Read Pahari, Mahasu रोमियो 6 Bible Online

रोमियो 6 - Pahari, Mahasu bible

रोमियो 6

¹परमेश्‍वर आपणी बौड़ी दया कौरीऐ आमारै पाप माफ कौरा आ। तैबै आमै का बोली? का आमै पाप कौरदै थाकी लागी, कि बौड़ी दया भौरी हुआ?

²नाईं, केबी भी नाईं। आमै ज़ेबी पापा कौरना लै मौरी गौऐ ता तैबै आमै एथ बासिऐ औगांऊ एथीई दी किणी ज़िन्दगी बिताई?

³आमै ज़ाणी की, आमु ज़ेतिऐ मसीह यीशु रौ बपतिस्मौ नियौं, ता तेसरी मौउता रौ बपतिस्मौ नियौं।

⁴एथीलै ज़ेबी आमुऐ बपतिस्मौ नियौं आ ता आमै यीशु मसीह आइलै मौरै और दौबी गौऐ। ताकी ज़िणौ मसीह बाबा परमेश्‍वरा री महिमा रै ज़ौरिऐ मौरै औन्दै मांझ़िआ कु ज़िउंदौ किऔ, तिणी ई आमु भी नौईं ज़िन्दगी री च़ाल जा च़ालणी।

⁵कैलैकि अगर आमै तेसरी मौउता री समानता दी तेस आइलै कौठै हुई गौऐ ता ज़ुरुरी तेसरै ज़िउंदै हुणै री समानता दी भी कौठै हुई ई।

⁶आमै ज़ाणी ई, कि आमारै पुराणै आदमी री ज़िन्दगी यीशु मसीह आइलै क्रुसा दी चड़ाई गोई, ताकी पापा वाल़ौ शरीर बेकार हुआ, ताकी आमै आशणै वाल़ै पापा री गुलामी दी ना रौई।

⁷ज़ेबी आमै यीशु मसीह आइलै मौरी गौऐ ता पापा रै वशा कु छ़ुटियौ धौर्मी बौणै।

⁸एथीलै अगर आमै मसीह आइलै मौरी गौऐ, ता आमारौ विश्वास एऊ आ कि तेस आइलै ज़िउंदै भी हुई ई।

⁹आमै इणौ ज़ाणी ई, कि मसीह मौरै औन्दै मांझ़िया कु ज़िउंदौ हुइयौ तौंइऐ नाईं मौरदौ, तैबै सेऊ दुज़ी बारै केबी ना मौरदौ।

¹⁰ज़ेबी मसीह ज़ुण मौरी गौ आ, ता पापा लै एकी बारै मौरी गौ आ। पर आबै ज़ो ज़िउंदौ सा, ता परमेश्‍वरा कालै ज़िउंदौ आ।

¹¹इणी ई तुमै भी आपु पापा लै ता मौरी गौऐ, पर परमेश्‍वरा कालै यीशु मसीह दी ज़िउंदै सौमझ़ौ।

¹²एथीलै पाप वाल़ी इच़्छ़ा तुमारै खातम हुणै वाल़ै शरीरा दी राज़ ना कौरा, कि तुमै तेसरी मौरज़ी रै अधीन रौऔ।

¹³और ना आपणै शरीरा रै आंग बुरै कामा रै हथियार हुणा लै पापा कै सांबौ, पर आपु मौरै औन्दै मांझ़िया कु ज़िउंदौ हुऔ औन्दौ ज़ाणियौ आपणी ज़िन्दगी परमेश्‍वरा कै सांबौ, और आपणै शरीरा रै आंग धार्मिकता रै हथियार हुणा लै परमेश्‍वरा कै सांबौ।

¹⁴तैबै तुमु लोगु माथै पापा रौ केज़ौ हक्क नाईं रौउंदौ, कैलैकि तुमै आबै नियमा रै वशा दी नाईं पर बौड़ी दया रै वशा दी ई।

¹⁵ता का हुऔ? का आमै एथीलै पाप कौरी लै, कि आमै नियमा रै अधीन नाईं यानी कि बौड़ी दया रै अधीना दी ई? नाईं, केबी भी नाईं।

¹⁶का तुमै नाईं ज़ाणदै, कि ज़ासरै हुकम मानणा लै तुमै आपु सेवका बाशीऐ सांबाई, तेसी रै सेवक हुऔ। इऐ गुलामी च़ाऊ पापा री, ज़ेथरौ अन्त मौत आ, च़ाऊ परमेश्‍वरा री, ज़ेथरौ अन्त भौलाई आ।

¹⁷पर परमेश्‍वरा रौ धन्यबाद च़ांई हुऔ, कि तुमै ज़ो पापा रै सेवक थै तैबै भी मौना कु तिऐं शिक्षा मानणै वाल़ै हुई गौऐ, ज़ासरै सांच़ै दी पाई गौऐ थै,

¹⁸और पापा कु छ़ुड़ाइयौ धौर्मा रै सेवक हुई गौऐ।

¹⁹हाऊं तुमारै शरीरा री कमज़ोरी री वज़ाह कु आदमी री रीती माथै बोलाऊ। ज़िणै तुमुऐ आपणै शरीरा रै आंग बुरै कामा लै अशुद्धता और गान्दै कामा लै दास ज़ाणियौ सांबौ थौ, तिणी ई ऐबै आपणै शरीरा रै आंग पवित्र हुणा लै धार्मिकता रै दास ज़ाणियौ सांबौ।

²⁰ज़ेबी तुमै पापा रै दास थै, ता धार्मिकता री तौरफा कु आज़ाद थै

²¹तुमुऐ बुरै काम किऐ ई और आबै तुमै तिऊं बुशा कु शौरमिंया ई, तिऊं सारै बुरै कामा कु तुमुलै का फाइदौ हुऔ आ? कैलैकि तिऊंरौ अन्त ता मौत आ।

²²पर आबै पापा कु आज़ाद हुइयौ और परमेश्‍वरा रै सेवक बौणीयौ तुमुकै फल़ मिलौ ज़ासकु पवित्रता मिला आ, और तेसरौ अन्त सौदा री ज़िन्दगी आ।

²³कैलैकि पापा री मज़दुरी ता मौत आ, पर परमेश्‍वरा रौ वरदान आमारै प्रभु मसीह यीशु दी सौदा री ज़िन्दगी आ।