Read Pahari, Mahasu 1 कुरि 12 Bible Online

1 कुरि 12 - Pahari, Mahasu bible

1 कुरि 12

¹ओ मैरै प्यारै साथी विश्वासिउओ, हाऊं नाईं च़ांहादौ कि तुमै पवित्र आत्मा रै वरदाना रै बारै अणज़ाण रौ।

²तुमै ज़ाणाई कि ज़ेबी तुमै मसीह दी नाईं थै, ता लाटी मुर्तिऊ रै पिछ़ै च़ाला थै, ज़िणौ सै च़लावा थै तिणौ च़ाला थै।

³एथीलै हाऊं च़ाहा ऊ कि तुमै सौमझ़ौ कि ज़ुण-कुण परमेश्‍वरा री आत्मा री अगुवाई कौरी बोला सा, सेऊ नाईं बोलदौ कि यीशु शापित आ। और ना कोई बिण पवित्र आत्मा कौरीऐ बोली बौल़दौ कि यीशु प्रभु आ।

⁴बरदान ता कई रौंगा रै ई, पर सै सारै एका आत्मा कु आशा ई।

⁵और सेवा भी कई रौंगा री आ, पर प्रभु एका सा।

⁶और शक्ति वाल़ै काम ता कई रौंगा रै ई, पर एकी परमेश्‍वरा रै ज़ौरिऐ सारै काम पुरै औआ ई।

⁷आमु सारेऊ कै आत्मिक वरदान ई दैऔ औन्दै ताकी आमै एकी दुजेऊ री मज़द कौरी सौका।

⁸कैलैकि एकी लै आत्मा रै ज़ौरिऐ बुद्धी री बुशै देई ऐन्दी, और दुजै लै सेज़ी ई आत्मा रै ज़ौरिऐ ज्ञाना री बुशै ई देई ऐन्दी।

⁹कासलै ता सेज़ी आत्मा कु मसीह दी विश्वास, और कासलै सेज़ी आत्मा कु च़ांगै कौरणै रौ वरदान आ दैऔ औन्दौ।

¹⁰तैबै कासलै च़मतकार कौरणै री शक्ति रौ वरदान, और कासलै भविष्यवाणी कौरणै रौ वरदान, और कासलै आत्माऊं री परख कौरणै रौ, और कासलै कई रौंगा री बोली बोलणै रौ, और कासलै बोली रौ मतलब सौमझ़ाउणा रौ वरदान ई दैऔ औन्दै।

¹¹पर इऐ सब शक्ति वाल़ै काम एक ई आत्मा कौरा सा। ज़ुण ज़ास ज़ास ठीक सौमझ़ा सा तिउंलै इऊं वरदान दिया सा।

¹²कैलैकि ज़िणौ आमारौ शरीर ता एक आ, और एथरै आंग ई भौरी। और तेस एक शरीरा रै सारै आंग भौरी हुइयौ भी सारै मिलियौ एका शरीर ई। तिणी ई मसीह भी आ।

¹³कैलैकि आमु सारेउऐ च़ाऊ केज़ौ यहुदी औलौ च़ाऊ दुजी ज़ाती रै, केज़ौ सेवक औलौ या केज़ौ आज़ाद औलौ, एक ई आत्मा कौरीऐ एक ई शरीर हुणा लै बपतिस्मौ निऔं, और आमु सौभी कै एक ई आत्मा सा मिली ऐन्दी।

¹⁴आमारै शरीरा दी एका आंग नाईं पर भौरी सारै आ।

¹⁵अगर बांगणै बोलालै, हाऊं हाथ नाईं, एथीलै हाऊं शरीरा रौ नाईं, ता का सेऊ तेसरै इणै बोलणै री वज़ाह कु शरीरा रौ आंग नाईं रौउंदौ?

¹⁶और अगर कौन्थु बोलालै, हाऊं आखी नाईं एथीलै शरीरा रौ नाईं, ता का सेऊ तेसरै इणै बोलणै री वज़ाह कु शरीरा रौ आंग नाईं रौउंदौ?

¹⁷अगर सारौ शरीर आखी ई औआ थी ता शुणा किणै कौरी थै? अगर सारौ शरीर कौन्थु ई औआ थौ ता शिंगा किणै कौरी थै?

¹⁸पर परमेश्‍वरै सौच़्च़ी ई आमारै शरीरा रै आंग आपणी मौरज़ी रै मुताबिक एकी-एकी कौरीऐ शरीरा दी छ़ाड़ै ई।

¹⁹अगर इऐ सारै एक ई आंग हुआ थै ता शरीर किऐ हुआ थौ?

²⁰पर आबै आंग ता भौरी सा, पर शरीर एक ई आ।

²¹आखी हाथा लै ना बोली बौल़दी, “मुकै तेरी ज़रूरत नाईं, और ना मूंड बांगणा लै बोली बौल़दौ कि, मुकै तेरी ज़रूरत नाईं।”

²²पर शरीरा रै सै आंग ज़ो दुजै कु कमज़ोर लागा ई, भौरौ ई ज़रूरी आ।

²³और शरीरा रै ज़ेज़ै आंगा लै आमै इज़्ज़ता रै लायक नाईं सौमझ़दै तिंउलै आमै ज़ादी इज़्ज़त देई आ। और आमै ज़ो आंग दुमी छ़ाड़ी आ सै तौंइऐ भी भौरी शोभलै बौणा ई,

²⁴तैबै भी आमारै शोभलै आंगा लै खास देखभाल़ा री ज़रूरत नाईं आसती। पर परमेश्‍वरै आमारौ शरीर इणौ चाणी गौ आ कि ज़ेज़ै आंगा लै इज़्ज़ता री कामी थी तेस आंगा लै तौंइऐ भी भौरी इज़्ज़त मिला।

²⁵ताकी शरीरा दी बिरोध ना पौड़ा, पर हरेक आंग एकी-दुजै री एकी ज़िणी देखभाल़ कौरा।

²⁶एथीलै अगर एक आंग दु:ख साहा आ, ता तेस आइलै शरीरा रै सारै आंग दु:ख साहा ई। और अगर एकी आंगा री बौड़ाई हुआ सा, ता तेस आइलै सारै आंग खुशी मौनावा ई।

²⁷इणै कौरीऐ तुमै सारै मिलियौ मसीहा रौ शरीर ई, और अलग-अलग तेथरै आंग आ।

²⁸मसीह रै एस शरीरा दी, परमेश्‍वरै कलिसिया दी अलग-अलग आदमी ई चुनै औन्दै। पैहलै प्रेरित, दुजै भविष्यवाणी कौरणै वाल़ै, और चिजै ई पौड़ाउणै वाल़ै, तैबै शक्ति रै काम कौरणै वाल़ै, तैबै च़ांगै कौरणै वाल़ै, और भौलाई कौरणै वाल़ै, और इन्तज़ाम कौरणै वाल़ै, और कई रौंगा री बोली बोलणै वाल़ै।

²⁹का सारै प्रेरित ई? का सारै भविष्यवाणी बोलणै वाल़ै ई? का सारै शिक्षा दैणै वाल़ै ई? का सारै शक्ति वाल़ै कामा कौरणै वाल़ै आ?

³⁰का सारेऊ लै च़ांगै कौरणै रौ वरदान आ मिलौ औन्दौ? का सारै कई रौंगा री बोली बोलाई?

³¹का सारै अनुवाद कौरा ई? तुमै बौड़ै बौड़ै वरदाना री इच़्छ़ा कौरौ। पर आबै हाऊं तुमुलै सारेऊ कु बौड़िया बाट बोलाऊ।