Read Pahari, Mahasu 1 कुरि 13 Bible Online

1 कुरि 13 - Pahari, Mahasu bible

1 कुरि 13

¹अगर हाऊं आदमी और सौरगदूतु री बोली बोलु और दुजेऊ आइलै प्यार ना छ़ाड़ु, ता हाऊं टण-पणादौ पितल़ और छ़ण-छ़णांदी झांझ ऊ।

²और अगर हाऊं भविष्यवाणी कौरी बोलु, और सारै भेद और सारै रौंगा रै ज्ञान सौमझ़ु, और इदरा झ़ांऊ कि मुकै पुरौ विश्वास आ कि हाऊं धारै टिरै एकी ज़ागाह कु दुजी ज़ागाह लै हटाऊ। पर दुजेऊ आइलै प्यार ना छ़ाड़ु, ता हाऊं कुछ़ भी नाईं आसतौ।

³अगर हाऊं आपणी सारी धन-ज़यदाद गरीबु लै खिलाऊ, या आपणौ शरीर ज़ाल़ना लै देऊ, और दुजेऊ आइलै प्यार ना छ़ाड़ु, ता मुकै कुछ़ भी फाइदौ नाईं।

⁴प्यार सौबरा वाल़ौ आ, और कृपा वाल़ौ आ प्यार ज़ौल़दौ नाईं, प्यार आपणी बौड़ाई नाईं कौरदौ, और शेखी नाईं मारदौ।

⁵प्यार दुजेऊ री बेइज़्ज़ती नाईं कौरदौ, सेऊ आपणौ भौलाई नाईं च़ांहादौ, झुंझलांदौ नाईं, बुरौ नाईं मानदौ।

⁶बुरै कामा कु खुश नाईं हुंदौ, पर सौच़्च़ाई कु खुश हुआ सा।

⁷सेऊ सारी बुशै सहन कौरा सा, सारी बुशु माथै विश्वास कौरा सा, सारी बुशु री आश छ़ाड़ा सा, सारी बुशु दी सौबर छ़ाड़ा सा।

⁸प्यार केबी टौल़दौ नाईं, भविष्यवाणी री तागत भी नाईं रौउंदी। ज़ो तागत दुजी बोली बोलणै वाल़ी ज़िभा दी आ सै ज़िभै एकी दिनै च़ुटुकच़ार थाका ई। ज्ञान औलौ ता, सेऊ भी पोरु मिटा सा।

⁹कैलैकि आमारौ ज्ञान अधुरौ सा, और आमारी भविष्यवाणी भी अधुरी ई।

¹⁰पर ज़ैबै सर्वशक्तिमान, सारै ज्ञान ज़ाणनै वाल़ौ आशा लौ, ज़ो ज़ो अधुरौ आ सेऊ सारौ खातम हुआ सा।

¹¹ज़ेबी हाऊं छ़ोटौ छ़ोहरु थौ, ता हाऊं छ़ोहरु बाशीऐ बोला थौ, छ़ोहरु रै ज़िणौ मन थौ, और छ़ोहरु री ज़िणी औकल थी। पर ज़ैबै स्याणौ हुई गौ आ ता छ़ोहरु वाल़ी बुशै जाणै देई गोई आ।

¹²आबै आमुकै शिशै दी धुंधलौ ज़ेई दिशा सा, पर सेज़ै बौगतै आमनै-सामनै देखीलै। एज़ै बौगतै मैरौ ज्ञान अधुरौ आ, पर तेबी मैरौ ज्ञान तिणी ई हुआ ज़िणौ तेबी मैरै बारै दी परमेश्‍वरा रौ आ।

¹³ता आबै आमुऐ इऐ चीन च़िज़ै च़ांई कौरणी: परमेश्‍वरा माथै विश्वास, तेसरै वायदै री आश, और दुजेऊ आइलै प्यार कौरणौ च़ांई। इऊं चिया च़िज़ा कु बौड़ियौ दुजेऊ आइलै प्यार कौरणौ आ।