Read Pahari, Mahasu रोमियो 4 Bible Online

रोमियो 4 - Pahari, Mahasu bible

रोमियो 4

¹आबै आमै यहुदी हुणै री वज़ाह कु आपणै बुज़ुर्ग अब्राहमा रै बारै दी का बोलु लै? कि केथरी वज़ाह कु सेऊ धौर्मी बौणौ?

²कैलैकि अगर अब्राहम आच़्छ़ै कामा कौरी धौर्मी बौणा थौ, तैबै तेसकै घमण्ड कौरणै री वज़ाह हुआ थी, पर सेऊ परमेश्‍वरा काऐ आपणै आच़्छ़ै कामा रौ घमण्ड नाईं कौरी सौकदौ।

³पवित्रशास्त्र का बोला सा? इणौ कि, “अब्राहमै परमेश्‍वरा माथै विश्वास किऔ, और सेऊ परमेश्‍वरा री नौज़री धौर्मी बौणौ।”

⁴कामा कौरणै वाल़ै री मज़दुरी दैणी दाण नाईं, पर हक्क सौमझ़िया सा।

⁵ज़ुण परमेश्‍वरा रै गुण पाइणा लै काम नाईं कौरदौ पर बुरै लोगु धौर्मी चाणनै वाल़ै माथै विश्वास कौरा आ तेसरौ विश्वास तेसलै धार्मिकता बौणा सा।

⁶ज़ास परमेश्‍वर बिणा कामै धौर्मी चाणा सा, तेसलै दाऊद भी भौलौ बोला सा।

⁷“भौलै ई सै, ज़ासरै बुरै काम परमेश्‍वरै माफ किऐ, और ज़ासरै पाप तिणीऐ पोरु बिसरी गौऐ।

⁸भौलै ई सै आदमी ज़ासरै पापा रौ लेखौ परमेश्‍वर नाईं नियां लौ।”

⁹ता एऊ भौलौ वचन, का खतना वाल़ेऊ लै ई, या बिण खतना वाल़ेऊ लै भी? आमै तिणौ थाकी बोलदै लागी ज़िणौ पवित्रशास्त्रा दी आ लिखौ औन्दौ, “अब्राहमै परमेश्‍वरा माथै विश्वास किऔ, और सेऊ परमेश्‍वरा री नौज़री धौर्मी बौणौ।”

¹⁰तैबै एऊ केबी हुऔ आ? खतनै री हालता दी या बिणा खतनै री हालता दी? खतनै री हालता दी नाईं पर बिणा खतनै री हालता दी।

¹¹बिण खतनै रै बौगतै अब्राहमा विश्वासा रै ज़ौरिऐ ज़ो धौर्मी बौणौ, तेस माथै छ़ाप ज़िणी खतनै रौ निशाण लाऔ। इणै कौरीऐ सेऊ तिऊं सारेऊ रौ भी बाब बौणौ, ज़ेथ कौरी तेसरौ भी विश्वास तेसलै धौर्मी गिणीया।

¹²और अब्राहम खतना किऐ औन्देऊ रौ भी बाब बौणौ, ज़ो ना सिरफ खतना माथै आश छ़ाड़ाई, पर आमारै बाब अब्राहमा रै तेस विश्वासा री लीया दी च़ाला ई, ज़ो तेसकै खतनै कु पैहलै हासिल थौ।

¹³परमेश्‍वरै अब्राहम और तेसरै वंशा कु वायदौ कियौ कि सै धौतरी रै हक्कदार हुणै ई एऊ एथलै नाईं हुऔ कि अब्राहमै नियमा रौ पालन कियौ आ पर एथीलै कि तिणीऐ विश्वास कियौ और सेऊ परमेश्‍वरा री नौज़री दी धौर्मी बौणौ।

¹⁴कैलैकि अगर नियम मानणै वाल़ै ई हक्कदार ई, ता विश्वास बेकार और वायदौ बेअसर साबित हुऐ।

¹⁵कैलैकि नियमा रौ नौतिज़ौ ता परमेश्‍वरा रौ रोश आ, पर ज़िऐ नियम नाईं तिऐ नियम चोड़णै रौ सवाल पैदौ नाईं हुन्दौ।

¹⁶एथीलै वायदौ विश्वासा रै ज़ौरिऐ हासिल हुआ। एऊ मुफ्तिऐ दैऔ औन्दौ दाण आ। अगर आमुकै अब्राहमा ज़िणौ विश्वास आ, तैबै च़ाऊ आमै मुसा रै नियमा ज़िणै ज़िउलै या नाईं ज़िउलै, तैबै भी आमै एस ज़ुरुर हासिल कौरी सौकी। कैलैकि अब्राहम तिऊं सारै विश्वास कौरणै वाल़ेऊ रौ बाब आ,

¹⁷ज़िणौ पवित्रशास्त्रा दी आ लिखौ औन्दौ, “कि मुंइऐ तू भौरी ज़ातीऊ रौ बाब चाणौ ई,” परमेश्‍वरा री नौज़रीऐ अब्राहम आमारौ बाब आ तिंउऐ परमेश्‍वरा माथै विश्वास किऔ आ ज़ुण मौरै औन्देऊ ज़िउंदौ कौरा सा, और ज़ेज़ी बुशै आसती ई नाईं, तिऊंरौ नाऊं इणौ निआं आ, कि मानौ कि सै आसती ई।

¹⁸तिणीऐ निराशा दी भी आश छ़ाड़ियौ विश्वास किऔ, एथीलै कि तेस वचना रै मुताबिक कि, “तैरौ वंश इणौ औलौ,” सेऊ भौरी ज़ातीऊ रौ बाब हुआ।

¹⁹सेऊ ज़ो शौ बौरशा रौ थौ, आपणै मौरै औन्दै ज़िणै शरीर और सारा रै गौरबा री मौरी औन्दी ज़िणी हालत ज़ाणीऔ भी विश्वासा दी कमज़ोर नाईं हुऔ।

²⁰और ना ता अविश्वासी हुइयौ परमेश्‍वरा रै वायदै माथै शक किऔ, पर विश्वासा दी पाकौ हुइयौ परमेश्‍वरा री महिमा की।

²¹और पाकौ ज़ाणौ, कि ज़ेज़ी बुशा रौ परमेश्‍वरै वायदौ कियौ आ, परमेश्‍वरा कै तिऐं पुरी कौरणै री भी शक्ति आ।

²²तेसरै विश्वासा री वज़ाह कु, एऊ तेसलै धार्मिकता गौणुऔ।

²³और एऊ वचन, “कि विश्वास तेसलै धार्मिकता गौणुई गौ, ना सिरफ तेसी लै थौ लिखौ औन्दौ,

²⁴बल्कि आमु कालै भी।” अगर आमै परमेश्‍वरा माथै विश्वास कौरुलै, ज़ुणिऐ आमारौ प्रभु यीशु मौरै औन्दै मांझिया कु ज़िउंदौ किऔ ता आमै भी विश्वासा री वज़ाह कु धार्मिक मानिणै ई।

²⁵यीशु आमारै पापा री ताइंऐ पाकड़ुऔ, और आमु धौर्मी चाणना लै परमेश्‍वरै सेऊ ज़िउंदौ भी किऔ।