली गौ आ, कि सै विश्वासा कौरी हुकम मानणै वाल़ै हुआ।

²⁷तेसी री सिरफ एक ई औकलमंद परमेश्‍वरा री यीशु मसीह रै ज़ौरिऐ जुगै-जुगै महिमा औन्दै थाकाली लागी। आमीन।