Read Pahari, Mahasu 1 कुरि 14 Bible Online

1 कुरि 14 - Pahari, Mahasu bible

1 कुरि 14

¹एकी दुजेऊ आइलै प्यार कौरना लै पुरी-पुरी कोशिश कौरौ, और आत्मा रै वरदाना पाइणा लै बौड़ी इच़्छ़ा कौरौ, खास कौरीऐ भविष्यवाणी रै वरदाना री।

²कैलैकि ज़ो दुजी बोली दी बुशै ला सेऊ आदमी आइलै नाईं बल्कि परमेश्‍वरा आइलै बुशै ला सा। एथीलै कि तेसरी बुशै कोइयौ ना सौमझ़दौ, कैलैकि सेऊ भेदा री बुशै पवित्र आत्मा री शक्ति कौरी बोला सा।

³पर ज़ो भविष्यवाणी कौरा सा, सेऊ विश्वासिऊ री तरक्की और हिम्मत और सुख शान्ति री बुशै बोला सा।

⁴ज़ो दुजी बोली दी बुशै बोला सा, सेऊ आपणै विश्वासा ई तरक्की कौरा सा। पर ज़ो भविष्यवाणी कौरा सा, सै कलिसिया रै विश्वासिऊ रै विश्वासा री तरक्की कौरा सा।

⁵हाऊं च़ाहा ऊ कि तुमै सारै दुजी बोली दी बुशै लाऔ, पर एथकु ज़ादौ इणौ च़ाहा ऊ कि तुमै भविष्यवाणी कौरौ, कैलैकि अगर दुजी बोली बोलणै वाल़ौ कलिसिया री तरक्की कौरना लै अनुवाद ना कौरालौ ता भविष्यवाणी कौरणै वाल़ौ तेसकु बौड़ी च़ौड़ियौ आ।

⁶एथीलै ओ मैरै प्यारै साथी विश्वासिउओ, अगर हाऊं तुमु काऐ आशीयौ दुजी बोली दी बुशै लाऊ ता मुकु तुमुलै का फाइदौ हुआ सा? एथकु तुमारौ फाइदौ तैबै हुआ ज़ैबै हाऊं प्याशै री, ज्ञाना री, या भविष्यवाणी या शिक्षा री बुशै तुमु आइलै बोलु लौ।

⁷इणी ई अगर साज़-बाज़ ज़ेथकु आवाज़ निकल़ा सा, ज़िणी बांइशी या बीन, अगर तिउंरी आवाज़ा दी फरक नाईं औलौ ता, इणौ किणै कौरीऐ पौतौ लागा कि केज़ौ साज़ आ बाज़णै लाऔ औन्दौ?

⁸और लौड़ाई दी, अगर कौरनाल़ री आवाज़ साफ ना औली, ता फौज़ी लौड़ाई कौरना लै तैयार नाईं औन्दै?

⁹इणी ई अगर दुजी बोली बोलदी बारै तुमारै बोल साफ-साफ नाईं औलै, ता कुण सौमझ़ा कि का ई बोलदै लागै औन्दै? सेऊ ता इणौ हुऔ ज़िणौ बागुरा आइलै बुशै लाआ ई।

¹⁰धौतरी माथै भौरी अलग-अलग बोली ई तिऊं हरेक बोलीऊ रौ मतलब आ।

¹¹पर अगर हाऊं केज़ी बोली रौ मतलब ना सौमझ़ु, ता बोलणै वाल़ै री नौज़रीऐ परदेशी ऊ, और बोलणै वाल़ौ मेरी नौज़री दी परदेशी आ।

¹²एथीलै तुमै भी ज़ुण आत्मा रै वरदाना पाइणा लै उताउल़ै ई, ता इणी कोशिश कौरौ तुमारै वरदाना री तरक्की कु कलिसिया री तरक्की भी हुआ।

¹³एज़ै कारणै ज़ो दुजी बोली बोलालौ, सेऊ प्राथना कौरा कि साथाई तेथारौ मतलब भी सौमझ़ाई बौल़ा

¹⁴एथीलै अगर हाऊं दुजी बोली दी प्राथना कौरुलौ, ता मेरी आत्मा प्राथना कौरा सा। पर मेरी बुद्धी काम नाईं कौरदी कैलैकि हाऊं तिऐं नाईं सौमझ़दौ।

¹⁵तैबै का च़ांई कौरणौ? इणौ ना, कि हाऊं आत्मा और बुद्धी कौरी प्राथना कौरु, और आत्मा और बुद्धी कौरीऐ भजन भी गा ऊ।

¹⁶नाईं ता अगर तू आत्मा कौरी परमेश्‍वरा री स्तुति कौरालौ, ता बिणा ज्ञान वाल़ौ तैरै स्तुति कौरणै माथै आमीन किणै कौरीऐ बोला? कैलैकि सेऊ ता नाईं ज़ाणदौ कि तू का ई बोलदै लागौ औन्दौ?

¹⁷तू ता आपकु आच़्छ़ै कौरी परमेश्‍वरा रौ धन्यबाद कौरा ई, पर दुजेऊ री विश्वासा दी तरक्की नाईं हुंदी।

¹⁸हाऊं आपणै परमेश्‍वरा रौ धन्यबाद कौराऊ, कि हाऊं तुमु सारेऊ कु ज़ादौ दुजी बोली दी बोलाऊ।

¹⁹पर कलिसिया दी दुजी बोली दी दस हज़ार बुशै बोलणै कु एऊ मुलै तौंइऐ भी आच़्छ़ौ ज़ाणिया आ, कि दुजै कु शिखाउणा लै बुद्धी कु पांज़ा बुशै बोलु।

²⁰ओ मैरै प्यारै साथी विश्वासिउओ, तुमै औकली कु छ़ोहरु ना बौणौ, बुराई दी ता छ़ोहरु रौ, पर सौमझ़ी दी स्याणै बौणौ।

²¹पवित्रशास्त्रा दी प्रभु बोला आ, “हाऊं पराऐ और अणज़ाण लोगु रै ज़ौरिऐ आपणै लोगु आइलै बुशै लाआ ऊ। तैबै भी सै मेरी नाईं शुणदै।”

²²एथीलै दुजी बोली दी बुशै लाइणी विश्वासिऊ लै नाईं, पर अविश्वासिऊ लै निशाणी ई। और भविष्यवाणी कौरणी अविश्वासिऊ लै नाईं पर विश्वासिऊ लै निशाणी आ।

²³एथीलै अगर कलिसिया एकी ज़ागै कौठी औली, सै सारै दुजी बोली बोला, और ज़ुण इऐं बोली नाईं सौमझ़दै या ज़ुण विश्वास नाईं कौरदै सै भितरै आशालै ता सै पाक्कौ इणौ सुंच़ाई कि तुमै पागल ई।

²⁴पर अगर सब भविष्यवाणी कौरदै लागा लै, और तिऐ सै आशालै ज़ुण विश्वास नाईं कौरदै या इऐं बोली ना सौमझ़दै, ता सै तिउंरी बोली शुणियौ आपुलै पापी सौमझ़ाई और आपणै मन पौरखा ई।

²⁵और तिंउरै मौना दी भेद पौगड़ौ हुआई और तैबै सेऊ मुंआ री हांगिऐ धौनी पौड़ीयौ परमेश्‍वरा कु ढाल कौरा, और आच़्छ़ा कौरीऐ माना ई कि परमेश्‍वर तुमु मांझ़िऐ आ।

²⁶ओ मैरै प्यारै साथी विश्वासिउओ शुणौ, का च़ांई कौरणौ? ज़ैबै तुमै आराधना कौरना लै कौठै हुआई, ता केज़ौ भजन शुणावा, केज़ौ शिक्षा दिया आ, केज़ौ प्रभु रै ज़ौरिऐ पौगड़ी की ऐन्दी बुशै बोला आ, केज़ै दुजी बोली बोलाई, केज़ै बोलाई तेथरौ मतलब। इयौ सब कुछ़ विश्वासिऊ री मज़द और तरक्की लै हुणौ च़ांई।

²⁷अगर दुजी बोली दी बुशै लाइणी औली ता ज़ादै कु ज़ादै दुई या चीन आदमी एकी बौगता दी बोला और एक आदमी तिऊं बोलीऊ रौ मतलब सौमझ़ावा लै ज़ुरुरी औणौ च़ांई।

²⁸पर अगर मतलब सौमझ़ाउणा वाल़ौ ना औलौ ता, दुजी बोली बोलणै वाल़ौ कलिसिया दी च़ुटुकच़ार थाका लौ, और आपणै मौना कु और परमेश्‍वरा आइलै बुशै ला लौ।

²⁹भविष्यवाणी बोलणै वाल़ै मांझ़िया कु दुई या चीन बोलालै, और बाकी लोग तिंउरै वचन पौरखा लै।

³⁰पर अगर दुजै माथै, ज़ुण बोशौ औन्दौ आ, कुछ़ परमेश्‍वरा री तौरफा कु पौगड़ौ औआ ता पैहलौ भविष्यवाणी बोलणै वाल़ौ च़ुटुकच़ार च़ांई थाकणौ।

³¹कैलैकि तुमै सारै एकी-एकी कौरीयौ भविष्यवाणी कौरी बौल़ा ई, ताकी सारै शिखा लै, और सारै शान्ति पा लै।

³²और भविष्यवाणी बोलणै वाल़ै री आत्मा आपणै वशा दी हुआ

³³कैलैकि परमेश्‍वर गड़बड़ी रौ नाईं पर शान्ति मेल-मिलापा रौ परमेश्‍वर आ। ज़िणौ पवित्र लोगु री सारी कलिसिया दी आ।

³⁴छ़ेउड़ी कलिसिया री खुम्बल़ी दी च़ुटुकच़ार थाकाली, कैलैकि तिउंलै बुशै लाइणा रौ हुकम नाईं पर अधीन रौइणा रौ हुकम सा, ज़िणौ मुसा रै नियमा दी आ लिखौ औन्दौ।

³⁵अगर सै कुछ़ शिखणौ च़ाहा ली, ता घौरा कै आपणै बोउटै कु पुछ़ा, कैलैकि छ़ेउड़ी री कलिसिया दी बुशै लाइणी ठीक नाईं आ।

³⁶का परमेश्‍वरा रौ वचन तुमु कु निकल़ौ आ? या सिरफ तुमु माथै पौगड़ौ हुऔ आ?

³⁷अगर कुण आदमी आपुलै भविष्यवाणी कौरणै वाल़ौ या आत्मिक आदमी सौमझ़ा लौ। ता सेऊ इणौ ज़ाणालौ कि ज़ो बुशै हाऊं तुमुलै लिखाऊ, सै प्रभु री आज्ञाऐं आ।

³⁸पर अगर कुण इऐं सौच़्च़ाई नाईं माना लौ, ता सेऊ भी ना मानिदौं।

³⁹एथीलै ओ मैरै प्यारै साथी विश्वासिउओ, भविष्यवाणी कौरणै री इच़्छ़ा कौरौ, और दुजी बोली बोलणा लै मौना नाईं कौरौ।

⁴⁰आराधना कौरदी बारै सारी बुशै ठीक ढौंगा कौरीऐ च़ांई कौरणी।