Read Pahari, Mahasu रोमियो 5 Bible Online

रोमियो 5 - Pahari, Mahasu bible

रोमियो 5

¹एथीलै आमै विश्वासा कौरी धौर्मी बौणै, कैलैकि ज़ो प्रभु यीशु मसीहै आमु आइलै कियौ आ तेसरै ज़ौरिऐ आमारौ परमेश्‍वरा आइलै शान्ति वाल़ौ रिश्तौ आ।

²कैलैकि आमारै विश्वासा री वज़ाह कु तिऐं बौड़ी दया झ़ांऊ, ज़ासदी आमै बौणी ई, आमारी पौउंच़ भी हुई, और परमेश्‍वरा री महिमा और आशा दी खुशी मौनाई ई।

³सिरफ एऊ ऊ नाईं, पर आमै दुखा दी भी खुशी मौनाई, इणै ज़ाणियौ की दुखा कु सौबर,

⁴और सौबरा कु आच़्छ़ौ च़ाल-च़लण और आच़्छ़ै च़ाल-च़लणा कु भरोसौ पैदौ हुआ सा।

⁵और भरोसै कु शौरम नाईं औन्दी, कैलैकि पवित्र आत्मा ज़ो परमेश्‍वरै आमुकै दैऔ औन्दौ आ तेथरै ज़ौरिऐ परमेश्‍वरा रौ प्यार आमारै ज़िवा दी पाऔ औन्दौ आ।

⁶कैलैकि ज़ेबी आमै कमज़ोर ई थै, तैबै यीशु मसीह सेज़ै बौगता दी ज़ो लोग पापी थै तिउंरी ताईं मौरौ।

⁷पर शायद ई कुण धौर्मी आदमी लै मौरा, इणौ ता मुश्कल़ आ, पर हुई सौका आ कि कुण आपणी मौरज़ी कौरी भौलै आदमी लै मौरा।

⁸पर परमेश्‍वर आमु माथै आपणै प्यारा री भौलाई इणै कौरी पौगड़ी कौरा आ, कि ज़ेबी आमै पापी ई थै तेबी मसीह आमुलै मौरौ।

⁹एथीलै ज़ैबै कि आमै, आबै तेसरै लोऊ री वज़ाह कु धौर्मी बौणै, ता तेसरै ज़ौरिऐ परमेश्‍वरा रै रोशा कु कैलै नाईं बौच़िलै?

¹⁰कैलैकि ज़ेबी आमै परमेश्‍वरा रै दुश्मन हुणै री हालता दी थै ता तेसरै छ़ोहरु मौरणै रै ज़ौरिऐ आमारौ मेल-ज़ोल परमेश्‍वरा आइलै हुऔ तैबै मेल-ज़ोल हुइयौ तेसरी ज़िन्दगी री वज़ाह कु आमै छ़ुटकारौ कैलै ना पाइलै?

¹¹और सिरफ इणौ ई नाईं, पर आबै ता आमारै प्रभु यीशु मसीह रै ज़ौरिऐ परमेश्‍वरा आइलै आमारौ मेल-ज़ोल हुई गौ आ, एथीलै आमै परमेश्‍वरा दी खुश ई।

¹²एथीलै ज़िणौ एकी आदमी रै ज़ौरिऐ पाप धौतरी दी आशौ, आदम ई सेज़ौ पैहलौ आदमी आ ज़ो परमेश्‍वरै चाणौ आ और आदमा रै पाप कौरणै रै ज़ौरिऐ मौत आशी, और इणै कौरी मौत सारै लोगु माथै आशी, एथीलै कि सौभीऐ पाप कियौ।

¹³परमेश्‍वरै मुसा कै नियम दैणै कु पैहलै पाप धौतरी माथै थौ, पर ज़िऐ नियम नाईं, तिऐ पाप नाईं गिणीदौ।

¹⁴तैबै भी आदमा कु मुसा झ़ांऊ लोगुऐ पाप कियौ और सै सारै मौरी गौऐ ज़ुणिऐ आदमा ज़िणौ हुकम नाईं मानियौ पाप नाईं कियौ। आदम मसीह रौ निशाण आ ज़ुण आशणै वाल़ौ थौ।

¹⁵पर आदमा रै पाप और परमेश्‍वरा री बौड़ी दया दी भौरी फर्क आ, कैलैकि ज़ेबी एकी आदमी रै पापा री वज़ाह कु भौरी लोग मौरै, तिणी ई परमेश्‍वरा री बौड़ी दया और धार्मिकता रौ दाण ज़ो तिणीऐ आमुकै यीशु मसीह रै ज़ौरिऐ दैऔ आ भौरी सारै लोगु रै पाप माफ कौरना लै भौरी बौड़ौ दाण आ।

¹⁶परमेश्‍वरा रौ दैऔ औन्दौ दाण आदमा रै पापा ज़िणौ नाईं आ। कैलैकि एकी गुनाह कौरी मौउता री सौज़ा आशी, पर च़ाऊ आमुऐ भौरी पाप किऐ ई, तैबै भी परमेश्‍वरै एक ई दाण देइयौ आमारै पाप माफ किऐ और आमै धौर्मी चाणै।

¹⁷कैलैकि ज़ेबी एकी आदमी रै गुनाह री वज़ाह मौउतै सारै लोगु माथै राज़ कियौ, ता ज़ो लोग बौड़ी दया और धौर्मा रै ज़िणै वरदान भौरी का पा ई सै एक आदमी रै, मतलब कि यीशु मसीह रै ज़ौरिऐ पाकौ ई सौदा ज़िन्दगी दी राज़ कौरा ई।

¹⁸एथीलै ज़िणौ एक गुनाह सौभी लोगु लै मौउता री सौज़ा री वज़ाह बौणी, तिणौ ई एक धार्मिकता रौ काम भी सौभी लोगु लै सौदा री ज़िन्दगी दैणा लै धौर्मी चाणनै री वज़ाह बौणौ।

¹⁹कैलैकि ज़िणौ एकी आदमी रै हुकम ना मानणै कु भौरी लोग पापी बौणै, तिणी ई एक आदमी रै हुकम मानणै कु भौरी लोग धौर्मी बौणनै ई।

²⁰बासिऐ मुसा रै नियम देई ताकी लोग इणौ सौमझ़ी बौल़ा कि सै केती पापी ई। पर ज़िऐ पाप भौरी हुऔ, तिऐ बौड़ी दया तेसकु भी भौरी ज़ादौ हुऔ।

²¹कि ज़िणौ पापै मौत फैलाइऔ सारै लोगु माथै राज़ कियौ, तिणौ ई आमारै प्रभु यीशु मसीह रै ज़ौरिऐ परमेश्‍वरा री बौड़ी दया भी सौदा री ज़िन्दगी लै धौर्मी चाणीऔ राज़ कौरा आ।