Read Pahari, Mahasu रोमियो 7 Bible Online

रोमियो 7 - Pahari, Mahasu bible

रोमियो 7

¹ओ मैरै साथी विश्वासिउओ, का तुमै नाईं ज़ाणदै, और हाऊं नियम ज़ाणनै वाल़ेऊ लै बोलाऊ, कि ज़ेबी झ़ांऊ आदमी ज़िउंदौ रौआ सा, तेबी झ़ांऊ तेस माथै नियमा रौ हक्क रौआ सा?

²ब्याई औन्दी छ़ेउड़ी नियमा रै मुताबिक ज़ेबी झ़ांऊ तिंआरौ बोउटौ ज़िउंदौ आ तेबी झ़ांऊ तेस आइलै बानुई रौआ सा, पर अगर बोउटौ मौरी जाआ लौ, ता सै कानुनी रीती कौरी आपणै कु छ़ुटी गोई।

³एथीलै अगर तिंआरौ बोउटौ ज़िउंदौ आ सै डेआली कास दुजै आदमी लै, ता तिंआलै गान्दै कामा कौरणै वाल़ी बोलाई। पर अगर बोउटौ मौरी जाआ लौ, ता सै तेस नियमा कु छ़ुटी गोई आ, इदरा झ़ांऊ कि अगर सै कास दुजै लै डिआली तैबै सै गान्दै काम कौरणै वाल़ी नाईं औली।

⁴एथीलै ओ मैरै साथी विश्वासिउओ, तुमै भी मसीह री मौउता रै ज़ौरिऐ नियमा लै मौरै औन्दै बौणी गौऐ, कि तेस दुजै रै मतलब मसीह रै हुऔ। सेऊ मौरै औन्दै मांझ़िऐ कु ज़िउंदौ हुऔ, ताकी आमै परमेश्‍वरा लै फल़ आणी।

⁵कैलैकि ज़ेबी आमै आपणै पापी च़ाल-च़लणा रै वशा दी थै, ता पापा री इच़्छ़ा ज़ो नियमा रै ज़ौरिऐ आमु भितै ज़ौन्मी आ, मौउता रौ फल़ पैदौ कौरना लै आमारै शरीरा दी काम कौरा थी।

⁶पर ज़ासरै बानणा दी आमै पैहलै थै तेसलै मौरीयौ आबै नियमा कु इणै छ़ुटी गौऐ, कि आबै लिखै औन्दै नियमा रै पुराणै तरिकै कौरी नाईं, पर पवित्र आत्मा री मानियौ नौऐ तरिकै कौरी परमेश्‍वरा री सेवा कौरी ई।

⁷ता आमै का बोली? का नियम पाप आ? नाईं, केबी भी नाईं। पर मुंइऐ नियमा रै ज़ौरिऐ ई पाप ज़ाणौ आ, नियम अगर नाईं बोला थौ कि, “लाल़च़ नाईं कर,” ता हाऊं लाल़च़ नाईं ज़ाणा थौ।

⁸पर पापै मौकौ पाइयौ तेस हुकमा रै ज़ौरिऐ मुंदी सारै रौंगा रौ लाल़च़ पैदौ किऔ, कैलैकि बिण नियमै पाप मौरौ औन्दौ आ।

⁹एक इणौ भी बौगत थौ कि हाऊं नियमा रै बिणा ज़िन्दगी ज़िवा थौ, पर ज़ेबी मुंइऐ नियम ज़ाणै, ता मुं भितै पाप कौरणै री इच़्छ़ा पैदी हुई ज़ेथ कौरी हाऊं परमेश्‍वरा कु दूर हुऔ।

¹⁰और सेई हुकम ज़ो ज़िन्दगी लै थौ, सेऊ मुलै मौरणै री वज़ाह बौणौ।

¹¹कैलैकि पापै मोकौ पाइयौ तेस हुकमा रै ज़ौरिऐ मुलै धोखौ दैऔ, और तेसी रै ज़ौरिऐ हाऊं परमेश्‍वरा कु दूर कियौ।

¹²ता एथीलै नियम पवित्र ई, और हुकम भी पवित्र, धौर्मी और आच़्छ़ौ आ।

¹³ता का नियम ज़ो आच़्छ़ौ थौ, मुलै मौत बौणी? नाईं, केबी भी नाईं। तिऐं भौलाई रै ज़ौरिऐ पापै मुंदी मौत पैदी कौरी कि पाप पापा रै रुपा दी पौगड़ौ कौरीया, और हुकमा रै ज़ौरिऐ इयौ औज़ौ भी ज़ादौ पाप वाल़ौ बौणा।

¹⁴कैलैकि आमै ज़ाणी ई कि नियम ता आत्मिक ई, पर हाऊं आदमी ऊ और पापा रै वशा दी ऊ।

¹⁵मुकै आपणै बारै दी सौमझ़ी दी नाईं आशदौ, कि ज़ो ठीक आ तेस हाऊं कौरणौ च़ाहा ऊ, पर हाऊं नाईं कौरदौ तेथारै बौदल़ै ज़ेथकु मुकै नफरत आशा सा, तेसी कौराऊ।

¹⁶और अगर, ज़ो हाऊं नाईं च़ांहादौ तिणौ ई कौराऊ, ता हाऊं मानाऊं, कि नियम भौलौ आ।

¹⁷ता इणी हालता दी तेसरौ कौरणै वाल़ौ हाऊं नाईं, पर पाप आ, ज़ो मुंदी आ बौसौ औन्दौ।

¹⁸कैलैकि हाऊं ज़ाणाऊ, कि मुंदी यानी कि मैरै शरीरा दी कोई आच़्छ़ी च़ीज नाईं बौसदी। भौलै काम हाऊं कौरणै ता च़ाहा ऊ, पर हुई नाईं बौल़दै।

¹⁹कैलैकि ज़ास भौलै कामा कौरणै इच़्छ़ा हाऊं कौराऊ, तेस ता नाईं कौरदौ, पर ज़ास बुराई री इच़्छ़ा नाईं कौरदौ, तिऊं कौराऊ।

²⁰पर अगर हाऊं तिणौ ई कौराऊ, ज़ासरी इच़्छ़ा नाईं कौरदौ, ता तेसरौ कौरणै वाल़ौ हाऊं ना रौऔ, पर पाप ज़ो मुंदी बौसौ औन्दौ आ।

²¹इदै मुकै इणौ ज़ाणिया, कि ज़ेबी भौलाई कौरणै री इच़्छ़ा कौराऊ, ता मुकु बुराई हुआ आ।

²²कैलैकि हाऊं आपणै पुरै ज़िवा कु ता परमेश्‍वरा रै नियमा कु भौरी खुश रौआऊ।

²³पर मुकै आपणै शरीरा रै आंगा दी दुजै रौंगा रै नियम ई दिशदै लागै औन्दी, ज़ो मैरै ज़िवा रै बिच़ारा आइलै पिटिआ सा, और इऐ तागत मुं पापा रौ गुलाम चाणा आ, ज़ो इबी भी मैरै शरीरा रै आंगा भितै आ।

²⁴हाऊं किणौ बदकिस्मत आदमी ऊ! मुं एस मौरणै वाल़ै शरीरा कु कुण छ़ुड़ावा आ?

²⁵हाऊं परमेश्‍वरा रौ धन्यबाद कौराऊ ज़ुणिऐ हाऊं प्रभु यीशु मसीह रै ज़ौरिऐ बौच़ाओ ऊ। एथीलै हाऊं आपणै ज़िवा कु ता परमेश्‍वरा रै नियम, पर शरीरा कु पापा रै नियम माना ऊ।