Read Pahari, Mahasu 1 कुरि 10 Bible Online

1 कुरि 10 - Pahari, Mahasu bible

1 कुरि 10

¹ओ मैरै प्यारै साथी विश्वासिउओ, हाऊं तुमुकै याद कौराउणै च़ाहा ऊ कि आमारै नान-बुड़ु आइलै भौरी पैहलै शुनशान ज़ागाह दी का हुऔ थौ। परमेश्‍वरै एक बादल़ भेज़ीयौ तिउंरी अगुवाई की ज़ो तिऊं आइलै औगाड़िऐ हाण्डा थौ। और परमेश्‍वरै सै सारै लाल समुन्दरा दी टौपाइयौ सही-सलामत पारभिलै निऐं।

²मुसा पिछ़ु सारै हाण्डणै वाल़ेऊ रौ बादल़ और समुन्दरा दी बपतिस्मौ हुऔ।

³और सारेउऐ एकी ज़िणी रोटी खाई ज़ो परमेश्‍वरै सौरगा कु देई थी।

⁴और सारेउऐ सेऊ पाणी पियौ, ज़ो परमेश्‍वरै डोक्कै कु दैऔ थौ। तेस डोक्कै री बराबरी मसीह आइलै कौरी सौकी ज़ो तिऊं आइलै थौ और तिउंलै ज़िन्दगी देई।

⁵पर परमेश्‍वर तिऊं सारेऊ मांझ़िया कु भौरी लोगु कु खुश नाईं हुऔ, एथीलै सै शुनशान ज़ागाह दी मौरी गौऐ।

⁶इऐ बुशै आमुलै धौमकी बौणी, कि ज़िणौ तिंउऐ लाल़च़ किऔ, तिणौ आमै भी बुरी च़िज़ु माथै लाल़च़ ना कौरी।

⁷और ना तुमै मूर्ती पुज़णै वाल़ै बौणौ, ज़िणौ कि तिऊं मांझ़िऐ केती आदमी बौणी गोऐ थै, ज़िणौ पवित्रशास्त्र बोला आ, “लोग खान्दै-पिंदै बोशै, और उठीयौ ऐश-मस्ती कौरदै लागै।”

⁸और ना आमुऐ गान्दै काम च़ांई कौरणै, ज़िणौ तिऊं मांझ़िऐ केती आदमीऐ कियौ आ। और एकी दिना दी एक बिऐ चीन हज़ार मौरै।

⁹और ना आमुऐ प्रभु मसीह च़ांई परखुणौ, ज़िणौ तिऊं मांझ़िऐ केती आदमीऐ इणौ काम कियौ, और सै सापा कु टुकाइयौ झ़ांगै।

¹⁰और ना तुमै घुणमुणाऔ, ज़िणी रीती कौरीऐ सै घुणमुणाऐ और नाश कौरणै वाल़ै दूता रै ज़ौरिऐ नाश किऐ।

¹¹पर इऐ सारी बुशै ज़ो तिऊं आइलै हुई एक धौमकी ज़िणी ज़ाणियौ थी। और सै आमु च़ितलाउणा लै आ ज़ो धौतरी रै आखरी बौगता दी रौआ ई तिउंलै आ लिखी औन्दी।

¹²एथीलै कोई भी विश्वासी ज़ुण सुंच़ा सा, कि हाऊं विश्वासा दी पाक्कौ ऊ, ता सेऊ च़ोकसिऐ रौआ कि पापा दी ना च़ांई लोटौ।

¹³तुमै केज़ी इणी मुसीबता दी ना च़ांई पौड़ै, ज़ो लोगु कै सहन ना हुआ। पर परमेश्‍वर विश्वास वाल़ौ आ। सेऊ तुमुलै एती मुसीबत नाईं दैंदौ ज़ो तुमुकै सहन ना हुआ, और मुसीबता रै बौगतै तुमुलै बौच़णै री बाट भी दिआ ताकी तुमै तिंआ मुसीबता कु बौच़ा।

¹⁴एज़ी वज़ाह कु, ओ मैरै प्यारै साथी विश्वासिउओ, मूर्ती पुज़ा कु दूर रौएऊ।

¹⁵हाऊं औकली वाल़ौ ज़ाणियौ तुमुलै बोलाऊ, ज़ो हाऊं बोलाऊ तेस तुमै पौरखौ।

¹⁶सेऊ धन्यबादा रौ खोरु, ज़ेथ माथै आमै धन्यबाद कौरी। का आमै यीशु मसीह रै लोऊ आइलै शामिल नाईं औन्दै? सै रोटी ज़ो आमै चोड़ी सा, का तिंआ रोटी चोड़ियौ आमै यीशु मसीह रै शरीरा आइलै शामिल नाईं औन्दै?

¹⁷एथीलै कि एका ई रोटी आ ता आमै भी ज़ो भौरी का ई, एक शरीर ई, कैलैकि आमै सौभी तिऐं रोटी खाई ई।

¹⁸तिऊं इस्राइलिऊ रै बारै दी सुंच़ौ ज़ो बौल़ी दी च़ौड़ाई ऐन्दी च़िज़ै खा ई। का सै तिंआ बेदी आइलै शामिल नाईं आसतै?

¹⁹तैबै हाऊं का बोलाऊ? का इणौ कि मूर्ती काऐ च़ौड़ाऔ औन्दौ बौल़ीदान कुछ़ आ, या मूर्ती कुछ़ आ?

²⁰नाईं, पर इणौ कि लोग ज़ो बौल़ी कौरा ई। सै परमेश्‍वरा लै नाईं पर बुरी आत्मा लै बौल़ी कौरा ई और हाऊं नाईं च़ांहादौ कि तुमै भी बुरी आत्माऐं आइलै शामिल हुआ

²¹तुमै प्रभु रै खोरु और बुरी आत्मा रै खोरु दुइया मांझिया कु नाईं पी बौल़दै। तुमै प्रभु री मेज़ और बुरी आत्माऊं री मेज़ दुइया रै भागीदार नाईं हुई बौल़दै।

²²अगर तुमै इणौ कौरा ई ता ज़ुरुर आमै प्रभु कु रोश गौड़ाई। याद छ़ाड़ौ कि तुमै तेसकु ज़ादै शक्ति वाल़ै नाईं ई।

²³सारी च़िज़ै मुं कालै ठीक ता आसा, पर सारी फाइदा री नाईं, सारी च़िज़ै मुंलै ठीक ता आसा ई, पर सारी च़िज़ेऊ कौरी तरक्की नाईं औन्दी।

²⁴तुमु मांझ़िऐ हरेक आपणै भौलै रौ नाईं पर दुजेऊ री भौलाई रौ ध्यान छ़ाड़ौ।

²⁵ज़ो कुछ़ कसाइऊ काऐ बिका सा तेस खाऔ और मौना दी कुछ़ शक ना कौरौ?

²⁶तुमै तेस खाई सौका ई, कैलैकि पवित्रशास्त्र बोला कि, “धौतरी और ज़ो तेथदी आ सेऊ सारौ प्रभु रौ आ।”

²⁷अगर बिणा अविश्वासिऊ मांझ़िया कु तुमु कुण आपणै रै काऐ औटावा लौ और तुमै डेउणै च़ाहा लै, ता ज़ो कुछ़ सै तुमुलै खाणा लै दिया लै तेस खाऔ। और मौना दी कुछ़ शक्क नाईं कौरौ।

²⁸पर अगर कुण तुमुलै बोलालौ कि इऐ रोटी ता मूर्ती काऐ च़ौड़ाई ऐन्दौ आ, ता तिऐं रोटी ना खाएऊ। आपणै मौना री वज़ाह कु नाईं पर तेसरै मौना री वज़ाह कु ज़ुणिऐ तुमुलै इणौ बोलौ आ। ताकी मेरी आज़ादी कास दुजै रै मौना री वज़ाह कु कम ना हुआ।

³⁰अगर हाऊं धन्यबाद कौरीयौ रोटी खाआ ऊ ता ज़ेज़ी रोटी लै परमेश्‍वरा रौ धन्यबाद कौराऊ, तेथरी वज़ाह कु कासी कै मेरी बुराई कौरणै रौ हक्क नाईं आ।

³¹एथीलै तुमै च़ाऊ खाऔ, च़ाऊ पियौ, च़ाऊ ज़ो कुछ़ कौरा ई परमेश्‍वरा री महिमा लै कौरौ।

³²तुमै ना यहुदिऊ, और ना दुजी ज़ातीऊ लै, और ना परमेश्‍वरा री कलिसिया लै पाप कौरणै रौ कारण बौणौ।

³³ज़िणौ हाऊं भी सारी बुशेऊ दी सारेऊ खुश कौराऊ, और आपणौ नाईं पर भौरी सारेऊ रौ फाइदौ लोड़ाऊ कि सै छ़ुटकारौ पा।