Read Pahari, Mahasu रोमियो 3 Bible Online

रोमियो 3 - Pahari, Mahasu bible

रोमियो 3

¹तैबै तुमारै यहुदी हुणै रौ का फाइदौ और खतनै री का किम्मत आ?

²ओ, एथरी भौरी किम्मत आ। सारेऊ कु ज़ादौ ज़ुरुरी इणौ कि यहुदिऊ कै मुसा और भविष्यवक्ता रै लिखै औन्दै सारै वचन ई सांबै औन्दै।

³अगर कुछ़ यहुदी परमेश्‍वरा आइलै विश्वास वाल़ै नाईं ता का हुऔ? का तिउंरै विश्वास चोड़णै कु परमेश्‍वरा री सौच़्च़ाई नाश हुआ आ?

⁴नाईं! केबी भी नाईं, पर परमेश्‍वर सौदा सौच़्च़ौ बोला आ और हर एक आदमी झुठौ बौणा, ज़िणौ पवित्रशास्त्र परमेश्‍वरा रै बारै दी बोला आ, “कि ज़ेथ कौरी तू आपणी बुशा दी धौर्मी बौणा और फैसलै कौरदी बारै तू ज़िता लौ।”

⁵एथीलै अगर आमारै बुरै काम परमेश्‍वरा री धार्मिकता बौणा सा, ता आमै का बोली ई? का इणौ परमेश्‍वरा लै गलत आ कि सेऊ रोशीआ और आमुलै सौज़ा दिया? (एस ता हाऊं आदमी री रीती माथै बोलाऊ)

⁶नाईं, केबी भी नाईं। अगर परमेश्‍वर यहुदिऊ रौ फैसलै कौरना लै ठीक नाईं, ता सेऊ धौतरी रै लोगु रौ फैसलौ किणौ कौरा सा?

⁷पर परमेश्‍वर किणौ मैरौ एक पापी ज़िणी बदनामी और फैसलौ कौरी सौका आ अगर मेरी बेइमानी कु तेसरी सौच़्च़ाई च़ौमका और तेसलै औज़ौ भी महिमा दिया?

⁸तैबै कैलै ना बोलु लै, “च़ालौ! आमै बुरै काम कौरी ज़ेथकु भौलाई पौगड़ी हुआ?” ज़िणौ कुछ़ लोग आमारी बदनामी कौरीयौ आमु माथै आरोप लाआ ई, और कुछ़ लोग बोलाई, कि आमुकै इणी शिखावा ई। इणै लोग सौज़ा रै हक्कदार हुआई।

⁹तैबै आमै का बोलु लै? का आमै यहुदी दुजेऊ कु आच़्छ़ै ई? नाईं! केबी भी नाईं। कैलैकि आमुऐ यहुदिऊ और दुजी ज़ातीऊ माथै एऊ आरोप लाई ऐरौ आ कि सै सारै पापा रै वशा दी ई।

¹⁰ज़िणौ पवित्रशास्त्रा दी आ लिखौ औन्दौ, “परमेश्‍वरा री नौज़री दी कोई भी धौर्मी नाईं, एक भी नाईं।

¹¹कोई भी इणौ नाईं आसतौ ज़ुण इणौ सौमझ़ा कि ठीक का सा, कोई भी परमेश्‍वर लोड़णै वाल़ौ नाईं।

¹²सारै परमेश्‍वरा कु दूर डेई गौऐ ई, सारै परमेश्‍वरा लै बेकार बौणी गौऐ, कोई भौलाई कौरणै वाल़ौ नाईं, एक भी नाईं।

¹³तिउंरी बुशै खुली ऐन्दी कब्रा कु आशणै वाल़ै बासा ज़िणी ई तिउंरी ज़ीभ झ़ुठा कौरी भौरुई औन्दी तिंउरै ओठा कु सापा रौ बीश च़ुड़ा आ।

¹⁴और तिउंरी बोली श्राप और कौड़ुवै कौरी भौरुई औन्दी।

¹⁵सै दुजेऊ पिटणा लै और झ़ांगणा लै भौरी तेज़ ई।

¹⁶ज़िऐ भी सै डियाई तिऐ बुराई और दु:ख आणाई।

¹⁷तिउंकै इणौ पौतौ नाईं आ कि शान्ति दी किणै ज़िवा ई।

¹⁸तिंउदी परमेश्‍वरा रौ डौर आसतौ नाईं।”

¹⁹आमै ज़ाणी ई, कि नियम ज़ो कुछ़ बोला सा तिऊंकु बोला आ, ज़ो नियमा रै वशा दी, एथीलै कि हर एकी आदमी बाहनै चाणनै कु रोका, और धौतरी रै सारै लोग परमेश्‍वरा काऐ आरोपी ई।

²⁰कैलैकि नियम मानणै रै ज़ौरिऐ कोई आदमी परमेश्‍वरा काऐ धौर्मी नाईं बौणदौ, एथीलै मुसा रै नियमा आमुकै देखावा कि आमै पापी ई।

²¹पर आबै हालात इणै ई कि बिण नियमा रै परमेश्‍वरा री धार्मिकता पौगड़ी हुई गोई ज़ेथरै बारै दी पवित्रशास्त्र और भविष्यवक्ता बोला थै।

²²मतलब परमेश्‍वरा री इऐ धार्मिकता, ज़ो यीशु मसीह माथै विश्वास कौरणै दी सारै विश्वास कौरणै वाल़ेऊ लै आ। कैलैकि सारै लोग एक बराबर ई।

²³एथीलै कि सारेउऐ पाप कियौ और परमेश्‍वरा री महिमा कु दूर ई।

²⁴पर परमेश्‍वरा री बौड़ी दया कौरी तेस छ़ुटकारै रै ज़ौरिऐ ज़ो यीशु मसीह दी आ, सारै मुफ्तिऐ धौर्मी चाणा ई।

²⁵परमेश्‍वरै यीशु मसीह आमारी ताइंऐ बौल़ी च़ौड़णा लै भेज़ौ। यीशु मसीहीऐ आपणी ज़िन्दगी री बौल़ी एथीलै देई ताकी तेस माथै विश्वास कौरीयौ आमै परमेश्‍वरा काऐ आशी बौल़ु। और भौरी पैहलै परमेश्‍वरै इणै देखाउणा लै कियौ कि सेऊ सौबर छ़ाड़णै दी और पापीऊ माफ कौरना लै ठीक थौ। एथ कौरी इणौ भी पौतौ लागा की परमेश्‍वर ठीक आ ज़ेबी सेऊ तिऊं लोगु अपणावा ज़ुण यीशु माथै विश्वास कौरा ई।

²⁷ता घमण्ड कौरणौ किऐ रौऔ? तेसरी ता ज़ागाह नाईं, केज़ै काइदै-कानूना री वज़ाह का कु? का नियमा मानियौ? नाईं, यानी की यीशु माथै विश्वासा री वज़ाह कु।

²⁸एथीलै आमै एज़ै नतीज़ै माथै पहुंच़ी ई, कि आदमी बिण नियमा, विश्वासा रै ज़ौरिऐ धौर्मी बौणा सा।

²⁹का परमेश्‍वर सिरफ यहुदिऊ रौ ई आ? का दुजी ज़ातीऊ रौ नाईं आ? ओ, दुजी ज़ाती रौ भी आसती आ।

³⁰कैलैकि एक ई परमेश्‍वर आ, ज़ो खतना वाल़ेऊ विश्वासा दी और बिणा खतना वाल़ेऊ भी विश्वास रै ज़ौरिऐ धौर्मी चाणा सा।

³¹ता का आमै नियम विश्वासा रै ज़ौरिऐ बेकार चाणी सी? नाईं! केबी भी नाईं, पर नियमा री किम्मत सौमझ़ी ई।